သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဒေါ်အေးအေးမော် (ရုံးအုပ်) နှင့်ဝန်ထမ်းများ၊ ဈေးတာဝန်ခံနှင့်ဝန်ထမ်းများသည် တောင်ဥက္ကလာပမြို့နယ်၊ ပဒေသာဈေးအတွင်းရှိ ကုန်စုံဆိုင်များသို့  ငရုတ်ဆီများအား ထုတ်ကုန်လုံခြုံစိတ်ချရမှုရှိစေရေး (၁၂-၈-၂၀၂၅ ) ရက်နေ့၊ နံနက်(၁၁:၃၀) နာရီအချိန်တွင် သွားရောက်၍ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။    

          ထိုသို့ကွင်းဆင်းစစ်ဆေးခဲ့ရာတွင်  စားသုံးသူမိဘပြည်သူများ  ဘေးအန္တရာယ်ကင်းရှင်းစေရန်အတွက်  ဈေးကွက်အတွင်းရောင်းချနေသောငရုတ်ဆီများတွင်  FDA ထောက်ခံချက်ပါရှိသည့်အပြင် ကုန်အညွှန်းအမှတ်အသားပြည့်စုံစွာဖော်ပြထားကြောင်း စိစစ်တွေ့ရှိခဲ့ပြီး  မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်ကြားချက် အမှတ်(၂/၂၀၁၉ ) နှင့်အညီ မြန်မာဘာသာဖြင့်ပြည်စုံစွာဖော်ပြထားသောကုန်စည်များကိုသာရောင်းချရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်နှင့် သတ်မှတ်အရည်အသွေးပြည့်မီသော ကုန်စည်များကိုသာရောင်းချရန် ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ရန်ုကုန်)

     ၁၄.၈.၂၀၂၅ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ မုဒုံမြို့နယ်တာဝန်ခံ ဦးညီလွင်အေးသည် မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ မုဒုံမြို့၊ မြို့မ (၄) ရပ်ကွက်၊ ဂျုံးဂျုံးဂျလမ်းရှိ “EVER GREEN” သောက်ရေသန့်လုပ်ငန်းရှင်နှင့် တွေ့ဆုံဆွေးနွေးခဲ့သည်။

          ထိုသို့တွေ့ဆုံရာတွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံမှ စီးပွားရေးလုပ်ငန်း ရှင်များလိုက်နာရမည့်တာဝန်များ၊ လက်ရှိထုတ်လုပ်၊ ဖြန့်ဖြူးရောင်းချနေသည့် အခြေအနေများ၊ ကုန်အညွှန်းအမှတ်အသားမှတ်ပုံတင်ခြင်းနှင့် ပတ်သက်သည့်အချက်များအား ဆွေးနွေးခဲ့ ကြောင်း သိရှိရပါသည်။

DOCA (မွန်)

     မွန်ပြည်နယ်၊ မုဒုံမြို့နယ်တွင် မြို့နယ်အုပ်ချုပ်ရေးမှူးဖလား (ရပ်ကွက်/ကျေးရွာ)ပေါင်းစုံ အလွတ်တန်း ဘောလုံးပြိုင်ပွဲ၊ ဗိုလ်လုပွဲနှင့် ဆုချီးမြှင့်ပွဲကို ၁၁.၈.၂၀၂၅ ရက်နေ့ နေ့လယ် (၁၅:၀၀) နာရီက မြို့နယ်အားကစားပြိုင်ဝင်းအတွင်းရှိ မီတာ (၄၀၀)ဘောလုံးကွင်း၌ ကျင်းပသည်။

      မိုးရာသီဘောလုံးပြိုင်ပွဲများကို တစ်မျိုးသားလုံးကျန်းမာကြံခိုင်စေရေး၊ ဘောလုံးအားကစား နည်းအားလူတန်းစားအလွှာအသီးသီးမှ အထူးစိတ်ဝင်စားလာပြီး မြန်မာ့ဘောလုံးအားကစား နည်းအဆင့်အတန်း တိုးတက်မြင့်မားစေရန်နှင့် မြို့နယ်၊ ပြည်နယ်ပြိုင်ပွဲများမှ နိုင်ငံလက်ရွေးစင် ဘောလုံးအားကစားသမားကောင်းများ ပေါ်ထွက်လာစေရန်အတွက် ကျင်းပပေးလျက်ရှိပြီး ပြိုင်ပွဲဝင်အသင်း (၁၄)သင်းက ပါဝင်ခဲ့ရာ ဗိုလ်လုပွဲစဥ်တွင် မြို့မ (၂) အသင်းနှင့် မြို့မ (၃) အသင်းတို့ ယှဥ်ပြိုင်ကြ၍ ပယ်နယ်တီ အဆုံးအဖြတ်(၃ ဂိုး၊ ၄ ဂိုး)ဖြင့် မြို့မ(၃) အသင်းက အနိုင်ရဗိုလ်ဆွဲခဲ့ကြောင်း သိရသည်။

