ပြည်ပကုန်သွယ်မှုသတင်းများ

      ဗီယက်နမ်နိုင်ငံ Binh Duong ပြည်နယ်သည် ယခုနှစ်တွင် စံချိန်တင်ကုန်သွယ်ရေးပိုငွေ အမေရိကန်ဒေါ်လာ ၁၀ ဘီလီယံရရှိလျက်ပြီး ဗီယက်နမ်နိုင်ငံတောင်ပိုင်းတွင် ထိပ်တန်း ဦးဆောင် စီးပွားရေးအချက်အချာအဖြစ် ရပ်တည်လျက်ရှိကြောင်း သိရပါသည်။ ပြည်နယ်၏စက်မှုနှင့် ကုန်သွယ်ရေးဦးစီးဌာန၏အဆိုအရ ၎င်းတို့သည်ပို့ကုန်မှတစ်ဆင့် ခန့်မှန်းအမေရိကန်ဒေါ်လာ ၃၄.၅ ဘီလီယံ (၂၀၂၃ ခုနှစ်တူညီသည့်ကာလထက် ၁၂.၇ ရာခိုင်နှုန်းမြင့်တက်) ခဲ့ပြီး သွင်းကုန် အတွက် အမေရိကန်ဒေါ်လာ ၂၄.၅ ဘီလီယံ (လွန်ခဲ့သည့်နှစ်တူညီသည့်ကာလထက် ၁၂.၂% မြင့်တက်)သုံးစွဲခဲ့ကြောင်း သိရပါသည်။ Binh Duong ပြည်နယ်၏လတ်တလောတင်ပို့မှု တန်ဖိုးမှာ ဗီယက်နမ်၏စုစုပေါင်းတင်ပို့မှုတန်ဖိုး၏ ၁၀% ကျော်ရှိကြောင်း သိရပါသည်။ အဓိကထုတ်ကုန် ၆ ခု ဖြစ်သည့် သစ်နှင့်သစ်ထုတ်ကုန်၊ အဝတ်အထည်များ၊ ဖိနပ်၊ စတီလ်းနှင့် အီလတ်ထရောနစ် ပစ္စည်းများတင်ပို့မှုမှ ဝင်ငွေအမေရိကန်ဒေါ်လာ ၁၉.၃ ဘီလီယံရရှိခဲ့ပြီး ပြည်နယ်၏ စုစုပေါင်း တင်ပို့မှုတန်ဖိုး၏ ၅၆.၂ ရာခိုင်နှုန်းရှိကြောင်း သိရပါသည်။ သစ်တင်ပို့မှု တန်ဖိုးသည် အမေရိကန် ဒေါ်လာ ၆.၅ ဘီလီယံဖြင့် ၁၇.၆ ရာခိုင်နှုန်းမြင့်တက်ခဲ့ပြီး  အဝတ်အထည်တင်ပို့မှုမှာ အမေရိကန် ဒေါ်လာ ၃.၂ ဘီလီယံဖြင့် ၁၅.၁ ရာခိုင်နှုန်း မြင့်တက်ခဲ့ ကြောင်းသိရပါသည်။ ပြည်နယ်စက်မှုနှင့် ကုန်သွယ်ရေးဦးစီးဌာန၏ ညွှန်ကြားရေးမှူးဖြစ်သူ Nguyen Thanh Toan က ထိုကုန်သွယ်ရေး ပိုငွေအမေရိကန်ဒေါ်လာ ၁၀ ဘီလီယံသည် ပြည်တွင်းစီးပွားရေးလုပ်ငန်းများ၏ ကြံကြံခံနိုင်စွမ်း နှင့် လိုက်လျောညီထွေဖြစ်မှုကို ရောင်ပြန်ဟပ်နေကြောင်း၊ လုပ်ငန်းများသည် အမေရိကန်၊ ဥရောပသမဂ္ဂ၊ ဂျပန်နှင့် တရုတ်ကဲ့သို့သော စျေးကွက်များတိုးချဲ့ရန် လွတ်လပ်သော ကုန်သွယ်ရေး သဘောတူညီချက်များကို ထိရောက်စွာ အသုံးချနိုင်ခဲ့ကြောင်းနှင့် လာမည့်အချိန်တွင်လည်း