ပြည်တွင်းကုန်သွယ်မှုသတင်း

         စစ်ကိုင်းတိုင်းဒေသကြီးသည် မြန်မာအမျိုးသမီးများ ကြိုက်နှစ်သက်စွာ အသုံးပြုနေကြသည့် သနပ်ခါးပင်များ စိုက်ပျိုးထွက်ရှိရာ ဒေသတစ်ခုဖြစ်ကြောင်း သိရသည်။ မြန်မာ့သနပ်ခါးသည် ကဗျာ၊ သီချင်းများ စပ်ဆိုရသည်အထိ ထင်းရှားပြီး၊ ရှေးယခင်ကပင် သနပ်ခါးကို နန်းတွင်းအလှကုန်အဖြစ် အသုံးပြုခဲ့ကြောင်း၊ မြန်မာ့ရိုးရာ အလှတရားတွင် သနပ်ခါးသည် အရေးပါသောအခန်းကဏ္ဍတွင် ပါဝင်ပြီး အမျိုးသမီးများသည် မျက်နှာတွင် သနပ်ခါးဖြင့် အလှဆင်လေ့ရှိကြောင်း သိရှိရပါသည်။

        မြန်မာနိုင်ငံတွင် သနပ်ခါးသည် သဘာဝအလှကုန်ပစ္စည်းအဖြစ် ဈေးကွက်တွင် အရေးပါပြီး နိုင်ငံတကာတွင်လည်း စိတ်ဝင်စားမှုများလာကြောင်း၊ သနပ်ခါးသည် ကျန်းမာရေးနှင့် အလှအပတို့ အတွက် တန်ဖိုးမဖြတ်နိုင်သော သဘာဝလက်ဆောင်တစ်ခုဖြစ်ပြီး၊ ကန့်ဘလူမြို့မဈေးတွင် ရောင်းချ နေသော သနပ်ခါးတုံးများသည် ကန့်ဘလူခရိုင်အတွင်းမှ ထွက်ရှိသလို၊ ရွှေဘိုမြို့ရှိ လက်လီ၊လက္ကား သနပ်ခါးတုံး အရောင်းဆိုင်များမှလည်း ဝယ်ယူရောင်းချကြောင်း၊ ဩဂုတ်လ တတိယပတ်အတွင်း မြန်မာ့ရိုးရာသနပ်ခါး(၁)တုံးလျှင် (၅၀၀၀မှ ၆၀၀၀)ကျပ်၊ အသေး(၁)တုံးလျှင် (၂၀၀၀)ကျပ်နှင့် (၃) တုံးလျှင် (၅၀၀၀)ကျပ်ဖြင့် ရောင်းချလျက်ရှိရာ အရွယ်အစားနှင့် အရည်အသွေးပေါ်မူတည်၍ ဈေးနှုန်းများကွာခြားကြောင်း လုပ်ငန်းရှင်များထံမှ သတင်းရရှိပါသည်။

DOCA (စစ်ကိုင်း)

               စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်း မျာ ဆောင်ရွက်လျက်ရှိသလို   စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက် ကုန်များ၏ ဈေးနှုန်း၊ဈေးကွက် အခြေအနေများကိုလေ့လာ၍ အပတ်စဉ်၊ လစဉ် အထက် အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။

            ကန့်ဘလူမြို့၊ မြို့မဈေးတွင် ရောင်းချလျက်ရှိသည့် ဝက်သားများကို ကန့်ဘလူမြို့ရှိ လက်လီ/လက္ကားဒိုင်များနှင့် ကျွန်းလှမြို့နယ်အတွင်းမှ ဝင်ရောက်လျက်ရှိကြောင်း၊ ၂၀၂၅ ခုနှစ်၊ ဩဂုတ်လ တတိယပတ်အတွင်း  ကန့်ဘလူမြို့မဈေး၌ ရောင်းချနေသော ဝက်သားဈေးနှုန်းများမှာ ပေါင်သား(၁)ပိဿာလျှင် (၃၃၀၀၀)ကျပ်၊ နံကိုင်းသား(၁)ပိဿာလျှင် (၃၀၀၀၀)ကျပ်၊ ဩဂုတ်လ တတိယပတ်အတွင်း  အမဲသားသန့်(၁)ပိဿာလျှင်(၂၉၀၀၀)ကျပ်၊ ရိုးရိုး(၁)ပိဿာလျှင် (၂၄၀၀၀) ကျပ်ဖြင့်ရောင်းချလျက်ရှိကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း ဝက်သား(၁)ပိဿာလျှင် (၂၀၀၀)ကျပ်ကျဆင်း၍ အမဲသား(၁)ပိဿာလျှင် (၁၀၀၀)ကျပ်ဈေးနှုန်းမြင့် တက်လျက်ရှိကြောင်း အသားရောင်းချသူများထံမှ သတင်းရရှိပါသည်။

