သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ရုံးမှ စစ်ဆေးရေးအရာရှိ ဦးသိန်းထွန်နှင့် ဝန်ထမ်းများသည် အွန်လိုင်းစနစ်ဖြင့် ရောင်းချခြင်းလုပ်ငန်းများ မှတ်ပုံတင်လက်မှတ်စိစစ်ထုတ်ပေးခြင်း၊ မြေပြင်လုပ်ငန်းနှင့် မှတ်ပုံတင်ထားရှိမှု ကိုက်ညီမှုရှိ/ မရှိ၊ လုပ်ငန်းလိပ်စာ မှန်ကန်မှု ရှိ/ မရှိကို (၂၄.၁၁.၂၀၂၅) ရက်နေ့၊ နေ့လယ်(၁၄:၀၀)နာရီအချိန်တွင် လင်းကမ္ဘာဒေသထွက် စားသောက်ကုန် Online Sale လုပ်ငန်းအား ရတနာပုံ(၂)လမ်း၊ (၁၀)မြောက်ရပ်ကွက်၊ သာကေတမြို့နယ် သို့သွားရောက်၍ Online Sale မှတ်ပုံတင်မြေပြင်စစ်ဆေးခြင်းဆိုင်ရာ အချက်အလက်များကိုက်ညီမှုရှိ/ မရှိကို စစ်ဆေးခဲ့ကြောင်း သိရှိရပါသည်။

          ကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကိုဆွေးနွေးရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေနဲ့ စားသုံးသူများကို အကာအကွယ်ပေးရန်နှင့် e-Commerce လုပ်ငန်းများဖွံ့ဖြိုးတိုးတက်စေရန် အွန်လိုင်းစနစ်နဲ့ ရောင်းချခြင်းလုပ်ငန်းများကို အရေးကြီးကုန်စည်ဝန်ဆောင်မှုအဖြစ် သတ်မှတ်ပြီး အွန်လိုင်းစနစ်ရောင်းချခြင်းလုပ်ငန်းနှင့် ပတ်သက်၍ မြေပြင်စစ်ဆေးရမည့် အချက်(၁၈)ချက်နှင့် ကိုက်ညီမှုရှိ/ မရှိတို့ကို မြေပြင်စစ်ဆေးခဲ့ပြီး စားသောက်ကုန်လုပ်ငန်းဖြစ်သည့်အတွက် ကုန်အညွှန်းအမှတ်အသားနှင့်စပ်လျဉ်း၍လည်း အသိပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

         စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ရုံးမှ စစ်ဆေးရေးအရာရှိ ဒေါ်မိုးမိုးကြည်နှင့် ဝန်ထမ်းများသည်(၂၄.၁၁.၂၀၂၅)ရက်နေ့၊ နေ့လယ်(၁၃:၀၀)နာရီအချိန်တွင် “A Touch of Beauty Online  shop” မှ အလှကုန်ပစ္စည်းများအား ပုညဝိသနလမ်း၊  ဌေးကြွယ်ရပ်ကွက်၊ တာမွေ မြို့နယ်သို့သွားရောက်၍ OnlineSale မှတ်ပုံတင်မြေပြင်စစ်ဆေးခြင်း ဆိုင်ရာအချက်အလက်များ ကိုက်ညီမှုရှိ/ မရှိကို စစ်ဆေးခဲ့ကြောင်း သိရှိရပါသည်။

          ကွင်းဆင်းစစ်ဆေးရာတွင် စစ်ဆေးရေးအရာရှိက အွန်လိုင်းစနစ်ဖြင့်ရောင်းချခြင်းလုပ်ငန်းနှင့် ပတ်သက်၍ မြေပြင်စစ်ဆေးရမည့် အချက်(၁၈) ချက်နှင့် ကိုက်ညီမှုရှိ/ မရှိ စစ်ဆေးခြင်းနှင့် အွန်လိုင်းစနစ်နှင့် ရောင်းချခြင်းလုပ်ငန်းလုပ်ကိုင်ခြင်းကို အရေးကြီးကုန်စည်ဝန်ဆောင်မှုဥပဒေအဖြစ် သတ်မှတ်ထားခြင်းဖြစ်ကြောင်းနှင့် စီးပွားရေးလုပ်ငန်းရှင်အား စားသုံးသူကာကွယ်ရေးဥပ‌ဒေပါ စီးပွားရေးလုပ်ငန်းရှင်၏ တာဝန်များအတိုင်း လိုက်နာဆောင်ရွက်စေလိုကြောင်း အသိပေးပြောကြားခဲ့ကြောင်း သိရှိရပါသည်။

DOCA (ရန်ကုန်)

      စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဦးစီးအရာရှိ ဒေါ်ငြိမ်းမြတ်ကျော်နှင့် ဝန်ထမ်းများသည် ၂၁.၁၁.၂၀၂၅ ရက်နေ့တွင် မော်လမြိုင်မြို့၊ ရတနာထွန်းပွဲရုံဝင်းအတွင်း ရန်ကုန်မြို့ယုဇနကုမ္ပဏီ မှ  6J/6791၊ 4D/1823 ယာဉ်တို့ဖြင့် စက်မှုလုပ်ငန်းသုံး စားအုံးဆီ ပေပါ (၂၂၀) ရောက်ရှိကြောင်း သတင်းရရှိသဖြင့် သွားရောက်စစ်ဆေးခဲ့ပါသည်။

