ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ လက်ပံတောကျေးရွာ၌ နှမ်း၊ မြေပဲ၊ ကုလားပဲ၊ ပဲတီစိမ်း၊ မတ်ပဲနှင့် ပဲစင်းငုံသီးနှံများကို စိုက်ပျိုးကြပြီး တောင်သူ (၁၀)ဦးခန့်အနေဖြင့် မြေပဲစိုက်ဧက(၁၅၀)ဧကကို ၂၀၂၄ခုနှစ်၊ ဩဂုတ်လတွင် စတင်စိုက်ပျိုးခဲ့ကြောင်းသိရသည်။

        မျိုးအနေဖြင့် ပင်ထောင်(အနီ)မျိုးကို ထွန်‌ကြောင်းဆွဲအစေ့ချစနစ်ဖြင့်စိုက်ပျိုးကြပြီး (၁)ဧကလျှင် မျိုး(၃)တင်းခန့်ကုန်ကျကြောင်း၊ မျိုးကို ယခင်နှစ်မြေပဲစိုက်ခင်းမှထွက်ရှိသည့် မြေပဲများကို မျိုးအနေဖြင့်ဖယ်ချန်၍ စိုက်ပျိုးခြင်းဖြစ်ကြောင်း၊ အပင်သက်တမ်း(၃)လအကြာတွင် ခူးဆွတ်ရကြောင်း၊ စိုက်ပျိုးစရိတ်အနေဖြင့် မြေပြုပြင်ခ၊ လုပ်အားခနှင့် အခြားသွင်းအားစုစရိတ်အပါအဝင် ကျပ်(၆၅၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် (၁)ဧကလျှင် တင်း(၁၀၀)နီးပါးထွက်ရှိခဲ့ပြီး ဈေးနှုန်းအနေဖြင့် မြေပဲတောင့်(၁)တင်းလျှင် ကျပ်(၂၀၀၀၀)၊ ဈေးရရှိခဲ့ကြောင်း၊ ဈေးကွက်အနေဖြင့် မင်းဘူးမြို့ရှိ ပွဲရုံများသို့တင်ပို့ရောင်းချကြောင်း လက်ပံတောကျေးရွာနေ မြေပဲစိုက်တောင်သူ ဒေါ်ဌေးထံမှသိရှိရပါသည်။

DOCA(မကွေး)

       မကွေးတိုင်းဒေသကြီးသည် ဆီထွက်သီးနှံဖြစ်သော မြေပဲ၊ နှမ်း၊ ကြက်သွန်နီနှင့် အခြားပဲမျိုးစုံကို အဓိကထားစိုက်ပျိုး၍ အခြားတိုင်းဒေသကြီးနှင့်ပြည်နယ်များသို့ တင်ပို့ရောင်းချလျက်ရှိပြီး  မကွေး၊ တောင်တွင်းကြီး၊ အောင်လံ၊ ရေနံချောင်း၊ ဆိပ်ဖြူနှင့် ပခုက္ကူကုန်စည်ဒိုင်တွင် နှမ်း၊ ကြက်သွန်နီနှင့် ပဲမျိုးစုံသီးနှံများ ပုံမှန်အရောင်းအဝယ်ဖြစ်လျက်ရှိပါသည်။

