သတင်းနှင့် လှုပ်ရှားမှုများ

            (၆-၅-၂၀၂၅)ရက်နေ့ ၊ နေ့လယ်(၁၃:၀၀)နာရီအချိန်တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း(ဌာနခွဲစာရေး)နှင့် ဝန်ထမ်းများသည်  မြို့နယ်ထွေ/အုပ်၊ မြို့နယ်စည်ပင်၊ အထူးစုံစမ်းစစ်ဆေးရေးဌာနတို့နှင့် ပူးပေါင်း၍ သာကေတ မြို့နယ်နှင့်ဒေါပုံမြို့နယ် အတွင်းရှိ စားအုန်းဆီအရောင်းဆိုင်များသို့ သွားရောက်၍ စားအုန်းဆီ ရောင်းချမှုအခြေအနေအား ကွင်းဆင်းစစ်ဆေးကြပ်မတ်မှုများ ဆောင်ရွက်ခဲ့ကြကြောင်း သိရှိရပါသည်။

          ထိုသို့ ကွင်းဆင်းဆောင်ရွက်ရာတွင် ကွင်းဆင်းစစ်ဆေးရာ ရည်ညွှန်းဈေးအပေါ် အမြတ် ၂ %  သယ်ယူခ ၊  လုပ်သားခများ ထည့်သွင်း၍ သင့်တင့်သောဈေးနှုန်းနှင့် အရေအတွက်မှန်၊ အလေးချိန် မှန် ၊  ဈေးနှုန်းမှန်ဖြင့် ရောင်းချလျက်ရှိကြောင်း တွေ့ရှိရပြီး ရောင်းချရာတွင်လည်း အိမ်ထောင်စု (၁)စုလျှင် (၅၀) ကျပ်သားကို စာအုပ်စနစ်ဖြင့် ရောင်းချပေးကြောင်း ကွင်းဆင်း စိစစ်သည့်အရောင်း ဆိုင်များ၊ ဈေးများလက်လီ/လက်ကား ကိုယ်စားလှယ်များထံမှ စိစစ် မေးမြန်းသိရှိရပြီး ဈေးနှုန်းမြှင့် တင်ရောင်းချသည်ကို စစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူ ခံရမှာဖြစ်ကြောင်း အသိပညာပေးပြောကြားခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

            စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးမှ ခရိုင်ဦးစီးမှူးနှင့် စစ်ဆေးရေးအရာရှိ များသည် နံနက် (၉:၀၀)  နာရီအချိန်တွင် အမှတ်(၁၇) ရက်ကွက်ရှိ သဲသဲလှုပ်အာလူးကြော် လုပ်ငန်းသို့ ထုတ်ကုန်လုံခြုံစိတ်ချရမှုရှိစေရန်နှင့် ကွင်းဆင်းဆောင်ရွက်ခဲ့ကြောင်းသိရှိရသည်။

            ထိုသို့ကွင်းဆင်းဆောင်ရွက်ရာတွင် သဲသဲလှုပ်အာလူးကြော်လုပ်ငန်းရှင်အား လုပ်ငန်းထုတ် လုပ်မှုအခြေအနေအား မေးမြန်းဆွေးနွေးရာတွင် နေ့စဉ်အာလူးကုန်ကြမ်း ပိဿာချိန်(၁၆၀) ခန့် ကြော်ရကြောင်း၊ လုပ်ငန်းသုံးဆီ သုံးစွဲမှုအနေဖြင့် အချိန်(၃၀)ပိဿာ ကုန်ပြီး ထွက်ရှိမှုကုန်ချော ပိဿာ အာလူးကြော်(၂၅) ပိဿာရရှိကြောင်း၊ ဈေးကွက်ဖြန့်ဖြူးမှုအနေဖြင့် ရန်ကုန်၊ မန္တလေး၊ နေပြည်တော်နှင့်ပြင်ဦးလွင်မြို့များသို့ တင်ပို့ရကြောင်း၊ အာလူးကြော်လက်ကား တစ်ပိဿာလျှင် (၃၈၀၀၀)ကျပ်၊ လက်လီတစ်ပိဿာလျှင်(၄၀၀၀၀)ကျပ်ဖြင့် ရောင်းချရကြောင်း၊ ကုန်အညွှန်းအမှတ် အသားများ ပြည့်စုံစွာပါရှိရန်၊ ထုတ်ကုန်များလုံခြုံစိတ်ချရမှုရှိစေရေး၊ စီးပွားရေးလုပ်ငန်းရှင်အား ကုန်စည်နှင့်စပ်လျဉ်း၍ ဖော်ပြရမည့်အာမခံချက်များ ပြည့်စုံစွာဖော်ပြရန်စသည်တို့ကို ဆွေးနွေး ပြောကြားခဲ့ကြောင်းသိရှိရသည်။

DOCA(မန္တလေး)

စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင်ဦးစီးမှူး ဦးမျိုးဝင်းနိုင်နှင့် ဝန်ထမ်းများသည် ၇-၅-၂၀၂၄ ရက်၊ ဗုဒ္ဓဟူးနေ့ နံနက် ၉:၀၀ နာရီအချိန်တွင် ကရင်ပြည်နယ်၊ ဘားအံမြို့ရှိ ဒေသန္တရဦးစီးဌာနမှကြီးမှူးကျင်းပသည့် အရန်သားဖွားသင်တန်းသူများအား စားသုံးသူ ကာကွယ်‌ရေးဆိုင်ရာ  သိကောင်းစရာအကြောင်းကို အသိပညာပေးဟောပြောခဲ့ကြောင်း သိရှိရသည်။

အဆိုပါဟောပြောပွဲတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင် ဦးစီးမှူး ဦးမျိုးဝင်းနိုင်က စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များအကြောင်း၊ စားသုံးသူကာကွယ်ရေးအကြောင်း သိကောင်းစရာများနှင့် ထုတ်ကုန်လုံခြုံစိတ်ချမှုရှိသော အစားအသောက်နှင့်ကုန်စည်များကို စနစ်တကျရွှေးချယ်ဝယ်ယူ စားသောက်သုံးစွဲတတ်စေရန်အတွက် ကုန်အညွှန်းအမှတ်အသားအကြောင်း၊ စားသုံးသူနစ်နာဆုံးရှုံမှုများဖြစ်ပေါ်ပါက CICC သို့ တိုင်ကြား နိုင်ကြောင်း၊ Call Center 1535 ရုံးချိန် (၂၄)နာရီ အတွင်းတိုင်ကြားနိုင်ကြောင်း လက်တွေ့ခေါ်ဆို မေးမြန်းခြင်းများ ပြုလုပ်ဆောင်ရွက်ခဲ့ပါသည်။ အဆိုပါဟောပြောပွဲတွင် သင်တန်းသူ (၂၄)ဦး  တက်ရောက်ပြီး  လက်ကမ်းစာစောင်များလည်း ဖြန့်ဝေခဲ့ကြောင်း သိရှိရပါသည်။

DOCA(ကရင်)

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် (၆.၅.၂၀၂၅) ရက်နေ့ နံနက် (၁၁:၅0)အချိန်မှစ၍ မင်္ဂလာဒုံမြို့နယ်၊ လှိုင်သာယာမြို့နယ်တို့ရှိ Super Center များရှိ ဆန်အရောင်းကောင်တာများအား ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့  ပါသည်။

          ထိုသို့ဆောင်ရွက်ရာတွင် မင်္ဂလာဒုံမြို့နယ်ရှိ Terminal Mall၊ လှိုင်သာယာမြို့နယ်ရှိ City Mart နှင့် Ocean Super Center များတွင် ရောင်းချနေသော ဆန်အမျိုးအစား၊ အမှတ်တံဆိပ် တို့၏ (Kg) ဈေးနှုန်း၊ မြန်မာနိုင်ငံဆန်စပါးအသင်းချုပ်မှ လစဉ်ထုတ်ပြန်ထားသော သတ်မှတ် ရည်ညွှန်းဈေးများအတိုင်း ရောင်းချနေကြောင်း စိစစ်တွေ့ရှိရပြီး ဈေးကစားရန်အလို့ငှာ သိုလှောင်ထားခြင်းမပြုရန် လိုက်နာမှုမရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူခံရမည်ဖြစ်ကြောင်း တာဝန်ခံများအား အသိပညာပေးပြောကြားခဲ့ကြောင်း သိရှိရ ပါသည်။

DOCA(ရန်ကုန်)

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် ၆.၅.၂၀၂၅ ရက်နေ့ နေ့လည် (၁၂:၁၅)နာရီအချိန်တွင် လှိုင်သာယာမြို့နယ်၊ အမှတ်(၆၃၈)၊ ရတနာလမ်း၊ (၉)ရပ်ကွက်ရှိ Once N Again အွန်လိုင်းအမည်ဖြင့် စားသောက်ကုန်နှင့်လူသုံးကုန်ပစ္စည်းများ အွန်လိုင်းမှတ်ပုံတင်ထားရှိမှုအား မြေပြင်ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

          ထိုသို့ ကွင်းဆင်းစစ်ဆေးရာတွင် ဒေါ်နီလာဝင်း၊ ဦးစီးမှူးမှ ဈေးကွက်အတွင်း ရောင်းချနေသာ စားသောက်ကုန်၊ လူသုံးကုန်ပစ္စည်းများ ဝယ်ယူအသုံးပြုရာတွင် ဘေးအန္တရာယ် ကင်းရှင်းစေရန် လုံခြုံစိတ်ချရမှုရှိစေရန် ကုန်အညွှန်းအမှတ်အသားပြည့်စုံစွာ ဖော်ပြထားခြင်း ရှိ/မရှိ၊ လုပ်ငန်းများ လျှောက်လွှာပုံစံတွင် ဖြည့်သွင်းထားသည့်လိပ်စာအတိုင်း လုပ်ငန်းအမှန် တစ်ကယ်တည်ရှိခြင်းရှိ/မရှိ၊ ရောင်းချရန်တင်ပြထားသော ကုန်စည်(သို့မဟုတ်)ဝန်ဆောင်မှု အမျိုးအစား စာရင်းအတိုင်းမြေပြင်တွင် အမှန်တကယ်ရောင်းချနေသော စာရင်းကိုက်ညီမှုရှိ/မရှိ တို့ကို စစ်ဆေးခဲ့ပြီး စားသုံးသူကာကွယ်ရေးဥပဒေပါ ကုန်စည်ပေါ်တွင် ဖော်ပြပါရှိရမည့် ကုန်အညွှန်းအမှတ်အသားဖော်ပြမှုတို့ကို ကွင်းဆင်း စစ်ဆေးခဲ့ကြောင်း သိရှိရပါသည်။

DOCA(ရန်ကုန်)