ဌာန သည်တင်ပို့မှုအရှိန်မြှင့်တင်ရန်  စက်မှုနှင့် ကုန်သွယ်ရေးဝန်ကြီးဌာနအစည်းအဝေးများမှတစ်ဆင့် စက်မှုလုပ်ငန်းများနှင့် စီးပွားရေးလုပ်ငန်းများအား သတင်းအချက်အလက်များ အချိန်ကိုက် ပံ့ပိုးသွားမည်ဖြစ်ကြောင်း ပြောကြားခဲ့ပါသည်။ ထို့ပြင်၎င်းတို့သည် ပြည်တွင်းကုန်ပစ္စည်းများ အတွက်  အခွင့်အလမ်းများကျယ်ပြန့်စေရန် ဟာလာ ဈေးကွက်ကဲ့သို့သော ဈေးကွက်သစ်များ ရှာဖွေသွားမည်ဟုသိရပါသည်။ Binh Duong ပြည်သူ့ ကော်မတီဥက္ကဌဖြစ်သူ Vo Van Minh က စံချိန်တင်ကုန်သွယ်ရေးပိုငွေရရှိခြင်းသည် ပြည်တွင်းအာဏာပိုင်များနှင့် စီးပွားရေးအဖွဲ့အစည်းများ အကြား အနီးကပ်ပူးပေါင်းဆောင်ရွက်မှုကြောင့် ဖြစ်ကြောင်းနှင့် ရှေ့ဆက်၍လည်းပြည်နယ် သည် ၂၀၂၅ ခုနှစ်တွင် တည်ငြိမ်စွာကြီးထွားရန်အတွက် မူဝါဒများချမှတ်ခြင်း၊  စက်မှုအခြေခံ အဆောက်အအုံနှင့် ဒစ်ဂျစ်တယ်အသွင် ကူးပြောင်းရေးတို့တွင် ကြီးမားစွာရင်းနှီးမြှုပ်နှံရန်စီစဉ် ထားကြောင်း ပြောကြားခဲ့ပါသည်။ ၎င်းတို့သည် ဆိပ်ကမ်းများနှင့်စက်မှုဇုန်များအကြား ချိတ်ဆက်မှု အားကောင်းရန် ကုန်သွယ်ရေးနှင့် ထောက်ပံ့ပို့ဆောင်ရေးအခြေခံအဆောက်အအုံနှင့် သယ်ယူပို့ဆောင်ရေးကွန်ယက်ဖွံ့ဖြိုးတိုး တက်ရေးတို့တွင် အဓိကအာရုံစိုက်ထားကြောင်းသိရပါသည်။ စီးပွားရေးလုပ်ငန်းများသည်လည်း ထုတ်လုပ်နိုင်စွမ်းနှင့် ထုတ်လုပ်မှုအရည်အသွေးမြှင့်တင်ရန် ဒစ်ဂျစ်တယ်အသွင်ကူးပြောင်းခြင်း၊ ပုံစံကျသောကုန်ထုတ်လုပ်ခြင်းနှင့် ထောက်ပံ့မှုကွင်းဆက် တွင် လူအစားစက်အစားထိုးခြင်းတို့ ဆောင်ရွက်ရန် တိုက်တွန်းခြင်းခံရကြောင်း သိရပါသည်။ ထို့ပြင် Binh Duong ပြည်နယ်သည် အရည်အသွေးမြင့်သော လုပ်သားထုလေ့ကျင့်ရေး၊ ဘဏ္ဍာရေး ထောက်ပံ့ခြင်းနှင့် အလားအလာ ရှိသောတင်ပို့ရာဈေးကွက်များရှိ  ဥပဒေစည်းမျဉ်းများနှင့် ပတ်သတ်၍ အကြံပေးခြင်းပြုလုပ် ခြင်းတို့တွင် ရင်းနှီးမြှုပ်နှံရန်စီစဉ်ထားကြောင်း သိရပါသည်။

