ပြည်တွင်းကုန်သွယ်မှုသတင်း

      စစ်ကိုင်းတိုင်းဒေသကြီး၊ မုံရွာမြို့နယ်ဒေသအတွင်း စိုက်ပျိုးရေးကို အဓိကထားလုပ်ကိုင်ပြီး  ဥယျာဉ်ခြံ စိုက်ပျိုးလုပ်ကိုင်ရာတွင် ရာသီစာဟင်းသီးဟင်းရွက်များကို စိုက်ပျိုးကြသလို ဖီးကြမ်း ငှက်ပျောကိုလည်း အများအပြား စိုက်ပျိုးပါကြောင်း၊ ရာသီစာဖြစ်သည့်ဖရဲသီးများ လည်းဝင်ရောက်လာပြီး၊ အရောင်းသွက်လျက်ရှိကြောင်း သိရှိရပါသည်။

      ငှက်ပျောသီးကို ငှက်ပျောသီးမှည့်အဖြစ်လည်း စားသုံးသလို၊ ငှက်ပျောသီးကြော်၊ ငှက်ပျောရွှေကြည်၊ ငှက်ပျောယို၊ ငှက်ပျောခြောက်၊ ငှက်ပျောပူတင်း အစရှိသော သရေစာများ လုပ်၍လည်း စားသုံးနိုင်ပါသည်။ ငှက်ပျောသီးမှည့်ကို ရှေ့လူကြီးများ အဆိုအရ မနက်ငှက်ပျော ညသင်္ဘောဆိုသလို မနက်စာ ဖီးကြမ်းငှက်ပျောသီးမှည့်တစ်လုံးကို စားသုံးပေးခြင်းဖြင့် ကျန်းမာရေး ကိုများစွာအထောက်အကူပြုပြီး ကိုယ်ခံအားကောင်းစေပါသည်။အစာအုပ်စု(၃)စုအနက် အာဟာရ ပြည့်ဝသည့် အစာအုပ်စုတွင်ပါဝင်ပြီး အမျှင်ဓါတ်ပါရှိ၍ ဝမ်းချုပ်ခြင်းမှလည်း ကာကွယ်ပေးပါ သည်။ ဖီးကြမ်းငှက်ပျောသီးတစ်လုံးကို နေ့စဉ်စားသုံးပေးပါက ခန္ဓာကိုယ်အတွင်းရှိ မလိုအပ် သော အဆီပိုများကို လျော့ကျစေသည့်အပြင် ကိုယ်ခံအားကို ကောင်းမွန်စေပြီး ရောဂါများမဖြစ် စေရန် ကာကွယ်ပေးပါသည်။

    ဖရဲသီးကိုအမျိုးမျိုးစားသုံးကြပါသည်။ အသီးအတိုင်းစားသုံးခြင်း၊ ဖျော်ရည်နှင့် စားသောက်ကုန်တို့တွင်ထည့်၍ စားသုံးခြင်း၊ ဖရဲသီးတွင် ရေဓာတ်ပေါကြွယ်ဝစွာ ပါဝင်သော ကြောင့် ရေအစားထိုးအနေဖြင့် စားသုံးနိုင်ပြီး အပူကင်းအောင်စားပေးသင့်သော အသီးတစ်မျိုး လည်း ဖြစ်ပါသည်။ ဖရဲသီးကို စားသုံးခြင်းဖြင့် မိမိခန္ဓာကိုယ်အတွက် ကောင်းကျိုးများစွာကို ရရှိစေပါသည်။

    ၂၀၂၅ခုနှစ်၊ ဩဂုတ်လ စတုတ္ထအပတ်တွင် မုံရွာမြို့၊ ကန်သာယာဈေးအတွင်းရှိ အုန်း၊ ငှက်ပျောရောင်းဝယ်ရေးဆိုင်များတွင် ငှက်ပျောတစ်ဖီးလျှင် ကျပ်(၂၅၀၀-၃၅၀၀)ဖြင့်ရောင်းချပြီး ဖီးကြမ်းငှက်ပျောသီးကို ဈေးကွက်အတွင်းတွင် အဖီးလိုက်၊ အခိုင်လိုက် ရောင်းချလျက်ရှိပြီး၊ ဝင်ရောက်လာသည့်ဖရဲသီး‌စျေးမှာ တစ်လုံးလျှင် အလုံးကြီး ၂၅၀၀ ကျပ်၊ အလုံးလတ် ၂၀၀၀ ကျပ်နှင့် အလုံးသေး ၁၀၀၀ကျပ် စျေးဖြစ်ပြီး အသီးအရွယ်အစားအလိုက် စျေးအနည်းငယ် ကွာခြားမှုရှိကြောင်း သီးနံရောင်းချသူထံမှ သိရှိရပါသည်။

