ပြည်တွင်းကုန်သွယ်မှုသတင်း

            ဆန်ကြာဇံသည် တရုတ်ရိုးရာအစားအစာ တစ်မျိုးဖြစ်ပြီး  ၁၉၃၀ ပြည့်နှစ်ဝန်းကျင်လောက် တွင် ထုတ်လုပ်မှုနည်းပညာကူးပြောင်းဖလှယ်၍ ဆန်ကြာဇံအသုံးပြုမှုမှာ မြန်မာနိုင်ငံသို့ရောက်ရှိလာခြင်း ဖြစ် ပါသည်။ စပါးကို ကြိတ်ခွဲလိုက်သည့်အခါ ထွက်ပေါ်လာသည့် ဆန်ကွဲများအား ဆန်ကွဲကို အခြေခံ အစားအစာများ၊ အရက် မုန့်ဟင်းခါးဖက် နှင့် ဆန်ကြာဇံ တို့ကိုလည်း ထုတ်လုပ် နိုင်ပါသည်။ ထို့ကြောင့် ဆန်ကြာဇံထုတ်လုပ်သော စက်ရုံအများစုသည် မြစ်ဝကျွန်းပေါ်ဒေသတွင် ရှိကြခြင်း ဖြစ်ပါသည်။

            ထို့ကြောင့် မြစ်ဝကျွန်းပေါ်ဒေသဖြစ်သည့် ဧရာဝတီတိုင်းဒေသကြီးအတွင်းရှိ ဆန်စက်အများဆုံး တည်ရှိရာဒေသလည်း ဖြစ်သည့် မြောင်းမြခရိုင် အတွင်း၌ ထုတ်လုပ်နေသည့် “စံပြဆန်ကြာဇံလုပ်ငန်း” မှာလည်း ထင်ပေါ်လူကြိုက်များ လှယုံသာမက ဒေသခံများအား အလုပ်အကိုင်အခွင့်အလမ်းများ ဖန်တီး ပေးနိုင်သည့် လုပ်ငန်းတစ်ခုလည်း ဖြစ်ပါသည်။ “စံပြဆန်ကြာဇံလုပ်ငန်း” မှာ အမှတ် (၁၆၄)၊ အောင် ဆန်း လမ်း၊ မြောင်းမြမြို့တွင် တည်ရှိပြီး စက်မှုလုပ်ငန်း လိုင်စင်အမှတ် ဧရ/ငယ်/၅၅၇(၀၃/၀၇/၁၉၉၁) ရရှိပြီးသား လုပ်ငန်း တစ်ခုလည်း ဖြစ်ပါတယ်။ လုပ်ငန်းအား မတည်ရင်းနှီးငွေ သိန်း(၃၀၀၀၀) ခန့်ဖြင့် မတည်၍ ရင်းနှီးမြှပ်နှံထားပြီး (၁) နှစ်လျှင်ဆန်ကြာဇံ အထုပ်ရ (၃၆၅၀၀၀) ခန့် ထုတ်လုပ်လျှက်ရှိပါသည်။