DOCA (စစ်ကိုင်း)

     မွန်ပြည်နယ်အတွင်းသို့ ဆန်အိတ်များ စီးဝင်လျက်ရှိပြီး ဩဂုတ်လ၏ တတိယအပတ်၌ ဆန်ဈေးနှုန်းမှာ တည်ငြိမ်လျက်ရှိပါသည်။ အခြားတိုင်းဒေသကြီးများမှ မွန်ပြည်နယ်သို့ ဆန်စီးဝင်မှုများမှာ ၂၀၂၅ ခုနှစ်၊ ဩဂုတ်လ ဒုတိယအပတ်တွင် ဧရာဝတီမှ (၂၇၂၀) အိတ်ခန့်၊ စစ်ကိုင်းမှ (၂၃၂၀) အိတ်ခန့်၊ ရန်ကုန်မှ (၇၉၂၀) အိတ်ခန့် စုစုပေါင်း (၁၂၉၆၀) အိတ်ခန့်၊ တန်ချိန်အားဖြင့် (၆၄၈) တန်ခန့်စီးဝင်ခဲ့သည်။ ယခု ဩဂုတ်လ၏ တတိယအပတ်တွင် ဧရာဝတီမှ (၈၂၀) အိတ်ခန့်၊ စစ်ကိုင်းမှ (၅၆၄၀) အိတ်ခန့်၊ ပဲခူးမှ (၃၈၀) အိတ်ခန့်၊ ရန်ကုန်မှ (၁၆၉၈၀) အိတ်ခန့်၊ စုစုပေါင်း (၂၃၈၂၀) အိတ်ခန့်၊ တန်ချိန်အားဖြင့် (၁၁၉၁) တန်ခန့် စီးဝင်ခဲ့ပြီး ယခင် ဒုတိယအပတ်နှင့် နှိုင်းယှဉ်ပါက  ပိုမို၍ စီးဝင်ခဲ့သည်။

          မွန်ပြည်နယ်မှ အခြားတိုင်းဒေသကြီးနှင့်ပြည်နယ်များသို့ ဆန်စီးထွက်ရာတွင် ၂၀၂၅ ခုနှစ် ဩဂုတ်လ ဒုတိယအပတ်တွင် ရန်ကုန်သို့ (၂၅၆၀) အိတ်ခန့်၊ ဘားအံသို့ (၂၀၀) အိတ်ခန့်၊ စုစုပေါင်း (၂၇၆၀) အိတ်ခန့်၊ တန်ချိန်အားဖြင့် (၁၃၈) တန်ခန့်စီးထွက်ခဲ့ပြီး၊ ယခု ဩဂုတ်လ တတိယအပတ်တွင် ဆန်စီးထွက်မှုမရှိကြောင်း သိရသည်။

          မွန်ပြည်နယ်၌ ဩဂုတ်လ၏ တတိယအပတ်တွင် ဆန်ဈေးနှုန်းမှာ (၂၄) ပြည်ဝင် ဆန် တစ်အိတ်လျှင် ပေါ်ဆန်း(ဒေသ) (၁၁၀၀၀၀) ကျပ်ခန့်၊ ရွှေဘိုပေါ်ဆန်း (၁၅၆၆၀၀) ကျပ်ခန့်၊ ဧည့်မထ(ဒေသ) (၇၀၀၀၀) ကျပ်ခန့်ရှိပြီး ယခုအပတ်တွင် ဆန်ဈေးနှုန်းမှာ တည်ငြိမ်လျက်ရှိကြောင်း သိရှိရပါသည်။

