သတင်းနှင့် လှုပ်ရှားမှုများ

       စားသုံးသူရေးရာဦးစီးဌာနမှ ဒေးဒရဲမြို့နယ် တာဝန်ခံဦးသိန်းမောင်နှင့် ဝန်ထမ်းတို့သည် (၁.၉.၂၀၂၅) နေ့လယ်  (၁၄:၀၀) နာရီအချိန်တွင် ဒေးဒရဲမြို့၊ ညောင်တပင်ကျေးရွာ အ.မ.က ကျောင်းရှိ ကျောင်းသား/သူများအား စားသုံးသူအခွင့်အရေး အပြည့်အဝရရှိစေရန်နှင့် နစ်နာဆုံးရှုံးမှုများနှင့် စပ်လျဉ်း၍ တောင်းဆိုရယူတတ်စေရန် ရည်ရွယ်၍ စားသုံးသူကာကွယ်ရေး အသိပညာဟောပြောခြင်း ကို ဆောင်ရွက်ခဲ့ပါသည်။

          မြို့နယ်တာဝန်ခံ ဦးသိန်းမောင်က စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားနှင့် စပ်လျဉ်း၍ ကုန်ပစ္စည်းများ ဝယ်ယူသုံးစွဲခြင်းမပြုမီ သတိ ပြုရမည့်အချက်များ၊ စားသုံးသူအခွင့်အရေးနှင့် စပ်လျဉ်း၍ နစ်နာဆုံးရှုံးမှုများ ဖြစ်ပေါ်လာပါက အရေးဆို တိုင်ကြားနိုင်သည့် စင်တာများ ဖွင့်လှစ်ထားရှိကြောင်း၊ သက်ဆိုင်ရာ မြို့နယ်ဦးစီးမှူးရုံးမှ လူကိုယ်တိုင် ဆက်သွယ်မေးမြန်းတိုင်ကြားနိုင်ကြောင်း ဟောပြောခဲ့ပြီး အဆိုပါ ဟောပြောပွဲသို့ ဆရာ/မ နှင့် ကျောင်းသား/သူ (၇၂) ဦးတက်ရောက်ခဲ့ကြောင်း သိရသည်။

(Doca ဧရာဝတီ)

       ဒေးဒရဲမြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်သည် ပြန်ကြားရေး နှင့် ပြည်သူ့ဆက်ဆံရေးဦးစီးဌာနနှင့် ပူးပေါင်း၍(၁.၉.၂၀၂၅) နေ့လယ်  (၁၄:၃၀) နာရီအချိန်တွင် ထုတ်ကုန်လုံခြုံစိတ်ချရမှု ရှိစေရေး အသိပညာပေး Talk Show ကျင်းပပြုလုပ်ခဲ့ပါသည်။

          အဆိုပါ Talk Show တွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်က စားသောက်ကုန်နှင့် လူသုံးကုန်ပစ္စည်းများ ထုတ်လုပ်ရာတွင် စားသုံးသူများ ဘေးအန္တရာယ် ကင်းရှင်းစွာသုံးစွဲနိုင်ရေးအတွက် စားသုံးသူကာကွယ်ရေးဥပဒေ အခန်း(၁၈) ၊ ပုဒ်မ (၄၁) အရ ထားသိုသိမ်းဆည်းပုံ၊ သက်တမ်းကုန်ဆုံးသည့် ရက်စွဲ၊ ထုတ်လုပ်သည့် ရက်စွဲ၊ အလေးချိန် ဂရမ် စသည့် ကုန်အညွှန်းအမှတ်အသား ပြည့်စုံစွာ ဖော်ပြထားရှိရန်လိုကြောင်း၊ ပုဒ်မ (၄၃) အရ မြန်မာဘာသာဖြင့် ဖြစ်စေ၊ အခြားဘာသာ တစ်ခုထက်ပို၍ တွဲလျက်ဖော်ပြထားရှိမှသာ စားသုံးသူများ ဘေးအန္တရာယ် ကင်းရှင်းစွာ စားသုံးနိုင်မည်ဖြစ်ကြောင်း ၊ စားသုံးသူများ အနေဖြင့် ကုန်စည်နှင့်ဝန်ဆောင်မှုများကြောင့် နစ်နာဆုံးရှုံးမှုဖြစ်ပေါ်လာပါက Call Centre 1535 သို့ ဆက်သွယ်တိုင်ကြားနိုင်ကြောင်း အသိပညာပေး Talk Show ကျင်းပပြုလုပ်ခဲ့ကြောင်း သတင်းရရှိပါသည်။

(Doca ဧရာဝတီ)

      ဒေးဒရဲမြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်နှင့် ဝန်ထမ်းတို့သည် စည်ပင်သာယာရေးဦးစီးဌာနနှင့် ပူးပေါင်း၍(၁.၉.၂၀၂၅)ရက်နေ့၊နေ့လယ် (၁၃:၀၀) နာရီအချိန်တွင် ဒေးဒရဲမြို့ပေါ်ရှိ ဘိလပ်မြေဆိုင်များသို့ ကွင်းဆင်း၍ ဘိလပ်မြေ ဈေးနှုန်းစုံစမ်းမေးမြန်းခြင်းကို ဆောင်ရွက်ခဲ့ကြပါသည်။

