သတင်းနှင့် လှုပ်ရှားမှုများ

      ပဲခူးတိုင်းဒေသကြီး၊ သာယာဝတီခရိုင်၊ကြို့ပင်ကောက်မြို့တွင် ကိုယ်တိုင်စိုက်ပျိုးမွေးမြူ ထုတ်လုပ်သူများ၏ အခြေခံစားသောက်ကုန်များဖြစ်သည့် ဆန်၊ ဆီ၊ ကြက်ဥနှင့်အသားများအား ကုန်ဈေး နှုန်း တည်ငြိမ်ရေးအဖွဲ့၏ ကြီးကြပ်မှု့ဖြင့် ဇန်နဝါရီလ(၁၀)ရက်နေ့ နံနက် (၈:၀၀) နာရီ အချိန်မှစ၍ မြို့နယ် စည်ပင်သာယာရေးအဖွဲ့ရုံးရှေ့၌ သက်သာသောဈေးနှုန်းများဖြင့် ရောင်းချ ပေးခဲ့သည်။ထိုသို့ဆောင်ရွက်ခြင်းကို မြို့နယ်စီမံအုပ်ချုပ်ရေးအဖွဲ့ဥက္ကဌ ဦးအောင်ကျော်ဇေယျ၏ ကြီးကြပ်မှုဖြင့် ထွေအုပ်၊စည်ပင်၊စားသုံးဌာနတို့မှ ဦးဆောင်၍ ကိုယ်တိုင်စိုက်ပျိုးထုတ်လုပ်သူများနှင့် ပူးပေါင်းကာအခြေခံစားကုန်များ၊ကုန်ဈေးနှုန်းကြီးမြှင့်မှု့ မရှိစေရေးအတွက် ဆန်၊ဆီ၊အသားနှင့် ကြက်ဥများအား ပြင်ပပေါက်ဈေးထက် သက်သာသောဈေးနှုန်းများဖြင့် ရောင်းချပေးခဲ့ရာ ဒေသခံ ပြည်သူများက ဆီနှင့်ကြက်ဥဝယ်ယူမှု့ ပိုများကောင်းသိရသည်။ရောင်းချပေးမှုတွင် ကြက်ဥအလုံး (၁၅၀၀)၊ဆီပိဿာ(၅၀)၊အမဲသား(၁၀)ပိဿာ၊ဝက်သား(၅)ပိဿာနှင့်ဆန် (၁)တင်းခွဲရောင်းချပေး နိုင်ခဲ့ကြောင်း ထိုသို့ရောင်းချပေးခြင်းကို အပတ်စဉ်သောကြာနေ့တိုင်း ရောင်းချပေးသွားမည်ဖြစ် ကြောင်းသိရှိရပါသည်။

DOCA(ပဲခူး)

          စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေ တို့နှင့် စပ်လျဉ်း၍ သက်ဆိုင်ရာ မိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်း လုပ်ငန်းများဆောင်ရွက်လျက်ရှိရာ ၂၀၂၄ ခုနှစ်၊ ဒီဇင်ဘာလ (၁၆)ရက်နေ့မှ (၃၁)ရက်နေ့ အတွင်းတွင် ပြည်ခရိုင်၊ ပြည်မြို့တွင် ဆံတော်ရပ်ကွက်နှင့် ကျောင်းကြီးအိုးတန်းရပ်ကွက်ရှိ ကုန်စုံဆိုင်များသို့ အာဟာရဖြည့်စွက်စာ အမျိုးမျိုးနှင့် မြို့မစည်ပင်သာယာဈေးနှင့် ခေတ္တရာမြို့သစ် ဈေးတို့ရှိ ကုန်စုံဆိုင်များသို့ ဘူးသွပ်စားသုံးဆီအမျိုးမျိုးကိုလည်းကောင်း၊ ရွှေတောင်မြို့တွင် တည်ကုန်း တောင်ပိုင်းနှင့် မြို့မစည်ပင်သာယာဈေးတို့ရှိ ကုန်စုံဆိုင်များသို့ ဘူးသွပ် စားသုံးဆီ အမျိုးမျိုးကိုလည်း ကောင်း၊ သရက်တောရပ်ကွက်နှင့် ယွန်းတန်းရပ်ကွက်ရှိ ကုန်စုံဆိုင်များသို့ အာဟာရဖြည့်စွက်စာ အမျိုးမျိုးကိုလည်းကောင်း၊ ပန်းတောင်းမြို့တွင် ပန်းတောင်းမြို့ပေါ် ဆေးဆိုင်များသို့လည်းကောင်း၊ ပေါက်ခေါင်းမြို့တွင် အမှတ်(၄)၊ အမှတ်(၅)ရပ်ကွက်ရှိ ကုန်စုံဆိုင် များသို့ ဘူးသွပ် စားသုံးဆီ အမျိုးမျိုးကိုလည်းကောင်း သက်ဆိုင်ရာ မြို့နယ်တာဝန်ခံနှင့် ဝန်ထမ်း များသည် သွားရောက်၍ ကုန်အညွှန်း အမှတ်အသားပါ သတ်မှတ်ချက်များနှင့် ကိုက်ညီမှုရှိသော ကုန်စည်များကိုတင်သွင်း ရောင်းချခြင်း ရှိ/မရှိ၊ သက်ဆိုင်ရာဌာန၏ ထောက်ခံမှုရှိ/မရှိ ဈေးကွက်စောင့်ကြည့်စစ်ဆေးခဲ့ ပါကြောင်းနှင့် စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်း အမှတ်အသားဖေါ်ပြချက် များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)

          စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများ အားလုံးသည် ကုန်စည်နှင့် ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေး အတွက် ခရိုင်အတွင်းရှိ  ထုတ်လုပ်လျှက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ် အသားများ ပြည့်စုံမှန်ကန်စွာဖေါ်ပြမှုရှိစေရေး ရည်ရွယ်၍ ဆောင်ရွက်လျှက် ရှိရာ ပြည်ခရိုင်အတွင်း ၂၀၂၄ ခုနှစ်၊ ဒီဇင်ဘာလ (၁၆)ရက်မှ(၃၁)ရက် အတွင်း ပြည်မြို့နယ်၊ ကျောင်းကြီးအိုးတန်းရပ်ကွက်၊ ကမ်းနားလမ်းရှိ ဦးအောင်ထက်သိန်း စိုက်ပျိုးရေးပစ္စည်းဆိုင်သို့ လည်းကောင်း၊ ဦးဇော်ဇော်အောင် ပိုင်ဆိုင်သော အပျိုကြီး စိုက်ပျိုးရေးပစ္စည်းဆိုင်သို့ လည်းကောင်း၊ ဦးမင်းမင်းထွန်း ပိုင်ဆိုင်သော သမာဓိ စိုက်ပျိုးရေးပစ္စည်းဆိုင်သို့လည်းကောင်း၊ ဦးမြင့်သိန်း ပိုင်ဆိုင်သော ပြည်ဟင်္သာဆန်အရောင်းဆိုင်သို့လည်းကောင်း၊ ရွှေတောင်မြို့နယ်၊ ပျော်ဘွယ်တန်း လမ်းရှိ ဦးသိန်းထိုက်ဦးပိုင်ဆိုင်သော MK ဆီစက်သို့လည်းကောင်း၊ ယွန်းတန်းရပ်ကွက်၊ ယွန်းတန်း လမ်းရှိ ဦးစန်းမြင့် ပိုင်ဆိုင်သော သရဖူ ပဲခွဲစက်သို့ လည်းကောင်း၊ ကျောင်းကြီးအိုးတန်းလမ်းရှိ ဦးဇာနည်ထွန်း ပိုင်ဆိုင်သော အမေ့မေတ္တာ ဆန်စက်သို့လည်းကောင်း၊ ပေါက်ခေါင်းမြို့နယ်၊ အမှတ်(၃)ရပ်ကွက်ရှိ ဦးတင်စိုး၊ ကုန်စုံဆိုင်သို့လည်းကောင်း၊  သက်ဆိုင်ရာမြို့နယ်တာဝန်ခံနှင့် ဝန်ထမ်းများသည် သွားရောက်၍ မိမိတို့ ဖြန့်ဖြူး ရောင်းချလျက်ရှိသော ကုန်စည်များတွင် အရည်အသွေး၊ အလေးချိန်၊ အချိန်အတွယ်၊ ပမာဏနှင့် အမျိုးအစားများ မှန်ကန်စွာ ဖြန့်ဖြူးရောင်းချမှုရှိစေရေး၊ စီးပွားရေး ကျင့်ဝတ်၊ စည်းကမ်းနှင့်အညီ ထုတ်လုပ် ရောင်းချမှုရှိစေရေး၊ ကုန်စည်အလိုက် ဖေါ်ပြရမည့် ကုန်အညွှန်း အမှတ်အသားများ၊ ပြည့်စုံ မှန်ကန်စွာဖေါ်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်း ကာလများတွင် ကွင်းဆင်း စစ်ဆေးမှုများနှင့်အတူ အရေးယူဆောင်ရွက်မှုများ ပြုလုပ် ဆောင်ရွက်သွားမှာဖြစ်သည့် အတွက် စီးပွားရေးလုပ်ငန်းရှင်များ အနေဖြင့် အထူးအလေးထား လိုက်နာဆောင်ရွက်ကြရန် ရှင်းလင်း ဆွေးနွေးပြောကြားခဲ့ကြောင်း သတင်းရရှိပါသည်။

