ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ ဆိပ်ဖြူမြို့နယ်၊ ရွာသစ်ရပ်ကွက်ရှိ စိုက်တောင်သူများသည် နှစ်စဉ် ကိုင်း၊ ကျွန်းမြေများတွင် ကြက်သွန်နီအပြင် သီးနှံမျိုးစုံစိုက်ပျိုးလျက်ရှိရာ ယခုနှစ်တွင် ဈေးကွက်ခိုင်မာ လျက်ရှိသော ဂျပန်ပဲယင်း(နီ)ကို စိုက်ဧကမများသော်လည်း တစ်ပိုင်တစ်နိုင်စိုက်ပျိုးထားကြောင်း ဒေသခံ တောင်သူတစ်ဦးထံမှ သိရသည်။

          ရွာသစ်ရပ်ကွက်တွင် ဂျပန်ပဲယင်း(နီ)စိုက်ဧက(၅)ဧကခန့် စိုက်ပျိုးထားရှိပြီး စိုက်တောင်သူမှ တစ်ဧကခန့် စိုက်ပျိုးထားရှိကြောင်း၊ စိုက်ပျိုးရာတွင် လွယ်ကူပြီး ကုန်ကျစရိတ်လည်း သက်သာကြောင်း၊ ယခင်နှစ်က စိုက်ပျိုးမှုနည်းကြောင်း၊ ယခုနှစ်တွင် နယ်မြေဒေသ ရာသီဥတု ကိုက်ညီမှုရှိခြင်းကြောင့် ပဲယင်း(နီ)ကို ကုလားပဲသီးနှံအစားထိုး၍စိုက်ပျိုးကြောင်း သိရသည်။ ဂျပန်ပဲယင်း(နီ)မျိုးများကို ၂၀၂၄ခုနှစ်၊ အောက်တိုဘာလတွင် စိုက်ပျိုးပြီး ၂၀၂၅ခုနှစ်၊ မတ်လတွင် ရိတ်သိမ်းကြောင်း၊ တစ်ဧက လျှင် ပဲယင်း(နီ) (၃)ပြည်ခန့်ကုန်ကျပြီး မျိုးစေ့တစ်ပြည်လျှင် ကျပ်(၇၅၀၀)ဈေးဖြင့် ဝယ်ယူရကြောင်း၊ စိုက်ပျိုးရာတွင် လွယ်ကူပြီး အလုပ်သမားငှားရမ်းမှုနည်းခြင်း၊ သွင်းအားစုသုံးစွဲမှုနှင့် ပိုးသတ်ဆေး ဖျန်းခြင်းများမပြုလုပ်ရခြင်းကြောင့် ကုန်ကျစရိတ်နည်းကြောင်း သိရသည်။

