သတင်းနှင့် လှုပ်ရှားမှုများ

   စားသုံးသူရေးရာဦးစီးဌာန၊  ရန်ကုန်တိုင်းဒေသကြီး အရှေ့ပိုင်းခရိုင်ဦးစီးမှူးရုံးမှ ဦးရန်နိုင် ထွန်း(အကြီးတန်းစာရေး)နှင့် ဝန်ထမ်းများသည် သင်္ဃန်းကျွန်းခရိုင် ၊ မြို့နယ်အထွေထွေအုပ် ချုပ်ရေးဦးစီးဌာန၊ စည်ပင်သာယာရေးကော်မတီမှတာဝန်ရှိသူများနှင့်ပူးပေါင်းပြီး  (၉.၉.၂၀၂၅) ရက်နေ့၊ နေ့လယ်(၁၂:၀၀)နာရီအချိန်တွင်ရန်ငြိမ်းလမ်း၊(၆)ရပ်ကွက်၊ ရန်ကင်းမြို့နယ် အောင်ဇဗ္ဗူ စားသုံးဆီရောင်းဝယ်ရေး စားအုန်းဆီလက်လီရောင်းချမှုအခြေအနေများကို  သွားရောက်၍ ကွင်း ဆင်းအသိပညာပေးမှုများ ဆောင်ရွက်ခဲ့ကြောင်း သိရှိရပါသည်။

         ထိုသို့ ကွင်းဆင်းအသိပညာပေးရာတွင် စားအုန်းဆီလက်လီရောင်းချသူများအနေဖြင့် သတ်မှတ်ရည်ညွှန်းဈေးအပေါ် သယ်ယူပို့ဆောင်စရိတ်အပါအဝင် ဖြစ်သင့်ဖြစ်ထိုက်သည့် အမြတ်ရာခိုင်နှုန်းထက်ပိုမို၍ ရောင်းချနေမှုရှိ/မရှိစစ်ဆေးခဲ့ပြီး ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို အပတ်စဉ်ထုတ်ပြန်ပေးလျက်ရှိသည့်အတွက် လုပ်ငန်းရှင်များအ နေဖြင့် စနစ်တကျလိုက်နာပေးစေလိုကြောင်း အသိပညာပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

  စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးမင်းမင်းစိုး  (ဌာနခွဲစာ ရေး)သည် ၁၀.၉.၂၀၂၅ ရက်နေ့ ၊ နေ့လယ် (၁၂:၀၀) နာရီအချိန်တွင် မင်္ဂလာတောင်ညွန့်မြို့နယ်၊ ရွှေပြည်စုံဈေး၊ ခိုင်ရွှေဝါဆေးဆိုင်သို့  ဈေးကွက်စောင့်ကြည့်စစ်ဆေးခဲ့ကြောင်းသိရှိရပါသည်။

            ထိုသို့ ကွင်းဆင်းစစ်ဆေးရာတွင် ခိုင်ရွှေဝါဆေးဆိုင်တွင် ရောင်းချလျှက်ရှိသော လူသုံး များ သောဆေးဝါးများနှင့် ရောင်းချနေသော ဆေးဝါးများ၏ ဈေးနှုန်းများအတက်အကျ ရှိ/မရှိ၊ ယခင်လဈေးနှုန်း၊ ယခုလဈေးနှုန်းများ၏ ဈေးနှုန်းကွာခြားမှုရှိ/မရှိ၊ ဆေးနှင့်ဆေးပစ္စည်းများပြတ် လပ်မှုရှိ/မရှိတို့ကိုကိုစစ်ဆေးခဲ့ပြီး ဈေးကွက်များအတွင်း ဆေးဈေးနှုန်းများမှာ ယခင်ကာလတူနှင့် နှိုင်းယှဉ်ကြည့်လျှင် ဆေးဈေးနှုန်းအတက်အကျ အနည်းငယ်သာရှိကြောင်း သိရှိရပါသည်။

