သတင်းနှင့် လှုပ်ရှားမှုများ

စားသုံးသူရေးရာဦးစီးဌာန ၊ အရှေ့ပိုင်းခရိုင်  ခရိုင်ဦးစီးမှူး ဦးလှစိုးနှင့် ဝန်ထမ်းများသည်   (၁၃-၁-၂၀၂၅) ရက်နေ့၊ နေ့လယ်(၁၃:၀၀) နာရီအချိန်တွင် တိုင်းရင်းဆေးအမျိုးမျိုးအား ကွင်းဆင်း စစ်ဆေးခြင်း လုပ်ငန်းများဆောင်ရွက်ခဲ့ပါသည်။

        ထိုသို့ဆောင်ရွက်ခဲ့ရာတွင် ကျိုက္ကဆံလမ်းမကြီး ၊ တာမွေမြို့နယ်ရှိ ရွှေအိုးဆေးဆိုင်၌ တိုင်းရင်းဆေးအမျိုးမျိုးဖြစ်သော ဝါယောအဓိက ၊ မှန်ချို ၊ ဧကမ္ဘာ ၊ ဉီးအံ့၊ ရှမ်းပျိုမယ်၊ ဂြိုလ်ထု၊ ရွှေ၊ မဟာဖြေဆေး၊ ဆန္ဒမွန် အစရှိသောဆေးများတွင် ကုန်အညွှန်းအမှတ်အသားတွင် ဖော်ပြရမည့် အချက်များကို မြန်မာလိုပြည့်စုံစွာပါရှိပြီး တချို့သောစားသုံးသူများက တိုင်းရင်းဆေးဝါးများကို အလေးထားပြီး သုံးစွဲနေကြောင်း၊ ရွှေအိုးဆေးဆိုင်တာဝန်ခံကလည်း မိမိတို့ဆေးဆိုင်တွင် ဆီးချိုနှင့် ပတ်သက်သော ဆေးများကိုလည်း ပိုမိုရောင်းချရကြောင်း ၊ ဘေးအန္တရာယ်မဖြစ်စေရန်အတွက် ကုန်အညွှန်းအမှတ်အသားပြည့်စုံသော တိုင်းရင်းဆေးဝါးများကိုသာရောင်းချပေးရန် အသိပညာပေး ဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

ရန်ကုန်တိုင်းဒေသကြီး၊ သန်လျင်ခရိုင်၊ ကျောက်တန်းမြို့နယ်၌ ယနှစ်ဆောင်းသီးနှံစိုက်ပျိုးရာသီ တွင် ပဲတီစိမ်းသီးနှံစိုက်ပျိုးခြင်းကို တစ်မြို့နယ်လုံးအတိုင်းအတာအနေဖြင့် (၂၀၂၄-၂၀၂၅) ခုနှစ် (၈၁၀၇၂) ဧက စိုက်ပျိုးရန်လျာထားခဲ့ပြီး ဒေသခံပဲစိုက်တောင်သူများက ၂၀၂၄ ခုနစ် နိုဝင်ဘာလမှ စတင်စိုက်ပျိုးခဲ့ရာ ယခုအခါပဲတီစိမ်း (၈၁၀၇၂) ဧက ရာနှုန်းပြည့် စိုက်ပျိုးပြီးဖြစ်ကြောင်း သိရသည်။

ကျောက်တန်းမြို့နယ်၌ လက်ရှိစိုက်ပျိုးပြီးစီးတဲ့ ပဲတီစိမ်းစိုက်ခင်းတွေကို သီးနှံအထွက်နှုန်း ကောင်းမွန် အောင် တောင်သူတွေကကြိုးစားလုပ်ကိုင်နေကြပြီး စားရေးရိက္ခာဖူလုံစေဖို့နဲ့တောင်သူတွေ သီးနှံဝင်ငွေ တိုးပွားစေဖို့ ရည်ရွယ်ပြီး ပဲတီစိမ်းသီးနှံစိုက်ပျိုးရာတွင် အထွက်နှုန်းတိုးတက်အောင် စိုက်ပျိုးနိုင်ပါက ဒေသအတွင်း စားသုံးမှုဖူလုံစေဖို့အပြင် ပိုလျှံမှုရောင်းချနိုင်သဖြင့် ပဲစိုက်တောင်သူများ၏ လူမှုစီးပွားဘဝများ ပိုမိုဖွံ့ဖြိုးတိုးတက်လာမည်ဖြစ်ပြီး စိုက်ပျိုးရေးဦးစီးဌာနအနေဖြင့်လည်း စိုက်ပျိုး ထားသော ပဲတီစိမ်းသီးနှံများ ဖြစ်ထွန်းအောင်မြင်ရေးနှင့်သီးနှံဝင်ငွေတိုးပွားရရှိရေးတို့အတွက် အလေးထား ဆောင်ရွက်လျှက်ရှိပြီး အထွက် ကောင်းမျိုးများ ၊ အရည်အသွေးကောင်းမျိုးများ တိုးချဲ့စိုက်ပျိုးနိုင်ရေး၊ ပိုးမွှားရောဂါ ကာကွယ်ရေးလုပ်ငန်းများ ကို မျက်ခြည်မပျက် စနစ်တကျစောင့်ကြည့် ဆောင်ရွက် ပေးလျှက်ရှိရာ မြေမှန်၊ မျိုးမှန်၊ စိုက်စနစ်မှန်ကန်ရေး နှင့် နည်းပညာများဖြန့်ဝေ ပေးနိုင်ရေးတို့အတွက် ဆောင်ရွက်ပေးလျှက်ရှိကြောင်း တောင်သူများအတွက် အကျိုးအမြတ်ရှိပြီး ခိုင်မာသေချာသည့် ပဲတီစိမ်းသီးနှံစိုက်မျိုးထုတ်လုပ်မှုဖြစ်လာနိုင်ရန် တိုးတက်ဖွံ့ဖြိုးလာသည့် စိုက်ပျိုးထုတ်လုပ်မှု နည်းစနစ်များအား ဒေသခံ ပဲစိုက်တောင်သူများနှင့် ပူးပေါင်းဆောင်ရွက်ပေးလျှက် ရှိကြောင်းသိရသည်။

