ပြည်ပကုန်သွယ်မှုသတင်းများ

       နိုင်ငံ၏ဆန်စပါးထုတ်လုပ်မှု ပိုမိုယှဉ်ပြိုင်နိုင်စွမ်းရှိစေရန်အတွက် လယ်ယာထွက်ကုန် အကောက်ခွန် စည်းကြပ်မှု ဥပဒေ (Agricultural Tariffication Act) အား ဒီဇင်ဘာလ ၉ ရက်နေ့ တွင် သမ္မတ Marcos က အတည်ပြု လက်မှတ်ရေးထိုးခဲ့ကြောင်းသိရှိရပါသည်။

     နိုင်ငံ၏ ဆန်ပြတ်လပ်မှုကို အရေး‌ပေါ်တုံ့ပြန်ဖြေရှင်းရန်နှင့် လယ်သမားများ လိုအပ်လျက် ရှိသည့်အရင်းအမြစ်များ စဉ်ဆက်မပြတ်ရရှိရန် ရည်ရွယ်ချက်များဖြင့် ဥပဒေအမှတ် ၁၂၀၇၈ ကို လက်မှတ်ရေးထိုးခဲ့ခြင်းဖြစ်ကြောင်း၊ ဆန်စပါး အကောက်ခွန် စည်းကြပ်မှုဥပဒေ (သို့မဟုတ်) ဥပဒေအမှတ် ၁၁၂၀၃ ကို ပြန်လည်ပြင်ဆင်ရခြင်းမှာ ဆန်စပါးဈေးကွက် ယှဉ်ပြိုင်မှုတိုးတက်ရေး ရန်ပုံ‌ငွေ (Rice Competitiveness Enhancement Fund - RCEF) ကို ၂၀၃၁ ခုနှစ်အထိ တိုးမြှင့် ဖော်ဆောင်ရန်နှင့် နှစ်စဉ်ရန်ပုံငွေ ပမာဏလျာထားမှုကို ပီဆို ၁၀ ဘီလီယံမှ ပီဆို ၃၀ ဘီလီယံသို့ တိုးမြှင့်ရန်အတွက်ဖြစ်ကြောင်း၊ ဥပဒေအရ စိုက်ပျိုးရေး ဦးစီးဌာနအနေဖြင့် ရုတ်တရက်ဆန်ပြတ် လပ်မှု သို့မဟုတ် ဆန်ဈေးနှုန်းအဆမတန်မြင့်မားမှု ဖြစ်ပေါ်ချိန်၌ ဈေးကွက်တည်ငြိမ်မှုရှိစေရေး     လိုအပ်သည့် အရေးယူဆောင်ရွက်မှုများ ဆောင်ရွက်နိုင်တော့မည်ဖြစ်သည့်အတွက် ဖိလစ်ပိုင် နိုင်ငံသားတိုင်း ဈေးနှုန်းသက်သာစွာဖြင့် ဆန်ဝယ်ယူစားသုံးနိုင်ရေးကို အထောက်အကူပြုမည်ဖြစ် ကြောင်း သမ္မတက အလေးအနက်ထား ပြောကြားခဲ့ကြောင်းသိရှိရပါသည်။

