သတင်းနှင့် လှုပ်ရှားမှုများ

စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၌  တိုင်းဒေသကြီးဦးစီးမှူးနှင့် ဌာနခွဲတာဝန်ခံများသည် (၁၉.၁၂.၂၀၂၄)ရက်နေ့၊ နံနက်(၁၀း၀၀) နာရီအချိန်တွင် စာသုံးဆီဖြန့်ဖြူးရောင်းချသူ လုပ်ငန်းရှင်များအား တွေ့ဆုံဆွေးနွေးခဲ့ရာ လုပ်ငန်းရှင် (၈)ဦးနှင့် ဌာနခွဲတာဝန်ခံများ(၁၂)ဦး၊စုစုပေါင်း (၂၀)ဦး တက်ရောက်ခဲ့ကြောင်း သိရပါ သည်။

အဆိုပါ တွေ့ဆုံဆွေးနွေးပွဲတွင် တိုင်း‌ဒေသကြီးဦးစီးမှူးက ပြောကြားရာတွင် ဆီကုန်သည်များ၊ ဆီလုပ်ငန်းရှင်များအနေဖြင့် စားအုန်းဆီခွဲတမ်းများကို သတ်မှတ်စည်းမျဉ်း စည်းကမ်းများနှင့်အညီ စနစ်တကျ ဖြန့်ဖြူးရောင်းချရန်၊ ခွဲတမ်းရရှိသည့်ဆိုင်များအနေဖြင့် ဈေးနှုန်းကို အများမြင်သာအောင် ဗွီနိုင်းချိတ်ဆွဲထားရှိရန်၊ ရည်ညွှန်းဈေးဖြင့် ရရှိသော စားအုန်းဆီများကို သင့်တင့်မျှတသော ဈေးနှုန်းဖြင့် ပြည်သူများအား ရောင်းချပေးရန် ဌာနက လည်းကြီးကြပ်ဆောင်ရွက်ပေးလျက်ရှိပါကြောင်း၊ ဘူးသွင်းဆီရောင်းချသူများအနေဖြင့် သက်ဆိုင်ရာဌာနများက ထုတ်ပြန်ထားသည့် အမိန့်၊ ညွှန်ကြားချက်နှင့်အညီ လိုက်နာ ဆောင်ရွက်ပြီး ရောင်းချဖြန့်ဖြူးကြရန်နှင့်မြို့နယ်အလိုက်ဆီခွဲတမ်းများကို မျှတစွာ ခွဲဝေရောင်းချ ကြရန်၊ စားသုံးဆီများကို ဈေးကစားရန် ရည်ရွယ်၍ သိုလှောင်ခြင်း၊ ဈေးနှုန်းအဆမတန် မြှင့်တင်ရောင်းချခြင်းများ မပြုလုပ်ကြရန် ရှင်းလင်း ပြောကြားဆွေးနွေးခဲ့ကြောင်း သိရပါသည်။

          ထို့နောက် တက်ရောက်လာသည့် ဆီကုန်သည်နှင့် ဆီလုပ်ငန်းရှင်များက မုံရွာမြို့ပေါ်တွင် Door to Door စနစ်ဖြင့် ရောင်းချနေခြင်းနှင့် ပတ်သက်၍ ကြုံတွေ့ရသော အခက်အခဲများ၊ အခြားလုပ်ငန်းလုပ်ဆောင်ရာတွင် တွေ့ရှိရသော အခက်အခဲများအား တင်ပြခဲ့ရာ တိုင်းဒေသကြီး ဦးစီးမှူးက လုပ်ငန်းအခက်အခဲများနှင့် ပတ်သက်၍  ပြန်လည်ဆွေးနွေးခဲပြီး ဆီကုန်သည်/ ဆီလုပ်ငန်းရှင်နှင့် တွေ့ဆုံဆွေးနွေးခြင်းကို နေ့လယ် ၁၂း၃၀ နာရီအချိန်တွင် ရုတ်သိမ်းခဲ့ကြောင်း သိရပါသည်။