DOCA(ရန်ကုန်)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများ၊  စီးပွားရေးလုပ်ငန်းရှင်များနှင့် တွေ့ဆုံပြီး ဥပဒေ၊ အမိန့်နှင့် ညွှန်ကြားချက်များအား ရှင်းလင်းဆွေးနွေးခြင်းများ ဆောင်ရွက်လျက်ရှိသည့်အပြင် ထုတ်ကုန်များလုံခြုံ စိတ်ချရမှုရှိစေရေးနှင့် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိရာ ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးဦးဆောင်၍ ဒု-ခရိုင်ဦးစီးမှူး၊ စားသုံးသူရေးရာဌာနခွဲ တာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် (၁၀.၉.၂၀၂၅)ရက်နေ့၊ နံနက်(၁၀:၀၀)နာရီ အချိန်တွင် ရွှေဘိုမြို့၊ အမှတ်(၁၀)ရပ်ကွက်ရှိ အေးမေတ္တာဆီနှင့် ကုန်မျိုးစုံရောင်းဝယ်ရေးဆိုင်ရှိ  စားသုံးဆီအမှတ်တံဆိပ်အမျိုးမျိုးအား ဈေးကွက်စောင့်ကြည့် စစ်ဆေးခဲ့ပါသည်။

          ထိုသို့ဈေးကွက်စောင့်ကြည့်စစ်ဆေးရာတွင် ခရိုင်ဦးစီးမှူးက ဌာနအနေဖြင့် ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်ရောက်ပြီးကုန်စည်များအပြင် ဈေးကွက်မရောက်မီကုန်စည်များကိုလည်း ဈေးကွက်စောင့်ကြည့်စစ်ဆေးလျက်ရှိကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းများ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါအကြောင်းများ၊ စားသုံးဆီနှင့်ပတ်သက်၍ ညွှန်ကြားချက်အမှတ်(၁/၂၀၂၁)ပါအကြောင်းများ၊ စားသုံးသူများသာမက စီးပွားရေးလုပ်ငန်းရှင်များအနေဖြင့် ဌာနမှဆောင်ရွက်နေသောလုပ်ငန်းများကို သိရှိလိုပါက ရုံးဖွင့်ရက်ရုံးချိန်အတွင်း Consumer Call Center No 1535သို့ ဆက်သွယ်မေးမြန်းနိုင်သည့် အကြောင်းများကို ရှင်းလင်းဆွေးနွေးခဲ့ကြကြောင်း သတင်းရရှိပါသည်။

DOCA(စစ်ကိုင်း)

စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ရုံးမှစစ်ဆေးရေးအရာရှိ ဒေါ်အေးအေး မော်နှင့် ဝန်ထမ်းများသည်  အွန်လိုင်းစနစ်ဖြင့်ရောင်းချခြင်းလုပ်ငန်းများ မှတ်ပုံတင်လက်မှတ် စိစစ်ထုတ်ပေးခြင်း၊မြေပြင်လုပ်ငန်းနှင့်မှတ်ပုံတင်ထားရှိမှု ကိုက်ညီမှု ရှိ/မရှိ၊ လုပ်ငန်းလိပ်စာမှန် ကန်မှု ရှိ/မရှိကို (၁၀.၉.၂၀၂၅) ရက်နေ့ ၊ နံနက်(၁၀:၀၀)အချိန်တွင် ဖန်စီပစ္စည်းများ Online Sale လုပ်ငန်း အမှတ်(၁၂)၊ ရွှေအုန်းပင် အိမ်ရာ (၂) ရန်ကင်းမြို့နယ်သို့ သွားရောက်၍ Online Sale မှတ်ပုံတင်မြေပြင်စစ်ဆေးခြင်းဆိုင်ရာအချက်အလက်များ ကိုက်ညီမှု ရှိ/မရှိကို စစ်ဆေးခဲ့ကြောင်း သိရှိရပါသည်။