            ဆန်ကြာဇံကို ငစိန်ဆန် (သို့မဟုတ်) ရွှေဝါထွန်း (ဧည့်မထဆန်)တို့ကို အသုံးပြု၍ ထုတ်လုပ်နိုင်ပါသည်။ ဆန်ကြာဇံပြုလုပ်ရာတွင် ရှေးဦးစွာ ဆန်ကိုဖုံး၊ သဲ၊ ခဲများ သန့်စင်ပေးရန် လိုပါသည်။ ဖုံ၊ သဲ၊ ခဲများ ပါသွားပါက နန်းဆွဲ သည့်အခါ ဖုံကပ်နေသည့် နေရာမှနေ၍ ပြတ်တောက်သွားနိုင်ပါသည်။ အချို့သော စက်များ၌ ဆန်ဖြူဖွတ်စက်များဖြင့် ဆန် သို့မဟုတ် ဆန်ကွဲကို ဖြူအောင် ဖွပ်ပေးပါသည်။ ပထမအဆင့် အနေဖြင့် ငစိန်ဆန်ကို ရေဖြင့်ဆေးကြောပါသည်။ ရေဆေးရာ၌ ရေဖြည့်ထားသော အုတ်ကန် အတွင်း ဆန်ကို အိတ်လိုက်လောင်းချပြီး ပွတ်တိုက်ဆေးကြော ပေးပါသည်။ ထို့နောက် ဆေးကြောပြီးသား ဆန်ကို ၂ နာရီမှ ၃ နာရီအထိ ရေစိမ်ပေးရပါသည်။ ရေစိမ်ထား၍ ရေဝနေသော ဆန်များကို ကျောက်ပြားကြိတ်ဆုံတွင် ရေလောင်း၍ မုန့်နှစ်ကြိတ်ပါသည်။ ရရှိသော မုန့်နှစ်ရည်များကို ပီနန်အိတ်များတွင်ထည့်၍ ရေထုတ်ရန် အလေးဖြင့် ဖိ၍ ဖြစ်စေ၊ ဟိုက်ဒရောလစ် ဖိစက်ဖြင့်ဖြစ်စေ ဖိညှပ်ပေးပြီး ရေထုတ်ပေးပါသည်။ အချို့စက်များ၌ အပေါ်က ဂုံနီအိတ်တစ်ထပ်ထပ်၍ ဖိညှပ်ပြီး ရေထုတ်ပေးပါသည်။ အလေးဖြင့် ဖိညှပ်ခြင်း၊ ဟိုက်ဒရော လစ်စက်ဖြင့် ဖိညှစ်ခြင်းကို တစ်ရက် သို့မဟုတ် တစ်ညခန့် ထားလေ့ရှိပါသည်။ မုန့်နှစ်အတွင်းမှ ရေများ တဖြည်းဖြည်း အိတ်အပြင်သို့ ထွက်သွားပြီး ရေကုန်စင်အောင် ထုတ်ပြီးပါက နောက်တစ်နေ့၌ အိတ်များ အတွင်းမှ မုန့်နှစ်များကို သစ်သား ပျဉ်ခင်းထားသည့် အခင်းပေါ်တွင် ဖြန့်ချပါသည်။ အဆိုပါ သစ်သားအခင်း ပေါ်တွင် ၁၀ လက်မ အထူခန့် ထိရရှိအောင် မုန့်နှစ်များ ဖြန့်ခင်းပြီး ညီညာအောင် ညှိပေးရပါသည်။ သမအောင် နယ်ပြီးသော မုန့်နှစ်ပြင်၏ အထူသည် ၁၀ လက်မခန့် ထူပါသည်။ ယင်းမုန့်နှစ်ပြင်ကြီးကို ပေါက်တူးဖြင့် ၆ လက်မ x ၆ လက်မ x ၁၀ လက်မ အရွယ် အတုံးများရအောင် ပြုလုပ်ပါသည်။ အဆိုပါ မုန့်နှစ်တုံးများကို ရေနွေးငွေ့ဖြင့် ပေါင်းပေးရန်လိုပါသည်။ ရေနွေးငွေ့ထုတ်ယူရရှိရန် မိုးဗြဲဒယ်ကြီးတွင် ရေထည့်ပြီး စပါးခွံ လောင်စာဖြင့် မီးအပူပေးပါသည်။ သံဖြင့် ပြုလုပ်ထားသောစင်ကို မိုးဗြဲဒယ်၏ အပေါ်တွင် ထားရှိပါသည်။ မုန့်နှစ်တုံး၏ အပြင်ဖက် ၁ လက်မ ၂ လက်မ ခန့်ကျက်လျှင် အနေတော်ပင် ဖြစ်ပါသည်။

