သတင်းနှင့် လှုပ်ရှားမှုများ

          မွန်ပြည်နယ်၊ ပေါင်မြို့နယ်၌ ၂၀၂၄-၂၀၂၅ ဘဏ္ဍာနှစ် ဒုတိယသီးနှံနွေစပါး (အောင်နိုင်တိုး) အား လက်ဆွဲကောက်စိုက်စက်နှင့် ကူဘူတာကောက်စိုက်စက်ဖြင့် စိုက်ပျိုးခြင်း ကွင်းသရုပ်ပြပွဲကို ၁၇.၁.၂၀၂၅ ရက်နေ့ နံနက်ပိုင်းက ရင်းငြိမ်မြောက်ကျေးရွာ တောင်သူတစ်ဦး ၏ လယ်မြေ၌ ပြုလုပ်ခဲ့သည်။

အဆိုပါ သရုပ်ပြပွဲသို့ ဒုတိယမြို့နယ်အုပ်ချုပ်ရေးမှူး ဦးကျော်မျိုးလှိုင်၊ မြို့နယ်စက်မှု လယ်ယာဦးစီးဌာနမှ ဦးစီးအရာရှိ ဦးရဲမြင့်နှင့်ဝန်ထမ်းများ၊ မြို့နယ်စိုက်ပျိုးရေးဦးစီးဌာန၊ ကြေးတိုင်နှင့်မြေစာရင်းဦးစီးဌာနမှဝန်ထမ်းများ၊ စားသုံးသူရေးရာဦးစီးဌာနမှ ဝန်ထမ်းများ၊ ဌာနဆိုင်ရာ အကြီးအကဲများက ကြည့်ရှုအားပေးကာ လိုအပ်သည်တို့ကို ပံ့ပိုးကူညီဆောင်ရွက် ပေးခဲ့ကြောင်း သိရှိရသည်။

ယခုကဲ့သို့ သရုပ်ပြပွဲကျင်းပရခြင်းမှာ ပေါင်မြို့နယ်အတွင်း နွေစပါးစိုက်ကာလ၌ တောင်သူများ လုပ်သားရှားပါးမှု ပြေလည်စေရန်အတွက် ကျဲပက် စိုက်ပျိုးခြင်းအစား လက်ဆွဲကောက်စိုက်စက်နှင့် ကူဘိုတာကောက်စိုက်စက်ကို အသုံးပြုပြီး စိုက်ပျိုးခြင်းဖြင့် ဒေသတွင်းစားရေရိက္ခာဖူလုံရေးနှင့် တောင်သူများ၏ လူမှုစီးပွားရေးကဏ္ဍများ ဖွံ့ဖြိုးတိုးတက် လာစေနိုင်ရန်ရည်ရွယ်၍ ပြသရခြင်းဖြစ်ကြောင်း သိရသည်။

DOCA(မွန်)

            ဇန်နဝါရီလ တတိယပတ်တွင် ကွမ်းခြံကုန်းမြို့နယ် စည်ပင်သာယာမြို့မဈေးအတွင်းရှိ ကုန်ခြောက်ဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှုနှင့် အညီ စားသုံးသူပြည်သူများ နေ့စဉ်စားသုံးလျက်ရှိသော စားအုန်းဆီများ ဖြန့်ဖြူးရောင်းချနေမှုအခြေအနေအား ဇန်နဝါရီလ (၁၇)ရက်နေ့၊ နံနက် (၁၀:၃၀)နာရီအချိန်တွင် ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရသည်။

