သတင်းနှင့် လှုပ်ရှားမှုများ

၁၅.၁.၂၀၂၅ ရက်နေ့ နေ့လည်(၁၂:၃၀)အချိန်တွင် မြောက်ပိုင်းခရိုင်ဦးစီးမှူးရုံးမှ ဝန်ထမ်းများ သည် အင်းစိန်မြို့နယ်ရှိ နီလာရိုးမစက်သုံးဆီဆိုင်သို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက် ခဲ့ပါသည်။

ထိုသို့ ဆောင်ရွက်ခဲ့ရာတွင် နီလာရိုးမစက်သုံးဆီဆိုင်မှ တာဝန်ခံ ဦးဝင်းမော်မှပူးပေါင်းလျက် သတ်မှတ်ထားသောရည်ညွှန်းဈေးများဖြင့် ရောင်းချခြင်းရှိ/မရှိ၊ LED ဈေးနှုန်းဘုတ်များ တင်ထားခြင်း ရှိ/မရှိ၊ ချိန်တွယ်ရာတွင်လည်း လီတာများပြည့်ဝမှုရှိ/မရှိနှင့် ဆီပြတ်လပ်မှုများရှိ/မရှိကို စစ်ဆေးခဲ့ရာ သတ်မှတ်ရည်ညွှန်းဈေးအတိုင်းရောင်းချပါကြောင်း၊ LED ဘုတ်များလည်း နေ့စဉ်တင်ထားပါကြောင်း၊ လီတာများကိုလည်း ပြည့်ဝစွာချိန်တွယ်ပေးပါကြောင်း၊ စက်သုံးဆီလည်းပြတ်လပ်မှုမရှိပါကြောင်းနှင့် ဆီဘောက်ဆာအဝင်များကိုလည်း သက်ဆိုင်ရာဌာနများသို့ စာရင်းပေးပို့လျက်ရှိပါကြောင်း ကွင်းဆင်းစစ်ဆေးချက်အရ သိရှိရပါသည်။

DOCA(ရန်ကုန်)

စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် (၁၄.၁.၂၀၂၅) နေ့လည်(၁၃:၃၀)နာရီအချိန်တွင် အင်းစိန်မြို့နယ်၊ ရွှေပြည်သာမြို့နယ်နှင့် မင်္ဂလာဒုံမြို့နယ်တို့ရှိ Super Market များတွင် သတ်မှတ်ရည်ညွှန်းဈေးနှုန်းများအတိုင်း ရောင်းချခြင်းရှိ/မရှိ ကွင်းဆင်း စစ်ဆေးဆောင်ရွက်ခဲ့ပါသည်။

ထိုသို့ ကွင်းဆင်းဆောင်ရွက်ရာတွင် အင်းစိန်မြို့နယ်ရှိ City Mart (ဖော့ကန်)၊ စိန်ဂေဟာ (အောင်ဆန်း)၊ ရွှေပြည်သာမြို့နယ်ရှိ City Mart၊ Orange၊ မင်္ဂလာဒုံမြို့နယ်ရှိ Terminal M (Ocean Super Center)များအတွင်း ရောင်းချနေသော ဆန်အမျိုးအစား၊ အမှတ်တံဆိပ်တို့၏ (Kg) ဆန်ဈေးနှုန်းများကို မြန်မာနိုင်ငံဆန်စပါးအသင်းချုပ်မှ သတ်မှတ်ထားသော ဈေးနှုန်းများအတိုင်း ရောင်းချသွားရန်၊ ဈေးကစားရန်အလို့ငှာ ဆန်များသိုလှောင်ထားခြင်းမပြုရန်၊ လိုက်နာမှုမရှိပါက ဥပဒေအရ အရေးယူခံရမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

          စားသုံးသူရေးရာဦးစီးဌာန၊ တိုက်ကြီးမြို့နယ်တာဝန်ခံသည်(၁၃.၁.၂၀၂၅)ရက်နေ့ နံနက် (၁၀:၀၀) နာရီအချိန်တွင် မြို့နယ်စည်ပင်သာယာရေးအဖွဲ့နှင့်ပူးပေါင်း၍ မြို့မဈေးအတွင်းရှိ ဆန်ဆိုင် များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။    

ထိုသို့ကွင်းဆင်းရာတွင် တိုက်ကြီးမြို့နယ်တာဝန်ခံ ဒေါ်တင်တင်ဌေးက မြန်မာနိုင်ငံဆန်စပါး အသင်းချုပ် MRFမှ လအလိုက် ထုတ်ပြန်ပေးသော သင့်တင့်မျှတသော ဈေးကွက်ဈေးနှုန်းဖြင့် ဆန်များ ဖြန့်ဖြူးရောင်းချနိုင်ရေးကို ကြော်ငြာချက်ပါ ဆန်ဈေးနှုန်းများအလိုက် ရောင်းချနိုင်စေရေး၊ သတ်မှတ်ရည်ညွှန်းဈေးထက်ကျော်လွန် ရောင်းချခြင်း မဖြစ်စေရေး၊ ဈေးကွက်အတွင်း ကုန်စည်များ ပြတ်လပ်မှုမရှိစေရေး ဈေးကွက်စောင့်ကြည့်စစ်ဆေးခြင်းများပြုလုပ်ခဲ့ပြီး ဆန်ဆိုင်များတွင် ဈေး ကစားရန် ရည်ရွယ်ချက်ဖြင့် သိုလှောင်ထားရှိမှု မရှိကြောင်းစစ်ဆေးတွေ့ရှိရကြောင်း သိရှိရပါသည်။