          ကြံ့နှစ်ကောင် ဘိလပ်မြေ တစ်အိတ်လျှင်(၂၀၅၀၀) ကျပ်၊  Alpha ဘိလပ်မြေ တစ်အိတ်လျှင် (၂၀၅၀၀) ကျပ် ဖြင့် အရောင်းအဝယ်ဖြစ်လျက်ရှိကြောင်း သိရသည်။ ဩဂုတ်လ ပထမ ပတ်နှင့် ယခုပတ် ဘိလပ်မြေ ဈေးနှုန်းများ နှိုင်းယှဉ်ပါက ကြံ့နှစ်ကောင်ဘိလပ်မြေနှင့် Alpha ဘိလပ်မြေ တစ်အိတ်လျှင် (၂၅၀၀) ကျပ်ခန့် ဈေးနှုန်းကျဆင်းသွားကြောင်း ကွင်းဆင်းစစ်ဆေးခဲ့မှုအရ သိရသည်။

(Doca ဧရာဝတီ)

      ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံဦးသိန်းမောင်သည် (၁.၉.၂၀၂၅) နေ့လယ်  (၁၂:၀၀) နာရီအချိန်တွင် မြို့နယ်စားသုံးသူရေးရာဦးစီးဌာနရုံး၌ Online Sale ရောင်းချသူလုပ်ငန်းများအား မှတ်ပုံတင်လျောက်ထားခြင်းနှင့် ပက်သက်၍ အသိပညာပေး ဟောပြောခြင်းကို ဆောင်ရွက်ခဲ့ပါသည်။

          အဆိုပါ‌ဟောပြောပွဲတွင် မြို့နယ်တာဝန်ခံ ဦးသိန်းမောင်က Online စနစ်ဖြင့် ရောင်းချရာတွင် မှတ်ပုံတင်လက်မှတ်လျောက်ထားခြင်းဆိုင်ရာကိစ္စရပ်များ ၊ Online စနစ်နှင့် ပက်သက်၍ ကုန်သွယ်ရေး ဦးစီးဌာနမှ သတ်မှတ်ထားသော လျောက်လွှာပုံစံ၊ မှတ်ပုံတင်လက်မှတ်ပုံစံ၊ မှတ်ပုံတင်ကြေးနှင့် ဝန်ဆောင်ခတို့ကို သတ်မှတ်ထားပြီး မည်သည့်စီးပွားရေးလုပ်ငန်းရှင်မဆို Online မှတ်ပုံတင် လက်မှတ်မရှိပဲ ရောင်းချမည်ဆိုပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူခံရမည် ဖြစ်ကြောင်း အသိပညာပေး ဟောပြောဆွေးနွေးခဲ့မှု အပေါ် သတင်းရရှိပါသည်။

(Doca ဧရာဝတီ)

    ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့နယ်ကုန်ဈေးနှုန်းတည်ငြိမ်ကျဆင်းရေး ကော်မတီ၏ ကြီးကြပ်မှုဖြင့်(၁.၉.၂၀၂၅)ရက်နေ့ နံနက်(၀၈:၀၀)အချိန်မှစတင်၍ အခြေခံစားသောက် ကုန် ဆန်၊ဆီနှင့်ကြက်ဥများအား ဈေးနှုန်းသက်သာစွာဖြင့် ပြည်သူများဝယ်ယူအသုံးပြုနိုင်ရေး ရောင်းချပေးလျက်ရှိပါသည်။ ဆန်နှင့် စားအုန်း ဆီများရောင်းချပေးရာတွင် မြို့နယ်စီမံအုပ်ချုပ်ရေးအဖွဲ့ ဥက္ကဌ၊ မြို့နယ်စည်ပင်သာယာရေးအဖွဲ့၊ စားသုံးသူရေးရာဦးစီးဌာန မြို့နယ်တာဝန်ခံ ဦးကျော်နိုင်ဝင်းနှင့် မြို့နယ် စားအုန်းဆီလက္ကားကိုယ်စားလှယ်များမှ ပူးပေါင်းဆောင်ရွက်ခဲ့ကြောင်းသိရသည်။

    ထိုသို့ရောင်းချရာတွင် ပြည်သူများအား သက်သာသော ဈေးနှုန်းဖြင့် ဝယ်ယူစားသောက်နိုင်ရန် စားအုန်းဆီ (၅၀ ကျပ်သား)ဘူးခွံအပါ တစ်ဗူးလျှင် ၃၅၀၀/- ကျပ်နှုန်းဖြင့် ပိဿာချိန် (၁၁၀)၊ ကြက်ဥ(၅)လုံးလျှင် (၂၀၀၀/-)ကျပ်ဖြင့် အလုံးရေ (၅၀၀)လုံး ရောင်းချပေးခဲ့ကြောင်း သိရှိရ ပါသည်။ ထိုသို့ရောင်းချခြင်းကို ဌာနဆိုင်ရာများမှ ပူးပေါင်း၍ ပြည်သူများ ဈေးနှုန်းသက်သာစွာ ဝယ်ယူနိုင်ရေး ဆောင်ရွက်ပေးခြင်းဖြစ်ကြောင်း သတင်းရရှိပါသည်။

EYDNS(DOCA ဧရာဝတီ)