          ထိုသို့ ကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကိုဆွေးနွေးရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေနဲ့ စားသုံးသူများကို အကာအကွယ်ပေး ရန်နှင့် e-Commerce လုပ်ငန်းများ ဖွံ့ဖြိုးတိုးတက်စေရန် အွန်လိုင်းစနစ်နဲ့ ရောင်းချခြင်းလုပ်ငန်း များကို အရေးကြီးကုန်စည် ဝန်ဆောင်မှုအဖြစ် သတ်မှတ်ပြီး လုပ်ငန်းမှတ်ပုံတင်လက်မှတ်များကို ခွင့်ပြုထုတ်ပေးလျက်ရှိကြောင်း ၊ e-Commerce Registration စနစ်မှတစ်ဆင့် လျှောက်ထား လာသော အွန်လိုင်းစနစ်နဲ့ရောင်းချခြင်းလုပ်ငန်းမျာ၏ လျှောက်လွှာများနှင့် သက်တမ်းတိုးသော လျှောက်လွှာများကို သက်ဆိုင်ရာတာဝန်ရှိသူများက အချက်အလက်မှန်ကန်မှု ရှိ/မရှိ မြေပြင် ကွင်းဆင်းစစ်ဆေးပြီးမှသာ Online Sale လုပ်ငန်းမှတ်ပုံတင်လက်မှတ်များ ထုတ်ပေး သွားမှာ ဖြစ်ကြောင်းပြောကြားခဲ့ပြီး၊လုပ်ငန်းသည် စားသောက်ကုန်လုပ်ငန်းဖြစ်သည့်အတွက် စားသုံးသူ ကာကွယ်ရေးဥပဒေပါ အခန်း ၁၁၊ ပုဒ်မ ၂၃ ပါ စီးပွားရေးလုပ်ငန်းရှင်၏ အာမခံချက်များပါ အချက်အလက်များကိုလည်းကောင်းစားသုံးသူကာကွယ်ရေးဥပဒေပါ  အခန်း(၁၈)ရှိ ကုန်အညွှန်း အမှတ်အသားဖော်ပြခြင်းနှင့်ပတ်သတ်၍အသိပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

           ကလေးမြို့၊ အ.ထ.က( ၆ )ကျောင်းသို့ ( ၅.၉.၂၀၂၅ )ရက်နေ့၌ လူကုန်ကူးမှုတားဆီးနှိမ်နင်း ရေးရဲတပ်ဖွဲ့၊ မြန်မာနိုင်ငံရဲတပ်ဖွဲ့ယာဉ်ထိန်းရဲတပ်ဖွဲ့၊ တို့နှင့်အတူ ကလေးခရိုင်စားသုံးသူရေးရာ ဦးစီးဌာနမှ ခရိုင်ဦးစီးမှူးနှင့် ဝန်ထမ်းများသည် သွားရောက်၍ ဆရာ/ ဆရာမ ( ၂၀ )ဦး၊ ကျောင်းသား/ ကျောင်းသူ ( ၁၁၀ ) ဦး စုစုပေါင်း ( ၁၃၀ ) တို့အား အသိပညာပေးဟော ပြောခဲ့ပါသည်။