DOCA(ရန်ကုန်)

စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်ဖြူဖြူမြင့်၊ ဒုကြီးကြပ်ရေးမှူးပါ (၂)ဦးတို့သည် ၁၃.၁.၂၀၂၅ ရက်နေ့ နံနက်(၉:၃၀)နာရီအချိန်တွင် မှော်ဘီမြို့နယ်၊ သရက်ကုန်း(၁) ကျေးရွာရှိ အခြေခံပညာမူလတန်းကျောင်းသို့ စားသုံးသူကာကွယ်ရေးအသိပညာပေးဟောပြောခြင်း ဆောင်ရွက်ခဲ့ပါသည်။

          အဆိုပါဟောပြောပွဲတွင် ကျောင်းသား/ကျောင်းသူများအား အစားအသောက်များ ဝယ်ယူစားသုံးရာတွင် ကုန်အညွှန်းအမှတ်အသားများပါသော အစားအသောက်များကိုသာ ဝယ်ယူ စားသောက်တတ်စေရန်၊ သက်တမ်းကုန်ရက်စွဲပါရှိ/မရှိ၊ ပါဝင်ပစ္စည်းနှင့်ဓါတ်မတည့်မှုများ မဖြစ်ပေါ် စေရန်၊ ပါဝင်ပစ္စည်းများ ဖော်ပြထားရှိမှုကို စစ်ဆေးပြီးမှ ဝယ်ယူစားသောက်ရန် အစားအသောက်များ ဝယ်ယူစားသုံးရာတွင် သတိပြုရမည့်ရှောင်ရန်/ဆောင်ရန် အချက်အလက်များအား အသိပညာပေး ဟောပြောခဲ့ကြောင်း သိရှိရပါသည်။

DOCA(ရန်ကုန်)

           ရှမ်းပြည်နယ်စားသုံးသူရေးဦးစီးဌာန၊ ကလောခရိုင်ဦးစီးမှူးရုံး (အောင်ပန်း)မှ ခရိုင်ဦးစီးမှူးနှင့် ဝန်ထမ်းများသည် (၇-၁-၂၀၂၅) ရက်နေ့ နံနက်(၁၁းဝ၀) နာရီအချိန်တွင် နယ်စပ်ဒေသတိုင်းရင်းသား လူငယ်များဖွံ့ဖြိုးရေး သင်တန်းကျောင်း(ပင်တယ)ရှိ ကျောင်းသူ/ ကျောင်းသား (၂၈၀) ဦးတို့အား စားသုံးသူကာကွယ်ရေးအသိညာပေးဟောပြောပွဲ ဆောင်ရွက်ခဲ့ကြောင်းသိရပါသည်။

          အဆိုပါသင်တန်းကျောင်းတွင်ခရိုင်ဦးစီးမှူး ဦးမြင့်နိုင်မှ စားသုံးသူကာကွယ်ရေးဥပဒေ(၂၀၁၉) အခန်း(၉)၊ ဥပဒေပုဒ်မ(၁၉)နှင့် (၂၀)တွင် ပြဌာန်းထားသော စားသုံးသူများအသုံးပြုသည့် ကုန်စည်နှင့် ဝန်ဆောင်မှုများ ဘေးအန္တရာယ်ကင်းရှင်းစေရန် ထုတ်ပြန်ထားသော အခွင့်အရေးများနှင့်တာဝန်များကို အသိပညာပေးဟောပြောခြင်း၊ ကုန်စည်များကို ရွေးချယ်ဝယ်ယူအသုံးပြုရာတွင် ပါဝင်သည့် ကုန်အညွှန်းးအမှတ်အသားများကို သေခြာစိစစ်၍ ဖတ်ရှုဝယ်ယူအသုံးပြုကြရန်၊ မြန်မာဘာသာဖြင့်ဖြစ်စေ၊ အခြာဘာသာတစ်ခုထက်ပို၍တွဲလျက်ဖြစ်စေ ဖော်ပြခြင်းမရှိသော ကုန်စည်များကို ဝယ်ယူသုံးစွဲခြင်းမပြုရန်နှင့် စားသုံးသူပြည်သူများ နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့် နည်းလမ်းများ၊ စားသုံးသူရေးရာဦးစီးဌာန၏ Call Centre (1535) ကို ကျောင်းသူ/ ကျောင်းသားများရှေ့တွင် လက်တွေ့ခေါ်ဆိုပေးပြီး   Call Centre ကို ခေါ်ဆို၍လည်း တိုင်ကြားနိုင်ကြောင်း အသိပညာပေး ဟောပြောခဲ့ကြောင်း သိရှိရပါသည်။

DOCA(ရှမ်း)