            ရေနွေးငွေ့ဖြင့် ပေါင်းပြီးသော မုန့်နှစ်တုံးများကို သံမဏိဒလိမ့်တုံး၊ သစ်ဒလိမ့်တုံး နှစ်ခုပါရှိသည့် Roller Mill ဖြင့် ထပ်မံ၍ ဖိညှစ်နယ်ပြီးသော မုန့်နှစ်တုံးများကိုဖိညှစ်စက်တွင် ထည့်ပါသည်။ ဖိညှစ်စက်တွင် တပ်ဆင်ထားသော ခွက်၏ အချင်းမှာ ၇ လက်မ ခန့်ရှိပြီး အပေါက်ငယ်ပေါင်း ၁,၀၀၀ ခန့်ဖောက်လုပ် ထားပါ သည်။ မုန့်နှစ်ကို ဖိညှပ်လိုက်သောအခါ အဆိုပါ အပေါက်ငယ်များမှ ဆန်ကြာဇံအမျှင်အစိုများ ထွက်လာပါသည်။ ထွက်လာသော ဆန်ကြာဇံ အမျှင်အစိုများကို ဝါးကပ်ဗန်းများပေါ်တွင် တင်၍ ရေနွေးငွေ့ဖြင့် ထပ်မံ၍ ပေါင်းပေး ပါသည်။ ပေါင်းချိန်ကာလမှာ ၃၀ - ၄၅ မိနစ်ခန့် ဖြစ်ပါသည်။ ရေနွေးငွေ့ဖြင့် ပေါင်းပြီးသော ဆန်ကြာဇံ အမျှင်အစိုများကို ဝါးကပ်ဗန်းများပေါ် ပြောင်းတင်း ပြီး ၂ နာရီ ကျော်သည်အထိ အအေးခံရပါသည်။ ဆန်ကြာဇံအမျှင်များကို အအေးခံပြီးလျှင် သင့်လျော်သည့် အရှည်ရအောင် ခေါက်ပေးပါသည်။ ဆန်ကြာဇံ အမျှင်အခေါက်များကို ဝါးဗန်းများပေါ်တင်၍ နေပူထုတ်လှန်းပါသည်။ တစ်နေကုန် လှန်းပြီးသောအခါ ဆန်ကြာဇံ အခေါက်များကို ချိန်တွယ်၍ထုတ်ပိုးကား စျေးကွက်သို့ တင်ပို့ရောင်းချပါသည်။ လက်ကားဖြန့်ဖြူးရန်အတွက် ၅ ပိဿာ အထုပ်ကြီးများမှ  ၁၀ ကျပ်သား နှင့်၂၀ ကျပ်သား အထုတ်ငယ်များအထိ ထုတ်လုပ် ရောင်းချလျက်ရှိကြောင်းလည်း သိရှိရပါသည်။

DOCA(ဧရာဝတီ)

          ဟင်းခတ် ငရုတ်ကောင်း ဆိုတာကို ထွေထွေထူးထူး ပြောစရာမလိုအောင်လူသိများပြီးသား မီးဖို ချောင် သုံးဟင်းခတ်အမွှေးအကြိုင် တစ်မျိုး ဖြစ်ပါတယ်။ ငရုတ်ကောင်းကို ဟင်းခါးတွေ၊ အသားဟင်းတွေမှာ ထည့်သွင်းအသုံးပြုကြပါတယ်။ အရှေ့တိုင်းထမင်းဝိုင်းမှာ ပါလေ့ရှိတဲ့ ဟင်းခတ်အမွှေးအကြိုင်ဖြစ်သလို အနောက်တိုင်းအစားအစာ၊ ဥရောပအစားအစာတွေမှာလည်း ငရုတ်ကောင်းလေး ဖြူးထားတာ တွေ့ရများ ပါတယ်။ ငရုပ်ကောင်းကို စားသုံးလိုက်သည် နှင့် ပူရှိန်းရှိန်း မွှေးတေးတေးနဲ့ အခိုးပွင့်စေဖို့ လုပ်ဆောင် ပေးပါတယ်။ အခိုးပွင့်စေတယ်ဆိုတာအပြင် အသားအရေအတွက်အပါအဝင် တခြားကျန်းမာရေး အကျိုး ကျေးဇူးများအပြင် စိတ်ကျခြင်းကို သက်သာစေခြင်း၊ အစာခြေစနစ်ကို ကောင်းစေခြင်း၊ အာဟာရစုပ်ယူမှု အားကောင်းစေခြင်း၊ ဝိတ်ကျစေခြင်း၊ ချောင်းဆိုးနဲ့ လည်ချောင်းနာပျောက်ကင်းစေခြင်း၊  နှလုံးကျန်းမာ စေခြင်း၊ သွားကိုက်သက်သာစေခြင်း၊ ဆံပင်ဖြူခြင်းကို ကာကွယ်ခြင်း၊ အဆစ်နာဝေဒနာ သည်တွေ အတွက် သက်သာစေခြင်း၊ အသားအရေကို ကြည်လင်စေခြင်း နှင့် ပျားရည် သို့မဟုတ် ဒိန်ချဉ်တို့နဲ့ ရောစပ်ပြီး exfoliator အဖြစ် ဆဲလ်သေဖယ်ရှားရာ တွင်လည်း အသုံးပြုနိုင်ပါတယ်။