     ထို့အပြင် အဆိုပါဥပဒေသည် ဆန်စပါးလုပ်ငန်းနယ်ပယ်ကို ပိုမိုစည်းကမ်းတင်းကြပ်စွာ ကြီးကြပ်ဆောင်ရွက်နိုင်ရေးအတွက် စိုက်ပျိုးရေးဦးစီးဌာနသို့ အခွင့်အာဏာအပ်နှင်းထားပြီးဖြစ်ရာ ဈေးကွက်အတွင်းသို့ စံချိန်စံညွှန်းပြည့်မီသည့် ဆန်များရောက်ရှိလာမည်ဖြစ်ကြောင်း၊ စိုက်ပျိုးရေး လုပ်ငန်းဗျူရိုအနေဖြင့် နိုင်ငံ၏ စားနပ်ရိက္ခာထောက်ပံ့မှုကို အကာအကွယ်ပေးရန်နှင့် ပြည်သူများ ၏ အစားအစာ ဘေးအန္တရာယ်ကင်းရှင်းမှု သေချာခိုင်မာစေရန်အတွက်  ဆန်သိုလှောင်ရုံများအား စစ်ဆေးခြင်းနှင့် သီးနှံသိုလှောင်မှုကို နောက်ကြောင်းပြန်ခြေရာခံရန်အတွက် အမျိုးသားအဆင့် သတင်းအချက်အလက်စနစ်အား စီမံခန့်ခွဲခြင်းတို့ကို ဆောင်ရွက်နိုင်မည်ဖြစ်ကြောင်း ဖိလစ်ပိုင် သမ္မတက ပြောကြားခဲ့ပါသည်။

     လယ်သမားများအနေဖြင့် အထွက်နှုန်းမြင့်မားသည့် အရည်အ‌သွေးမြင့် မျိုးစေ့များကို ပိုမို ဝယ်ယူအသုံးပြုနိုင်စေရန်အတွက် ပြန်လည်ပြင်ဆင်ထားသည့် အဆိုပါဥပဒေ၌ မျိုးစေ့အစီအစဉ်နှင့် စက်မှုလယ်ယာဖော်ဆောင်ရေး အစီအစဉ်တို့ကို ဖော်ပြထားကြောင်း၊ ရိတ်သိမ်းချိန်လွန် လေလွင့် ဆုံရှုံးမှုများ ‌လျော့ချရေးကိုလည်း သိသာစွာအလေးပေးဖော်ပြပါရှိကြောင်း၊ နှစ်စဉ် ဆန်တန်ချိန် ၃၇၅၀၀၀ ခန့် လေလွင့်ဆုံးရှုံးနေမှုကို ကာကွယ်တားဆီးခြင်းဖြင့် နောင်လာမည့် ၆ နှစ်တာ ကာလအတွင်း ပြည်သူဦးရေ ၃.၄ သန်းအတွက် ထပ်ဆောင်း၍ စားနပ်ရိက္ခာ ထောက်ပံ့ပေးနိုင် မည်ဖြစ်ပြီး အစားအစာဘေးအန္တရာယ် ကင်းရှင်းစေရန်နှင့် ဈေးနှုန်းသင့်တင့်သည့်ဆန်များ ပိုမိုဝယ်ယူစားသုံးနိုင်ရန် ကူညီဆောင်ရွက်ပေးနိုင်မည်ဖြစ်ကြောင်း သမ္မတ Marcos က ပြောကြားခဲ့ပါသည်။

Source : Manila Bulletin, 09 December 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    သမ္မတ Prabowo Subianto က ချမှတ်ထားသည့် ကိုယ်တိုင်စားနပ်ရိက္ခာဖူလုံစေရေး ရည်မှန်းချက်အရ စပါးစိုက်ဧရိယာ ဟက်တာပေါင်း ၂.၃ သန်းကို အသစ်ထပ်မံတိုးချဲ့စိုက်ပျိုးမည် ဖြစ်သည်ဟု အင်ဒိုနီးရှား စိုက်ပျိုးရေးဝန်ကြီး Andi Amran Sulaiman က ဒီဇင်ဘာ ၅ ရက်နေ့တွင် ပြောကြားခဲ့ပါသည်။