        ၂၀၂၄ခုနှစ်၊ စက်တင်ဘာလ(တတိယပတ်)တွင် ကုန်စည်ဒိုင်များတွင် အရောင်းအဝယ်ဖြစ်ပေါ်နေသော ကုန်ပစ္စည်းတစ်ပိဿာဈေးနှုန်းများမှာ မကွေးကုန်စည်ဒိုင်တွင် နှမ်းဖြူ ကျပ်(၈၀၇၀)၊ နှမ်းနီ ကျပ်(၈၁၃၀)၊ နှမ်းနက်(စမုန်) ကျပ်(၁၃၃၃၀)၊ နှမ်းညိုကြား ကျပ်(၇၂၀၀)၊ ကုလားပဲ(929) ကျပ်(၅၁၆၀)၊ ကုလားပဲ (ဟော်လန်) ကျပ်(၅၁၁၀)၊ မြေပဲလုံးဆန်(ဖြူ/ နီ) ကျပ်(၈၉၀၀)၊ ပဲလွန်းဝါ ကျပ်(၃၄၂၀)၊ ပဲကြီးဖြူ ကျပ်(၄၂၁၀)၊ မတ်ပဲ ကျပ်(၆၃၀၀)၊ စားတော်ပဲ ကျပ်(၇၀၀၀)၊ ပဲစင်းငုံ ကျပ်(၇၅၅၀)ဖြစ်ပြီး ယခင်အပတ်ထက် ယခုအပတ်တွင် နှမ်းဖြူ ကျပ်(၂၀၀)၊  နှမ်းနီ ကျပ်(၂၀၀)၊ နှမ်းနက်(စမုန်) ကျပ် (၃၃၀)၊ ပဲလွန်းဝါ ကျပ်(၁၀၀)၊ ကုလားပဲ(ဟော်လန်) ကျပ်(၆၀)၊ ကုလားပဲ(929)ကျပ်(၁၆၀)၊ စားတော်ပဲ ကျပ် (၁၀၀)၊ မတ်ပဲ ကျပ်(၅၀)၊ မြေပဲလုံးဆန်(ဖြူ) ကျပ်(၃၀၀)၊ မြေပဲလုံးဆန်(နီ) ကျပ်(၆၀၀) ဈေးနှုန်းမြင့်တက်ခဲ့ကြောင်းသိရသည်။

       တစ်ပတ်အတွင်း တန်ချိန်(၈၉၀)ခန့်အရောင်းအဝယ်ဖြစ်ခဲ့ပြီး ရန်ကုန်မြို့သို့ ကုလားပဲအိတ်ရေ (၁၀၀၀)၊ နှမ်းအိတ်ရေ (၂၅၀၀)၊ ပဲကြီးအိတ်ရေ(၈၀၀)၊ မြေပဲအိတ်ရေ(၅၀၀၀)၊ မန္တလေးမြို့သို့ နှမ်းအိတ်ရေ (၇၂၅၀၀)၊ စုစုပေါင်းအိတ်ရေ(၈၁၈၀၀) တင်ပို့ခဲ့ကြောင်းသိရှိရသည်။

      တောင်တွင်းကြီးကုန်စည်ဒိုင်တွင် နှမ်းနက်(စမုန်) ကျပ်(၁၀၀၀၀)၊ နှမ်းပြာ ကျပ်(၇၅၅၅)၊  နှမ်းဖြူသန့် ကျပ်(၈၆၇၀)၊ နှမ်းနီ(၇၇၈၀)၊ ပဲကြီးဖြူ ကျပ်(၄၅၀၀)၊ ကုလားပဲဝါ(သေး) ကျပ်(၃၉၅၀)၊ ကုလားပဲ(ဟော်လန်) ကျပ်(၄၃၀၀)၊ ပဲတီစိမ်း ကျပ်(၃၅၀၀)ဖြစ်ပြီး ယခင်အပတ်ထက် ယခုအပတ်တွင် နှမ်းနက်(စမုန်) ကျပ် (၃၃၃၅)၊ နှမ်းပြာ ကျပ်(၂၄၄၅)၊ နှမ်းနီ ကျပ်(၁၃၅)၊  ကုလားပဲဝါ(သေး) ကျပ်(၂၀၀)၊ ကုလားပဲ(ဟော်လန်) ကျပ် (၄၅၀)ဈေးနှုန်းကျဆင်းခဲ့ပြီး ပဲတီစိမ်း ကျပ်(၂၅၀)၊ နှမ်းဖြူ ကျပ်(၆၇၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန် (၁၂၀.၇၅)ခန့်အရောင်းအဝယ်ဖြစ်ခဲ့ပါသည်။