          ယခင်နှစ် ပဲယင်း(နီ)တစ်ဧက အထွက်နှုန်းမှာ တင်း(၃၀)မှ (၄၀)ထိ ထွက်ရှိကြောင်း၊ တစ်တင်း လျှင် ဒေသပေါက်ဈေး ကျပ်(၇)သောင်းဈေးဖြင့် ရောင်းချရ၍ ကျပ်(၂၁)သိန်းခန့် ဝင်ငွေရရှိပြီး ကုန်ကျ စရိတ် ကျပ်(၃)သိန်းခန့် ကုန်ကျ၍ အကျိုးအမြတ်အနေဖြင့် ကျပ်(၁၈)သိန်းခန့် ရရှိခဲ့ကြောင်း၊ ဈေးကွက် အနေဖြင့် စိုက်ခင်းထွက်သီးနှံများကိုချောက်မြို့ အေဝမ်းပွဲရုံသို့ရောင်းချပြီး ထိုမှတဆင့် ဒေသတွင်း ဖြန့်ဖြူးမှုအပြင် ရန်ကုန်မန္တလေးပဲဈေးကွက်မှ ပြည်ပတရုတ်နိုင်ငံသို့ တင်ပို့ကြောင်း၊ ပဲယင်းနီသီးနှံကို ပြည်တွင်းသုံးစွဲမှု နည်းကြောင်း၊ ယခုနှစ် စိုက်ပျိုးရာသီချိန်တွင် ရာသီဥတုကောင်းမွန်၍ ပဲယင်း(နီ) စိုက်ခင်းများ အောင်မြင်ဖြစ်ထွန်းလျက်ရှိကြောင်း၊ မတ်လဆန်းပိုင်တွင် သီးနှံ များ ရိတ်သိမ်းမည်ဖြစ် ကြောင်း၊ ယခုသီးနှံဈေးကွက်တွင် ပဲယင်း(နီ) တစ်တင်းလျှင် ကျပ်(၉၀၀၀၀)ဈေးဖြင့် အရောင်း အဝယ်ဖြစ်နေကြောင်း စိုက်တောင်သူများအနေဖြင့် ယခုနှစ်သီးနှံပေါ်ချိန်တွင် အထွက်နှုန်းကောင်းပြီး ဈေးကောင်းရရှိပါက အကျိုးအမြတ်များစွာရရှိမည်ဖြစ်ကြောင်း သိရှိရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူကုန်စည်ဒိုင်တွင် ပဲစဉ်းငုံနီ၊ ကုလားပဲအမျိုးမျိုး၊ ပဲတီစိမ်း၊ မတ်ပဲ၊ ပဲဇီးကွက်၊ ပဲလွန်းပြာ ပဲယင်းဝါနှင့် နှမ်းမျိုးစုံ အရောင်းအဝယ်ဖြစ်လျက်ရှိပါသည်။ ပဲစဉ်းငုံနီကို ပခုက္ကူမြို့နယ်အတွင်းရှိ ကျေးရွာများတွင် ပဲစဉ်းငုံနီကို သီးညှပ်အဖြစ် စိုက်ပျိုးကြပြီး သက်ကြီး၊ သက်လတ်မျိုးများကို အများဆုံးစိုက်ပျိုးကြသည်။ ယခုတစ်ပတ်တွင် ပဲစဉ်းငုံနီ(သစ်)များ စတင် ဝင်ရောက်နေပြီး ဈေးနှုန်းများမှာလည်း ယခင်တစ်ပတ်ထက် ဈေးနှုန်းများ ကျဆင်းလျက်ရှိကြောင်း သိရသည်။

          ၂၀၂၅ခုနှစ်၊ ဇန်နဝါရီလ(ပထမပတ်)တွင် ပခုက္ကူကုန်စည်ဒိုင်၌ အရောင်းအဝယ်ဖြစ်ခဲ့သော ပဲစဉ်းငုံနီဈေးနှုန်းမှာ တစ်တင်းလျှင် ကျပ်(၉၆၀၀၀)၊ (ဒုတိယပတ်)တွင် ကျပ်(၉၄၂၀၀)၊ (တတိယပတ်) တွင် ကျပ်(၉၁၀၀၀)ဖြစ်ပြီး (ပထမပတ်)နှင့် (တတိယပတ်)နှိုင်းယှဉ်ပါက တစ်တင်းလျှင် ကျပ်(၅၀၀၀) ခန့် ကျဆင်းနေကြောင်း၊ အရောင်းအဝယ်ဖြစ်မှုမှာ နေ့စဉ်အိတ်ရေ(၃၀၀ မှ ၁၂၀၀ ထိ) ဖြစ်လျက်ရှိပြီး တင်ပို့မှုအနေဖြင့် ရန်ကုန်ရွှေပြည်သာသို့ အိတ်ရေ(၂၇၀၀)ခန့် တင်ပို့လျက်ရှိကြောင်း ကုန်လမ်းပို့ဆောင် ရေးနှင့်ကုန်စည်ဒိုင်မှ သိရှိရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူမြို့ပေါ်တွင် ဒေသထွက်ကုန်မုန့်မျိုးစုံလုပ်ငန်းများ လုပ်ကိုင်လျက် ရှိရာ ပခုက္ကူခရိုင်ဦးစီးမှူးရုံးမှ ဝန်ထမ်းများအဖွဲ့သည်  (၁၇.၁.၂၀၂၅)ရက်နေ့၊ နံနက်(၁၁:၃၀)အချိန်တွင် ပြည်တွင်းအသေးစားလုပ်ငန်းများ ဖွံ့ဖြိုးတိုးတက်ရေးအတွက် ရည်ရွယ်၍ ပခုက္ကူမြို့၊ အောင်သပြေ ရပ်ကွက်ရှိ “ဝင်းထူးအောင်” ကိတ်မုန့် လုပ်ငန်းရှင်နှင့် တွေ့ဆုံ၍ ဈေးနှုန်း၊ ဈေးကွက်များ၊ လုပ်ငန်း ဆောင်ရွက်ပုံအဆင့်ဆင့်များကို ဆွေးနွေးမေးမြန်းခဲ့ကြောင်း သိရသည်။   