    အဆိုပါ အသစ်တိုးချဲ့မည့် စပါးစိုက်ဧရိယာပမာဏတွင် စိမ့်တောမြေများအား စပါးစိုက်ပျိုးနိုင်အောင် ထူထောင်မှုမှ ဟက်တာ ၈၅၁၀၀၀ နှင့် စပါးစိုက်ခင်းအသစ် ဖော်ထုတ်လုပ်ကိုင်မှုမှ ဟက်တာ ၅၀၀၀၀၀ တို့ ပါဝင်မည်ဖြစ်ပြီး လက်ရှိ ထွန်ယက်စိုက်ပျိုးလျက်ရှိသော လယ်မြေများမှ လည်း ဟက်တာ ၁ သန်းကို တိုးချဲ့စိုက်ပျိုးမည်ဖြစ်သည်။ ဝန်ကြီး Sulaiman ၏ ပြောဆိုချက်အရ အဓိကအားဖြင့် ဂျာဗားကျွန်းပေါ်တွင် တည်ရှိသော လက်ရှိစပါးစိုက်ဧရိယာများအနက်မှ ဟက်တာ ၁ သန်းကို ပင်မအဆင့်၊ ဒုတိယအဆင့်နှင့် တတိယအဆင့် ဆည်ရေပေးဝေမှု ပုံစံတကျလုပ်ဆောင်ခြင်းဖြင့် တောင်သူလယ်သမားများအနေဖြင့် ၁ နှစ်လျှင် စပါးသီးနှံ ၃ ကြိမ် စိုက်ပျိုးနိုင်အောင် ဆောင်ရွက်မည်ဖြစ်ကြောင်း သိရှိရသည်။

   လက်ရှိကာလ၌ အင်ဒိုနီးရှား စိုက်ပျိုးရေးဝန်ကြီးဌာနသည် နိုင်ငံအရှေ့ပိုင်းတွင်၊ ပါပူအာ တောင်ပိုင်းပြည်နယ်ရှိ Merauke ခရိုင် ကဲ့သို့သော ဒေသများ၌ စပါးစိုက်ပျိုးမြေအသစ်များ ဖော်ထုတ်ခြင်းကို လုပ်ဆောင်လျက်ရှိသည်။

    ကိုယ်တိုင်စားနပ်ရိက္ခာဖူလုံစေရေးကို အကောင်အထည်ဖော်ဆောင်ရာတွင် စိုက်ပျိုးရေး ဝန်ကြီးဌာနသည် ဆည်မြောင်း အခြေခံအဆောက်အအုံများ အားကောင်းခိုင်မာစေရန်အတွက် ပြည်သူ့လုပ်ငန်းများရေးရာ ဝန်ကြီးဌာနနှင့် အမျိုးသားတပ်မတော်တို့နှင့် စုပေါင်းညှိနှိုင်း ဆောင် ရွက်လျက်ရှိကြောင်း၊ စိမ့်တောမြေများ အဆင့်မြှင့်တင်ခြင်း၊ လယ်မြေအသစ်များ ဖော်ထုတ်ခြင်း နှင့် လက်ရှိစိုက်ပျိုးမြေများ၌ ဆည်ရေပေးဝေမှု နည်းလမ်း ၃ ရပ်ဖြင့် စပါး ၃ သီးစိုက်ပျိုးခြင်းတို့တွင် သက်ဆိုင်ရာကဏ္ဍများ ပူးပေါင်းဆောင်ရွက်ခြင်းဖြင့် ပြည်တွင်း ဆန်စပါးစိုက်ပျိုးထုတ်လုပ်မှုမှာ တိုးတက်လာမည်ဖြစ်ကြောင်း၊ ၎င်းတို့ အဖွဲ့အစည်းများ၏ လုပ်ငန်းတာဝန်မှာ သမ္မတ၏ လမ်းညွှန် ချက်နှင့်အညီ ကိုယ်ပိုင်ရိက္ခာဖူလုံမှုရရှိရေး စွမ်းဆောင်ရာ၌ အရှိန်မြှင့်တင်လုပ်ကိုင်ရန် ဖြစ်ကြောင်း စိုက်ပျိုးရေးဝန်ကြီး Sulaiman က ပြောဆိုခဲ့သည်။

