ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့ စည်ပင်သာယာဈေးတွင်ရှိသော ဂျင်း  ဈေးနှုန်းများမှာ  စက်တင်ဘာလ  ဒုတိယပတ်တွင်  ဂျင်း၁၀ကျပ်သားလျှင်  ၇၀၀ / ကျပ် ရှိခဲ့ပြီး ယခုအောက်တိုဘာလဒုတိယပတ်တွင်လည်း၇၀၀/ကျပ်ရှိနေပါသည်။ဂျင်းဈေးနှုန်းမှာဈေးငြိမ်နေကြောင်း သိရှိရပါသည်။

       ကြက်သွန်ဖြူဈေးနှုန်းများအနေဖြင့် စက်တင်ဘာလဒုတိယပတ်တွင် ကြက်သွန်ဖြူ (ကြူကုတ်) ၁၀ ကျပ်သားလျှင် ၁၅၀၀/ကျပ်၊ ယခု အောက်တိုဘာလဒုတိယပတ်တွင် ကြက်သွန်ဖြူ (ကြူကုတ်) ၁၀ ကျပ်သားလျှင် ၁၅၀၀ကျပ် ဈေးနှုန်းဖြင့် ရောင်းချလျက်ရှိပါသည်။

      ကြက်သွန်ဖြူ(ရှမ်းစ) ဈေးနှုန်းအနေဖြင့်  စက်တင်ဘာလဒုတိယပတ်တွင် ၁၀ ကျပ်သားလျှင် ၁၀၀၀ ကျပ်ပေါက်ဈေးရှိနေပြီး ယခုအောက်တိုဘာလဒုတိယတွင်လည်း ဈေးနှုန်းအပြောင်းအလဲမရှိ၊ ဈေးငြိမ် နေပါသည်။ ကြက်သွန်ဖြူ (ဥတစ်လုံး) ဈေးကွက်မှာတစ်ဆယ်ကျပ်သားလျှင် ၂၅၀၀ ကျပ်  ဈေးနှုန်း တို့ဖြင့် ရောင်းချလျှက်ရှိရာ ဂျင်း၊ကြက်သွန်ဖြူ၊ဈေးကွက်တို့မှာ ဈေးအေးနေပြီးပုံမှန် ရောင်းဝယ်လျက်ရှိပါသည်။

DOCA(ပဲခူး)   

     ပဲပြားကို မြန်မာနိုင်ငံအပါအဝင် နိုင်ငံတကာ၌စားသုံးနေကြပြီး ချက်ပြုတ်ရန် လွယ်ကူသော အစားအစာ ဖြစ်သည့်အပြင် ဝယ်ယူရာ၌လည်းဈေးနှုန်းသက်သာလှသည်။ အာဟာရဓာတ် များစွာနှင့် ပရိုတင်းဓာတ် မြင့်မားစွာပါဝင်သောပဲပြားကို ပဲပိစပ်မှထုတ်လုပ်ထားသော ပဲနို့မှ ပြုလုပ်ခြင်းဖြစ်ကာ ပဲပိစပ်အရည်ကို ကျိုချက်၍အဖတ်များကို စစ်ထုတ်လိုက်သောအခါ ပဲနို့ကိုရရှိပြီး ပဲနို့ထဲသို့ ခဲစေသောဓာတ်ပစ္စည်း မဂ္ဂနီဆီယမ် ကလိုရိုက် သို့မဟုတ် ကယ်လ်ဆီယမ် ဆာလဖိတ်ကို ထည့်လိုက်ခြင်းဖြင့် ပဲနို့သည် ဒိန်ခဲကဲ့သို့ အဖတ်များအဖြစ် စတင်ခဲလာပါသည်။ ခဲထားသောအဖတ်များကို ဖိနှိပ်ခြင်း၊ ရေစစ်ထုတ်ခြင်းဖြင့်ပြုလုပ်ကာ လိုချင်သောပုံစံပေါ် မူတည်၍ ပျော့ပြောင်းသော၊ မာသောပဲပြားအတုံးများအဖြစ် ပုံသွင်းကာ ပဲပြားကိုရရှိလာပါသည်။