          လုပ်ငန်းရှင်မှ ကိတ်မုန့်လုပ်ငန်းကို လုပ်ကိုင်သည်မှာ (၅၊ ၆)နှစ်ခန့်ရှိပြီဖြစ်ပြီး လုပ်ငန်းအစတွင် အခက်အခဲများစွာရှိသော်လည်း ယခုအချိန်တွင် ဖောက်သည်များစွာ ရရှိသောကြောင့် လုပ်ငန်း သည် ပို၍တွင်ကျယ်လာကြောင်း၊ ကိတ်မုန့်လုပ်ငန်းကို သန့်ရှင်းသပ်ရပ်စွာ လုပ်ကိုင်သောကြောင့် ပခုက္ကူမြို့ တွင် ရောင်းအားကောင်းလျက်ရှိကြောင်း သိရသည်။ ၎င်းနောက် ကိတ်မုန့်လုပ်ကိုင်ပုံအဆင့်ဆင့်ကို ရှင်းပြရာ ပထမဦးစွာ ဗန်းထဲကို ဂျုံ(၅၀)ကျပ်သားထည့်၍  ကြက်ဥ(၁၀)လုံး၊ ဆီ(၁၀)ကျပ်သား၊ သကြား၊ ရေတို့ဖြင့်  သမအောင် ရောစပ်ပြီးနယ်ရကြောင်း၊  နယ်ပြီးသားမုန့်ဗန်းများကို မုန့်ဖုတ်စက်ထဲသို့ထည့်၍ (၄၅)မိနစ်ခန့် ကြာအောင် မီးဖုတ်ရကြောင်း၊ စက်ထဲသို့ တစ်ကြိမ်ဖုတ်လျှင်  (၅)ဗန်းထည့်၍ရကြောင်း၊ ထို့နောက် ကျက်ပြီးသား ကိတ်မုန့်များကို ဆီသုတ်၍ အအေးခံပြီး ပါကင်ဗူးထဲသို့ထည့်၍ ထုတ်ပိုး ကြောင်း၊ လုပ်သားအင်အားအနေဖြင့် (၃)ဦးရှိပြီး တစ်ဦးလျှင် လုပ်အားခ ကျပ်(၇၀၀၀ - ၁၀၀၀၀) ပေးရပြီး မိသားစုဝင်များ ကိုယ်တိုင်လည်း ဝင်ရောက်လုပ်ကိုင်လျက်ရှိကြောင်း သိရသည်။

          ဈေးနှုန်းအနေဖြင့် ကိတ်မုန့်တစ်ဘူးလျှင် လက်ကားဈေး ကျပ်(၂၁၀၀)၊ လက်လီဈေး ကျပ် (၂၅၀၀)ဖြင့် ရောင်းချပြီး၊ ပခုက္ကူမြို့မဈေးသို့ အများဆုံးဖြန့်ဖြူးရောင်းချပြီး ယောနယ်ဖြစ်သော ကျောက်ထုမြို့၊ မြိုင်မြို့သို့လည်း လမ်းပန်းအဆင်ပြေ၍ အမှာရှိလျှင် တင်ပို့ရောင်းချပါကြောင်း၊ ရောင်းအားအနေဖြင့် တစ်လလျှင် ကိတ်မုန့်ဘူး(၁၅၀၀)ခန့်ရောင်းရကြောင်း၊ ဆီကြော်မုန့်နှင့် ကြက်ဥ ကိတ်မုန့်များကိုလည်း ထပ်မံ၍ တိုးချဲ့ထုတ်လုပ်နေပြီဖြစ်ကြောင်း လုပ်ငန်းရှင်၏ ပြောပြချက်အရ သိရှိရ ပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်ရှိ မြို့မဈေးနှင့် ပန်းခြံဈေးတို့တွင်ရောင်းချနေသော ကုန်စိမ်းသီးနှံ၊ ဟင်းသီးဟင်းရွက်ဈေးကွက်တွင် ဆောင်းရာသီထွက် ကုန်စိမ်းသီးနှံမျိုးစုံ လှိုင်လှိုင်ဝင်ရောက် အရောင်းအဝယ်ဖြစ်လျက်ရှိသည်။ ပခုက္ကူမြို့၊ မြစ်တစ်ဖက်ကမ်းရှိ ကျွန်းကျေးရွာများဖြစ်သော ကျွန်းညိုကြီးရွာ၊ ကံလှအုပ်စု၊ တင်းဂတ်၊ ကုက္ကိုလှအုပ်စုအတွင်းရှိ ကျေးရွာများနှင့် ကမ္မ၊ မြစ်ခြေနှင့် ကျောက်ပန်းတောင်း၊ ပုပ္ပါး ဒေသများမှ စိုက်ပျိုးထားရှိသော ကုန်စိမ်းသီးနှံများကိုလှိုင်လှိုင်ဆွတ်ခူးလျက်ရှိပြီး ဈေးကွက်အတွင်းသို့ ဝင်ရောက် လျက်ရှိပြီး ၂၀၂၅ခုနှစ်၊ ဇန်နဝါရီလဆန်းမှစ၍ ကုန်စိမ်းသီးနှံတချို့မှာ ဈေးနှုန်းကျဆင်းပြီး အရောင်းအဝယ်ဖြစ် လျက်ရှိကြောင်း သိရသည်။