DOCA(ပဲခူး)

           စားသုံးသူများအနေဖြင့် ဈေးကွက်အတွင်းရှိ ကုန်စည် (သို့မဟုတ်) ဝန်ဆောင်မှုတို့ကို ရွေးချယ်ဝယ်ယူရာတွင် ကြိုတင်သိရှိထားရမည့်အချက်အလက်များနှင့်ပတ်သက်ပြီး အသိပညာပေးခြင်းကို ၁၆.၁.၂၀၂၅ ရက်နေ့တွင် သင်္ဃန်းကျွန်းမြို့နယ်၊ သုဝဏ္ဏဈေးစည်ပင်ရုံးတွင် ပြုလုပ်ခဲ့ကြောင်းသိရှိရပါသည်။

            ခရိုင်ဦးစီးမှူးဦးလှစိုးက ဈေးသူ/ ဈေးသားများအား အသိပညာပေးပြောကြားရာတွင် ကုန်စည်၏ အရည်အသွေး၊ အရေအတွက်၊ ပါဝင်သောပစ္စည်းများ၊ အသုံးပြုပုံ၊ ဈေးနှုန်း၊ ဝန်ဆောင် မှုနှုန်းထားတို့ကို ကုန်ပစ္စည်းမဝယ်ယူမီ ကြိုတင်သိရှိထားရန်လိုအပ်ကြာင်း၊ ကုန်စည် (သို့မဟုတ်) ဝန်ဆောင်မှုကို ပေးအပ်နိုင်သည့်အချိန်တို့ နှင့်စပ်လျဉ်း၍ လိမ်လည်လှည့်ဖြားခြင်း မခံရအောင် သတိပြုရန်လိုအပ်ကြောင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အာမခံပေးထားမှု၊ သက်ဆိုင်ရာအစိုးရဌာန၊ အဖွဲ့အစည်းများက သတ်မှတ်ထားသည့် စံချိန်စံညွှန်း၊ အရည်အသွေး တို့နှင့်ကိုက်ညီမှု ၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြထားမှု ရှိ၊ မရှိ တို့ကို သေချာစွာဖတ်ရှု့ပြီးမှ ဝယ်ယူရန်လိုအပ်ကြောင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ လိုအပ်သောသတင်း အချက်အလက်များကို စုံစမ်းမေးမြန်းရန်အတွက် လိပ်စာ၊ ဖုန်းနံပါတ်များ ရေးသားဖော်ပြထားမှု၊ ကုန်စည် သို့မဟုတ် ဝန်ဆောင်မှု နှင့်စပ်လျဉ်း၍ အပြစ်အနာ အဆာ၊ ချို့ယွင်းချက်များကို ဖုံးကွယ်ထားခြင်း၊ ကုန်စည် သို့မဟုတ် ဝန်ဆောင်မှုတွင် ပါဝင်ရမည့် သတင်းအချက်အလက်များကို ပြည့်စုံခိုင်မာမှုမရှိဘဲ ချဲ့ကားဖော်ပြထားခြင်းရှိ၊ မရှိတို့ကိုလည်း သိရှိထားရန်လိုအပ်ကြောင်း စသည်တို့ကို အသိပညာပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