Vietnam Plus

DOCA(ရန်ကုန်)

      Geely Automobile Holding မှ ပိုင်ဆိုင်သည့် တရုတ်မော်တော်ကား ကုမ္ပဏီ Lynk & Co သည် ၎င်း၏ ပထမဆုံး လျှပ်စစ်မော်တော်ကားအား အစ္စရေးတွင် ၂.၁၂.၂၀၂၄ ရက်နေ့၊ တနင်္လာနေ့ က စတင်မိတ်ဆက်ခဲ့သည်။ ထို EV မော်ဒယ်သည် အကွာအဝေး ၄၆၅ ကီလိုမီတာ မောင်းနှင်နိုင်ပြီး အမြန်နှုန်းအား တစ်နာရီလျှင် ၁၈၀ ကီလိုမီတာအထိ မြှင့်တင်မောင်းနှင်နိုင်မည် ဖြစ်သည်။ ၎င်း EV ကားအား ၆၆ Kwh ဘတ်ထရီတပ်ဆင် အသုံးပြုမည်ဖြစ်ကြောင်းသိရသည်။ Lynk & Co သည် ၂၀၂၃ ခုနှစ် ဇန်နဝါရီလတွင် အစ္စရေးကားဈေးကွက်သို့ Plug-in hybrid Lynk & Co 01, Compact Crossover SUV ဖြင့် ဝင်ရောက်ခဲ့သည်။ ထိုမော်ဒယ်နှစ်မျိုးလုံးအား Lynk & Co နှင့် ဆွီဒင်အခြေစိုက် Volvo တို့မှ ပူးပေါင်းထုတ်လုပ်ထားပြီး Geely မှ ပိုင်ဆိုင်သည်။ တနင်္လာနေ့တွင် အစ္စရေးမော်တော်ယာဉ် တင်သွင်းသူများအသင်းမှ ထုတ်ပြန်သော အချက်အလက်များအရ တရုတ်အမှတ်တံဆိပ် BYD သည် ဇန်နဝါရီမှ နိုဝင်ဘာလအတွင်း အစ္စရေး လျှပ်စစ်ကား ဈေးကွက်တွင် အစီးရေ ၁၆၄၄၃ စီး ရောင်းချခဲ့ရပြီး အထူးသဖြင့် Atto 3 Crossover, Dolphin Hatchback နှင့် Seal Fastback Sedan တို့အား အဓိကရောင်းချရကြောင်း သိရသည်။

Source : Xinhua

DOCA(ရန်ကုန်)

            ကမ္ဘောဒီးယားနှင့် ဗီယက်နမ်တို့သည် နယ်စပ်ငွေပေးချေမှုစနစ်ပေါင်းစည်းရေးစီမံကိန်းတွင် ပူးပေါင်ဆောင်ရွက်မှုကို အားကောင်းလာစေရန်အတွက် ၎င်းတို့၏ဘဏ်လုပ်ငန်းကဏ္ဍများတွင် ပိုမိုဖွံဖြိုးတိုးတက်ရေးကို မြှင့်တင်ရန်သဘောတူခဲ့ကြသည်။ ဗီယက်နမ်နိုင်ငံ၊ ဟနွိုင်းမြို့တွင် ကမ္ဘောဒီးယားအမျိုးသာဘဏ် (NCB) အုပ်ချုပ်ရေးမှူး  Chea Serey နှင့် ဗီယက်နမ် နိုင်ငံတော်ဘဏ် (SBV) အုပ်ချုပ်ရေးမှူး Nguyen Thi Hong တို့တွေ့ဆုံမှုတွင်နှစ်နိုင်ငံစီးပွားရေး၊ ငွေးကြေးအခြေအနေနှင့် ဘဏ်လုပ်ငန်းကဏ္ဍဖွံ့ဖြိုးတိုးတက်ရေးတို့ကို ဆွေးနွေးခဲ့ကြသည်။ ထို့အပြင် နယ်စပ်ဖြတ်ကျော်ငွေပေးချေမှုနစ် ပေါင်းစည်းရေးပရောဂျက်တွင် ပူးပေါင်းဆောင်ရွက်ခြင်း တိုးတက်မှုများကိုလည်းဆွေးနွေးခဲ့ကြသည်။ ဤတွေ့ဆုံပွဲသည် နှစ်နိုင်ငံ အကြား ဘဏ်လုပ်ငန်းကဏ္ဍ ပိုမိုဖွံ့ဖြိုးတိုးတက်စေရန်အတွက် နှစ်နိုင်ငံပူးပေါင်းဆောင်ရွက်မှုကိုအားကောင်းစေရန်နှင့် ချဲ့ထွင်ရန်ရည်ရွယ်ခြင်းဖြစ်ကြောင်း၊ ထိုနှစ်ပတ်လည်အစည်းအဝေးသည် တွေ့အကြုံများမျှဝေနှင့် လေ့လာခြင်းများဖြင့် နှစ်နိုင်ငံချစ်ကြည်ရင်းနှီးမှုနှင့် ခိုင်မာစေရန်ရည်ရွယ်သည်ဟု Chea Serey ကပြောကြားခဲ့သည်။ ကမ္ဘောဒီးယားနှင့်ဗီယက်နမ်တို့သည် နှစ်နိုင်ငံအကြားခရီးသွားလာရေး၊ ကုန်သွယ်မှုနှင့် ရင်းနှီးမြှုပ်နှံမှုများကို မြှင့်တင်ရန်အတွက် နယ်စပ်ဖြတ်ကျော် QR ငွေပေးချေမှုစနစ်များ ချိတ်ဆက်မည့် ပရောဂျက်ကိုစတင်မည်ဖြစ်ကြောင်းသိရသည်။