     ဆက်လက်၍ ဆုချီးမြှင့်ပွဲကိုကျင်းပရာ ပြိုင်ပွဲ ပွဲစဥ်တစ်လျှောက် အကောင်းဆုံး အားကစားသမားဆု၊ ပထမ၊ ဒုတိယ၊ တတိယ တစ်ဦးချင်းဆု၊ အသင်းလိုက်ငွေသားဆုနှင့် တံခွန်စိုက်ဒိုင်းဆုများကို မြို့နယ်အုပ်ချုပ်ရေးမှူးနှင့် တာဝန်ရှိသူများက အသီးသီး ဆုချီးမြှင့် ပေးအပ်ခဲ့ကြောင်းနှင့် ဒေသခံပြည်သူ (၁၆၀၀)ခန့် အားပေးကြကြောင်း သိရသည်။

DOCA (မွန်)

     မွန်ပြည်နယ်၊ မုဒုံမြို့နယ်တွင် ၂၀၂၅-၂၀၂၆ ပညာသင်နှစ် ကျောင်းကျန်းမာရေး သီတင်းပတ် လှုပ်ရှားမှု အခမ်းအနားကို (၁၁.၈.၂၀၂၅) ရက်နေ့ နံနက်ပိုင်းက အ.လ.က (သင်္ဘောဦး) စာသင်ကျောင်း၌ ပြုလုပ်ခဲ့သည်။

    ရှေးဦးစွာ အခမ်းအနားကို ကျောင်းသား/သူများက တေးသီချင်းသီဆို၍ ဖွင့်လှစ်ခဲ့ပြီး မြို့နယ်ပြည်သူ့ကျန်းမာရေးဦးစီးဌာန၊ ကုသရေးဦးစီးဌာနမှသွားဆရာဝန် ဒေါက်တာလမင်းထက် က ကျောင်းအခြေပြု ကျန်းမာမှုအသိပညာမြှင့်တင်ရေးလုပ်ငန်းများ၊ ကျောင်းပတ်ဝန်းကျင် သန့်ရှင်းရေးလုပ်ငန်း (အမှိုက်ကင်းစင်ကျောင်း၊ သန့်ရှင်းသော ယင်လုံအိမ်သာသုံးစွဲရေး)၊ ကျောင်းအခြေပြု ရောဂါကာကွယ်ရေးလုပ်ငန်းများ၊ ကျောင်းတွင်းအာဟာရဖွံ့ဖြိုးရေး၊ အစားအစာများ အန္တရာယ်ကင်းဝေးရေးနှင့် ကျောင်းကျန်းမာရေးစောင့်ရှောက်မှု လုပ်ငန်းများကို နှစ်စဥ် ဆောင်ရွက်ပေးလျက်ရှိကြောင်းနှင့် သွားနှင့်ခံတွင်း ကျန်းမာရေးအကြောင်းအရာများကို ရှင်းလင်းပြောကြားခဲ့ကြောင်း သိရသည်။

    ထို့နောက် လက်ဆေးနည်းအဆင့်ဆင့်၊ နည်းစနစ်မှန် သွားတိုက်ခြင်း သရုပ်ပြခြင်း၊ အာဟာရအုပ်စု (၃) စုပါဝင်သော အစားအစာများအကြောင်းကို မေးခွန်းအမေး/ အဖြေများဖြင့် ကျန်းမာရေး ဝန်ထမ်းများက ပြုလုပ်ပေးခဲ့ပြီး ဆုရ ကျောင်းသား/သူ များအား တာဝန်ရှိသူများက ဆုချီးမြှင့်ပေးအပ်ခဲ့သည်။ ယင်းနောက် ကျောင်းသား/သူများကို ကျန်းမာရေးစစ်ဆေး၍ လိုအပ်သည့် ဆေးဝါးများ အခမဲ့ပေးအပ်ခဲ့ပြီး အာဟာရများကျွေးမွေးကြောင်း သိရသည်။

DOCA (မွန်)

     ၁၃.၈.၂၀၂၅ ရက်နေ့ မွန်ပြည်နယ်၊ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံ ဦးညီလွင်အေးသည် မုဒုံမြို့နယ်၊ ကမာဝက်မြို့ အမှတ် (၆)၊ ဗိုလ်ချုပ်လမ်း၊ တရုတ်တန်းရပ်ရှိ ဟင်းမွှေးမဆလာ ထုတ်လုပ်သည့် လုပ်ငန်းရှင်နှင့် တွေ့ဆုံဆွေးနွေးခဲ့သည်။

     ထိုသို့ တွေ့ဆုံဆွေးနွေးရာတွင် မုဒုံမြို့နယ်တာဝန်ခံက လုပ်ငန်းရှင်အား စားသုံးသူကာကွယ်ရေးဥပဒေပါစီးပွားရေးလုပ်ငန်းရှင်၏ တာဝန်များကို လိုက်နာရန်၊ ထုတ်ကုန် ပစ္စည်းများပေါ်တွင် စားသုံးသူကာကွယ်ရေးဥပဒေ အခန်း(၁၈) တွင် ပြဌာန်းထားသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်များနှင့် ကိုက်ညီအောင်ဖော်ပြရန်၊ သက်ဆိုင်ရာဌာနများ၏ ထောက်ခံချက်များကိုဖော်ပြရန်ဆွေးနွေးခဲ့ကြောင်း သိရှိရပါသည်။

DOCA (မွန်)