ပြည်တွင်းကုန်သွယ်မှုသတင်း

            မန္တလေးတိုင်းဒေသကြီး၊ ကျောက်ဆည်ခရိုင်ရှိ စိုက်ပျိုးရေးလုပ်ကိုင်နေကြသော တောင်သူ ကြီးများသည် ပဲ၊ ပြောင်း၊ နှမ်း၊ စပါး၊ ကြက်သွန်၊ ဝါသီးနှံများကိုလည်း ရာသီအလိုက် စိုက်ပျိုးကြပါ သည်။ ထိုသီးနှံများအပြင် စားဖိုဆောင်သီးနှံများကိုလည်း စီးပွားဖြစ်စိုက်ပျိုးကြပြီး ခရမ်းသီးပင် များကိုလည်း စိုက်ပျိုးကြကြောင်း သိရှိရပါသည်။ ခရမ်းပင်ကို ကျောက်ဆည်မြို့နယ် ကျောင်းကုန်း ကျေးရွာတွင် စိုက်ပျိုးလျှက်ရှိပြီး မျိုးအနေဖြင့် စိန်းညိုလုံးကြီးမျိုး၊ ၇၈၉မျိုး နှင့်(၅၅၅)မျိုးများကို စိုက်ပျိုးကြကြောင်းသိရှိရပါသည်။ခရမ်းပင်စိုက်ပျိုးမည်ဆိုပါကပထမဦးဆုံးပျိုးအရင်ထောင်ရကြောင်း၊ ပျိုးပင်သက် (၁)လခွဲသားအရွယ်တွင် ပြောင်းရွေ့စိုက်ပျိုးရကြောင်း၊ ပြောင်းရွေ့စိုက်ပျိုးပြီး (၂)လ၊ (၃)လအကြာတွင် ခရမ်းသီးများ စတင်ခူးဆွတ်ရကြောင်း၊ တစ်ဧက တစ်ပတ်အထွက်နှုန်းမှာ ပိဿာ (၁၅၀)မှ (၂၀၀)အထိ ထွက်ရှိကြောင်း သိရှိရပါသည်။ သက်တမ်းအနေဖြင့် (၅)လအထိ ခရမ်းသီး များ ခူးဆွတ်နိုင်ကြောင်း၊ တစ်ဧက ကုန်ကျစရိတ်အနေဖြင့် (၈၀၀၀၀/-) ကျပ် ခန့်ရှိပြီး စတင်ခူး ဆွတ်ချိန်မှ ဖျက်သိမ်းချိန်အထိ ခရမ်းသီးထွက်ရှိမှု စုစုပေါင်း(၂၀၀၀)ပိဿာ ထွက်ရှိကြောင်း သိရှိရပါသည်။ ခရမ်းသီး တစ်ပိဿာလျှင် လက်လီဈေးအနေဖြင့် (၁၂၀၀-၁၄၀၀) ကျပ်ရှိပြီး ကုန်စိမ်းပွဲစားများမှ စိုက်ခင်းထဲအထိ လာရောက်ဝယ်ယူကြကြောင်း၊လက်ကားဈေးအနေဖြင့်တစ်ပိဿာလျှင်(၁၀၀၀/-)ကျပ်ဖြင့် အရောင်းအဝယ်ဖြစ်နေကြောင်း၊ တစ်ဧကအကျိုးအမြတ် အနေဖြင့် ယခုလက်ရှိခရမ်းသီးဈေးနှုန်းများ ကောင်းမွန်သောကြောင့် (၁၂၀၀၀၀၀/-) ကျပ်ခန့်မြတ်ကြောင်း၊ တောင်သူများအနေဖြင့် အကျိုးအမြတ် ရရှိသည့် ခရမ်းသီး သီးနှံကို ပိုမိုစိုက်ပျိုးသင့်ပါကြောင်း ရေသားတင်ပြအပ်ပါသည်။

DOCA (မန္တလေး)

           မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကို အဓိကထားလုပ်ကိုင် ဆောင်ရွက်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ဈေးကွက်ဝယ်လိုအား ရှိသော သခွားမွှေးသီးနှံကိုလည်းစိုက်ပျိုးလျက်ရှိကြောင်း၊ သခွားမွှေးစိုက်ပျိုးမှုအနေဖြင့် မျိုးစေ့ဝယ်၍ ပျိုးထောင် စိုက်ပျိုးရကြောင်း၊ ပျိုးသက်တမ်း (၂၅)ရက်မတိုင်မီစိုက်ခင်းထဲသို့ပြောင်းရွေ့စိုက်ပျိုးရကြောင်း၊မျိုးစေ့ကိုစိုက်ပျိုးရေးဆေးဆိုင်များမှဝယ်ယူစိုက်ပျိုးကြကြောင်း၊သခွားမျိုးစေ့တစ်ထုတ်လျှင်(၃၅၀၀၀-၄၀၀၀၀)ကျပ်ဖြင့် ဝယ်ယူရကြောင်း၊ တစ်ဧကမျိုး (၂၀၀)ဂရမ် စိုက်ပျိုးရကြောင်း၊ ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ၊ တိုင်ထောင်ဝါး၊ ပလပ် စတစ်လိပ်ဖိုး များအပါအဝင် စုစုပေါင်း (၆၀၀၀၀၀၀/-)ကျပ်ခန့် ကုန်ကျကြောင်း၊ သွင်းအားစုများ ပိုမိုသုံးစွဲပါက ကုန်ကျစရိတ်ပိုမိုများပြားနိုင်ကြောင်း၊ သခွားမွှေးစိုက်ပျိုးရာတွင် တန်းကြားတစ်ပင်လျှင် (၃)ပေခြား၊ (၂)ပေခြား၍ စိုက်ပျိုးကြောင်း၊ တစ်ဧကလျှင် အပင်ပိုင် (၇၀၀၀)ကျော်ခန့် ဝင်ဆန့်ကြောင်း၊ စတင်အသီးသီးချိန်မှ (၃)လုံးအထိ တင်စေပြီး တင်းနစ်ဘောလုံး အရွယ်အစားရောက်လျှင် တစ်ပင်ကို (၂)လုံးသာယူကြောင်း၊ အသီးတင်ပြီး (၁၀)ရက်တစ်ကြိမ် သွင်းအားစုများ ထည့်ပေးရကြောင်း၊ စိုက်ပျိုးပြီး ရက်(၃၀)အကြာတွင် ပန်းများစတင်ပွင့်ပြီး ပန်းပွင့်ပြီး (၃၅)ရက်၊ (၄၅) ရက်တွင် အသီးများစတင်ခူးခွတ်နိုင်ပြီးဖြစ်ကြောင်း၊ စိုက်ပျိုးမှု မျိုးအနေဖြင့် ရွှေသခွား၊ ကျောက်စိမ်း သခွားနှင့် ပိုက်ကွက်သခွားမျိုးများကို စိုက်ပျိုးကြကြောင်း ၊ ဇွန်လဆန်းတွင် စိုက်ပျိုးခဲ့သောကြောင့် အောက်တိုဘာလဆန်းပိုင်းမှစတင်၍ ထွက်ပေါ်နေပြီဖြစ်ကြောင်း၊ တစ်ဧကအထွက်နှုန်းအနေဖြင့် အလုံးပေါင်း (၁၄၀၀၀)ခန့် ထွက်ရှိကြောင်း၊ ခရိုင်အတွင်း လက်ရှိစိုက်ပျိုးမှု အနည်းငယ်သာရှိပြီး စိုက်ပျိုးသောရွာမှာ မြေစိုရွာဖြစ်ကြောင်း၊ ယခုလက်ရှိဈေးကွက်အတွင်း သခွားမွှေးသီးဈေးနှုန်းများ အနေဖြင့် အလုံးကြီး ရှယ်သန့်တစ်လုံးလျှင် လက်လီဈေး(၈၀၀၀/-)ကျပ်၊ လက်ကားဈေး အလုံး (၁၀၀)ဈေး တစ်လုံးလျှင် (၆၀၀၀/-)ကျပ်ဖြင့် ဝယ်ယူရောင်းချရကြောင်း၊ တစ်ဧက အကျိုးအမြတ် အနေဖြင့် စိုက်ပျိုးစရိတ်နှုတ်ပြီး (၂၄၀၀၀၀၀/-)ကျပ်ခန့်မြတ်ကြောင်း၊ မြို့နယ်အတွင်း ထွက်ရှိသော အသီးများဖြစ်ပြီး သစ်သီးဆိုင်များမှ သခွားဈေးနှုန်း အနေဖြင့် ကျောက်စိမ်းသခွား/ ပိုက်ကွက်သခွား တစ်လုံးလျှင် အလုံးသေး (၆၀၀၀/-)ကျပ်၊ အလုံးကြီး (၈၀၀၀/-) ကျပ်၊ ရွှေသခွား တစ်လုံးလျှင် အလုံးကြီး(၈၀၀၀/-)၊ အလုံးသေး (၅၅၀၀/-) ကျပ်တို့ဖြင့် ရောင်းဝယ်လျက်ရှိကြောင်း ဈေးကွက် အနေဖြင့် မြို့ပေါ်ရှိ သစ်သီးဆိုင်များ၊ သစ်သီးပွဲရုံများနှင့် ဈေးများသို့ ရောင်းချလျက်ရှိပြီး ပွဲရုံများမှ တစ်ဆင့် မန္တလေးမြို့၊ ရန်ကုန်မြို့များသို့ တင်ပို့လျက်ရှိကြောင်း၊ သစ်သီးဆိုင်များမှ စိုက်ခင်းထဲ အရောက်လာရောက် ဝယ်ယူသူများလည်းရှိကြောင်း သိရှိရ ပါသည်။

DOCA (မန္တလေး)

