သတင်းနှင့် လှုပ်ရှားမှုများ

   ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် စည်ပင်သာယာမြို့မဈေးအတွင်း ကုန်ခြောက်ဆိုင်များတွင် ရောင်းချနေသော ဗူးဆီ (စားသုံးဆီအမျိုးမျိုး)တို့ကို စားသုံးသူရေးရာ ဦးစီးဌာန၊ ခရမ်းမြို့နယ်တာဝန်ခံ ဒေါ်ကျော့ကေခိုင်သည် မြို့နယ်စည်ပင်သာယာရေးအဖွဲ့ မြို့နယ်ဈေးတာဝန်ခံနှင့်ပူးပေါင်း၍ အောက်တိုဘာလ(၁၀)ရက်နေ့၊ နံနက်(၀၉:၃၀)နာရီအချိန် တွင် ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။

        ထိုသို့ ဈေးကွက်စောင့်ကြည့် စစ်ဆေးရာတွင်  မြို့မဈေးအတွင်း ရောင်းချနေသော စားသုံးဆီအမျိုးမျိုးတို့တွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်၊ ၂/၂၀၁၉ပါ မြန်မာဘာသာဖြင့် ကုန်အညွှန်းအမှတ်အသားများနှင့် ပြည့်စုံမှုရှိ/မရှိ၊ စားသုံးသူရေးရာ ဦးစီးဌာန၏ ညွှန်ကြားချက်အမှတ်(၁/၂၀၂၁)ပါ ညွှန်ကြားထားချက်များနှင့် ထည့်သွင်းဖော်ပြထား ခြင်းများရှိ/မရှိနှင့် FDAထောက်ခံချက်များ ပါဝင်မှုရှိ/မရှိတို့အား စစ်ဆေးခဲ့ကြပြီး ဈေးဆိုင်ပိုင်ရှင်များအား မြို့နယ်တာဝန်ခံက ညွှန်ကြား ချက်ပါ အချက်များအား ရှင်းလင်းပြောကြားခဲ့ပြီး မိမိတို့ ဆိုင်တွင် ရောင်းချနေသော ဗူးဆီ (စားသုံးဆီအမျိုးမျိုး)တွင် ထိုအချက်များဖြင့် ပြည့်စုံသော ကုန်စည်ကို ရောင်းချခြင်းဖြင့် စားသုံးသူများ ထင်ယောင်ထင်မှား မဖြစ်စေဘဲ အခြေခံလိုအပ်ချက် များအပေါ်တွင် စိတ်ကျေနပ်မှုရရှိစေရန် ပူးပေါင်းဆောင်ရွက်ပေးကြရန် အသိပေးခဲ့ကြောင်းသိရှိရပါသည်။

DOCA(ရန်ကုန်)                                                                                                                       

       (၁၀.၁၀.၂၀၂၅)ရက်နေ့ နံနက်(၀၉:30)နာရီအချိန်တွင် စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိများသည် ဦးပိုင်အမှတ် (၄/၄၅/1A/46 /1A) နွယ်ခွေကျေးရွာ၊ မင်္ဂလာဒုံမြို့နယ်ရှိ Max စက်သုံးဆီဆိုင်သို့ ဈေးကွက်စောင့်ကြည့် စစ်ဆေးခဲ့ကြောင်း သိရသည်။

           ထိုသို့ကွင်းဆင်းစစ်ဆေးရာတွင် စစ်ဆေးရေးအရာရှိက Max စက်သုံးဆီဆိုင် တာဝန်ခံ ဦးစံဝင်းအား စက်သုံးဆီရောင်းချမှုအခြေအနေများ၊ စက်သုံးဆီဈေးနှုန်း၊ အချင်အတွယ် မှန်ကန်မှုရှိ/ မရှိ ဆီကားရောက်ရှိမှုအခြေအနေများနှင့် ဆီလက်ကျန်အခြေအနေများ၊ ဈေးနှုန်းမြှင့်တင်ရောင်းချခြင်းရှိ/ မရှိ မေးမြန်းခြင်းဆောင်ရွက်ခဲ့ပြီး စက်သုံးဆီအရောင်းဆိုင်များအနေဖြင့် စားသုံးသူများ လွယ်ကူစွာဝယ်ယူသုံးစွဲနိုင်စေရန်အတွက် စက်သုံးဆီအရောင်းဆိုင်များကို ပုံမှန်ဖွင့်လှစ်ရောင်းချပေးရန် ပြောကြားခဲ့ကြောင်း သိရှိရပါသည်။

DOCA (ရန်ကုန်)