DOCA(စစ်ကိုင်း)

          ၂၀၂၄ ခုနှစ်၊ ဒီဇင်ဘာလ (၁၇)ရက် နေ့လယ် (၁၂:ဝဝ)နာရီအချိန်၌ စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၊ အစည်းအဝေးခန်းမ-၂၊ ရုံးအမှတ် (၃) နေပြည်တော်တွင် ပြည်ထောင်စုဝန်ကြီး ဦးဆောင်၍ ပို့ကုန် ၂ ဆ တိုးမြှင့်တင်ပို့နိုင်ရေးလုပ်ငန်းညှိနှိုင်းအစည်းအဝေးကို ကျင်းပပြုလုပ်ခဲ့ရာ ဒုတိယညွှန်ကြားရေးမှူးချုပ်များ၊ သက်ဆိုင်ရာ ညွှန်ကြားရေးမှူးများနှင့် ကုန်သွယ်ရေးဦးစီးဌာန၊ နယ်စပ် စခန်းမှ တာဝန်ခံများ၊ စားသုံးသူရေးရာဦးစီးဌာန၊ တိုင်းဒေသကြီး/ ပြည်နယ်ဉီးစီးမှူးများ၊ မြန်မာကုန်သွယ်မှု မြှင့်တင်ရေးအဖွဲ့မှ စီးပွားရေးသံမှူးများက Virtual စနစ်ဖြင့် တက်ရောက်ခဲ့ကြောင်း သိရှိရပါသည်။

အဆိုပါ အစည်းအဝေးတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စု ဝန်ကြီးက အဖွင့်အမှာစကား ပြောကြားခဲ့ကြောင်း သိရသည်။ ဆက်လက်၍ ကုန်သွယ်ရေးဦးစီးဌာန၊ ညွှန်ကြားရေးမှူးချုပ်က ၂၀၂၄-၂၀၂၅ ဘဏ္ဍာရေးနှစ်၊ ပို့ကုန် ဆောင်ရွက်နိုင်မှုအခြေအနေများကို ရှင်းလင်း ပြောကြားခြင်း၊ မြန်မာနိုင်ငံပို့ကုန်အသင်းအဖွဲ့များက ပြည်ပသို့ တင်ပို့နိုင်မည့် သီးနှံများနှင့် ဈေးကွက် အလားအလာများ ဆွေးနွေးတင်ပြခြင်း၊ စီမံကိန်းနှင့် ဘဏ္ဍာရေး ဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ စွမ်းအင် ဝန်ကြီးဌာန၊ စက်မှုဝန်ကြီးဌာန၊ စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာန၊ သီလဝါ အထူးစီးပွားရေးဇုန် စီမံခန့်ခွဲမှုကော်မတီမှ ဒုတိယဝန်ကြီးများက ပို့ကုန်တင်ပို့နိုင်မည့် အခြေအနေများအား ဆွေးနွေးတင်ပြခြင်းနှင့် တိုင်းဒေသကြီး/ ပြည်နယ် စီးပွားရေးရာဝန်ကြီးများက အဓိက စိုက်ပျိုးထွက်ရှိ သည့် ဒေသထွက်သီးနှံအမယ်များအလိုက် ပို့ကုန်မြှင့်တင်နိုင်မည့်အခြေအနေများအား ဆွေးနွေး တင်ပြခဲ့ ကြောင်း သတင်းရရှိပါသည်။

DOCA(စစ်ကိုင်း)

           ၂၀-၁၂-၂၀၂၄ ရက်နေ့၊ နေ့လည် (၁၂:၀၀) နာရီအချိန်တွင် ဘားအံမြို့၊ ခရိုင်ပြန်ကြား ရေး နှင့်ပြည်သူ့ဆက်ဆံရေးဦးစီးဌာနရုံး၌ Online ရောင်းချခြင်းလုပ်ငန်းများနှင့် စပ်လျဉ်း၍ အသိပညာပေးဆွေးနွေးပွဲ  (Talk Show) ကျင်းပခဲ့ကြောင်း သိရသည်။

