သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန၊ စစ်ကိုင်းခရိုင်၊ ခေတ္တခရိုင်ဦးစီးမှူးမှ ဦးဆောင်၍ ခရိုင်ရုံမှ စစ်ဆေးရေးမှုး (၂)ဦးသည် ၂၀၂၅ ခုနှစ်၊ ဖေဖေါ်ဝါရီလ (၂၀)ရက်နေ့တွင် စစ်ကိုင်းမြို့၊ တင်းတိပ်ရပ်ကွက်ရှိ “ရွှေလရောင် Online Business” လုပ်ငန်းအား မြေပြင်ကွင်းဆင်းစစ်ဆေးခဲ့ကြောင်း သိရှိရသည်။

             ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာန၊ ခေတ္တခရိုင်ဦးစီးမှူးက လုပ်ငန်းရှင် မှ အွန်လိုင်းစနစ်ဖြင့် ရောင်းချခြင်းလုပ်ငန်း မှတ်ပုံတင်လက်မှတ် လျှောက်ထားလာသော အချက်အလက် များနှင့် မြေပြင်အခြေအနေ ကိုက်ညီမှု ရှိ၊ မရှိ DOCA Application အသုံးပြု၍ စစ်ဆေးခဲ့ပြီး စားသုံးသူ ကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ လိုက်နာ ဆောင်ရွက်ရမည့် အချက်အလက်များ၊ ဥပဒေ အခန်း (၁၀)ပါ စီးပွားရေး လုပ်ငန်းရှင်၏ တာဝန်များ၊ ဥပဒေ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးခြင်းဆိုင်ရာ အချက်အလက်များအကြောင်း  ဆွေးနွေးပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း)

             ၂၀၂၅ ခုနှစ်၊ ဖေဖော်ဝါရီလ ၂၀ ရက်နေ့၊ ၁၄း၀၀ နာရီအချိန် ရင်းနှီးမြှုပ်နှံမှု နှင့်ကုမ္ပဏီများ ညွှန်ကြားမှုဦးစီးဌာနတွင် ကိုဗစ်-၁၉ကြောင့် ဖြစ်ပေါ်လာနိုင်သည့် စီးပွားရေး သက်ရောက်မှုများအပေါ် ကုစားရေးလုပ်ငန်းကော်မတီ၏ (၁/၂၀၂၅) ကြိမ်မြောက် အစည်း အဝေးဆုံးဖြတ်ချက်နှင့် စပ်လျဥ်း၍ ကုစားရေးလုပ်ငန်းကော်မတီ၏ လုပ်ငန်းအဖွဲ့ ခေါင်းဆောင်နှင့် တိုင်း/ ပြည်နယ် စိစစ်ကြပ်မတ်ရေး အဖွဲ့များ တွေ့ဆုံဆွေးနွေးသည့် အစည်းအဝေးသို့ စားသုံးသူ ရေးရာဦးစီးဌာန၊ ဦးစီးအရာရှိ ဒေါ်မိုးသီတာလင်း မှ တက်ရောက်ခဲ့ပါသည်။

            အစည်းအဝေးတွင် အဖွဲ့ခေါင်းဆောင်၊ ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီး ဌာန၊ ဒုတိယဝန်ကြီး ဒေါက်တာဝါဝါမောင်မှ အဖွင့်အမှာစကားပြောကြားခဲ့ရာ ကိုဗစ်ချေးငွေ ခွင့်ပြုထုတ်ပေးထားသည့် ချေးငွေ၊ သက်တမ်းများနှင့် ပတ်သက်၍ ဆောင်ရွက်ထားရှိမှု အခြေအနေများ၊ လက်ရှိဖြစ်ပေါ်နေသည့် အခြေအနေများအား ဆွေးနွေးပြောကြားခဲ့ပြီး တိုင်းနှင့် ပြည်နယ်ဦးစီး မှူးများမှဆွေးနွေးခြင်း၊ တက်ရောက်လာသူများမှ အထွေထွေဆွေးနွေးခြင်းများ ဆောင်ရွက်ခဲ့ကြပြီး အစည်းအဝေးကို ညနေ ၀၄း၀၀နာရီအချိန်တွင် အောင်မြင်စွာရုတ်သိမ်းခဲ့ ကြောင်း သိရပါသည်။