              ထိုသို့ဈေးကွက်စောင့်ကြည့်ကွင်းဆင်းစစ်ဆေးခဲ့ရာတွင် ကွမ်းခြံကုန်းမြို့နယ်စည်ပင်သာယာ မြို့မဈေးတာဝန်ခံတို့သည် စည်ပင်သာယာမြို့မဈေးအတွင်း/ အပြင်ရှိ စားအုန်းဆီဖြန့်ဖြူးရောင်းချလျက်ရှိသော ကုန်ခြောက်ဆိုင်များဖြစ်သည့် ဒေါ်ရီရီသန်းဆိုင်၊ ဦးမြင့်မင်းသူဆိုင်၊ ဒေါ်မာမာဦးဆိုင်များမှ ဆိုင်ပိုင်ရှင်လုပ်ငန်းရှင်များနှင့် တွေ့ဆုံခဲ့ပြီး ကွမ်းခြံကုန်းမြို့နယ်အတွင်းရှိ စားသုံးသူပြည်သူများ စားအုန်းဆီကို အခက်အခဲမရှိဝယ်ယူစားသုံးနိုင်ရေး၊ ကွမ်းခြံကုန်းမြို့နယ်အတွက်သတ်မှတ် စားအုန်းဆီခွဲတမ်းများအား လုံလောက်စွာချထားပေးခဲ့ပြီး စားအုန်းဆီဈေးနှုန်းမှန်ကန်စွာဖြင့် ပြန်လည်ဖြန့်ဖြူးရောင်းချနိုင်ရေးအတွက် သတ်မှတ်အခြေခံ လက်ကားရည်ညွှန်းဈေးအား အပတ်စဉ် တနင်္လာနေ့တိုင်း သက်ဆိုင်ရာဌာနမှ ထုတ်ပြန်ပေးလျက်ရှိပြီး ဈေးကွက်အတွင်း ဈေးနှုန်းအဆမတန် မြှင့်တင်ရောင်းချနေခြင်း၊ ဈေးကစားရန်ရည်ရွယ်ချက်ဖြင့် တရားမဝင်သိုလှောင်ထား ခြင်းမပြုလုပ်ကြရန် စားသုံးသူကာကွယ်ရေးအသိပညာပေးပြောကြားခဲ့ပြီး ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

၁၈.၁.၂၀၂၅ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ် ရော်ဘာ စိုက်ပျိုးထုတ်လုပ်သူများအသင်းမှ ရော်ဘာအရည်အသွေး တိုးတက်လာရေးအတွက် MSR စက်ရုံများနှင့် ရော်ဘာကုန်ကြမ်း အဝယ်ဒိုင်များ တွေ့ဆုံဆွေးနွေးပွဲကို မုဒုံမြို့ရှိ ရွှေဟင်္သာ ခန်းမ၌ ပြုလုပ်ခဲ့ရာ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံမှ တက်ရောက်ခဲ့သည်။

တွေ့ဆုံပွဲတွင် မုဒုံမြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးပြည်သိမ်းက နိုင်ငံတော်အကြီး

အကဲများအနေနှင့် ရော်ဘာနှင့်ပတ်သက်သည့် စိုက်ပျိုးသည်မှအစ အစေးခြစ်ခြင်း၊ အစေးခဲခြင်း၊ ထုတ်ကုန်အဖြစ်ရောက်ရှိအောင် ဆောင်ရွက်ခြင်း၊ မျိုးကောင်းမျိုးသန့်ပင်များ ထုတ်လုပ်ခြင်း၊ အစေးခဲရာတွင် အသုံးပြုသည့် အရည်အသွေးကောင်းအက်စစ်များ မှာယူတင်သွင်း၍ ထုတ်ကုန်များကို အဆင့်အတန်းမြင့်မားရန်အတွက် ခရမ့် ရော်ဘာစက်ရုံ၊ မှိုင်းရုံများဖြင့် ဆောင်ရွက်ရာတွင် အထောက်အကူပြုစေမည့် MSME ချေးငွေ၊ နိုင်ငံ့စီးပွားမြှင့်တင်ရေးရန်ပုံငွေမှ ချေးငွေများ ပံ့ပိုးပေးလျက်ရှိကြောင်း၊ မိမိနိုင်ငံ၏ ထုတ်ကုန်များကို အိမ်နီးချင်းနိုင်ငံများနှင့် စျေးကွက်တွင် ယှဉ်ပြိုင်နိုင်စေရန်၊ နိုင်ငံခြားဝင်ငွေ ရေရှည်တည်တံ့စွာရရှိနိုင်ရန်အတွက် ရေရှည်ခံယူချက်ထား၍ ပူးပေါင်းဆောင်ရွက်ကြရန် အမှာစကားပြောကြားခဲ့သည်။