       အောင်လံကုန်စည်ဒိုင်တွင် သိပ္ပံနှမ်းနက် ကျပ်(၁၃၁၀၀)၊ နှမ်းနီ ကျပ်(၇၅၅၅)၊ နှမ်းဖြူ ကျပ် (၇၃၃၅)၊ ပဲတီစိမ်း ကျပ်(၃၀၀၀)၊ ပဲစင်းငုံနီ ကျပ် (၇၅၀၀)၊ ကုလားပဲ (ဟော်လန်) ကျပ်(၄၉၇၅)၊ ကုလားပဲ(မြကြေး) ကျပ်(၅၃၅၀)၊ ပဲကြီးကျပ် (၄၄၀၀)၊ မတ်ပဲ ကျပ်(၆၂၅၀)၊ ဝါ ကျပ်(၃၁၀၀)ဖြစ်ပြီး ယခင်အပတ်ထက် ယခုအပတ်တွင် သိပ္ပံနှမ်းနက် ကျပ်(၂၃၅)ဈေးနှုန်းကျဆင်းခဲ့ပြီး ကုလားပဲ (ဟော်လန်) ကျပ်(၃၀၀)၊ မြေပဲလုံးဆန်ဖြူ ကျပ်(၂၀၀)၊ မတ်ပဲ ကျပ်(၁၀၀)၊ နှမ်းနီ ကျပ်(၂၂၀)ဈေးနှုန်းမြင့်တက်ခဲ့ပါသည်။ တစ်ပတ်အတွင်း တန်ချိန် (၃၈၄)ခန့်အရောင်းအဝယ်ဖြစ်ခဲ့ကြောင်းသိရသည်။ 

       ရေနံချောင်းကုန်စည်ဒိုင်တွင် ကြက်သွန်နီ ကျပ်(၁၅၀၀-၂၃၀၀)၊ ယခင်အပတ်ထက် ယခုအပတ်တွင် ကျပ်(၂၀၀-၃၀၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန်(၉၇.၉၇)ခန့်အရောင်းအဝယ်ဖြစ်ခဲ့ကြောင်းသိရသည်။  

       ဆိပ်ဖြူကုန်စည်ဒိုင်တွင် ကြက်သွန်နီ ကျပ်(၁၆၀၀-၂၁၀၀)၊ ယခင်အပတ်ထက် ယခုအပတ်တွင် ကျပ်(၁၀၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန်(၅၂.၂၅)ခန့်အရောင်းအဝယ်ဖြစ်ခဲ့ကြောင်းသိရသည်။

     ပခုက္ကူကုန်စည်ဒိုင်တွင် ကုလားပဲ(929) ကျပ်(၄၈၃၀)၊ ပဲစင်းငုံ ကျပ်(၇၆၀၀)၊ ပဲယင်း ကျပ် (၃၀၀၀)ဖြစ်ပြီး တစ်ပတ်အတွင်း တန်ချိန်(၅၀)ခန့် အရောင်းအဝယ်ဖြစ်ခဲ့ကြောင်းသိရပါသည်။

DOCA(မကွေး)

      သဘာဝဘေးအန္တရာယ် ရေကြီးမှုဒဏ်ခံခဲ့ရသော အောင်ပန်းမြို့သည် ယခုအခါတွင် ရေများ ပြန်ကျဆင်းသွားပြီဖြစ်၍ ယခင်ကကဲ့သို့ ကုန်စိမ်းဈေးကွက် ပြန်လည်ဦးမော့လာပြီဖြစ်ပါသည်။ ရှေ့ရက်များတွင် ရေလွှမ်းမိုးမှုကြောင့် သီးနှံဈေးနှုန်းများလျော့နည်းခဲ့သော်လည်း ယခုအခါတွင် ကုန်စိမ်းဈေးနှုန်းများ ပြန်လည်မြင့်တက်လာပြီဖြစ်ကြောင်း တောင်သူတစ်ဦးထံမှသိရပါသည်။