   စားသုံးသူရေးရာဦးစီးဌာနသည် စားသုံးသူများ ဘေးအန္တရာယ်ကင်းရှင်းစေရေး၊ ဝယ်ယူ သုံးစွဲသောကုန်စည်နှင့်ပတ်သတ်၍ လိုအပ်သောသတင်းအချက်အလက်များ ပြည့်စုံမှန်ကန်စွာရရှိ နိုင်စေရေးအတွက် ကုန်စည်များတွင် ကုန်အညွှန်းအမှတ်အသားများ ပြည့်စုံစွာမြန်မာ ဘာသာဖြင့် ထည့်သွင်းဖော်ပြထားခြင်းရှိ/မရှိအား သက်ဆိုင်ရာဌာနဆိုင်ရာများနှင့် ပူးပေါင်းကာ ကုန်စည် အမျိုးအစားအလိုက် လစဉ်ဈေးကွက်စောင့်ကြည့်စစ်ဆေးလျှက်ရှိရာ ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်စည်ပင်သာယာမြို့မဈေးအတွင်း ဆေးမျိုးစုံရောင်းချသော ဆိုင်များ တွင် ရောင်းချနေသော ကလေးအာဟာရဖြည့်စွက်စာအမျိုးမျိုးကို စားသုံးသူရေးရာဦးစီးဌာန၊ ခရမ်းမြို့နယ်တာဝန်ခံ ဒေါ်ကျော့ကေခိုင်သည် မြို့နယ်စည်ပင်သာယာရေးအဖွဲ့ ဈေးတာဝန်ခံနှင့် ပူးပေါင်း၍ အောက်တိုဘာလ(၈)ရက်နေ့၊ နံနက်(၀၉:၃၀)နာရီအချိန်တွင် ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။

   ထိုသို့ ဈေးကွက်စောင့်ကြည့် စစ်ဆေးရာတွင် စည်ပင်သာယာမြို့မဈေးအတွင်း ဆေးအမျိုး မျိုးရောင်းချသော ဇူလိုင်ဆေးဆိုင်၊ ဦးမြဝိုင်+ဒေါ်တင်ရွှေဆေးဆိုင်၊ ရောင်နီဆေးဆိုင်များတွင် ကလေးအာဟာရဖြည့်စွက်စာအမျိုးမျိုးတွင် မြန်မာဘာသာဖြင့်ထည့်သွင်းဖော်ပြရမည့် ကုန်စည် အမျိုးအမည်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့် ကြောင်းဖော်ပြချက်၊ ဘေးထွက်ဆိုးကျိုးနှင့်ကြိုတင်သတိပေးချက်များ ပြည်စုံစွာဖော်ပြထားခြင်း ရှိ/မရှိနှင့် FDA ထောက်ခံချက်များရှိ/မရှိတို့အား စစ်ဆေးခဲ့ကြပြီး မြို့နယ်တာဝန်ခံက ဆိုင်ရှင်များ အား ကလေးအာဟာရဖြည့်စွက်စာများ ရောင်းချရာတွင် ကျန်းမာရေးဝန်ကြီးဌာန၊ အစား အသောက်နှင့်ဆေးဝါးကွပ်ကဲရေးဦးစီးဌာနမှ ထုတ်ပြန်ထားသောတုပထုတ်လုပ် ဖြန့်ဖြူးရောင်းချ နေသည့် အစားအသောက်နှင့်ပတ်သတ်၍ အများပြည်သူသိရှိရန် အသိပေးကြေညာချက်များပါ ကုန်စည်အစစ်နှင့်အတုအား ခွဲခြားပြီး မိမိဆိုင်တွင် ကုန်စည်အတုများအား ဖြန့်ဖြူးရောင်းချခြင်း မပြုလုပ်ကြရန်နှင့် လိုက်နာဆောင်ရွက်ခြင်းမရှိပါက ဥပဒေနှင့်အညီ အရေးယူဆောင်ရွက်မည် ဖြစ်ကြောင်း အသိပညာပေးခဲ့ကြောင်း သိရှိရပါသည်။

DOCA(ရန်ကုန်)

  ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လမ်းညွှန်မှု အရ အလုံခရိုင်၊ မရမ်းကုန်းခရိုင်၊ ကျောက်တံတားခရိုင် တရားမဝင်ကုန်သွယ်မှုတိုက်ဖျက်ရေး အထူးအဖွဲ့ အတွင်းရေးမှူး စားသုံးသူရေးရာဦးစီးဌာန၊ အနောက်ပိုင်းခရိုင်ဦးစီးမှူး ဦးအောင်တင်စိုး ဦးဆောင်သော ပူးပေါင်းအဖွဲ့သည် ၁၀.၁၀.၂၀၂၅ ရက်နေ့တွင် ကမ်းရိုးတန်းသွားရေယာဉ်များ ဆိုက်ကပ်သည့် ဆိပ်ကမ်းများဖြစ်သော ဗားကရာဆိပ်ကမ်း၊ ချောင်းဝဆိပ်ကမ်းနှင့် သိန်းဦးဆိပ်ကမ်းအား အကောက်ခွန်ဦးစီးဌာန၊ စားသုံးသူရေးရာဦးစီးဌာန၊ အထွေထွေ အုပ်ချုပ်ရေးဦးစီးဌာန၊ စိုက်ပျိုးရေး ဦးစီးဌာန၊ မြန်မာ့ဆိပ်ကမ်းအာဏာပိုင်၊ အမှတ်(၃)ရေကြောင်း ရဲတပ်ဖွဲ့ စသည့် ပူးပေါင်းအဖွဲ့များဖြင့် ပူးပေါင်း၍ ရေယာဉ်များတွင် တင်ဆောင်ထားသော တင်ဆောင်ကုန်များအား ရှောင်တခင်ဝင်ရောက် စစ်ဆေးခဲ့ပြီး လက်နက်ခဲယမ်းများတင်ဆောင်မှု မရှိစေရေးအတွက် ရဲတပ်ဖွဲ့နှင့်ပူးပေါင်း၍ စစ်ဆေးမှုများပြုလုပ်ခဲ့ကြောင်း သိရှိရပါသည်။