     အဆိုပါဝန်ကြီးဌာန ၂ ခုနှင့် အမျိုးသားတပ်မတော်တို့သည် ဆည်‌ရေပေးဝေမှုဆိုင်ရာ ပေါင်း စပ်ညှိနှိုင်းမှု အစည်းအဝေးတစ်ရပ်ကို ဒီဇင်ဘာ ၅ ရက်နေ့၌ ဂျကာတာမြို့ရှိ စိုက်ပျိုးရေးဝန်ကြီးရုံး တွင် ကျင်းပခဲ့ကြကြောင်း၊ ၂၀၂၄ ခုနှစ် အောက်တိုဘာ ၂၀ ရက်နေ့ အစိုးရအဖွဲ့သစ် စတင်တာဝန် ယူချိန်၌ ကနဦးမိန့်ခွန်းပြောကြားရာတွင် သမ္မတ Prabowo Subianto က ၄ နှစ်မှ ၅ နှစ်တာ ကာလအတွင်း အင်ဒိုနီးရှားနိုင်ငံအနေဖြင့် ကိုယ်ပိုင် စားနပ်ရိက္ခာဖူလုံမှုရှိအောင် ဆောင်ရွက်မည် ဟု ပြောကြားခဲ့ကြောင်း Antara News သတင်းဌာနက ဖော်ပြထားသည်။

Source: Antara News, 5 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ၂၀၂၃ ခုနှစ်၊ စက်တင်ဘာလမှ ၂၀၂၄ ခုနှစ်၊ စက်တင်ဘာလအတွင်း ကမ္ဘောဒီးယားနိုင်ငံ၏ နိုင်ငံခြားတိုက်ရိုက်ရင်းနှီးမြှုပ်နှံမှု (FDA) သည် အမေရိကန်ဒေါ်လာ ၈.၁ ဘီလီယံအထိ မြင့်တက်လာကြောင်း စီးပွားရေးနှင့်ဘဏ္ဍာရေးဝန်ကြီးဌာန (MEF) ၏ အစီခံစာအရ သိရသည်။ FDI တွင်အဓိကရင်းနှီးမြှုပ်နှံသည့်နိုင်ငံမှာ တရုတ်နိုင်ငံဖြစ်ပြီး တောင်ကိုရီယား၊ စင်္ကာပူ၊ ဂျပန်၊ ဗီယက်နမ်၊ မလေးရှား၊ ထိုင်း၊ ကနေဒါနှင့် ဗြိတိန်နိုင်ငံတို့ဖြစ်ကြသည်။ ကမ္ဘောဒီးယားနိုင်ငံသည် ငြိမ်းချမ်းရေး၊ လုံခြုံရေးနှင့် နိုင်ငံရေးတည်ငြိမ်ရေးတို့နှင့်အတူ  မြင့်မားသောတိုးတက်မှုကို တစိုက်မတ်မတ်ထိန်းသိမ်းထားနိုင်ခဲ့ပြီး စီးပွားရေးတိုးတက်မှု၊ ဆင်းရဲမွဲတေမှုလျော့ချရေးနှင့် ဝင်ငွေနည်းပါးမှုနည်းပါးခြင်းတို့မှ တိုးတက်လာခဲ့သည်။ ၂၀၂၄-၂၀၂၅ ခုနှစ်တွင် စီးပွားရေးသည် ၆ ရာခိုင်နှုန်းနှင့် ၆.