DOCA(ရန်ကုန်)

ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်၌ ယခုနှစ်ဆောင်းသီးနှံစိုက်ပျိုးရာသီတွင် ပဲတီစိမ်း (၁၀၄၅၅၈) ဧက စိုက်ပျိုးရန် လျာထားပြီး ၂၀၂၄ ခုနစ် နိုဝင်ဘာလမှ စတင်စိုက်ပျိုးခဲ့ရာ လက်ရှိအချိန်အထိ လျာထား (၁၀၄၅၅၈) ဧကအား ပြည့်မှီအောင် စိုက်ပျိုးပြီးစီးပြီး သီးနှံအထွက်နှုန်းတိုးတက်စေရန် လိုအပ်သော စိုက်ပျိုးရေးသွင်းအားစုများ ထည့်သွင်းခြင်းနှင့် ပိုးမွှားရောဂါမကျရောက်စေရေး ကြိုတင်ကာကွယ်နှိမ်နှင်းခြင်း လုပ်ငန်းများကို ဒေသခံတောင်သူများ ကြိုးပမ်းဆောင်ရွက်လျှက်ရှိကြောင်း ခရမ်းမြို့နယ်စိုက်ပျိုးရေးဦးစီးဌာန မှသိရသည်။

ယခုနှစ်ဆောင်းသီးနှံစိုက်ပျိုးရာသီမှာ စားရေးရိက္ခာဖူလုံစေဖို့နဲ့ တောင်သူတွေသီးနှံဝင်ငွေတိုးပွား စေဖို့ရည်ရွယ်ပြီး ပဲတီးစိမ်း (၁၀၄၅၅၈)ဧက လျာထားစိုက်ပျိုးခဲ့ရာ လျာထားဧကပြည့်မှီအောင် စိုက်ပျိုးနိုင်ခဲ့ပြီး ဖြစ်ပါသည်။ လက်ရှိစိုက်ပျိုးပြီးစီးတဲ့ ပဲတီစိမ်းစိုက်ခင်းတွေကို သီးနှံအထွက်နှုန်းကောင်းမွန်အောင် တောင်သူ တွေက ကြိုးပမ်းလုပ်ကိုင်နေကြပြီး စိုက်ပျိုးရေးဦးစီးဌာန အနေဖြင့်လည်း တောင်သူအသိပညာပေးလုပ်ငန်း များကို ကူညီဆောင်ရွက်ပေးနေကြောင်း သီးနှံစိုက်ပျိုးရာတွင်အထွက်နှုန်းတိုးတက်အောင် စိုက်ပျိုးနိုင်ပါက ဒေသတွင်း စားသုံးမှုဖူလုံစေမည့်အပြင် ပိုလျှံမှုကိုရောင်းချနိုင်သဖြင့် ပဲစိုက်တောင်သူများ၏ လူမှုစီးပွားဘဝ များပိုမိုဖွံဖြိုးတိုးတက်လာမည်ဖြစ်ကြောင်း ယခုနှစ်ပဲတီစိမ်းစိုက်ပျိုးရာသီတွင် ဒေသနှင့်ကိုက်ညီသော မျိုးသန့်မျိုးစေ့များ ရွေးချယ်မှန်ကန်စေရေး၊ မြေဆီမြေလွှာကောင်းမွန်အောင်ပြုပြင်ရေး၊ စိုက်နည်းစနစ် မှန်ကန်စေရေး၊ ပိုးသတ်ဆေးသုံးစွဲနည်းစနစ်များ မှန်ကန်စေရေးစသည့် တောင်သူအသိပညာပေးလုပ်ငန်းများ ကိုစိုက်ပျိုးရေးဦးစီးဌာနမှ ကူညီဆောင်ရွက်ပေးလျှက်ရှိကြောင်း သိရသည်။