ထို့နောက် မြန်မာ့ရော်ဘာအရည်အသွေးတိုးတက်စေရန် မုဒုံမြို့နယ် စိုက်ပျိုးရေးဦးစီး ဌာနမှ မြို့နယ်ဦးစီးမှူး ဦးငြိမ်းချမ်းကျော်၊ မွန်ပြည်နယ် ရော်ဘာစိုက်ပျိုးထုတ်လုပ်သူများ အသင်း ဥက္ကဋ္ဌ ဦးမင်းကျန်ရစ်၊ MSR ရော်ဘာစက်ရုံများမှ တာဝန်ရှိသူများ၊ မြို့နယ်အတွင်းရှိ ရော်ဘာအဝယ်ဒိုင်များ၊ ရော်ဘာစိုက်တောင်သူများတို့က အသီးသီး ပါဝင်ဆွေးနွေးခဲ့ကြပြီး တက်ရောက်လာသူများအား လက်ကမ်းစာစောင်နှင့် ဗီနိုင်းများ ဖြန့်ဝေပေးခဲ့ကြောင်း သိရသည်။

DOCA(မွန်)

  ၁၇.၁.၂၀၂၅ ရက်နေ့ နံနက် (၁၁:၀၀) နာရီအချိန်တွင် မွန်ပြည်နယ်၊ စားသုံးသူရေးရာ ဦးစီးဌာနမှ မော်လမြိုင်ခရိုင် ဦးစီးမှူး၊ ချောင်းဆုံမြို့နယ်တာဝန်ခံနှင့် ဝန်ထမ်းများသည် ချောင်းဆုံမြို့နယ် အ.ထ.က (ခွဲ) ဒရယ်ကျောင်း၌ စားသုံးသူကာကွယ်ရေးဆိုင်ရာ အသိပညာပေး ဟောပြောပွဲ ကျင်းပပြုလုပ်ခဲ့ပါသည်။ 

အဆိုပါ ဟောပြောပွဲတွင် ကျောင်းအုပ်ဆရာမကြီး ဒေါ်ယဉ်လှိုင်စန်းမှ အဖွင့်အမှာ စကားပြောကြားပြီး စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင်မှ ဌာန၏ လက်ရှိအချိန်တွင် ဆောင်ရွက်နေသော လုပ်ငန်းတာဝန်များကို ဦးစွာပထမ ဟောပြောရှင်းလင်း၍ ကုန်ညွှန်းအမှတ်အသား ပြည့်စုံမှသာလျှင် စိတ်ချယုံကြည်စွာ ရွေးချယ်ဝယ်ယူအသုံးပြုတတ်စေရန် ကုန်ညွှန်းအမှတ်အသားများအကြောင်း အကျယ်တဝင့် ရှင်းလင်းဟောပြောပြီးနောက် စားသုံးသူရေးရာဦးစီးဌာန၊ အငယ်တန်းစာရေး ဒေါ်ခင်လေးနွယ်က စားသုံးသူတိုင်းရယူခွင့်ရှိသော စားသုံးသူအခွင့်အရေး(၈)ချက်၊ လိုက်နာရမည့်တာဝန် (၄) ရပ်တို့ကိုဟောပြောဆွေးနွေး၍ စားသုံးသူနစ်နာဆုံးရှုံးမှုဖြစ်ပေါ် လာပါက စားသုံးသူများမှ လူကိုယ်တိုင်ဖြစ်စေ၊ စားသုံးသူရေးရာဦးစီးဌာန website မှတစ်ဆင့်ဖြစ်စေ၊ DOCA Myanmar Mobile Application နှင့် Consumer Call Center (1535) တို့တိုင်ကြားနိုင်ကြောင်းတို့ကို အသေးစိတ် ရှင်းလင်းဆွေးနွေးခဲ့ပါသည်။

 အဆိုပါ အသိပညာပေးဟောပြောပွဲသို့ ဆရာ/ဆရာမ (၂၅) ဦး၊ ကျောင်းသား/ ကျောင်းသူ (၂၅၀) ဦးတို့တက်ရောက်၍ ဌာနမှ လက်ကမ်းစာစောင်များအား ​ပေးအပ်ခဲ့ကြောင်း သိရှိရပါသည်။