Source: Khmer Times

DOCA(ရန်ကုန်)

     တရုတ်နိုင်ငံသည် ဗီယက်နမ်ဆန်ကို အများဆုံးတင်သွင်းသူဖြစ်ခဲ့ဖူးသော်လည်း ဆန်တင် သွင်းမှု ကျဆင်းလာခဲ့ရာ ယခုအခါ တရုတ်ဈေးကွက်သို့ ဆန်တင်ပို့မှုများ ပြန်လည်စတင်နိုင်မည်ဟု  အပြုသဘောဆောင် ရှုမြင်ထားကြောင်း ဗီယက်နမ် စက်မှုနှင့်ကုန်သွယ်ရေးဝန်ကြီးဌာနက ဖော်ပြ ခဲ့သည်။

     ဗီယက်နမ်ဆန်များတင်ပို့မှုကို မြှင့်တင်ရန် ရည်ရွယ်ချက်ဖြင့် ဒီဇင်ဘာ ၂ ရက်မှ ၆ ရက်အထိ တရုတ်နိုင်ငံရှိ Guangdong နှင့် Hunan ပြည်နယ်များသို့ ကုန်သွယ်ရေးကိုယ်စားလှယ်အဖွဲ့ တစ်ရပ်ကို စေ  လွှတ်ရန် အဆိုပါဝန်ကြီးဌာနကစီစဉ်ထားကြောင်း၊ ဗီယက်နမ်ဆန်စပါးလုပ်ငန်း နယ်ပယ်ရှိ ဦးဆောင်ကုမ္ပဏီကြီးများမှ ကိုယ်စားလှယ် ၁၀ ဦးမှ ၁၈ ဦးအထိ အဖွဲ့ဝင်အဖြစ် လိုက်ပါ မည်ဖြစ်ကြောင်း၊ ကိုယ်စားလှယ်အဖွဲ့သည် တရုတ်မိတ်ဖက်များနှင့် အပြန်အလှန် အစည်းအဝေးပွဲ များ ကျင်းပခြင်း၊ စီးပွားရေးလုပ်ငန်းအချင်းချင်း တွေ့ဆုံဆွေးနွေးပွဲများတွင် ပါဝင်ခြင်းနှင့် တရုတ် စားသုံးသူများ၏ နှစ်သက်မှုကို ထိုးထွင်းသိမြင်နိုင်မည့် စျေးကွက်သုတေသနပြုလုပ်ခြင်း တို့ကို ဆောင်ရွက်မည်ဖြစ်ကြောင်း သိရပါသည်။

     စက်မှုနှင့်ကုန်သွယ်ရေးဝန်ကြီးဌာနသည်  ဗီယက်နမ်စီးပွားရေးလုပ်ငန်းများ အနေဖြင့် သက်ဆိုင်သည့်မူဝါဒများနှင့် စျေးကွက်တောင်းဆိုချက်များကို နားလည်သဘောပေါက်စေရန်နှင့် ပူးပေါင်းဆောင်ရွက်မှု အခွင့်အလမ်းများ ပိုမိုဖော်ထုတ်နိုင်စေရန်အတွက် စီးပွားရေးလုပ်ငန်း အချင်းချင်း ဆွေးနွေးပွဲများကိုလည်း လက်ခံကျင်းပမည်ဖြစ်ကြောင်း၊ ဗီယက်နမ်၏ ဆန်မွှေးနှင့် ပရီမီယံဆန်များသည် ထင်ရှားကျော်ကြားမှုရှိကြောင်း၊ လူဦးရေ ၁.၄ ဘီလီယံရှိသော တရုတ်နိုင်ငံ တွင် ရေရှည်တည်တံ့သော ဆန်အမှတ်တံဆိပ်များ တည်ဆောက်နိုင်ရေးအတွက် ဝန်ကြီးဌာနက စီးပွားရေးလုပ်ငန်းများသို့ တွန်းအားပေးလျက်ရှိကြောင်းဖြင့် အဆိုပါ ဝန်ကြီးဌာနလက်အောက်ရှိ ကုန်သွယ်မှုမြှင့်တင်ရေးအေဂျင်စီမှ ဒါရိုက်တာ Vu Ba Phu က ပြောကြားခဲ့ပါသည်။