          ယခုအခါတွင် အာလူးတစ်ပိဿာလျှင် (၃၂၀၀) ကျပ်မှ (၅၃၀၀) ကျပ်၊ ကြက်သွန်ဖြူတစ်ပိဿာလျှင် (၁၀၀၀၀) ကျပ်မှ (၁၄၀၀၀) ကျပ်၊ ချင်း(ဂျင်း) တစ်ပိဿာလျှင် (၁၉၀၀) ကျပ်မှ (၂၀၀၀) ကျပ်၊ ဂေါ်ဖီတစ်ထုပ်လျှင် (၃၅၀) ကျပ်မှ (၁၀၀၀) ကျပ်၊  ခရမ်းချဉ်သီးတစ်ပိဿာလျှင် (၁၃၀၀) ကျပ်မှ (၁၆၀၀) ကျပ် အထိ အသီးသီးရှိကြောင်း အောင်ပန်းမြို့ ကုန်သည်တစ်ဦးထံမှသိရှိရပါသည်။

        “ ဒီရက်ပိုင်း ရေပြန်ကြသွားသည့်အတွက် သီးနှံဈေးကွက် နည်းနည်းပြန်ဖြစ်လာတယ်ပြောရမှာပေါ့။ တောင်သူတွေရဲ့ ဘဝက သီးနှံဈေးကွက်ပေါ် မှီခိုထားရတာဖြစ်တဲ့အတွက် ဈေးနှုန်းတွေအားလုံး ပုံမှန်အတိုင်းပြန်ဖြစ်စေချင်ပါတယ် ” ဟု ဒေသခံတစ်ဦးက ပြောကြားခဲ့ကြောင်းသိရှိရပါသည်။

DOCA(ရှမ်း)

      ရှမ်းပြည်နယ်(တောင်ပိုင်း)၊ အောင်ပန်းမြို့၊ ပင်းတယ၊ လွိုင်လင်နှင့် အနီးတဝိုက်ရှိကျေးရွာများတွင် ရာသီပေါ်သီးနှံဖြစ်သော ပန်းဂေါ်ဖီထုပ်များ စတင်ပေါများစွာထွက်ပေါ်လာပြီဖြစ်ကြောင်းသိရသည်။ အောင်ပန်း၊ ပင်းတယ၊ လွိုင်လင်အနီးတဝိုက်ရှိ ကျေးရွာများမှ တောင်သူများသည် ပန်းဂေါ်ဖီထုပ်များကို စီးပွားဖြစ်သော်လည်းကောင်း၊ တစ်နိုင်တစ်ပိုင်စားသုံးရန်အတွက်သော်လည်းကောင်း စိုက်ပျိုးကြကြောင်းသိရှိရသည်။

        စိုက်ပျိုးထွက်ရှိလာသော ပန်းဂေါ်ဖီထုပ်များကို အောင်ပန်းမြို့ မြို့မဈေးရှိ အဝယ်ဒိုင်ပွဲရုံများသို့ လာရောက်ရောင်းချကြကြောင်းနှင့် တချို့ကို ရန်ကုန်၊ မန္တလေးနှင့် အခြားနီးစပ်ရာမြို့များသို့လည်း တင်ပို့ရောင်းချကြကြောင်းသိရသည်။ ဈေးနှုန်းများမှာ အကြီးအသေးပေါ်မူတည်၍ လက်ကားဈေး ဂေါ်ဖီထုပ်တစ်ထုပ်လျှင် (၄၀၀) ကျပ်မှ (၈၅၀) ကျပ်အထိရှိပြီး လက်လီဈေး (၅၀၀) ကျပ် (၁၇၀၀) ကျပ်အထိရှိကြောင်းသိရှိရသည်။