DOCA (မွန်)

    မွန်ပြည်နယ်၊ ချောင်းဆုံမြို့နယ် အနီးတစ်ဝိုက်နှင့် ကျေးရွာများတွင် ဥစားပိန်း စိုက်တောင်သူများ ဈေးကောင်းရရှိသဖြင့် မိသားစုတစ်ပိုင်တစ်နိုင် စိုက်ပျိုးရာမှ စီးပွားဖြစ် တိုးချဲ့ စိုက်ပျိုးလာကြောင်း သိရသည်။

     ဥစားပိန်းပင်များကို မစိုက်မီမြောင်းဘောင်ကို အရင်ဆုံးပြုပြင်ရပြီး စိုက်ဘောင်များ အတွင်း ကြက်ချေး သို့မဟုတ် နွားချေးနှင့် ဆန်စက်မှရရှိသည့် ဖွဲမှုန့်များကို ရောစပ်ထည့်ပေး ရကြောင်း၊ ပိန်းပင်ပေါက်များကို တစ်ပင်နှင့်တစ်ပင် တစ်ပေခန့်အကွာစိုက်ပျိုးရကြောင်း၊ အပင် ကြီးထွားမှုနှင့် လေဝင်လေထွက်ကောင်းရန် ဂရုစိုက်ရပြီး ရက် (၈၀) ခန့်အကြာတွင် ဥများ တူးဖော်ကာရောင်းချရကြောင်း ဥစားပိန်းစိုက်တောင်သူတစ်ဦးထံမှ သိရသည်။

    ဥစားပိန်းများကို ရာသီမရွေးစိုက်ပျိုးရပြီး ဈေးကွက်တွင် ဒေသပေါက်ဈေး တစ်ပိဿာလျှင် ကျပ် ၁၀၀၀၀ ရရှိကာ တောင်သူများ တစ်ပိုင်တစ်နိုင် စိုက်ပျိုးရာမှ ယခုအခါ စီးပွားဖြစ် စိုက်ပျိုးလာကြကြောင်း သိရသည်။

DOCA (မွန်)

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် သီးနှံမျိုးစုံစိုက်ပျိုးလျက်ရှိ ရာစားဖိုဆောင်သီးနှံများကို ရာသီချိန်အလိုက် စိုက်ပျိုးကြကြောင်း၊ မုန့်ညှင်းရွက်ကို မြို့ပေါ်ရပ် ကွက်များတွင်သာမက ကန့်ဘလူမြို့နယ်အတွင်းရှိ ကျေးရွာများတွင်လည်း မိမိတို့နေအိမ်ခြံဝင်းများ၊ ယာကွက်များတွင် တစ်နိုင်တစ်ပိုင် စိုက်ပျိုးကြကြောင်း သိရှိရသည်။

      ၂၀၂၅ခုနှစ်၊ ဩဂုတ်လတတိယပတ်အတွင်း ကန့်ဘလူမြို့မဈေးတွင် မုန့်ညှင်းချဉ် (၁)ပုဂံလျှင် (၃၀၀)ကျပ်၊ (၂)ပုဂံလျှင် (၅၀၀)ကျပ်ဖြင့်လည်းကောင်း၊ ဩဂုတ်လ တတိယပတ်အတွင်း မုန့်ညှင်း ရွက်လက်လီ(၁)စီးလျှင် (၃၅၀)ကျပ်၊  လက္ကား(၃)စီးလျှင် (၁၄၀၀)ကျပ်၊ (၁၀)စီးလျှင် (၃၂၀၀)ကျပ် ဖြင့်လည်းကောင်း ရောင်းချကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း မုန့်ညှင်းရွက်ဈေးနှုန်း အနည်းငယ်မြင့်တက်လာကြောင်း ဟင်းသီးဟင်းရွက် ရောင်းချသူများထံမှ သိရှိရသည်။

DOCA (စစ်ကိုင်း)