၃ ရာခိုင်နှုန်း အသီးသီးတိုးလာရန် မျှော်မှန်းထားပြီး အထူးသဖြင့် အထည်ချုပ်ကဏ္ဍများတွင် ဆက်တိုက်အရှိန်အဟုန်ဖြင့် တိုးတက်လျက်ရှိကြောင်း  စီးပွားရေးနှင့်ဘဏ္ဍာရေးဝန်ကြီး Aun Pornmoniroth က ပြောကြားခဲ့သည်။ ၂၀၂၄ ခုနှစ်ပထမ (၉) လအတွင်း ကမ္ဘောဒီးယား ဖွံ့ဖြိုးတိုးတက်ရေးကောင်စီ (CDC) သည် ရင်းနှီးမြှုပ်နှံမှုအမေရိကန်ဒေါ်လာ ၅.၃ ဘီလီယံရရှိကာ အလုပ်အကိုင်ပေါင်း ၂၅၂,၀၀၀ ကျော်ကို ဖန်တီးနိုင်ခဲ့သည်။ ကမ္ဘောဒီးယား ကုန်သည်ကြီးများအသင်း ဒုတိယဥက္ကဋ္ဌ Lim Heng သည် မကြာသေးမီက CDC တွင် မှတ်ပုံတင်ထားသောရင်းနှီးမြှုပ်နှံမှု သိသိသာသာတိုးလာခဲ့သည်ဟု ပြောကြားခဲ့သည်။ အလတ်စားနှင့်အကြီးစား စက်မှုလုပ်ငန်းများတွင်ရင်းနှီးမြှုပ်နှံသည့် ကုမ္ပဏီများသည် အခြေခံအဆောက်အအုံရင်းနှီးမြှုပ်နှံမှု၊ ကားတပ်ခြင်းစက်ရုံ၊ စိုက်ပျိုးရေးလုပ်ငန်းနှင့် တာယာထုတ်လုပ်မှုကို အာရုံစိုက်သည့် ကုမ္ပဏီများဖြစ်ပြီး  နိုင်ငံ၏ စီးပွားရေးအတွက်ကောင်းမွန်သော ရင်းနှီးမြှုပ်နှံမှုများဖြစ်ကြောင်း ဆက်လက်ပြောကြားခဲ့သည်။ နိုင်ငံခြားတိုက်ရိုက်ရင်းနှီးမြှုပ်နှံမှု စုစုပေါင်းတွင် တရုတ်နိုင်ငံမှ ၄၅.၆ ရာခိုင်နှုန်း၊ တောင်ကိုရီးယားနိုင်ငံမှ ၁၁.၈ ရာခိုင်နှုန်း၊ စင်္ကာပူနိုင်ငံမှ ၆.၅ ရာခိုင်နှုန်း၊ ဂျပန်မှ ၆.၂ ရာခိုင်နှုန်း၊ ဗီယက်နမ်မှ ၅.၃ ရာခိုင်နှုန်း၊ မလေးရှားမှ ၄.၄ ရာခိုင်နှုန်း၊ ထိုင်းမှ ၄ ရာခိုင်နှုန်း၊ ကနေဒါမှ ၃.၅ ရာခိုင်နှုန်း၊ဗြိတိန်မှ ၃.၂ ရာခိုင်နှုန်းနှင့်အခြားနိုင်ငံများမှ ၉.၅ ရာခိုင်နှုန်းတို့ ပါဝင်သည်။