DOCA(ရန်ကုန်)

ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်ရပ်ကွက်များတွင် နို့နှင့်နို့ထွက်ပစ္စည်း အမျိုး မျိုးရောင်းချသည့်ဆိုင်များသို့ နို့နှင့်နို့ထွက်ပစ္စည်းများတွင် ကုန်အညွှန်းအမှတ်အသားပြည့်စုံမှုရှိ/မရှိ ၂၀၂၅ ခုနှစ် ဇန်နဝါရီလ (၁၃)ရက်နေ့၊ နံနက်(၀၉:၃၀)နာရီအချိန်တွင် မြို့နယ်စားသုံးသူရေးရာဦးစီးဌာနမှ မြို့နယ် တာဝန်ခံနှင့်ဝန်ထမ်းများ မြို့နယ်စည်ပင်သာယာရေးအဖွဲ့မှ ဈေးတာဝန်ခံနှင့်ဝန်ထမ်းများပူးပေါင်း၍ ကွင်းဆင်း စစ်ဆေးခဲ့ကြောင်းသိရသည်။

ထိုသို့ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှဈေးတာဝန်ခံနှင့်ဝန်ထမ်းများသည် မြို့နယ်အတွင်းရှိ နို့နှင့်နို့ ထွက်ပစ္စည်းအမျိုးမျိုးရောင်းချသော ဈေးပိုင်းရပ်ကွက် ရတနာပုံ (၁)လမ်း၊ အမှတ်(၅၈) စိတ်တိုင်းကျ (ရေသန့်၊ အချိုရည်)မျိုးစုံရောင်းဝယ်ရေးနှင့် ဈေးပိုင်းရပ်ကွက် ရတနာလမ်း အမှတ် (၇၁) ခေတ်သစ်မုန့်တိုက်ဆိုင်များသို့ နို့နှင့်နို့ထွက်ပစ္စည်းများဖြစ်သော PEP နို့အရသာ၊ VEVE နို့အရသာ၊ နို့စတော်ဘယ်ရီအရသာ၊ SWIS နို့စိမ်း၊ Mother Choice တို့တွင် ကုန်အညွှန်းအမှတ်အသားပြည့်စုံစွာပါရှိကြောင်း တွေ့ရှိခဲ့ကြသည်။

            စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်နွယ်နွယ်အေးကတွေ့ရှိရသော နို့နှင့်နို့ထွက်ပစ္စည်း များကဲ့သို့ စားသောက်ကုန်များတွင် ကုန်အညွှန်းအမှတ်အသား ပြည့်စုံစွာပါရှိပြီး သက်ဆိုင်ရာထောက်ခံချက် များပါရှိသော စားသောက်ကုန်များကိုသာ ရွေးချယ်ရောင်းချသွားကြရန် အသိပညာပေးတွေ့ဆုံပြီး ကွင်းဆင်း စစ်ဆေးခဲ့ကြောင်း သိရသည်။

DOCA(ရန်ကုန်)

စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း (ဌာနခွဲစာရေး)နှင့်  ဝန်ထမ်းများသည် ရန်ကုန်မြို့တော်စည်ပင်သာယာရေးကော်မတီ၊ သက်ဆိုင်ရာမြို့နယ်ဈေးများ ဌာနနှင့်ပူးပေါင်း၍ (၁၀.၁.၂၀၂၅)ရက်နေ့တွင်ဒဂုံ ဆိပ်ကမ်းမြို့နယ်အတွင်းရှိ စားအုန်းဆီ ရောင်းချသည့် လက်လီဆိုင်များသို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

        ထိုသို့ ကွင်းဆင်းဆောင်ရွက်ရာတွင် စားအုန်းဆီ ရောင်းချသော လက်လီအရောင်းဆိုင်များအနေဖြင့် စားအုန်းဆီများကို ၊ စားအုန်းဆီလိုအပ်ချက်အပေါ် ဗူးသွပ်ဆီများ ၊ ရောနှောဆီများရောင်းချခြင်း မပြုလုပ် ရန်နှင့် ဈေးနှုန်းမြှင့်တင်ရောင်းချခြင်းမပြုရန်၊ထိုသို့ပြုလုပ်သည်များကို စစ်ဆေးတွေ့ရှိပါက စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည့် အရေးကြီးသည့် ကုန်စည် နှင့် ဝန်ဆောင်မှု ဥပဒေအရ အရေးယူဆောင်ရွက်သွားမှာ ဖြစ်ကြောင်း စားအုန်းဆီ လက်လီဆိုင်(၆)ဆိုင် တို့အား အသိပေး ပြောကြားခဲ့ကြောင်းသိရှိရပါသည်။

DOCA(ရန်ကုန်)