   မိတ္ထီလာ ဈေးကွက်အတွင်း ယခုအောက်တိုဘာလ ဒုတိယအပတ်တွင် အပါချီဘိလပ်မြေ တစ်အိတ်လျှင် (၁၈၀၀၀)ကျပ်၊ ကြံ့နှစ်ကောင်ဘိလပ်မြေတစ်အိတ်လျှင်(၁၈၀၀၀)ကျပ်၊ Alpha ဘိလပ်မြေတစ်အိတ် လျှင်(၁၇၅၀၀)ကျပ်ဖြင့် အရောင်းအဝယ်ဖြစ်လျက်ရှိပြီးယခင်လနှင့် ကာလတူ နှိုင်းယှဉ်လျှင် အပါချီဘိလပ်မြေတစ်အိတ်လျှင်(၃၀၀၀)ကျပ်၊ ကြံ့နှစ်ကောင်ဘိလပ်မြေတစ်အိတ်လျှင် (၁၀၀၀)ကျပ်၊ Alpha ဘိလပ်မြေတစ်အိတ်လျှင်(၂၅၀၀)ကျပ် ဈေးနှုန်းမြင့်တက်လာကြောင်းသိရသည်။ မိုးရာသီကုန်ချိန်ဖြစ်၍ စက်ရုံထုတ်ဈေးမြှင့်တက်လာခြင်းကြောင့် ဖြစ်ကြောင်းသိရသည်။ မိတ္ထီလာမြို့ သို့ သာစည်မြို့နယ်၊ ပြည်ညောင်ကျေးရွာမှ အပါချီဘိလပ်မြေ၊ ကျောက်ဆည်မြို့မှ ကြံ့နှစ်ကောင်နှင့် Alpha ဘိလပ်မြေများ ဝင်ရောက်ပြီး မိတ္ထီလာ၊ သာစည်၊ ဝမ်းတွင်းနှင့် မလှိုင်မြို့နယ်များမှ ဝယ်လက် များသို့ ရောင်းချရကြောင်း ဈေးကွက်မှ သိရသည်။

DOCA(မန္တလေး)

     အောက်တိုဘာလ၊ တတိယအပတ်တွင် ရှမ်းပြည်နယ်(မြောက်ပိုင်း)၊ မူဆယ်မြို့ရှိ မြို့မဈေးတွင် ရောင်းချနေသော အာလူးဈေးနှုန်းမှာ တစ်ပိဿာလျှင် (၃၀၀၀) မှ (၃၅၀၀) ကျပ်၊ ကြက်သွန်နီ တစ်ပိဿာလျှင် (၄၀၀၀) မှ (၄၅၀၀) ကျပ်၊ ကြက်သွန်ဖြူ(ကြူကုတ်) တစ်ပိဿာလျှင်(၉၅၀၀) ကျပ်မှ (၁၁၀၀၀) ကျပ် အထိရှိပြီး အမျိုးအစားပေါ်မူတည်၍ ကွဲပြားကြောင်း သိရှိရသည်။ ရှမ်းပြည်နယ်(မြောက်ပိုင်း)တွင် လတ်တလောဖြစ်ပေါ်နေသော နိုင်ငံရေးအခြေနေများကြောင့် ကုန်စည်စီးဆင်းမှုများခက်ခဲလျက် ရှိနေပြီး၊ နယ်စပ်ဖြစ်သော တရုတ်ပြည်မှတစ်ဆင့်အဓိကထားပြီး တစ်နိုင်တစ်ပိုင်စားသုံးရန်ယူ၍ ရောင်းချနေရကြောင်း၊ အရောင်းအဝယ်များလည်းပါးနေကြောင်း ကုန်ရောင်းချသူများထံမှ သိရှိ ရပါသည်။

DOCA(ရှမ်း)

    ရှမ်းပြည်နယ်(မြောက်ပိုင်း)၊ လားရှိုးမြို့၊ မြို့မဈေးတွင် ဒေသထွက်သီးနှံများအပြင် အသား/ ငါး နှင့် ဟင်သီးဟင်းရွက်မျိုးစုံကိုလည်းရောင်းချလျက်ရှိရာ အခြေခံစားကုန်ဖြစ်သော မြေပဲဆံနှင့် ကုလားပဲ များကိုလည်း ပေါများစွာရောင်းချလျက်ရှိကြောင်း တွေ့ရှိရပါသည်။

     အောက်တိုဘာလ၊ တတိယအပတ်တွင် ရှမ်းပြည်နယ်(မြောက်ပိုင်း)၊ လားရှိုးမြို့ရှိ မြို့မဈေးတွင် ရောင်းချနေသော မြေပဲဆံဈေးနှုန်းမှာ တစ်ပိဿာလျှင် (၁၁၀၀၀ မှ ၁၃၀၀၀) ကျပ်၊ ကုလားပဲတစ်ပိဿာလျှင် (၁၁၀၀၀ မှ ၁၃၀၀၀) ကျပ် နှုန်းဖြင့်ရောင်းချလျက်ရှိပြီး အမျိုးအစားပေါ်မူတည်၍ ကွဲပြားကြောင်း သိရှိရပါသည်။‌

DOCA(ရှမ်း)