         ယခင်အပတ် ရှမ်းပြည်နယ်တောင်ပိုင်းအတွင်း မိုးသည်းထန်စွာရွာသွန်းမှုကြောင့် ရေကြီးရေလျှံမှုများနှင့် မြေပြိုမှုများကြောင့် ကုန်ပစ္စည်းများမှာ ရောင်းသူဝယ်သူမရှိဘဲ အရောင်းအဝယ်ပါးလျက်ရှိကြောင်းသိရှိရသည်။ ယခုအခါတွင် ရေများလျော့ကျသွားပြီး ကားလမ်းများ ပြန်လည်ပွင့်လင်းလာ၍ ရောင်းဝယ်ကုန်သွယ်မှုများ တဖြည်းဖြည်းပြန်လည်စတင်လာပြီဖြစ်ကြောင်း ဒေသခံတစ်ဦး၏ ပြောကြားချက်အရသိရှိရပါသည်။

DOCA(ရှမ်း)

       ရှမ်းပြည်နယ်(အရှေ့ပိုင်း)၊ ကျိုင်းတုံမြို့သည် ရေခံ၊ မြေခံကောင်းသည်နှင့်အညီ စိုက်ပျိုးရေးလုပ်ငန်းများကို အဓိကစိုက်ပျိုးလျက်ရှိရာ ၂၀၂၃-၂၀၂၄ ခုနှစ်၊ မိုးရာသီ မေလမှစ၍ ဖူးစားပြောင်း (ခေါ်) သကြားပြောင်းကို တစ်နိုင်တစ်ပိုင်စိုက်ပျိုးကြပါသည်။ ဖူးစားပြောင်း(ခေါ်) သကြားပြောင်းသည် ဩဂုတ်လ ပထမပတ်တွင် စတင်ထွက်ရှိပြီး စိုက်ပျိုးကြသည့် တောင်သူများအနေဖြင့် မိသားစုအပိုဝင်ငွေများရရှိကြောင်းသိရှိရပါသည်။

       ဖူးစားပြောင်း(ခေါ်) သကြားပြောင်းသည် ရေလုံလောက်စွာရရှိပါက (နွေ၊ မိုး၊ ဆောင်း) တစ်နှစ်ပတ်လုံးစိုက်ပျိုးနိုင်ပြီး ကုန်ကျစရိတ်များအနေဖြင့် မျိုးသွင်းအားစု၊ ပိုးသတ်ဆေး၊ လုပ်သားခအပါအဝင် တစ်ဧကလျှင် စုစုပေါင်း (၈) သိန်းကျပ်ခန့်ကုန်ကျကြောင်း၊ သကြားပြောင်းစိုက်ပျိုးပြီး ရက်ပေါင်း (၈၀) မှ (၉၀) ရက်အတွင်း အသီးများကို စတင်ခူးဆွတ်နိုင်ပြီး သကြားပြောင်းတစ်ဧကလျှင် အဖူးပေါင်း (၁၄၀၀၀) ခန့်ထွက်ရှိကြောင်းသိရှိရပါသည်။ လက်ရှိအချိန် စက်တင်ဘာလတွင် ဖူးစားပြောင်း (ခေါ်) သကြားပြောင်းရောင်းချရသည့်ဈေးနှုန်းမှာ တစ်ဖူးလျှင် လက်ကားဈေးနှုန်း (၆၀၀) ကျပ်ဖြင့်လည်းကောင်း၊ လက်လီဈေးနှုန်း (၇၀၀) ကျပ်ဖြင့်လည်းကောင်း အရောင်းအဝယ်ရှိပြီး အကျိုးအမြတ်အနေဖြင့် တစ်ဧကလျှင် (၄) သိန်းကျပ်ခန့်ရရှိကာ ဖူးစားပြောင်း (ခေါ်) သကြားပြောင်းစိုက်တောင်သူများ ဝင်ငွေရရှိပြီး အဆင်ပြေလျက်ရှိကြောင်း ဈေးကွက်သတင်းအရသိရှိရပါသည်။

DOCA(ရှမ်း)