၂၀၂၃ သီးနှံပြက္ခဒိန်နှစ်တွင် ကရင်ပြည်နယ်အတွင်းစိုက်ပျိုးသော ပဲမျိုးစုံများမှပဲပုပ်နှင့်ပဲလွန်းဖြူများ ဘားအံခရိုင် ကော့လုံကျွန်း၊ မိဇံကျွန်းများတွင်စပေါ်၍ ဈေးကွက်အတွင်း ဝင်ရောက်လျက်ရှိကြောင်း သိရသည်။
ပဲပုပ်ဈေးမှာ ယခင်နှစ်ရာသီပိတ် ဈေးနှုန်းမှာ တစ်ပိဿာ ၃၀၀၀/ကျပ်ဖြင့် ဈေးပိတ်ခဲ့ပြီး ယခုနှစ်အဖွင့်ဈေးနှုန်းမှာ တစ်ပိဿာ ၃၂၀၀/ကျပ်၊ ပဲလွန်းဖြူဈေးမှာ ယခင်နှစ်အပိတ်ဈေး တစ်ပိဿာ ၂၆၀၀/ကျပ်၊ ယခုနှစ် အဖွင့်ဈေး တစ်ပိဿာ ၃၀၀၀/ကျပ် ဖြစ်ကြောင်းသိရသည်။ ဈေးနှုန်း/ဈေးကွက်အလား နှင့် ပတ်သက်၍ “ ပဲလွန်းဖြူက ရိတ်သိမ်းတဲ့အခါ အတောင့်လိုက်ချွေရလို့ ကရိကထများတယ်၊ ပဲပုပ်ကတော့ စိုက်တာရော၊ရိတ်တာရောလွယ်တဲ့အပြင် ပုံမှန်ဈေးကွက် ရှိတဲ့အတွက် တောင်သူတွက်ချေကိုက်ပြီး အစိုက်များတယ်၊ ဝယ်လိုအားအခြေအနေကြောင့်လည်း ပဲလွန်းဖြူဈေးကောင်းရနိုင်တယ်လို့ခန့်မှန်းတယ်” ဟု ဘားအံမြို့ရှိ ရွှေကံထူးပဲပွဲရုံကပိုင်ရှင် ဦးစောဝင်းနိုင်က သုံးသပ် ပြောကြားသည်။
ကရင်ပြည်နယ်တွင် ၂၀၂၃-၂၀၂၄ ဘဏ္ဍာနှစ်အတွင်း ပဲပုပ်စိုက်ဧက ၈၅၆၈ ဧကဖြစ်ပြီး ပဲလွန်း စိုက်ဧက ၁၁၇၃၅ ဧက ဖြစ်ကြောင်း စိုက်ပျိုးရေးဦးစီးဌာန၏ စာရင်းများအရ သိရသည်။
DOCA(ကရင်)