        ပဲပြားတွင်ပါဝင်သော Isoflavones ဓာတ်သည် သွေးတွင်းရှိမကောင်းသော ကိုလက်စထရော ကို လျှော့ချပေးပြီး နှလုံးရောဂါဖြစ်နိုင်ချေကိုလျော့နည်းစေပါသည်။ ကယ်လ်ဆီယမ် ပါဝင်မှု ကြောင့် အရိုးပွရောဂါ ဖြစ်ပွားခြင်းမှကာကွယ်ပေးနိုင်ပြီး ကယ်လိုရီနည်းပြီး ပရိုတင်းဓာတ် များစွာပါဝင်သည့်အတွက်ကြောင့် အစာ စားချင်စိတ်ကို ထိန်းချုပ်စေနိုင်ပြီး ကိုယ်အလေးချိန် လျှော့ချလိုသူများအတွက် သင့်လျော်ပါသည်။ မြန်မာနိုင်ငံတွင် ပဲပြားကို ပဲပြားဟင်း၊ ပဲပြားဟင်းချို၊ ဟင်းသီးဟင်းရွက်များနှင့်ရောနှောကြော်ချက်ခြင်း စသဖြင့် အမယ်မျိုးစုံချက် ပြုတ်စားသောက်ကြပါသည်။ ပဲပြားတုတ်ထိုး၊ ပဲပြားသုပ်၊ ပဲပြားအစာသွပ်တို့ကို မိမိတို့အိမ်တွင်လည်း လွယ်ကူစွာပြုလုပ်နိုင်ခြင်း၊ စီးပွားဖြစ်ရောင်းချရာတွင်လည်း အရင်းအနှီး နည်းပါးပြီး ရောင်းပန်း လှသောကြောင့် ပဲပြားသည်အစားအသောက်လုပ်ငန်းတွင် အမြဲမပြတ် နေရာယူ တွင်ကျယ်လျက်ရှိနေပါသည်။

DOCA(ပဲခူး)   

          မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်း ဖွံ့ဖြိုးတိုး တက်အောင် ဆောင်ရွက်နေသော နိုင်ငံတစ်ခုဖြစ်ပြီး စစ်ကိုင်းတိုင်းဒေသကြီး၊ ကန့်ဘလူမြို့နယ် တွင်လည်း လယ်ယာစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များ၌လည်း ကောင်း၊ နေအိမ်ခြံဝင်းများ၌လည်းကောင်း မိသားစုဝင်ငွေရရှိသည့်အတွက် စိုက်ပျိုးကြကြောင်း သိရသည်။

          ၂၀၂၅ ခုနှစ်၊ အောက်တိုဘာလ တတိယပတ်တွင် ဖြစ်ပေါ်နေသော ကန့်ဘလူမြို့နယ်၏ ကွမ်း ရွက်ဈေးနှုန်းများမှာ အရည်အသွေးပေါ်မူတည်၍ ကွမ်းရွက်(ရှယ်)တစ်ပိဿာလျှင် (၆၀၀၀)ကျပ်၊ ကွမ်းရွက်(ကြီး)တစ်ပိဿာလျှင် (၃၅၀၀)ကျပ်၊ ကွမ်းရွက်(သေး)တစ်ပိဿာလျှင် (၂၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ကွမ်းရွက်များကို ကန့်ဘလူခရိုင်အတွင်းနှင့် မန္တလေးမြို့သို့ တင်ပို့ရောင်းချကြောင်း ကွမ်းရွက်ရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA (စစ်ကိုင်း)