DOCA(စစ်ကိုင်း)

          မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့်ခရိုင်ဦးစီးမှူး၏ လမ်းညွှန်မှုဖြင့် ပခုက္ကူခရိုင် ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် (၁၉.၂.၂၀၂၅)ရက်နေ့၊ နံနက်(၁၀:၃၀)အချိန်တွင် ပခုက္ကူမြို့ပေါ်ရှိ ထုတ်လုပ်လျှက်ရှိသော အာလူးကြော်၊ နံကထိုင်၊ ဆီကြော်မရွေး၊ မြေပဲဆီလုပ်ငန်းရှင် များထံသို့သွားရောက်၍ စားသုံးသူကာကွယ်ရေးဥပဒေပါ ပြဌာန်းချက်များအား လိုက်နာဆောင်ရွက် ခြင်းဖြင့် မိမိတို့လုပ်ငန်းများ ထုတ်ကုန်လုံခြုံစိတ်ချရမှုရှိပြီး ဈေးကွက်များ ပိုမိုရရှိနိုင်စေရန် ရည်ရွယ်၍ အသိပညာပေးဆွေးနွေးခဲ့ကြောင်း သိရသည်။

          ဒုတိယခရိုင်ဦးစီးမှူးမှ ဆွေးနွေးရာတွင် စားသုံးသူကာကွယ်ရေးဥပဒေပါ ကုန်အညွှန်းအမှတ် အသားဖော်ပြချက်များအကြောင်း၊ စီးပွားရေးလုပ်ငန်းရှင်၏တာဝန်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း၊ မြန်မာနိုင်ငံစားသုံးသူကာကွယ် ရေးကော်မရှင်မှ ထုတ်ပြန်ထားသောညွှန်ကြားချက်ပါ ကုန်စည်အုပ်စုအလိုက် မြန်မာဘာသာဖြင့် ထည့်သွင်းဖော်ပြရမည့်အချက်အလက်များ၊ လုပ်ငန်းရှင်များမှလည်း မိမိတို့ထုတ်လုပ်သော ကုန်စည် အမျိုးအစားအလိုက် စားသုံးသူကာကွယ်ရေးဥပဒေ(၂၀၁၉)အခန်း(၁၈)ပါ ကုန်အညွှန်းအမှတ်အသား ဖော်ပြချက်များနှင့် ကိုက်ညီသည့်ကုန်စည်များကို စားသုံးသူရေးရာဦးစီးဌာန၏ စိစစ်ခွင့်ပြုချက်ရရှိရန် လျှောက်ထားနိုင်ကြောင်းကိုလည်းကောင်း၊ စားသုံးဌာနခွဲတာဝန်ခံမှ  လုပ်ငန်းရှင်များအား  မိမိတို့ ထုတ်လုပ်သော စားသောက်ကုန်များတွင် သက်ဆိုင်ရာအစိုးရဌာနများမှ တားမြစ်ထားသော ဓါတုဆိုး ဆေးများ၊ တာရှည်ခံဆေးများ၊ အသုံးမပြုရန်နှင့် လိုအပ်သောပမာဏကိုသာ ထည့်သွင်းအသုံးပြုစေ လိုကြောင်း၊ သန့်ရှင်းသပ်ရပ်စွာ အသုံးပြုစေလိုကြောင်း၊ မြေပဲတွင် အာဖလာတောက်ဆင်မှိုဆိပ်ပါနိုင်၍ အထူးသတိပြုစေလိုကြောင်း၊ ကုန်အညွှန်းအမှတ်အသား ပြည့်စုံစွာဖော်ပြထားရှိမှုသည် အလွန်အရေး ကြီးသောကြောင့် လိုက်နာရန်လိုအပ်ကြောင်းကိုလည်းကောင်း အသီးသီးဆွေးနွေးခဲ့ပြီး စားသုံးသူ ကာကွယ်ရေးဥပဒေပါ လက်ကမ်းစာစောင်များအား ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