           ၂၀၂၅ခုနှစ်၊ ဇန်နဝါရီလ(တတိယပတ်)တွင် ကုန်စိမ်းသီးနှံများထဲမှ ပန်းဂေါ်ဖီပွင့်များလည်း ဒေသ တွင်းလှိုင်လှိုင်ပေါ်၍ ဈေးကွက်သို့ ကုန်ဝင်ရောက်မှုများပြီး ဈေးကျဆင်းပြီး အရောင်းအဝယ်ဖြစ်လျက်ရှိ သည်။ သီးနှံအရည်အသွေးနှင့် အရွယ်အစားကိုလိုက်၍ ပန်းဂေါ်ဖီတစ်ပွင့်လျှင် ကျပ်(၅၀၀ မှ ၂၀၀၀) ဈေးအသီးသီး ဖြင့်အရောင်းအဝယ်ဖြစ်လျက်ရှိပြီး ယခင် ၂၀၂၄ခုနှစ်၊ ဒီဇင်ဘာလ(တတိယပတ်)တွင် ပန်းဂေါ်ဖီတစ်ပွင့်လျှင် ကျပ်(၁၀၀၀ မှ ၂၅၀၀)ဈေးဖြင့် အရောင်းအဝယ်ဖြစ်၍ တစ်လအတွင်း ကျပ်(၅၀၀)ခန့် ဈေးကျဆင်းပြီး အရောင်း အဝယ်ဖြစ်ကြောင်း၊ ယခုအချိန်သည် ဒေသတွင်း စိုက်ခင်းများမှ ကုန်စိမ်းသီးနှံများ လှိုင်လှိုင်ပေါ်ချိန်ဖြစ်၍ ဈေးနှုန်းမှာကျဆင်းရခြင်းဖြစ်ကြောင်း ဈေးကွက်မှ သိရှိရပါသည်။

DOCA(မကွေး)

          ၂၀၂၅ ခုနှစ်၊ ကရင်ပြည်နယ်၊ ဘားအံမြို့ပေါ်ဈေးတွင် ကျောက်ဖရုံသီးများ အရောင်းသွက်လျက် ရှိကြောင်း သိရသည်။ ကျောက်ဖံရုံသီးကို ဘားအံမြို့အနီး တဝိုက်ကျေးရွာများတွင် တနိုင်တပိုင်စိုက်ပျိုး ကြသည်။ ကရင်ပြည်နယ်အတွင်းသို့ အခြားဒေသမှ ကျောက်ဖရုံသီးများလည်း ဝင်ရောက်လျက်ရှိ ကြောင်းသိရသည်။ ကျောက်ဖရုံသီးကို ဟင်းချိုနှင့်ဟင်းရောဟင်းအဖြစ် စားသုံးကြသလို ကျောက်ဖရုံယို အဖြစ်လည်း ယိုထိုးစားကြပါသည်။ ကျောက်ဖရုံသီးတွင် အမျှင်ဓာတ်နှင့်ရေဓာတ် များသောကြောင့် ကျန်းမာရေးနှင့် ညီညွှတ်၍ စားသုံးသင့်သောသီးနှံဖြစ်သည်။ ကျောက်ဖရုံသီးဈေးနှုန်းမှာ  ကျောက်ဖရုံသီး အလုံးကြီး တစ်ပိဿာလျှင် (၂၀၀၀)ကျပ်၊ ကျောက်ဖရုံသီး အလုံးသေး တစ်ပိဿာလျှင် (၁၅၀၀) ကျပ် တို့ဖြင့် အရောင်းအဝယ်ဖြစ်လျက် ရှိကြောင်း သိရသည်။

DOCA(ကရင်)