DOCA (စစ်ကိုင်း)

    စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် စိုက်ပျိုးရေးလုပ်ငန်းကို လုပ်ကိုင်စားသောက်ကြရာမှ စားဖိုဆောင်သီးနှံဖြစ်သည့် ပဲတောင့်ရှည်သီးများနှင့် ကြက်ဟင်းခါးသီးပင်များကိုလည်း တစ်နိုင်တစ်ပိုင် စိုက်ပျိုးလျက် ရှိပြီး မုံရွာမြို့၊သာစည်ဈေးတွင် လာရောက်ရောင်းချလျက်ရှိကြောင်း သိရပါသည်။

          ၂၀၂၅ ခုနှစ်၊ ဩဂုတ်လ စတုတ္ထပတ်တွင် မုံရွာမြို့၊ သာစည်ဈေးတွင် ပဲတောင့်ရှည်သီး ဈေးနှုန်းများမှာ ပဲတောင့်ရှည်သီး ငါးတောင့်ပါတစ်စီးလျှင် (၃၅၀) ကျပ်ရှိပြီး ဆယ်တောင့်ပါ တစ်စီးလျှင်(၇၀၀)ကျပ်၊ တောကြက်ဟင်းခါးသီး ဈေးနှုန်းများမှာ တစ်ပြည်လျှင် (၅၅၀၀/ ၆၀၀၀)ကျပ်၊ ခဆော့သီးတစ်ပြည်လျှင် (၃၀၀၀/ ၃၅၀၀)ကျပ်၊ ကြောင်လျှာသီးအကြီး တစ်တောင့်လျှင် (၁၀၀၀)ကျပ်၊ ကြောင်လျှာသီးအသေး တစ်တောင့်လျှင် (၈၀၀)ကျပ်နှုန်းတို့ ဖြင့်  အရောင်းအဝယ်ဖြစ်လျက်ရှိကြောင်း  သိရှိရပါသည်။

DOCA (စစ်ကိုင်း)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ရွှေဘိုခရိုင် ဦးစီး မှူးရုံးအနေဖြင့် ရွှေဘိုမြို့ရှိ ပဲပွဲစားများကထိန်တော်အသင်း ပဲ၊နှမ်းကုန်စည်ဒိုင်၏ သီးနှံအမျိုးအစားအလိုက် အရောင်းအဝယ်ဖြစ်မှုနှင့်ဈေးနှုန်းဈေးကွက် အခြေအနေများအား ကုန်စည်ဒိုင်ရှိ တာဝန်ရှိသူများဖြင့် ဆက်သွယ်မေးမြန်း၍  အပတ်စဉ်၊ လစဉ် တင်ပြလျက်ရှိပါသည်။