Source: Khmer Times

DOCA(ရန်ကုန်)

     ထိုင်းနိုင်ငံတောင်ပိုင်းတွင် ရေလွှမ်းမိုးမှုကြောင့် ရော်ဘာထုတ်လုပ်မှု ၇% လျှော့ကျ နိုင်ကြောင်း ထိုင်းနိုင်ငံရာဘာအာဏာပိုင်အဖွဲ့က ဒီဇင်ဘာလ ၃ ရက်နေ့က ပြောကြားခဲ့ပါသည်။ ယာယီပြည်နယ်အုပ်ချုပ်ရေးမှူးဖြစ်သူ Sukatus Tarngwiriyakul က ပြည်နယ်အေဂျင်စီသည် ယခုနှစ်တွင် ရော်ဘာတန်ချိန် ၄.၇၈ သန်းထွက်ရှိရန် ရည်မှန်းထားသော်လည်း ယခုအခါ ထိုပမာဏထဲမှ တန်ချိန် ၃၂၀၀၀၀ လျှော့ကျနိုင်ကြောင်း၊ ရေလွှမ်းမိုးမှုကြောင့် ရာဘာစိုက်ပျိုးရေးသမားများက ရော်ဘာစေးမထုတ်ယူနိုင်တော့ကြောင်းနှင့် ပြည်တွင်းရော်ဘာသုံးစွဲမှုကိုလည်း သက်ရောက်စေနိုင်ကြောင်း ပြောကြားခဲ့ပါသည်။ ထိုင်းနိုင်ငံသည် ကမ္ဘာ့အကြီးမားဆုံးရာဘာတင်ပို့သူဖြစ်ပြီး ယခုနှစ်၏ပထမ ၉ လတာကာလတွင် ရော်ဘာတန်ချိန် ၂.၈၆ သန်းတင်ပို့ခဲ့ပြီး ၂၀၂၃ တူညီသည့် ကာလထက် ၅.၉ ရာခိုင်နှုန်းကျဆင်းခဲ့ကြောင်း သိရပါသည်။ ၂၀၂၃ ခုနှစ်တွင် ထိုင်းနိုင်ငံသည် ရော်ဘာတန်ချိန်စုစုပေါင်း ၄ သန်းတင်ပို့ခဲ့ကြောင်း သိရပါသည်။ ထိုင်းနိုင်ငံသည် တောင်ပိုင်းပြည်နယ်ရှစ်ခုတွင် ရော်ဘာစိုက်ခင်းဧရိယာ ၅.၉၆ သန်း Rai (Rai = ထိုင်းနိုင်ငံတိုင်းတာမှုစနစ်)ရှိကြောင်း သိရပါသည်။ ထိုင်းနိုင်ငံ‌တောင်ပိုင်းနှင့် မလေးရှားကျွန်းဆွယ်တို့သည် ဆယ်စုနှစ်အတွင်း အဆိုးရွားဆုံးရေလွှမ်းမိုးမှုများထဲမှအချို့ကို တွေ့ကြုံခံစားခဲ့ရကြောင်း သိရပါသည်။

Bangkok Post

DOCA(ရန်ကုန်)