          လူသားများအတွက် အကျိုးကျေးဇူးများစွာရှိသော ငရုပ်ကောင်းကို မြောင်းမြမြို့ရဲ့ “စစ်မှစစ်” ငရုပ် ကာင်းထုတ်လုပ်ရေး လုပ်ငန်းမှ ဈေးကွက်လိုအပ်ချက်အရ ပုံစံမျိုးစုံဖြင့် ထုတ်လုပ်လျှက်ရှိပါတယ်။ “စစ်မှစစ်” ငရုပ်ကာင်းထုတ်လုပ်ရေး လုပ်ငန်းမှ ထုတ်လုပ်လိုက်တဲ့ ငရုပ်ကောင်းတွေကတော့ ဧရာဝတီ တစ်တိုင်း လုံးတွင်သာမက ရန်ကုန်တိုင်းအထိပါ နာမည်ကြီးလှပါတယ်။ “စစ်မှစစ်” ငရုပ်ကာင်းထုတ်လုပ်ရေး လုပ်ငန်း ပိုင်ရှင်မှာ ဦးသုခအောင် ဖြစ်ပြီး ၎င်းအနေဖြင့် ငရုပ်ကောင်းများကို မြောင်းမြ-လပွတ္တာ ကားလမ်း ဘေး၊ မိုင်တိုင်အမှတ် (၂၁/၂) တွင် ၂၀၀၉ ခုနှစ်လောက်မှစတင်၍ စိုက်ပျိုးခဲ့ခြင်း ဖြစ်ပါသည်။ စိုက်ပျိုးစဉ်က ထွက်ရှိ လာသော ငရုပ်ကောင်း ကုန်ကြမ်းများအား ဒိုင်သွင်းရောင်းချသည့် စနစ်ဖြင့်သာ ရောင်းချခဲ့ခြင်း ဖြစ်ပါသည်။ ထို့နောက် ငရုပ်ကောင်းများကို ကိုယ်တိုင်ကုန်ချော အဖြစ် ထုတ်လုပ်ရောင်းချလိုသဖြင့် ၂၀၁၉ ခုနှစ်တွင် အသေးစားစက်မှုလုပ်ငန်း လိုင်စင်အမှတ် အစ၁၄-၂၃၇၉၁ ရယူကာ ကုန်ချောများအား စတင် ထုတ်လုပ်ခဲ့ခြင်း ဖြစ်ကြောင်းလည်း သိရှိရပါသည်။ ရင်းနှီးမြုပ်နှံမှုအနေဖြင့် သိန်း (၃၀၀) ခန့် ရင်းနှီးမြုပ်နှံမှုများ ဆောင်ရွက်ခဲ့ပြီး ထုတ်လုပ်မှုအနေဖြင့် (၁) နှစ်လျှင် (၉၀၀၀၀) ခန့် ထုတ်လုပ်လျှက် ရှိပါသည်။ ထုတ်လုပ်မှုအနေဖြင့်၂၅ ကျပ် သား ငရုပ်ကောင်းအစေ့ထုပ် ၂၀ ဂရမ် ငရုပ်ကောင်းမှုန့်ဗူး၊ ၂၅ ကျပ်သား ငရုပ်ကောင်းမှုန့်အထုပ် နှင့် ဗူးပါကင်၊ တစ်ခါသုံး (၁၀၀) ကျပ်တန် ငရုပ်ကောင်းစေ့ နှင့် ငရုပ်ကောင်းမှုန့်၊ (၁၀)ကျပ်သားနှင့် (၂၀)ကျပ်သား ငရုပ်ကောင်းမှုန့်ဗူး တို့အား ဈေးကွက် လိုအပ်ချက် များအရ ထုပ်ပိုးရောင်းချလျက်ရှိပါသည်။

