သတင်းနှင့် လှုပ်ရှားမှုများ

   ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ အိမ်ဆောက်ပစ္စည်း ရောင်းချသောဆိုင်များတွင် ဘိလပ်မြေများ ပစ္စည်းပြတ်လပ်မှုရှိ/မရှိနှင့် ဈေးနှုန်းကြီးမြှင့်မှုရှိ/မရှိ အခြေအနေ များအား ဧပြီလ (၄)ရက်နေ့၊ နေ့လယ်  (၁၄:၁၅)နာရီအချိန်တွင် ကွင်းဆင်းစုံစမ်း စစ်ဆေးခဲ့ကြောင်း သိရသည်။

     ထိုသို့ဈေးနှုန်းဈေးကွက် အခြေအနေများ ကွင်းဆင်းစုံစမ်းစစ်ဆေးခဲ့ရာတွင် တရားမဝင် ကုန်သွယ်မှုတိုက်ဖျက်ရေးအထူးအဖွဲ့ အနေဖြင့် သုံးခွမြို့နယ်ရဲတပ်ဖွဲ့မှ ဒုရဲအုပ် သက်ပိုင်ထွန်းမှ ဦးဆောင်၍ မြို့နယ်သစ်တောဦးစီးဌာန၊ မြို့နယ်စည်ပင်သာယာရေးအဖွဲ့နှင့် မြို့နယ်စားသုံးသူ ရေးရာဦးစီးဌာန တို့ပါဝင်သောအဖွဲ့ဖြင့် အမှတ်(၄)ရပ်ကွက် အောင်ဇေယျလမ်းရှိ ဦးအင်းရွှေနှင့် ညီမ၊ ဒေါ်အေးကြည် အိမ်ဆောက်ပစ္စည်းဆိုင်၊ အမှတ်(၉)ရပ်ကွက်ရှိ အောင်ဇေယျလမ်းရှိ သရဖူအိမ်ဆောက်ပစ္စည်းဆိုင် နှင့် ချမ်းသာအိမ်ဆောက်ပစ္စည်းဆိုင်များသို့ ဘိလပ်မြေများ ပစ္စည်းပြတ်လပ်မှုရှိ/မရှိ၊ ဈေးနှုန်းကြီးမြင့် မှုရှိ/မရှိနှင့် ဝယ်ယူရရှိမှုအခြေအနေ၊ ဖြန့်ဖြူး ရောင်းချမှုအခြေအနေများအား ဈေးဆိုင်ပိုင်ရှင်လုပ်ငန်းရှင်များနှင့် တွေ့ဆုံမေးမြန်း စစ်ဆေး ခဲ့ကြောင်း၊ လုပ်ငန်းရှင်များမှလည်း ဝယ်ယူရရှိသည့် ဈေးနှုန်းအပေါ် သယ်ယူစရိတ်ပါ အမြတ် ရာခိုင်နှုန်း အနည်းငယ်မျှဖြင့် ပြန်လည်ဖြန့်ဖြူးရောင်းချပေးလျက် ရှိကြောင်း ပြန်လည် ဖြေကြားပေးခဲ့ကြောင်း၊ ဘိလပ်မြေများအား ဈေးကစားရန် ရည်ရွယ်ချက်ဖြင့် သိုလှောင် ထားခြင်းများ၊ ဈေးနှုန်းအဆမတန် မြှင့်တင်ရောင်းချခြင်း မပြုလုပ်ကြရန် အသိပညာပေး ဆွေးနွေးခဲ့ပြီး ဈေးကွက်အတွင်း ကွင်းဆင်းစုံစမ်း စစ်ဆေးခဲ့ကြောင်း သိရသည်။

DOCA(ရန်ကုန်)

    ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်၌ ၂၀၂၅ ခုနှစ်၊ ဧပြီလ(၂)ရက်နေ့၊ နံနက်(၁၁:၃၀)နာရီတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင် ဖွင့်လှစ်သော အခြေခံပန်းချီရေးဆွဲနည်း သင်တန်းတက်ရောက် ကလေးငယ်များအား စားသုံးသူရေးရာဦးစီးဌာန ခရမ်းမြို့ နယ်တာဝန်ခံ ဒေါ်ကျော့ကေခိုင်က စားသုံးသူကာကွယ်ရေး အသိပညာပေး ဟောပြောခဲ့ကြောင်း သိရသည်။

     အသိပညာဟောပြောရာတွင် မြို့နယ်တာဝန်ခံက ပန်းချီသင်တန်းသို့ တက်ရောက် လာသော ကလေးများသည် နိုင်ငံတော်၏ လူ့စွမ်းအားအရင်းအမြစ်များဖြစ်၍ ငယ်ရွယ်စဉ်မှစ၍ စားသုံးသူရေးရာနှင့် ပတ်သတ်သော အသိပညာများ လေ့လာခွင့်ရှိ၍ စားသုံးသူကာကွယ်ရေး အသိပညာပေးရခြင်းဖြစ်ပြီး စားသုံးသူကာကွယ်ရေးဥပဒေ ပြဌာန်းထားရှိမှု၊ စားသုံးသူ၏ အဓိပ္ပါယ်၊ စားသုံးသူများ၏ အခွင့်အရေးနှင့် တာဝန်များအား အသိပညာပေးခြင်းနှင့် အစားအသောက်များ၊ လူသုံးကုန်များ၊ ဆေးဝါးများနှင့် ကလေးအသုံးအဆောင်ပစ္စည်းများ၊ ကလေးကစားစရာအရုပ်များ ဝယ်ယူသုံးစွဲရာတွင် ကုန်စည်တွင် မြန်မာဘာသာဖြင့် ဖော်ပြထားသော ကုန်အညွှန်းအမှတ်အသားများ ဘေးအန္တရာယ်မဖြစ်စေရန် ကြိုတင်သတိပေးချက်များ၊ သုံးစွဲပုံနည်းလမ်းများ၊ ဓာတ်မတည့်ကြောင်းဖော်ပြထားချက်၊ ထုတ်ကုန်ရက်စွဲ၊ ကုန်ဆုံးရက်စွဲများပါဝင်ခြင်းရှိ/မရှိများအား ကြည့်ရှု့သုံးစွဲသော အလေ့အကျင့်ကောင်းများအား ပြုလုပ်၍ မိမိကိုယ်ကို ကာကွယ်တတ်စေရန် အသိပညာပေးခြင်းနှင့် ကုန်စည်နှင့် ဝန်ဆောင်မှုများ ဝယ်ယူသုံးစွဲ၍ နစ်နာမှုများရှိလာလျှင်လည်း စားသုံးသူရေးရာဦးစီးဌာန၏ Call Center No. 1535သို့ ရုံးချိန်အတွင်း ဆက်သွယ်တိုင်ကြားနိုင်ကြောင်းနှင့် စားသုံးသူနှင့် ပတ်သတ်သည့် သတင်းအချက်အလက်များ အားလုံးလည်း မေးမြန်းစုံစမ်းနိုင်ကြောင်းများအား အသိပညာပေးခဲ့ကြောင်း သိရသည်။

DOCA(ရန်ကုန်)