      ဗီယက်နမ်နှင့် တရုတ်အကြား စိုက်ပျိုးမွေးမြူရေး-သစ်တော-ငါးလုပ်ငန်းကုန်သွယ်မှု မြှင့်တင်နိုင်မည့်နည်းလမ်းရှာဖွေရန်အတွက် ဖိုရမ်ကို ဒီဇင်ဘာလ ၃ ရက်နေ့က ဗီယက်နမ် နိုင်ငံ မြောက်ပိုင်းနယ်စပ် Lang Son ပြည်နယ်တွင် ကျင်းပခဲ့ပါသည်။ ဗီယက်နမ်နိုင်ငံ စိုက်ပျိုးမွေးမြူရေးနှင့် ကျေးလက်ဒေသဖွံ့ဖြိုးတိုးတက်ရေးဝန်ကြီးဌာန (MARD)နှင့် ပြည်နယ်ပြည်သူ့ ကော်မတီက ပူးပေါင်းကြီးမှူးကျင်းပခဲ့သည့်ထိုဖိုရမ်သည် စီးပွားရေးလုပ်ငန်းများ၊ ထုတ်လုပ်သူများနှင့် ပို့ကုန်လုပ်ငန်းရှင်များက နှစ်နိုင်ငံလုံးမှဝန်ကြီးဌာနများ၊ အေဂျင်စီများနှင့် စီမံခန့်ခွဲရေး အေဂျင်စီများအား အဆိုပြုချက်များတင်ပြရန် အခွင့်အလမ်းများကို ဆောင်ယူပေးနိုင်ခဲ့ကြောင်း သိရပါသည်။ MARD ၏ အရည်အသွေး၊ ပြုပြင်ထုတ်လုပ်ခြင်းနှင့် ဈေးကွက်ဖွံ့ဖြိုးတိုးတက်ရေးဦးစီးဌာန၏ ဒုတိယညွှန်ကြားရေးမှူး ဖြစ်သူ Le Thanh Hoa က တရုတ်နိုင်ငံသည် ဗီယက်နမ်နိုင်ငံ၏အကြီးမားဆုံး ကုန်သွယ်ရေးမိတ်ဖက်ဖြစ်ပြီး စိုက်ပျိုးမွေးမြူရေး-သစ်တော-ငါးလုပ်ငန်း ပို့ကုန်တင်ပို့ရာ အဓိကဈေးကွက်ဖြစ်ကြောင်း ပြောကြားခဲ့ပါသည်။  အပြန်အလှန် ကုန်သွယ်မှုသည် ဗီယက်နမ်၏ ကမ္ဘာပေါ်တွင်စုစုပေါင်းတင်ပို့မှု၏ လေးပုံတစ်ပုံရှိကြောင်း သိရပါသည်။ အပြန်အလှန်အနေဖြင့် ဗီယက်နမ်သည်  တရုတ်၏ ကမ္ဘာပေါ်တွင်အကြီးမားဆုံး ကုန်သွယ်ရေး မိတ်ဖက်များထဲမှတစ်ခုဖြစ်ပြီး အာဆီယံတွင်အကြီးမားဆုံးဖြစ်ကြောင်း သိရပါသည်။ စိုက်ပျိုး မွေးမြူရေး-သစ်တော-ငါးလုပ်ငန်းကုန်သွယ်မှုသည် တည်ငြိမ်စွာကြီးထွားလျက်ရှိပြီး ယခုနှစ် ပထမ ၁၁ လတာကာလတွင် အမေရိကန်ဒေါ်လာ ၁၆ ဘီလီယံ ရောက်ရှိခဲ့ပြီး ၂၀၂၂ တူညီသည့် ကာလနှင့်နှိုင်းယှဉ်ပါက ၁၃.၄ ရာခိုင်နှုန်းမြင့်တက်လာကြောင်း သိရပါသည်။ တရုတ်နိုင်ငံသည် ဗီယက်နမ်ထံမှ နို့ထွက်ပစ္စည်းစက်ရုံနှင့် ထုတ်ကုန် ၁၁ ခု၊ ငှက်သိုက်လုပ်ငန်း ၉ ခု၊ ရေနေ မျိုးစိတ်၄၈ ခုနှင့် ထုတ်ကုန် ၁၂၈ ခုအား တင်သွင်းခွင့်ပြုထားကြောင်း သိရပါသည်။ ယနေ့ အချိန်ထိ ဗီယက်နမ်ကုမ္ပဏီ ၅၉၆ ခုသည် တရုတ်နိုင်ငံသို့ ရေနေထုတ်ကုန်တင်ပို့ခွင့် လိုင်စင်ရရှိထားကြောင်း သိရပါသည်။ တရုတ်နိုင်ငံမှ ကိုယ်စားလှယ်များကလည်း အစိမ်းရောင်ပဲကိတ်၊ အုန်းသီးသကြားလုံးနှင့် လိုင်ချီးသီးခြောက်ကဲ့သို့သော ဗီယက်နမ်သစ်သီးများနှင့် အခြားထုတ်ကုန် များသည် ၎င်းတို့ နိုင်ငံတွင်လူကြိုက်များကြောင်း ပြောကြားခဲ့ကြပါသည်။ MARD ၏ ဒုတိယဝန်ကြီးဖြစ်သူ Tran Thanh Nam ကလည်း ဆက်လက်၍ နှစ်နိုင်ငံကြား ဘက်ပေါင်းစုံဗျူဟာမြောက် ပူးပေါင်းဆောင်ရွက်ရေးမိတ်ဖက်ဖွဲ့မှုအပေါ် ၎င်းတို့၏ပူးတွဲထုတ်ပြန်ချက်အရ နှစ်ဖက်စလုံးသည် အပြန်အလှန်ကုန်သွယ်မှုမြှင့်တင်ရေး သဘောတူညီခဲ့ကြကြောင်း ပြောကြားခဲ့ပါသည်။

Vietnam Plus

DOCA(ရန်ကုန်)