          အသိပညာပေးဟောပြောပွဲတွင် ဦးစွာပထမ အ.ထ.က(၆)ကျောင်းရှိ ကျောင်းဆရာမ ဒေါ်ခင်ပြုံးလွင်မှ အဖွင့်အမှာစကားပြောကြားပြီး မြန်မာနိုင်ငံ ရဲတပ်ဖွဲ့ယာဉ်ထိန်းရဲတပ်ဖွဲ့စု အမှတ်-၁၀၈မှ ရဲအုပ်ကျော်ညွှန့်စိုးက ကမ္ဘာ့ကျန်းမာရေးအဖွဲ့(WHO)မှဖြန့်ချီခဲ့သော ကမ္ဘာ့နိုင်ငံအသီးသီးမှ ယာဉ်တိုက်မှုကြောင့် သေဆုံးဒဏ်ရာရရှိမှုစာရင်းနှင့် ယာဉ်အန္တရာယ်ကင်းရှင်းရေးအစီအမံများနှင့် ပတ်သက်သည့်အကြောင်းအရာများ၊ ယာဉ်မောင်းလိုင်စင်အမျိုးအစားများ၊ အလှပျက်မည်စိုး၍ ဆိုင်ကယ်စီးဦးထုပ်မဆောင်းလျှင် ဘဝပျက်သွားနိုင်ကြောင်း၊ ဆိုင်ကယ်စီးလျှင် ထီးမဆောင်းရန်နှင့် ဆိုင်ကယ်စီးလျှင် ဆိုင်ကယ်ဦးထုပ်ဆောင်းခြင်းဖြင့် ကာကွယ်ရမည့်အကြောင်းစည်းကမ်းရှိစွာ ဆိုင်ကယ်စီးမယ်ဆိုသည့်ကဗျာများ၊ စည်းကမ်းလိုက်နာ ဘေးကင်းကွာ၊ စည်းကမ်းဆိုတာလူ၏ တန်ဖိုးဖြစ်ကြောင်း ပြောကြားပြီး ကျောင်းသား/သူများအား စက်ဘီး၊ ဆိုင်ကယ်များစီးသည့်အခါ ယာဉ်အန္တရာယ်ကင်းဝေးနိုင်ကြပါစေဟု ပြောကြားပြီး လူကုန်ကူးမှုတားဆီးရေးရဲတပ်ဖွဲ့၊ ဒုရဲမှူး ကျော်ဝင်းသန်းမှ လူကုန်ကူးမှုဆိုသည်မှာ လူတစ်ဦးသည် အခြားလူတစ်ဦးကို အဓ္ဓမပြည့်တန်ဆာ လုပ်ခိုင်းခြင်း၊ အခြားကာမဆိုင်ရာကိစ္စတစ်မျိုးမျိုးပြုလုပ်ခိုင်းခြင်း၊ အဓ္ဓမအလုပ်ခိုင်းစေခြင်း၊ အဓ္ဓမ လက်ထပ်ထိမ်းမြားခြင်း၊ ကျွန်ပြုခြင်း၊ ကျေးကျွန်ကဲ့သို့ခိုင်းစေခြင်း၊ ကြွေးမြီဖြင့်နှောင်ဖွဲ့ခိုင်းစေခြင်း၊ အခြားသူတစ်ယောက်၏ ခန္ဓာကိုယ်အစိတ်အပိုင်းအား ထုတ်ယူဖယ်ရှားခြင်း၊ ရောင်းစားခြင်းစသည် တို့ကိုပြုရာမှ ငွေကြေးကိုသော်လည်းကောင်း၊ အကျိုးအမြတ်တစ်စုံတစ်ရာကိုသော်လည်းကောင်း လက်ခံခြင်း(သို့မဟုတ်) လက်ခံရယူရန်သဘောတူခြင်းတို့ကို ဆွေးနွေးပြောကြားပြီး၊ ကလေးခရိုင် စားသုံးသူရေးရာဦးစီးဌာန၊ ဒေါ်သိမ့်သိမ့်ထွန်း ဒု-ဦးစီးမှူးမှ ကျောင်းသား/ ကျောင်းသူများ   ( အခြေခံပညာ ) သိသင့်သည့် စားသုံးသူကာကွယ်ရေးအသိပညာပေးခေါင်းစဉ်မှ ဘေးအန္တရာယ် ကင်းရှင်းစွာ အသုံးပြုနိုင်ခွင့်ရှိခြင်း၊ သတင်းအချက် အလက် ပြည့်စုံမှန်ကန်စွာ သိရှိခွင့်နှင့်ပြေစာ(သို့) အထောက်အထားရယူခွင့်ရှိခြင်း၊ စိတ်ကြိုက်ရွှေးချယ်ဝယ်ယူခွင့်ရှိခြင်း၊ ကုန်စည်နှင့်ဝန်ဆောင်မှုများ နှင့် စပ်လျဉ်း၍အခြေခံ လိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ နစ်နာဆုံးရှုံးမှုများကို ရှင်းလင်းတင်ပြခွင့်နှင့် တိုင်ကြားခွင့်ရရှိစေခြင်း၊ အသိ ပညာ၊ အခွင့်အရေးနှင့်အချက်အလက်များကို လေ့လာနိုင်ခွင့်ရှိခြင်း၊ နစ်နာဆုံးရှုံးမှုများကို ပြန်လည်ကုစားခွင့်ရရှိခြင်း၊ ကောင်းမွန်သောလူနေမှု အဆင့်တန်းနှင့် ပတ်ဝန်းကျင်တွင် နေထိုင်နိုင်ခွင့်ရှိခြင်းနှင့် ကုန်အညွှန်းအမှတ်အသား ဖော်ပြခြင်း စသည့် အကြောင်းအရာများကို ရှင်းလင်းပြောကြားခဲ့ပြီး သက်ဆိုင်ရာဌာနအသီးသီးမှ Projector ဖြင့်မိမိတို့ဌာန၏ အသိပညာပေးလိုသည့် Video ဖိုင်များပြသ၍ ရှင်းလင်းခဲ့ကြကြောင်း သတင်းရရှိရပါသည်။

 DOCA (စစ်ကိုင်း)