 မကွေးတိုင်းဒေသကြီး၊ ပခုက္ကူခရိုင်၊ ပခုက္ကူခရိုင်ဦးစီးမှူးနှင့် မြို့နယ်တာဝန်ခံတို့သည် (၂၁-၂-၂၀၂၄)ရက်နေ့၊ နံနက်(၁၂:၃၀)အချိန်တွင်  ပခုက္ကူမြို့ပေါ်ရှိ စက်သုံးဆီရောင်းချနေသော ဆီဆိုင်(၂)ဆိုင် အား သတ်မှတ်ထားသောအခြေခံရည်ညွှန်းဈေးဖြင့် အမှန်တကယ်ရောင်းချမှုရှိ/မရှိနှင့်  အချင်အတွယ် မှန်ကန်မှုရှိ/မရှိ  ကွင်းဆင်းစစ်ဆေးခဲ့ကြောင်း သိရသည်။

           စက်သုံးဆီရောင်းချလျက်ရှိသော “ရွှေဗျိုင်းဖြူနှင့် TAL”ဆီဆိုင်များသို့   သတ်မှတ်ထားသော အခြေခံရည်ညွှန်းဈေးဖြင့်ရောင်းချကြရန်၊ ဈေးနှုန်းများကိုလည်းအများပြည်သူ သိရှိအောင် LED Board များတွင် ဖော်ပြပေးကြရန်၊ နေ့စဉ်ရောင်းချနေသောဈေးနှုန်းများကိုလည်း ဖော်ပြပေးကြရန်၊ အချင် အတွယ်မှန်ကန်မှုရှိစေရန်၊  စက်သုံးဆီများအား  ပုံး၊ ပေပါအလိုက်ရောင်းချခြင်းမပြုရန်နှင့် စက်သုံး ဆီပြတ်လပ်မှုမရှိစေရေးတို့ကို ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(မကွေး)

            ၂၀၂၅ ခုနှစ်၊ ဖေဖော်ဝါရီလ ၂၁ ရက် နံနက် (၀၉:၀၀) နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တာဝန်ခံဦးမျိုးဝင်းသန်းနှင့် ဒေါ်အိမွန်ကျော် အကြီးတန်းစာရေးတို့သည့် မြို့နယ်ကျန်းမာရေးဦးစီးဌာန၊ စည်ပင်သာယာရေးအဖွဲ့၊ ရပ်ကွက်အုပ်ချုပ်ရေးမှူးစသည့် တာဝန်ရှိသူများနှင့်ပူးပေါင်း၍ ကန့်ဘလူမြို့၊ အမှတ်(၃)ရပ်ကွက်ရှိ သောက်ရေသန့်စက်ရုံအား ဈေးကွက်စောင့်ကြည့်စစ်ဆေးခဲ့ကြောင်း သိရသည်။

          မြို့နယ်တာဝန်ခံကပူးပေါင်းအဖွဲ့ဖြင့် သောက်ရေသန့်စက်ရုံမှ ထုတ်လုပ်ဖြန့်ဖြူးလျက်ရှိသည့် သောက်ရေသန့်ဘူးများ သန့်ရှင်းသပ်ရပ်မှုရှိ/မရှိ၊ သောက်ရေသန့်ဘူးများပေါ်တွင် ကုန်အညွှန်းအ မှတ်အသားများကို မြန်မာဘာသာဖြင့်ပြည့်စုံစွာဖော်ပြထားခြင်းရှိ/မရှိ စစ်ဆေးခဲ့ကြောင်း၊ သက်ဆိုင်ရာဌာနများကလည်း မိမိတို့နှင့်သက်ဆိုင်သည်များကို အသိပညာပေးဆွေးနွေးခဲ့ကြကြောင်း၊ လုပ်ငန်းရှင်အား စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များပါ အသိပညာ ပေးလက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(စစ်ကိုင်း)