          ပဲ၊နှမ်းကုန်စည်ဒိုင်အနေဖြင့် ၂၀၂၅ခုနှစ် ဩဂုတ်လ တတိယပတ်တွင် ပဲတီစိမ်း တစ်တင်းလျှင် (၈၆၅၀၀)ကျပ် ပေါက်ဈေးဖြင့်  (၇၅၀)တင်း ၊တန်အားဖြင့် (၂၄)တန် ၊ ပဲစဉ်းငုံနီ တစ်တင်းလျှင် (၇၇၅၀၀)ကျပ် ပေါက်ဈေးဖြင့် (၃၀၀)တင်း၊တန်အားဖြင့် (၁၀)တန်၊ နှမ်းနက် တစ်တင်း လျှင်(၂၃၆၅၀၀)ကျပ် ပေါက်ဈေးဖြင့် (၁၃၅၀)တင်း တန်အားဖြင့် (၃၃)တန် ၊မြေပဲလုံးဆံဖြူ တစ်တင်းလျှင် (၁၂၈၀၀၀)ကျပ် ပေါက်ဈေးဖြင့် (၄၅၀)တင်း၊တန်အားဖြင့် (၁၀)တန်အရောင်းအဝယ် ဖြစ်ခဲ့ ကြောင်း ယခင်ပတ်နှင့်နှိုင်းယှဉ်ပါက ပဲ၊နှမ်း ဝင်ရောက်မှုနည်းပါးလာပြီး ဈေးနှုန်းများ အနည်းငယ်ကျဆင်းလျက်ရှိကြောင်း  ပဲပွဲစားများ ကထိန်တော်အသင်း ပဲနှမ်းကုန်စည်ဒိုင်ရှိ တာဝန်ရှိသူ တစ်ဦးထံမှ သတင်း ရရှိသည်။

DOCA (စစ်ကိုင်း)

      စစ်ကိုင်းတိုင်းဒေသကြီး၊ မုံရွာမြို့၊ ကန်သာယာဈေးအတွင်းတွင်  ပန်းဂေါ်ဖီများ ရောင်းချလျက် ရှိကြောင်းသိရှိရပါသည်။

     ပန်းဂေါ်ဖီမှာ အာဟာရပြည့်ဝတဲ့ ဟင်းသီးဟင်းရွက်တစ်မျိုးဖြစ်ပြီး  ဗီတာမင်C၊ ပိုတက်ဆီယမ်၊ ဗီတာမင်Bနဲ့ ကယ်ဆီယမ် ဓာတ်တစ်ချို့နဲ့သံဓာတ်တို့ ပါဝင်သောကြောင့် ကျန်းမာရေး အတွက် ကောင်းမွန်ကြောင်းသိရှိရပါသည်။

     ၂၀၂၅ခုနှစ်၊ ဩဂုတ်လစတုတ္ထအပတ်အတွင်း ဖြစ်ပေါ်နေသော  ရောင်းချနေသော ကုန်စိမ်းသည် များထံမှ ပန်းဂေါ်ဖီစိမ်းစျေးနှုန်း အသေးတစ်ပွင့်လျှင့် (၁၂၀၀-၁၅၀၀)ကျပ် ရှိကြောင်းသိရှိရသည်။

DOCA (စစ်ကိုင်း)

         မုံရွာမြို့၊ ပတ်ဝန်းကျင်ရှိ ကျေးရွာများသည် မိမိတို့အိမ်ခြံမြေများနှင့် လယ်ယာမြေများ တွင်  ဆူးပုတ်ကြီးပင်နှင့် ကန်စွန်းပင်များကို  မီးဖိုချောင်စရိတ်သက်သာစေရန် စိုက်ပျိုးလေ့ရှိ ကြပြီး၊  စီးပွားဖြစ်စိုက်ပျိုးမှုများလည်း ရှိကြပါသည်။ ဆူးပုတ်ရွက်နှင့် ကန်စွန်းရွက်သည် ရာသီ မရွေးပေါ်ထွက်သော သီးနှံတစ်မျိုးလည်း ဖြစ်ပါသည်။ စိုက်ပျိုးရရှိသော ဆူးပုတ်ကြီးရွက် များနှင့် ကန်စွန်းရွက်များကို     မုံရွာမြို့၊ သာစည်ဈေးတွင် လာရောက်ရောင်းချကြကြောင်း သိရှိရပါသည်။  

          ဩဂုတ်လ စတုတ္ထပတ်တွင် သာစည်ဈေးတွင် ဆူးပုတ်ကြီး(၁) စည်းလျှင် (၃၀၀) ကျပ် မှ (၃၅၀)ကျပ်နှင့် ကန်စွန်းရွက် (၁)စည်းလျှင်(၂၀၀)ကျပ်၊ (၃)စည်းလျှင်(၅၀၀) ကျပ်နှုန်းဖြင့် ရောင်းချလျက်ရှိကြောင်း သိရှိရပါသည်။

DOCA (စစ်ကိုင်း)