     ပဲခူးတိုင်းဒေသကြီး၊ တောင်ငူမြို့နယ်အတွင်းရှိ ညောင်ပင်လေးဈေးထဲသို့ ဂေါ်ဖီထုပ် အဓိကစိုက်ပျိုးသော ရှမ်းပြည်နယ်တောင်ပိုင်း၊ အောင်ပန်းနှင့်က‌လောမြို့တို့မှ ဂေါ်ဖီထုပ်များ ယခုအောက်တိုဘာလတွင် အများအပြားဝင်ရောက်လာကြပြီးရန်ကုန်၊ မန္တလေးနှင့် နေပြည်တော် စသော မြို့ကြီးများဆီသို့လည်း တင်ပို့လျက် ရှိနေပါသည်။ နေပြည်တော်၊ တပ်ကုန်းမြို့တွင် လည်း ဂေါ်ဖီထုပ်စိုက်ပျိုးပြီး နေပြည်တော်ဈေးကွက် အပြင် တောင်ငူဒေသသို့လည်း တင်ပို့လျက်ရှိကာ ဂေါ်ဖီထုပ်ဈေးကွက်ကျယ်ပြန့်လျက်ရှိနေပါသည်။

    ဂေါ်ဖီထုပ်များကို စားသောက်ဆိုင်၊ ထမင်းဆိုင်နှင့်အသုပ်ရောင်းချသူများက အဓိက ဝယ်ယူနေကြပြီး အရောင်းသွက်လျက်ရှိကာ တောင်ငူမြို့နယ်၊ ညောင်ပင်လေး‌ဈေးထဲတွင် ဂေါ်ဖီထုပ် ၅၀ ကျပ်သားလျှင် ၁၈၀၀ ကျပ်၊ ၁ ပိဿာလျှင် ၃၅၀၀ ကျပ်ဖြင့်ရောင်းချလျက် ရှိကြောင်း သိရသည်။

DOCA(ပဲခူး)   

      အိမ်ရှင်မများသည်  မိမိတို့အိမ်တွင် အပျင်းပြေစေရန် သရေစာ မြန်မာမုန့်များနှင့် အကြော်စုံများကို တစ်ခါတစ်ရံ ပြုလုပ်စားလေ့ရှိကြသည်။  အကြော်စုံများထဲမှ  ရှမ်းငါးပေါင်းကြော်ကိုလည်း လုပ်စားကြသည်။

    ရှမ်းငါးပေါင်းကြော်ပြုလုပ်ရာတွင် ပါဝင်မှုပမာဏအနေဖြင့် ကောက်ညှင်းတစ်ပြည်ကို ဆန် နို့ဆီဗူး ၂လုံး ရောစပ်၍ မုန့်နှစ်ရအောင် ကြိတ်ရပါသည်။ ကြိတ်ထားသော မုန့်နှစ်များကို ၄ နာရီ မှ ၅နာရီခန့် စစ်ထားရသည်။ စစ်ပြီးသား မုန့်နှစ်များကို ပဲမှုန့်စိမ်း (၅)ကျပ်သားခန့်၊ ယိုးဒယားမယ်အသေး (၁) ထုတ်၊ ကြက်သွန်နီ (၁)ပိဿာ၊ ကြက်သွန်ဖြူ (၁၀)ကျပ်သား၊ အားလူး (၅၀) ကျပ်သားတို့ကို ဂျင်း၊အချိုမှုန့်၊နနွင်းမှုန့်နှင့် မဆလာတို့ လိုအပ်သလို ထည့်၍ သမအောင် ရောနယ်ရသည်။

          အဆိုပါ မုန့်နှစ်များကို အသင့်တည်ထားသော ဆီပူအိုးထဲသို့ ထည့်ကြော်ခြင်းဖြင့် ရှမ်းငါးပေါင်းကြော်အဖြစ် ရလာသည်။ ထို့ပြင် မိမိနှစ်သက်ရာ အသား(သို့မဟုတ်)ငါး တစ်မျိုးမျိုး ထည့်၍လည်း ကြော်စားနိုင်သေးသည်။

          ရောင်းချသူများအနေဖြင့် ရှမ်းငါးပေါင်းကြော် ဒိုးဝိုင်းစာ ၁ခုလျှင် (၂၅၀)ကျပ်၊ ၄ခုကို (၁၀၀၀)ကျပ်ဖြင့် ရောင်းချပြီး မိမိတို့အိမ်တွင်လည်း အလွယ်တကူလုပ်စားနိုင်ကြောင်း ရှမ်းငါးပေါင်းကြော် ရောင်းချသည့် ဈေးသည်ထံမှ မေးမြန်းသိရှိရပါသည်။

DOCA(ပဲခူး)