    ထိုသို့ စစ်ဆေးခဲ့ရာတွင် စားအုန်းဆီရောက်ရှိသည့် ပိဿာချိန်အရေအတွက် မှန်ကန်မှု ရှိ/မရှိ၊ ဆီအရည်အသွေး မှန်ကန်မှု ရှိ/မရှိ၊ စက်မှုလုပ်ငန်းနေရာများတွင် သုံးစွဲရန်အတွက် ဟုတ်/မဟုတ် စစ်ဆေးခဲ့ကြောင်း သိရှိရပါသည်။

DOCA (မွန်)

    ၁၉.၁၁.၂၀၂၅ ရက်နေ့တွင် မွန်ပြည်နယ်၊ ပေါင်မြို့နယ် ကြက်ခြေနီအသင်းခွဲမှ ဦးဆောင် ၍ အပြည်ပြည်ဆိုင်ရာကြက်ခြေနီကော်မတီ (ICRC)နယ်လှည့်ခြေတု တပ်ဆင်ရေးအဖွဲ့မှ ပေါင်မြို့နယ်အတွင်းရှိ မသန်စွမ်း ပြည်သူများအား ခြေတုလက်တု အခမဲ့ပြုလုပ်ပေးခဲ့ရာ ပေါင်မြို့နယ်အတွင်းရှိ ပြည်သူစုစုပေါင်း(၃၁)ဦး ပြုလုပ်ခဲ့ကြောင်းသိရသည်။ ပေါင်မြို့နယ် ကြက်ခြေနီအသင်းခွဲ‌အနေဖြင့် ခြေတုလက်တုများပြုလုပ်ပေးခြင်းဖြင့် လမ်းလျှောက်နိုင်ခြင်း၊ အရာဝတ္ထုများကို ကိုင်တွယ်ပြုလုပ်နိုင်ခြင်း ၊ကိုယ်ဟန်အနေအထား ထိန်းညှိရန်  ခန္ဓာကိုယ်၏ ဟန်ချက်ညီမှုကို ထိန်းသိမ်းပေးခြင်း၊ ကျန်ရှိသော အစိတ်အပိုင်းများကို ထိခိုက်မှုမှ ကာကွယ် ပေးခြင်း၊ ကိုယ်ခန္ဓာအစိတ်အပိုင်းဆုံးရှုံးမှုကြောင့် ဖြစ်ပေါ်လာနိုင်သော စိတ်ဒဏ်ရာများကို လျှော့ချပေးခြင်း၊ ယုံကြည်မှုပြန်လည်ရရှိစေခြင်း၊ ခန္ဓာကိုယ်၏ ပုံသဏ္ဍာန်ပကတိကို ပြန်လည် ရရှိစေခြင်း၊ လူ့အဖွဲ့အစည်းအတွင်း ပိုမိုလွယ်ကူစွာ ပြန်လည်ပေါင်းစည်းနိုင်ခြင်း စသည်များ ပြန်လည်ခံစားရရှိစေရန်  ပြုလုပ်ပေးရခြင်းဖြစ်ကြောင်း သိရှိရပါသည်။

DOCA (မွန်)

          ၁၉.၁၁.၂၀၂၅ ရက်နေ့တွင် စိုက်ပျိုးရေးဦးစီးဌာနက မွန်ပြည်နယ်၊ ‌ပေါင်မြို့နယ်ရှိ တောင်သူများအား နေကြာမျိုးကောင်းမျိုးသန့်များ စိုက်ပျိုးနိုင်ရေးအတွက် ဆောင်းသီးနှံ နေကြာမျိုးစေ့များ ပေးအပ်ခြင်းကို ယနေ့နံနက်ပိုင်းက မြို့နယ်စိုက်ပျိုးရေးဦးစီးဌာနရုံး၌ ကျင်းပပြုလုပ်ခဲ့ရာ မြို့နယ်အထွေထွေအုပ်ချုပ်ရေးဦးစီးဌာန၊ စိုက်ပျိုးရေးဦးစီးဌာန၊ စားသုံးသူ ရေးရာဦးစီးဌာနနှင့် ဌာနဆိုင်ရာများ၊ တောင်သူများ တက်ရောက်ခဲ့ကြပါသည်။ ရှေးဦးစွာ ဒုတိယမြို့နယ်အုပ်ချုပ်ရေးမှူး ဦးကျော်မျိုးလှိုင်က အမှာစကားပြောကြားပြီး ပေါင်မြို့နယ် စိုက်ပျိုးရေးဦးစီးဌာန မြို့နယ်ဦးစီးမှူးဦး‌ကျော်စွာလှိုင်က ဆောင်းသီးနှံနေကြာမျိုးစေ့များ ပေး အပ်ရခြင်းနှင့် ပတ်သက်၍ ရှင်းလင်းပြောကြားပြီး တာဝန်ရှိသူများက လျာထားဧက ပြည့်မီစွာ စိုက်ပျိုးနိုင်ရေးအတွက် အိန္ဒိယစပ်မျိုးနေကြာ၊ ရေဆင်းစပ်မျိုး(၁)နေကြာ၊ ဆင်းရွှေကြာ(၂) နေကြာမျိုးစေ့ကို တောင်သူများထံသို့ လွှဲပြောင်းပေးအပ်ခဲ့ပါသည်။ ပေါင်မြို့နယ်အနေဖြင့် ပြည်နယ်အတွင်း စားနပ်ရိက္ခာဖူလုံရေးအတွက် စိုက်ပျိုးမွေးမြူရေးကဏ္ဍများကို စနစ်တကျ ဆောင်ရွက်ကြရန်နှင့် ဆီထွက်သီးနှံများဖြစ်သည့် မြေပဲ၊ နှမ်း၊ နေကြာ စိုက်ခင်းများအား တိုးချဲ့စိုက်ပျိုးနိုင်ရေး ရည်ရွယ်ထားရှိကြောင်းသိရသည်။

DOCA (မွန်)