          လူကြိုက်အများဆုံး အဝယ်များသည်မှာ ငရုပ်ကောင်းစေ့အထုပ်များပင်ဖြစ်ပါသည်။ မိမိတို့အနေဖြင့် စိုက်ပျိုးပြီးသား ငရုပ်ကောင်းများကို ရိတ်သိမ်းပြီးပါက နေပူတွင်(၇)ရက်ခန့် ခြောက်သွေ့နေအောင် နေပူလှန်းရပါတယ်။ ခြောက်သွေ့နေသော ငရုပ်ကောင်းစေ့များကို ပီနန်အိတ်တစ်ထပ်၊ ပလပ်စတစ် အိတ်တစ်ထပ်၊ စက္ကူအိတ်တစ်ထပ် စသည်ဖြင့် အစိုမပျံစေရန် အထပ်ထပ်ထုပ်ပိုးပြီး သိမ်းဆည်းရပါတယ်။ သိမ်းဆည်း ထားသော ငရုပ်ကောင်းစေ့များမှာ အကျိုးအကြေနှင့် အမှုန်များ မပါရှိစေရန်အတွက် လေမှုတ်စက်များဖြင့် မှုတ်ထုတ်ပြီးမှသာလျှင် ပါကင်ထုပ်ပိုးသည့် စနစ်ကို ဆောင်ရွက်သောကြောင့် မိမိတို့ ငရုပ်ကောင်းစေ့များမှာ အမှုန်များမပါခြင်း၊ မှိုမတက်ခြင်း ၊ အနံ့လွန်စွာမွှေးခြင်း တို့ကြောင့် လူကြိုက် များလှခြင်း ဖြစ်ကြောင်းသိရှိရပါသည်။ ငရုပ်ကောင်းမှုန့် ထုတ်လုပ်မှုအနေဖြင့်လည်း ငရုပ်ကောင်းစေ့များအာ လှော်၍အမှုန်ကြိတ်ပြီးပါက အအေးခံကာ ပါကင်ထည့်ထုပ်ပိုးခြင်းများကို ဆောင်ရွက်သည့် အနံလွှင့်ပျယ်မှုမရှိအောင် ဆောင်ရွက်ပြီးမှသာ ထုတ်လုပ်ဖြန့်ဖြူးကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသထွက် နာမည်ကြီးအစားအသောက်များထဲတွင် ရေကြည်မြို့ရဲ့ ဒေသထွက်ကုန် နုထွေး(၁၂)မျိုးဂျင်းသုပ်လည်း တစ်မျိုးအပါအဝင် ဖြစ်ပါတယ်။  နုထွေး(၁၂)မျိုးဂျင်းသုပ်နှင့် အကြော်စုံ လုပ် ငန်း ကို ရေကြည်မြို့၊ အမှတ်(၆၃၀)၊ အောင်ဆန်း(၁)လမ်း၊ ဗထူးရပ်ကွက်တွင် ဒေါ်ဝါဝါဟန်ဆိုသူမှ ဦးစီး ဆောင်ရွက်နေခြင်းဖြစ်ပြီး လုပ်ငန်းရပ်တည်လာသည်မှာ နှစ်ပေါင်း(၄၀)ကျော်ခန့်ရှိနေပြီ ဖြစ်ကြောင်းလည်း သိရှိရပါသည်။ ဂျင်းသုပ်ရရှိရန်အတွက် ဦးစွာဂျင်းနုများအား လှီး၍ ဆား၊ အချဉ် တို့နှင့် (၂) ရက်ခန့် စိမ် ထားရပါတယ် သို့မှ စားသုံးလို့ရသည့် ဂျင်းချဉ်အား ရရှိလာပါသည်။ ဂျင်းသုပ်တွင် ထည့်ထားသည့် (၁၂) မျိုး အကြော်စုံများမှာတော့ မြေပဲ၊ နှမ်း၊ ကြက်သွန်ကြော်၊ ပဲကြမ်းကြော်၊ ပဲလွန်း၊ အုန်းသီးကြော်၊ ကန်စွန်းဥကြော်၊ ငှက်ပျော်ကြော်၊ ပဲမှုန့်၊ ဆီ စသည်တို့ ဖြစ်ပါတယ်။ အုန်းသီးကြော်၊ ကန်စွန်းဥကြော်၊ ငှက်ပျော်ကြော်၊ ပဲမှုန့် တို့ကို မိမိတို့ကိုယ်တိုင် ကြော်လှော်ခြင်းလုပ်ငန်းများကို ဆောင်ရွက်ကြပြီး ကျန်ရှိသည့်အကြော်နှင့် ပစ္စည်း များကို ရန်ကုန်မြို့ရှိ ဘုရင့်နောင်ပွဲရုံမှ မှာယူလေ့ရှိကြောင်းလည်း လေ့လာသိရှိရပါသည်။ ဂျင်းသုပ်များကို ထုတ်လုပ်ရောင်းချရာတွင် ဂျင်းအစို နှင့် ဂျင်းခြောက်၍ (၂)မျိုးထုတ်လုပ်ရောင်းချလျှက်ရှိပြီး ဂျင်းစိုမှာ လူကြိုက်များလှသော်လည်း ထုတ်လုပ်သည့်နေ့မှ (၁)လထိသာ ကြာရှည်ခံပါကြောင်းနှင့် ဂျင်းခြောက်မှာ (၆)လအထိ တာရှည်ခံသည့်အတွက်နှစ်ရှည်ထား၍ စားသုံးသည့်သူများဝယ်ယူလေ့ရှိကြောင်းကိုလည်း သိရှိရပါသည်။