          ဆွေးနွေးပွဲတွင် ခရိုင်ပြန်ကြား ရေး နှင့်ပြည်သူ့ဆက်ဆံရေးဦးစီးဌာန ဒေါ်အေးအေးစိုး (လက်ထောက်ညွှန်ကြားရေးမှူး)က အွန်လိုင်း Talk Show ကျင်းပရခြင်း၏ ရည်ရွယ်ချက် အကြောင်းပြောကြားခဲ့ပြီး ဆက်လက်၍ စားသုံးသူရေးရာဦးစီးဌာန၊ ဒေါ်စုနွေးသီရိမောင်(ဒု-ဦးစီးမှူး)က အွန်လိုင်းစနစ်ဖြင့် ရောင်းချခြင်းလုပ်ငန်းများနှင့် ပတ်သက်၍ မှတ်ပုံတင်ခြင်း ဆိုင်ရာ အမိန့်ထုတ်ပြန်ချက်အကြောင်း၊ အွန်လိုင်းတွင်အခြေခံဆောင်ရွက်ရမည့် အမျိုးအစားများ အကြောင်း၊ ကုန်စည်နှင့်ဝန်ဆောင်မှုအမျိုးအစား ရွေးချယ်သတ်မှတ်ထားကြောင်း၊ အွန်လိုင်း မှတ်ပုံတင်ခြင်း လုပ်ငန်းများအား အွန်လိုင်းစနစ်ဖြင့် လျှောက်ထားမှုပုံစံ အကြောင်းကို https://www.ecomreg.gov.mm website တွင် လျှောက်ထားရန်အတွက် ဝင်ရောက်ကြည့်ရှု နိုင်ကြောင်း အကျယ်တဝင့် ရှင်းလင်းဆွေးခဲ့ကြောင်း သိရှိရသည်။              

DOCA(ကရင်)

စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ စစ်ဆေးရေးအရာရှိ ဦးမျိုးဝင်းနိုင် ဦးဆောင်၍ စားသုံး/ထုတ်လုံဌာနခွဲမှ ဝန်ထမ်းများသည် (၁၉-၁၂-၂၀၂၄) ရက် ၊ နံနက်(၀၉:၃၀) နာရီအချိန် တွင် ဘားအံမြို့ရှိ  သီရိဈေးတွင်  ရောင်းချနေသော စားသောက်ကုန်များကို ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင် ညွှန်ကြားချက် အမှတ်၊ ၂/၂၀၁၉ နှင့်အညီ ကိုက်ညီမှု ရှိ / မရှိ ‌ဈေးကွက် စောင့်ကြည့်စစ်ဆေးခဲ့ကြောင်း သိရသည်။

          ထိုသို့ဈေးကွက်စောင့်ကြည့်စစ်ဆေးရာတွင် ကရင်ပြည်နယ်စားသုံးသူရေးရာကော်မတီ က  သတ်မှတ်ထားသော ဦးစားပေးဆောင်ရွက်မည့်  ကုန်စည် (၁၀) မျိုးထဲမှ ခေါက်ဆွဲခြောက်အမျိုးမျိုး ဖြစ်သည့်   ငါးမှုန့်ချဉ်ငန်စပ်အရသာ WAIWAI  မှတ်တံဆိပ်တွင် ကုန်အညွှန်းအမှတ်အသား ပြည်စုံစွာ ဖော်ပြထားမှု ရှိ/ မရှိ စစ်ဆေးဆောင်ရွက်ခဲ့သည့်အပြင်  စစ်ဆေးရေးအရာရှိ ဦးမျိုးဝင်းနိုင်က သီရိဈေး တွင် စားသောက်ကုန်များရောင်းချရာ၌ FDA မှ ထောက်ခံချက်ရရှိသော စားသောက်ကုန်များနှင့် စားသုံးသူရေးရာဦးစီးဌာနမှ ဥပဒေနှင့်အညီ ပြဌာန်းသတ်မှတ်ထားသော ကုန်အညွှန်းအမှတ်အသား ပြည့်စုံစွာဖော်ပြထားသည့် စားသောက်ကုန်များကိုသာရောင်းချကြရန်နှင့် ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသော စားသောက်ကုန်များကို မရောင်းချရန် စစ်ဆေးပြောကြားခဲ့ကြောင်း သတင်းရရှိသည်။

          စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးအနေဖြင့် စားသုံးသူများ ဘေးကင်းလုံခြုံ စိတ်ချရမှုရှိစေရန်အတွက် ကရင်ပြည်နယ်အတွင်း ဦးစားပေးကုန်စည် (၁၀)မျိုးကို သတ်မှတ်ထားပြီး ကုန်စည်အမျိုးအစားအလိုက် ဘေးအန္တရာယ်ကင်းရှင်းမှု ရှိ/မရှိ လစဉ်လျာထားချက်များ ချမှတ်၍ သက်ဆိုင်ရာအဖွဲ့များနှင့်‌ ပေါင်းစပ်၍ စစ်ဆေးဆောင်ရွက်လျက်ရှိကြောင်းသိရှိရသည်။

DOCA(ကရင်)

၁၈.၁၂.၂၀၂၄ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ မုဒုံမြို့နယ်တာဝန်ခံ ဦးညီလွင်အေးသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ် စည်ပင်သာယာရေးအဖွဲ့တို့နှင့်ပူးပေါင်း၍ မုဒုံမြို့နယ်၊ မြို့ပေါ်ရပ်ကွက်ရှိ ကုန်စုံဆိုင်များတွင် ရောင်းချနေသော ဆပ်ပြာရည်၊ ဆပ်ပြာခဲနှင့် ဆပ်ပြာမှုန့်အမျိုးမျိုးတို့အား ကွင်းဆင်းစစ်ဆေး

ခဲ့ကြောင်း သိရသည်။

          ထိုသို့ ကွင်းဆင်းစစ်ဆေးရာ ဈေးကွက်အတွင်း ရောင်းချနေသော Lifeboy ဆပ်ပြာခဲ၊ Parrot ဆပ်ပြာခဲ၊ LUX ရေချိုးဆပ်ပြာရည်၊ Family Care ရေချိုးဆပ်ပြာရည်၊ Goat Milk ရေချိုးဆပ်ပြာရည်၊ E-LAN ဆပ်ပြာမှုန့်၊ Rose ဆပ်ပြာမှုန့်၊ Win ဆပ်ပြာမှုန့်အမျိုးမျိုးတို့တွင် မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉) တွင် ဖော်ပြထားသော ကုန်စည်အလိုက် ဖော်ပြရမည့် ကုန်အညွှန်းအမှတ်အသားဖော်ပြချက်နှင့် ကိုက်ညီမှု ရှိ/မရှိ စစ်ဆေးခဲ့ပြီး ၎င်းဆပ်ပြာရည်အမျိုးမျိုးတို့တွင် ကုန်အညွှန်းအမှတ်အသား ပြည့်စုံစွာ ဖော်ပြထားသည်ကို စစ်ဆေးတွေ့ရှိခဲ့ပြီး ဆိုင်ရှင်အား စီးပွားရေးလုပ်ငန်းရှင်များ လိုက်နာရမည့်အချက်များနှင့် စားသုံးသူများ ဘေးအန္တရာယ်ကင်းသော ကုန်စည်များကိုသာ ရောင်းချရန် အသိပေးပြောကြား ခဲ့ကြောင်း သိရှိရပါသည်။

DOCA(မွန်)