   ၄.၄.၂၀၂၅ ရက်နေ့ နံနက်(၉:၄၅)နာရီအချိန်တွင် စားသုံးသူရေးရာဦးစီးဌာန၊ မြောက်ပိုင်း ခရိုင်ဦးစီးမှူးရုံးမှ ခရိုင်ဦးစီးမှူး၊ ဦးအောင်တင်စိုးပါ ဝန်ထမ်း(၃)ဦးတို့သည် မြန်မာနိုင်ငံဆန်စပါး အသင်းချုပ်မှ အဖွဲ့ဝင် ဦးကိုလတ်ပါဝင်ပူးပေါင်း၍ အင်းစိန်မြို့နယ်၊ အောင်ဆန်းရပ်ကွက်နှင့်ရွာမ အနောက်ရပ် ကွက်အတွင်းရှိ ဆန်ဆိုင်များတွင် ဆန်သိုလှောင်ထားရှိမှု၊ ဆန်လက်ကျန် အခြေအနေနှင့် သင့်တင်မျှတသော ဈေးနှုန်းများဖြင့် ရောင်းချနိုင်ရေးအတွက် လက်ရှိဖြစ်ပေါ် နေသည့်ဆန်ဈေးကွက်အခြေအနေ များအား ကွင်းဆင်းစစ်ဆေးခဲ့ပါသည်။

    ထိုသို့ ကွင်းဆင်းစစ်ဆေးရာတွင် ဆန်ဆိုင်များရှိ ရောင်းချနေသော ဆန်များသည် မြန်မာနိုင်ငံ ဆန်စပါးအသင်းချုပ်မှ သတ်မှတ်ထားသော ရည်ညွှန်းဈေးနှုန်းများအတိုင်း ရောင်းချခြင်းရှိ/မရှိနှင့် ဆန်ဈေးနှုန်းကြီးမြင့်မှုမဖြစ်ပေါ်စေရေးအတွက် ဈေးကစားရန်အလို့ငှာ ဆန်များသိုလှောင်ထားခြင်း ရှိ/မရှိတို့ကို စစ်ဆေးခဲ့ကြပြီး လိုက်နာမှုမရှိသော လုပ်ငန်းရှင်များကို အရေးကြီးကုန်စည်နှင့်ဝန်ဆောင် မှုဥပဒေအရ အရေးယူခံရမည်ဖြစ်ကြောင်းနှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ထုတ်ပြန်ထားသော ဆန်တန်ချိန်(၂၅)တန်နှင့်အထက် သိုလှောင်ရုံပိုင်ရှင်များအနေဖြင့် MyRo တွင် မှတ်ပုံတင်ပြု လုပ်ကြရန် အသိပညာပေးကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

DOCA(ရန်ကုန်)

    ၄.၄.၂၀၂၅ ရက်နေ့ နံနက်(၁၀:၀၀)အချိန်မှစ၍ စားသုံးသူရေးရာဦးစီးဌာန၊ မြောက်ပိုင်းခရိုင် ဦးစီးမှူးရုံး၊ ဒုခရိုင်ဦးစီးမှူး ဦးမျိုးအေးပါ(၃)ဦး မြန်မာနိုင်ငံဆန်စပါး လုပ်ငန်း ရှင်များအသင်းမှ အဖွဲ့ဝင် ဦးတင်ရွှေတို့ပူးပေါင်းပါဝင်လျက် လှိုင်သာယာ(အရှေ့ပိုင်း)မြို့နယ်ရှိ ဆန်ဆိုင်များသို့ ကွင်းဆင်း စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