     ဗီယက်နမ်စားနပ်ရိက္ခာအသင်းနှင့် ဆန်လုပ်ငန်းကျွမ်းကျင်သူများ၏ အဆိုအရ တရုတ်နိုင်ငံ သည် ဗီယက်နမ်ဆန်အတွက် အကြီးဆုံးဈေးကွက်ဖြစ်ခဲ့ဖူးသော်လည်း လွန်ခဲ့သည့် ၂ နှစ်အတွင်း (၂၀၂၃-၂၀၂၄) တွင် ယင်းဈေးကွက်သို့ ဗီယက်နမ်ဆန်တင်ပို့မှုမှာ သိသာစွာ ကျဆင်းခဲ့ကြောင်း သိရသည်။ ဗီယက်နမ်၏ ၂၀၂၃ ခုနှစ် ဆန်တင်ပို့မှု စုစုပေါင်းတွင် တရုတ်နိုင်ငံသို့ တင်ပို့မှုမှာ ၁၁ ရာခိုင်နှုန်းသာရှိခဲ့ပြီး ဖိလစ်ပိုင်နှင့် အင်ဒိုနီးရှားတို့၏ နောက်၌ရပ်တည်နေခဲ့သည်။ ယင်းအခြေ အနေသည် ၂၀၁၂ ခုနှစ်၌ စုစုပေါင်း ဆန်ပို့ကုန်တန်ဖိုး၏ ၂၇ ဒသမ ၅ ရာခိုင်နှုန်းကို တရုတ်နိုင်ငံသို့ တင်ပို့လျက် ဗီယက်နမ်၏ အကြီးမားဆုံး ဆန်ပို့ကုန်ဈေးကွက်ဖြစ်ခဲ့ရာမှ သိသာထင်ရှားသည့် ပြောင်းလဲမှုဖြစ်ပေါ်ခဲ့ခြင်းဖြစ်သည်။

     ဗီယက်နမ် စက်မှုနှင့် ကူးသန်းရောင်းဝယ်ရေးဝန်ကြီးဌာနသည် လုပ်ငန်းရှင်များအား ထုတ် ကုန်အရည်အသွေးမြှင့်တင်ရန်နှင့် ၎င်းတို့၏ စျေးကွက်အနေအထားကို ပြန်လည်ထူထောင်နိုင်ရန် အတွက် အခွင့်အလမ်းများကို အသုံးချကာ ပံ့ပိုးကူညီသွားမည်ဖြစ်ကြောင်း သိရပါသည်။

Source: Saigon Giai Phong News, 01 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     အိန္ဒိယနိုင်ငံတွင် ပဲမျိုးစုံ စိုက်ပျိုးမှုဧရိယာ တိုးချဲ့နိုင်ရန် ရည်ရွယ်လျက် ပထမဦးဆုံးအကြိမ် အစပြုလုပ်ဆောင်မှုအဖြစ် ပဲစင်းငုံနှင့် ပဲနီလေးတို့ကို ကန်ထရိုက်လယ်ယာစနစ်ဖြင့် စိုက်ပျိုး ထုတ်လုပ်လျက် အစိုးရ၏ အနိမ့်ဆုံးအထောက်အပံ့ပြု အခြေခံရည်ညွှန်းဈေးနှုန်းဖြင့် တောင်သူ များထံမှ ဝယ်ယူခြင်းကို တမီနာဒူ၊ ဘီဟာ၊ ဂျားခန်နှင့် ဂူဂျရတ် ပြည်နယ်များ၌ ဆောင်ရွက်သွားရန် အစိုးရက စီစဉ်လျက်ရှိကြောင်း သိရသည်။