DOCA(မွန်)

             ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းအသုံးပြုလျှက်ရှိသော ဆန်စက်များ အား ဆန်စပါးလုပ်ငန်းများဖွံ့ဖြိုးတိုးတက်ရေး ဆန်စက်များစနစ်တကျ မှတ်ပုံတင်နိုင်ရေးတို့ကို ယမန်နေ့ မွှန်လွှဲပိုင်း တောင်ပိုင်းရပ်ကွက်၊ ထမ္မနိုင်ကျေးရွာ၊ ဝါးဘလောက်ကျေးရွာ၊ သမင်ခြံကျေးရွာ၊ သခွတ်ပင်ကျေးရွာများသို့ တာဝန်ရှိသူများက ကွင်းဆင်းကြည့်ရှု့စစ်ဆေးခဲ့ကြောင်း သိရသည်။

          ထိုသို့ကွင်းဆင်းကြည့်ရှု့စစ်ဆေးခဲ့ရာတွင် တွံတေးခရိုင်စီမံအုပ်ချုပ်ရေးအဖွဲ့ ဥက္ကဌ ဦးညွှန့်နွယ်၊ မြို့နယ်စီမံအုပ်ချုပ်ရေးအဖွဲ့ဥက္ကဌ ဦးမျိုးမင်း၊ စိုက်ပျိုးရေးဦးစီးဌာနမှဦးစီးမှူး ဦးသက်နိုင်၊ စားသုံးသူ ရေးရာဦးစီးဌာနမှ တာဝန်ခံဦးတင်မင်း၊ မြို့နယ်မီးသတ်ဦးစီးဌာနမှ ဒု-ဦးစီးမှူးဦးအောင်မင်းဝေ နှင့်တာဝန်ရှိသူများ မြို့နယ်ဆန်စက်အသင်းဥက္ကဌ ဦးတင်အောင်တို့က မြို့နယ်အတွင်းအသုံးပြု လျက်ရှိသည့် ရွှေနဂါးဆန်စက်၊ အောင်ချမ်းညွှန့်ဆန်စက်၊ သုခပြည့်စုံ ဆန်စက်၊ အောင်ဇေယျဝင်းဆန်စက်၊ ရွှေတိုးလေးဆန်စက်၊ လွင်အောင်ဟိဏ်းဆန်စက်၊ စိန်ရတနာဆန်စက်၊ ဆုမြတ်ကျော်ဆန်စက် တို့အားကွင်းဆင်းကြည့်ရှု့စစ်ဆေး၍ စပါးသိုလှောင် ကြိတ်ခွဲသည့်လုပ်ငန်းများ မှန်ကန်မြန်ဆန်စွာ ဆောင်ရွက်နိုင်ရေး၊ မလိုလားအပ်သော အဟန့်အတားများကြန့်ကြာမှုများမဖြစ်ပေါ်စေရေး၊ ဒေသတစ်ခုသို့ ဆန်စပါးသယ်ယူပို့ဆောင် ရာတွင် ဆန်စပါးလုပ်ငန်းကြီးကြပ်ရေးအဖွဲ့၏ စီစစ်မှုဖြင့် ဆောင်ရွက်နိုင်ရေး၊ ဆန်စပါးလုပ်ငန်း များ စဉ်ဆက်မပြတ်ဖွံ့ဖြိုးတိုးတက်ရေး၊ ဆန်စက်များစနစ် တကျမှတ်ပုံတင်နိုင်ရေး၊ စပါး သယ်ဆောင်ခွင့်အား ညွှန်ကြားချက်အတိုင်းလိုက်နာဆောင်ရွက်ရေး ကိစ္စများအား ဆွေးနွေးပြောကြားခဲ့ပြီး ဆွေးနွေးမှုနှင့်ပတ်သတ်၍ ဆန်စက်လုပ်ငန်းရှင်များက ပြန်လည်ရှင်းလင်း ဆွေးနွေးခဲ့ကြကြောင်း သိရှိရပါသည်။

DOCA(ရန်ကုန်)