DOCA(ဧရာဝတီ)

          မကွေးတိုင်းဒေသကြီး၊ စလင်းမြို့၊ ဆင်ဖြူကျွန်းမြို့၊ ပွင့်ဖြူမြို့နှင့် မင်းဘူးမြို့နယ်အတွင်းရှိ ကျေးရွာများတွင် အဓိက စိုက်ပျိုးကြပြီး ထွက်ရှိလာသော ငရုတ်သီးများကို မင်းဘူးမြို့နှင့် မကွေးမြို့ရှိ ပွဲရုံများသို့ တင်ပို့ရောင်းချကြောင်း သိရသည်။

          ၂၀၂၅ခုနှစ်၊ မတ်လ(ဒုတိယပတ်)တွင် မကွေးမြို့၌ ငရုတ်သီးခြောက်(ရှည်) (၁)ပိဿာလျှင် ကျပ်(၁၁၅၀၀) ရောင်းချလျက်ရှိရာ ယခင်(ပထမပတ်)နှင့်ဈေးနှုန်းနှိုင်းယှဉ်ပါက ငရုတ်သီးခြောက် (ရှည်) ကျပ်(၅၀၀)ဈေးနှုန်းကျဆင်းလာကြောင်း၊ ယခုအချိန်တွင် ဆင်ဖြူကျွန်းဒေသထွက် ငရုတ်သီး ခြောက်(ရှည်)အသစ်များ ဈေးကွက်အတွင်းသို့ ဝင်ရောက်မှုများလာသော ကြောင့် ဈေးနှုန်းမှာ ကျဆင်းရခြင်းဖြစ်ကြောင်း ကုန်စိမ်းသီးနှံ ရောင်းချသည့်ဈေးသည် တစ်ဦးထံမှ သိရှိရသည်။

DOCA(မကွေး)

          မကွေးတိုင်းဒေသကြီး၊ အထက်မင်းလှမြို့၊ ဇေယျာသီရိဈေး၌ မေမြို့ပန်းကို မြို့အနီးရှိ ညောင်ပင်သာကျေးရွာ၊ ပန်းတော်ပြင်ကျေးရွာနှင့် မယ်ဇလီတောကျေးရွာများတွင် အဓိကစိုက်ပျိုး ရောင်းချလျက်ရှိသည့်အပြင် မန္တလေးမြို့နှင့် ပြင်ဦးလွင်မြို့တို့မှလည်း မှာယူရောင်းချလက်ရှိကြောင်း သိရသည်။

          ၂၀၂၅ခုနှစ်၊ မတ်လ(ဒုတိယပတ်)တွင် မေမြို့ပန်း သုံးပင်ပါ(၁)စည်းလျှင် ကျပ်(၅၀၀)ဖြင့် ရောင်းချလျက်ရှိပြီး ယခင်မေမြို့ပန်းပေါ်စအချိန် ဖေဖော်ဝါရီလ(ပထမပတ်)တွင် မေမြို့ပန်း သုံးပင်ပါ (၁)စည်းလျှင် ကျပ်(၁၀၀၀ - ၁၅၀၀)ဖြင့် ရောင်းချလျက်ရှိရာ လနှစ်လဈေးနှုန်းနှိုင်းယှဉ်ပါက ကျပ် (၅၀၀-၁၀၀၀)ဈေးနှုန်းကျဆင်းခဲ့ကြောင်း၊ ယခုမတ်လတွင် ဒေသတွင်းရှိ မေမြို့ပန်းစိုက်ခင်းများ လှိုင်လှိုင်ထွက်ရှိနေသောကြောင့် ဈေးနှုန်းမှာ ယခင်လကထက် ကျဆင်းလာရခြင်းဖြစ်ကြောင်း ဈေးအတွင်း ပန်းရောင်းချသည့် ဈေးသည်တစ်ဦးထံမှ သိရှိရပါသည်။

DOCA(မကွေး)