     ကနဦး အစပြုဆောင်ရွက်မည့် အစီအစဉ်သည် ဧက ၁၅၀၀၀ ကို လွှမ်းခြုံမှုရှိမည်ဖြစ်ပြီး အဆိုပါ ပြည်နယ်များ၌ လက်ရှိကာလတွင် တောင်သူများက စိုက်ပျိုးခြင်းမရှိသော မြေနေရာများ၌ ပဲမျိုးစုံ စိုက်ပျိုးမှုတိုးချဲ့ရန် ရည်ရွယ်ထားကြောင်း အစိုးရ အရာရှိများက ပြောဆိုကြသည်။ အခြေခံ ရည်ညွှန်းဈေးနှုန်းဖြင့် စိုက်ပျိုးထွက်ရှိသည့် ပဲများအား ပြန်လည်ဝယ်ယူမှုသည် ပဲမျိုးစုံကို ပိုမို စိုက်ပျိုးရန် တောင်သူများသို့ တွန်းအားပေးလိမ့်မည်ဖြစ်ပြီး နိုင်ငံ၏ သွင်းကုန်အပေါ် မှီခိုနေရမှုကို လျှော့ချနိုင်မည်ဟု အရာရှိတစ်ဦးက Financial Express သတင်းဌာနသို့ ပြောကြားခဲ့သည်။

     အိန္ဒိယ အမျိုးသားစားသုံးသူ သမဝါယမအသင်းချုပ် (NCCF) သည် ထိုကဲ့သို့ မကြာမီ ကာလ၌ ကန်ထရိုက် လယ်ယာစနစ်ဖြင့် စိုက်ပျိုးထွက်ရှိမည့် ပဲမျိုးစုံအား ဝယ်ယူခြင်းကို စတင် ဆောင်ရွက်မည်ဖြစ်သည်။ ထို့အပြင် ၎င်းအေဂျင်စီသည် မဟာရဋ္ဌ၊ မဒ္ဒရာပရာဒေ့ရှ်၊ ဂူဂျရတ်၊ ကာနာတကာ၊ တဲလန်ဂါနာနှင့် ချတ္တီဂါ တို့ကဲ့သို့ ပဲမျိုးစုံ အဓိကစိုက်ပျိုးသော ပြည်နယ်များရှိ တောင်သူပေါင်း ၁.၅ သန်းထံမှ ပဲများကို အခြေခံရည်ညွှန်းဈေးနှုန်းဖြင့် ဝယ်ယူရန် မှတ်ပုံတင်ထား ပြီးဖြစ်သည်။

     အိန္ဒိယ လယ်သမားများ သမဝါယမ အသင်းချုပ်ဖြစ်သော NAFED သည်လည်း မိုးသီးနှံ ရာသီ၌ စိုက်ပျိုးထုတ်လုပ်သည့် ပဲစင်းငုံ၊ မတ်ပဲနှင့် ပဲနီလေးတို့ကို အခြေခံရည်ညွှန်းဈေးနှုန်းဖြင့် ဝယ်ယူရန်အတွက် တောင်သူဦးရေ ၁.၇ သန်းကို မှတ်ပုံတင်ထားပြီးဖြစ်ကြောင်း သိရှိရသည်။

     ပဲစင်းငုံနှင့် မတ်ပဲတို့၏ လက်လီဈေးနှုန်းများသည် လွန်ခဲ့သော ၃ လတာ ကာလအတွင်း ကျဆင်းမှု သို့မဟုတ် ဆက်လက်တည်ငြိမ်မှု ရှိနေခဲ့သည်ဟု အရာရှိတစ်ဦးက ပြောဆိုခဲ့သည်။ အိန္ဒိယနိုင်ငံအနေဖြင့် ပြည်တွင်း၌ နှစ်စဉ် ပဲမျိုးစုံစားသုံးရန် လိုအပ်ချက် တန်ချိန် သန်း ၃၀ ခန့်၏ ၁၅ ရာခိုင်နှုန်းကို ပြည်ပမှတင်သွင်းခြင်းဖြင့် ရောင်းလိုအားနှင့် ဝယ်လိုအား တို့အကြား ကွာဟချက် ကို ဖြည့်ဆည်းနေရကြောင်း Financial Express သတင်းဌာနက ဖော်ပြထားသည်။

Source: Financial Express, 29 Nov 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)