    ထိုသို့ ဆောင်ရွက်ခဲ့ရာတွင် ဆန်ဆိုင်များဖြစ်သော ပွင့်သစ်၊ စင်္ကြာရွှေရည်၊ အောင်မြန်မာ၊ ဆွေသဒ္ဒါ၊ ရွှေပြည့်ဝ၊ ယွန်းစန္ဒီ၊ ရွှေပြည်စိုးဆိုင်များတွင် ရောင်းချနေသော ရွေဘိုပေါ်ဆန်း၊ ကျားပျံနှင့် ဧရာဝတီပေါ်ဆန်းဈေးနှုန်းများကို သတ်မှတ်ဈေးနှုန်းအတိုင်းရောင်းချလျက်ရှိပြီး အိတ်ဈေးနှုန်းများကိုလည်း (၈၀၀)ကျပ်မှ (၁၀၀၀)ကျပ် လျော့ပေးပြီး အိမ်အရောက်ပို့ပေးပါကြောင်း၊ အရောင်းလည်း အေးပါကြောင်း၊ လက်ကျန်အိတ်များလည်း များပြားစွာရှိပါကြောင်း၊ ဆန်များပြတ်လပ်မှုမရှိရအောင်လည်း ထပ်မံမှာယူထားပါကြောင်း၊ မိမိတို့ဌာနမှလည်း ဈေးနှုန်းမြှင့်တင်ရောင်းချခြင်းများ ဈေးကစားရန် ရည်ရွယ်ချက်ဖြင့် သိုလှောင်ထားပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူခံရမည်ဖြစ်ပါကြောင်း ဆွေးနွေး ပြောကြားခဲ့ပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ် ပြန်ကြားရေးနှင့် ပြည်သူ့ဆက်ဆံရေး ဦးစီးဌာန ရုံး၌ ပြုလုပ်သော နွေရာသီအခြေခံ ပန်းချီရေးဆွဲနည်း သင်တန်းတွင် စားသုံးသူရေးရာ ဦးစီးဌာနမှ မြို့နယ် တာဝန်ခံ ဒေါ်စန်းစန်းမော်သည် ဧပြီလ (၂)ရက်နေ့၊ နေ့လယ် (၁၁:၃၀)နာရီ အချိန်တွင် စားသုံးသူကာကွယ်ရေး အသိပညာပေး ဟောပြောခဲ့ကြောင်း သိရသည်။

    အဆိုပါဟောပြောပွဲတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်တင်တင်ထွေးမှ သင်တန်းဖွင့်လှစ်ရခြင်း၏ ရည်ရွယ်ချက်များအကြောင်း ရှင်းလင်းဟောပြော ခြင်း၊ မြို့နယ်ပြည်သူ့စာ ကြည့်တိုက် ဥက္ကဌ ဦးသန်းလွင်မှ နွေရာသီပန်းချီသင်တန်း တက်ရောက်ခြင်း၏ အကျိုးကျေးဇူးများ၊ သင်တန်းတက်ရောက်ရာတွင်လည်း စိတ်ဝင်စားစွာ လေ့လာဆည်းပူး သင်ကြားကြရန် အသိပညာပေးခြင်း၊ စားသုံးသူရေးရာဦးစီးဌာန မြို့နယ် တာဝန်ခံ ဒေါ်စန်းစန်းမော်မှ ဝန်ကြီးဌာနနှင့် စားသုံးသူရေးရာဦးစီးဌာနအကြောင်း၊ ဌာန၏ လုပ်ငန်းဆောင်ရွက်ချက်များနှင့် စားသုံးသူကာကွယ်ရေးဥပဒေပါ စားသုံးသူ၏ အဓိပ္ပါယ် ဖွင့်ဆိုချက်၊ စားသုံးသူအခွင့်အရေးနှင့် တာဝန်များအကြောင်း၊ စားသုံးသူနစ်နာဆုံးရှုံးမှုများနှင့် စပ်လျဉ်း၍ တိုင်ကြားနိုင်သည့် နည်းလမ်း များ၊ ကုန်အညွှန်းအမှတ်အသားဖော်ပြခြင်းဆိုင်ရာ အချက်များအကြောင်း ရှင်းလင်းဟောပြော အသိပညာပေးခဲ့ပါသည်။ ထို့နောက် သင်တန်းဆရာ မှ အခြေခံပန်းချီရေးဆွဲနည်းအား ဆက်လက် သင်ကြား ပို့ချပေးခဲ့ပါသည်။ အခြေခံပန်းချီ ရေးဆွဲနည်း သင်တန်းသို့ သင်တန်းသား/သင်တန်းသူ (၃၀)ဦး တက်ရောက်ခဲ့ကြောင်း သိရသည်။

DOCA(ရန်ကုန်)