              စားသုံးသူရေးရာဦးစီးဌာန၊ တောင်ငူခရိုင် ရေတာရှည်မြို့နယ်တာဝန်ခံ ဦးဇော်ဇော်ထွေး သည် ရေတာရှည်မြို့နယ် စီမံအုပ်ချုပ်ရေးအဖွဲ့၏ လမ်းညွှန်ချက်အရ ရေတာရှည်မြို့နယ် အထွေထွေ အုပ်ချုပ်ရေးဦးစီးဌာန ဒုတိယဦးစီးမှူး ဒေါ်နှင်းပန်းအိမ်ဦးဆောင်သော ဌာနဆိုင်ရာ ပူးပေါင်းအဖွဲ့က ဇန်နဝါရီလ ၁၃ ရက်နေ့ မွန်းလွဲပိုင်းတွင် ရေတာရှည်မြို့ပေါ်ရှိ ဓါတ်မြေဩဇာနှင့် စိုက်ပျိုးရေးသုံး ဆေးပစ္စည်းအရောင်းဆိုင်များသို့ ဈေးကွက်စောင့်ကြည့်စစ်ဆေးရာတွင် ပူးပေါင်းပါဝင်ဆောင်ရွက်ခဲ့ ပါသည်။

              ပူးပေါင်းအဖွဲ့သည် တောင်ငူမြို့ပေါ်ရှိ ဓါတ်မြေဩဇာနှင့် စိုက်ပျိုးရေးသုံးဆေးပစ္စည်း ဆေးဆိုင်ကြီးများ၌ တရားမဝင် ဓါတ်မြေဩဇာနှင့် စိုက်ပျိုးရေးသုံးဆေးပစ္စည်း ရောင်းချခြင်းရှိမရှိနှင် ဖြစ်သင့်ဖြစ်ထိုက်သည့် ဈေးနှုန်းထက်ပိုမို၍ အမြတ်တင်ရောင်းချခြင်းရှိ/မရှိကို ကြည့်ရှုစစ်ဆေးပြီး တရားမဝင်ကုန်စည်များ ရောင်းချခြင်းမပြုရန်နှင့် ၁၀ ရာခိုင်နှုန်းထက်ပို၍ အမြတ်တင်ရောင်းချခြင်း မပြုရန် အသိပညာပေးပြောကြားပါသည်။

              စားသုံးသူရေးရာဦးစီးဌာန မြို့နယ်တာဝန်ခံက စားသုံးသူကာကွယ်ရေးဥပဒေ ပြဌာန်း ချက်များနှင့်အညီ ကုန်အညွှန်းအမှတ်အသား ဖော်ပြထားခြင်းမရှိသော ကုန်စည်များကို ရောင်းချ ခြင်းမပြုရန်၊ စားသုံးသူနစ်နာဆုံးရှုံးမှုမဖြစ်စေရေးကို အလေးထားဆောင်ရွက်ရန် အသိပညာပေး ပြောကြားခဲ့ပါသည်။

              ပူးပေါင်းအဖွဲ့တွင် စိုက်ပျိုးရေးဦးစီးဌာန၊ ပြည်တွင်းအခွန်များဦးစီးဌာန၊ သမဝါယမဦးစီး ဌာန၊ မြန်မာ့လယ်ယာဖွံ့ဖြိုးရေးဘဏ်နှင့် မြို့နယ်စည်ပင်သာယာရေးအဖွဲ့တို့မှ တာဝန်ရှိသူများ ပူးပေါင်းပါဝင်ဆောင်ရွက်ခဲ့ကြောင်း သိရပါသည်။

DOCA(ပဲခူး)