DOCA(ရန်ကုန်)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ မအူပင်ခရိုင်ဦးစီးမှူးရုံးလက်အောက်ရှိ ဓနုဖြူမြို့နယ်တာဝန်ခံရုံးမှ တာဝန်ရှိသူတို့သည် ဓနုဖြူမြို့နယ် မြို့မဈေး၊ ရပ်ကွက်ဈေးများတွင် ရောင်းချနေသော ကုန်မျိုးစုံအား မိတ်ဖက်ဌာနများဖြစ်သော စည်ပင်သာယာအဖွဲ့၊ တိမွေးကု၊ ငါးမွေးမြူရေးဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့်အတူ (၈၊၁၀၊၂၀၂၅)ရက်နေ့၊ နံနက်(၈)နာရီ အချိန်တွင် ဈေးကွက်အတွင်းကုန်စည်မျိုးစုံအား ဈေးကွက်စောင့်ကြည့်စစ်ဆေးခဲ့ကြပါသည်။

   အဆိုပါစစ်ဆေးမှူတွင် စည်ပင်သာယာရေးအဖွဲ့မှ အသားအမျိုးမျိုးရောင်းချသူများအား သတ်မှတ်လိုင်စင်များကို စစ်ဆေးခြင်း၊ မွေးမြူရေးနှင့် ကုသရေးဦးစီးဌာနမှ ဟင်းသီး၊ ဟင်းရွက်ရောင်းချသူများအား တာရှည်ခံ ဓါတုဆေးဝါးများမသုံးစွဲပဲ သဘာဝအတိုင်း ရောင်းချရန်အသိပညာပေးပြီး စစ်ဆေးခြင်းကိုလည်းကောင်း၊ ငါးလုပ်ငန်းဦးစီးဌာနမှ အေးခဲသားများ ရောင်းချခြင်းရှိ/မရှိကို စစ်ဆေးခြင်းများ ပြုလုပ်ခဲ့ကြပါသည်။

     ဆက်လက်၍ စားသုံးသူရေးရာဦးစီးဌာနမှ ဦးခိုင်လွမ်းမိုး(အကြီးတန်းစာရေးမှ) ဈေးအတွင်းရောင်းချနေသော ကုန်စည်များတွင် ကုန်အညွှန်းအမှတ်အသားဖော်ပြပါဝင်ခြင်း မရှိသော ကုန်စည်များရောင်းချခြင်း ရှိ/မရှိကိုစစ်ဆေးပြီး ရောင်းချသူ ကုန်မျိုးစုံဆိုင်ရှင်များအား စားသုံးသူကာကွယ်ရေးဥပဒေ (၂၀၁၉)ပါ  စားသုံးသူအဓိပ္ပါယ်၊ စီးပွားရေးလုပ်ငန်းရှင်အဓိပ္ပါယ်၊ စားသုံးသူနှင့် စီးပွားရေးလုပ်ငန်းရှင်အကြား စားသုံးသူအခွင့်အရေးနစ်နာဆုံးရှုံးမှု ရှိလာပါက ဖြစ်ပေါလာသည့် ဖြစ်စဉ်များကို ဖြေရှင်းဆောင်ရွက်ရသည့် ကိစ္စရပ်များကို ရှင်းလင်းပြီး၊ စီးပွားရေးလုပ်ငန်းရှင်လိုက်နာရမည့် တာဝန်များကိုလည်းကောင်း လေးစားလိုက်နာပြီး၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များကို ရှင်းလင်းပြီး၊ ကုန်စည်အမျိုးမျိုးကို စစ်ဆေးခဲ့ရာ ကုန်အညွှန်းအမှတ် အသားဖော်ပြပါဝင်သော ကုန်စည်များကိုသာ ဓနုဖြူမြို့မဈေး၊ ရပ်ကွက်ဈေးများတွင် ရောင်းချနေကြောင်း သိရှိရပါသည်။

DOCA (ဧရာဝတီ)