ပြည်တွင်းကုန်သွယ်မှုသတင်း

ရက်စွဲ၊ ၁၉.၂.၂၀၂၅

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ် ကွက်များတွင် ရှားပါးသော ရာသီ၌ ရောင်းချရန်အတွက် ဒေသအတွင်းထွက်ရှိသည့် မျှစ်များ လှိုင်လှိုင် ပေါ၍ဈေးချိုချိန်တွင် မျှစ်ချဉ်/မျှစ်ချို တို့ကို နှစ်လည်ခါကြူရောင်းချရန်အတွက် စဉ့်အိုးများ အင်တုံများ ပလပ် စတစ်အကြည်အိပ်များနှင့် သိပ်ထားပြီး ဒေသထွက် မျှစ်မျိုကို ရောင်းချကြပါသည်။ မျှစ်ချို သိပ်ပုံ ကိုတော့ နှစ်ရှည်ခံအောင် မျှစ်ကို ဆားနှင့်အချိုသိပ်ရပါသည်။ မျှစ်ချိုကို အချောင်းအလိုက်ရောင်းခြင််း၊ မျှစ်အချောင်းကို အပ်ဖြင့်ဖွပြီးရောင်းခြင်းတို့ဖြင့် ရောင်းချလျက်ရှိကြောင်းသိရပါသည်။

          မျှစ်ချိုကိုတော့ ချည်ပေါင်ရွက်၊ ငရုပ်သီးစိမ်း၊ ပုဇွန်တို့နှင့်ရောကြော်ခြင်း၊ မျှစ်ချိုကို စားတော်ပဲ ပြုတ်နှင့်ကြော်ခြင်း၊ မျှစ်ချီုကို ကြက်ဟင်းခါးသီးနှင့်ကြော်ခြင်း၊ မျှစ်ချိုကို အချိုချက်စားခြင်း၊ မျှစ်ချိုကို ကန်ဇွန်းရွက်နှင့်‌ကြော်ခြင်းစသည့်ပုံစံအမျိုးမျိုးနှင့်ချက်ပြုတ်စားသောက်ကြပါသည်။

          ယခင် ၂၀၂၅ ခုနှစ်၊ ဖေဖော်ဝါရီလ ‌တတိယပတ်အတွင်း ကန့်ဘလူမြို့မဈေး၌ ဖြစ်ပေါ်နေသော မျှစ်ချို ဈေးနှုန်းမှာ မျှစ်ချို တစ်ပိဿာလျှင်(၈၀၀၀)ကျပ်၊ (၅၀)ကျပ်သားလျှင်(၄၀၀၀)ကျပ်နှင့် (၂၅)ကျပ် သားလျှင်(၂၀၀၀)ကျပ် တို့ဖြင့် အရောင်းအဝယ်ဖြစ်နေကြောင်း ကန့်ဘလူမြို့၊ မြို့မဈေးတွင် မျှစ်ချို ရောင်းချနေသော ဈေးသည် တစ်ဦးထံမှ သိရသည်။

DOCA(စစ်ကိုင်း)

မန္တလေးမြို့အတွင်းရှိ သစ်သီးပွဲရုံများသို့ ကျွဲကောသီးထွက်ရှိရာ ဒေသများဖြစ်ကြသည့် ရန်ကုန်၊ ပဲခူး၊ မွန်ပြည်နယ်တို့မှ  ကျွဲကောသီးများ ဝင်ရောက်လာကြသည်။ ကျွဲကောသီးများကို သဲမြေ၊ နှုန်းမြေ များတွင် စိုက်ပျိုးလာကြပြီး ဒီဇင်ဘာ၊ဇန်နဝါရီ၊ဖေဖော်ဝါရီလတို့တွင် ထွက်ရှိလေ့ရှိသည်။ မွန်ပြည်နယ်မှ အများဆုံးစိုက်ပျိုး ထွက်ရှိပြီး ဒေသထွက်ကျွဲကောသီးအရောင် မှာ နှစ်မျိုးရှိပြီး  အတွင်းသားအဖြူရောင်နှင့် ပန်းရောင်မျိုးများ ဖြစ်ကြသည်။ အဖြူရောင်မှာ နိုဝင်ဘာလနှင့် ဒီဇင်ဘာလတို့တွင် ထွက်ရှိသည်။ မန္တလေးမြို့တွင်းသာမက နယ်မြို့အသီးသီးကိုလည်း တင်ပို့ရောင်းချကြသည်။ ကျွဲကောသီးမှာ ဇန်နဝါရီလတွင် စတင်ထွက်ရှိပြီး ရှောက်ပန်းသီးမျိုးမှာ ဩဂုတ်လမှထွက်ရှိပြီး ဈေးကွက်သို့ ဝင်ရောက်လေ့ရှိသည်။ ကျွဲကောသီးနှင့် ရှောက်ပန်းသီးမှာ ဆင်တူယိုးမှားကြသည်။ ကျွဲကောသီးကို ယခင်နှစ်က အလုံးအရွယ်အစားလိုက်၍ တစ်လုံးလျှင် ၂၅၀၀၊ ၃၀၀၀၊ ၃၅၀၀ ကျပ် အထိဈေးရှိပြီး ယခုနှစ်တွင် တစ်လုံးလျှင်အရွယ်အစားအလိုက် ၃၀၀၀၊ ၃၅၀၀၊ ၄၀၀၀ကျပ် အထိ အသီးသီး ရောင်းချကြကြောင်း သစ်သီးပွဲရုံများမှ သိရှိရပါသည်။ ယခုနှစ်တွင် သယ်ယူစရိတ်ကြီးမားခြင်းကြောင့်လည်း ဈေးနှုန်းအနည်းငယ်ကြီးမြင့်ကြောင်း သိရှိရသည်။ ကျွဲကောသီးတွင် ဗီတာမင်စီ အများဆုံးပါဝင်ယုံသာမက ကျွဲကောသီးစားသုံးခြင်း၏ အကျိုးကျေးဇူးများမှာ ဆီးလမ်းကြောင်း ပိုးဝင်မှုသက်သာစေခြင်း၊ အနာအမြန်ကျက်စေခြင်း၊ သွားနှင့်ခံတွင်းကျန်းမာစေခြင်း၊ သွေးအားနည်း ရောဂါ၊ အရိုးပါးရောဂါ၊ ခြေထောက်ကြွက်တက်မှု တို့ကိုပါ ကာကွယ်ပေးသည့်အပြင် ကိုယ်အလေးချိန်ကို ထိန်းညှိပေးနိုင်ခြင်းစသည့် ကျန်းမာရေး အကျိုးကျေးဇူးများရရှိနိုင်ကြောင်း လေ့လာသိရှိရပါသည်။

DOCA(မန္တလေး)

          ယခုလိုဆောင်းရာသီတွင် ထန်းမြစ်၊ စိမ်းစားဥ၊ ပဲမြစ်၊ ကန်စွန်းဥတို့မှာ အညာဒေသ၏ ရာသီစာသီးနှံများဖြစ်သလို အလွန်ချမ်းအေးသော နံနက်ခင်းအချိန်တွင် မီးဖို၍မီးလှုံရင်း ထန်းမြစ် ဖုတ်/ပြုတ်၊ ပဲမြစ်ပြုတ်၊ ကန်စွန်းဥဖုတ်/ပြုတ်ခြင်းတို့သည် အညာဒေသ၏ နံနက်ခင်းကို ကြိုဆို ခြင်းဖြင့် အညာလူနေမှုပုံစံများအား အညာသူအညာသားများမှ နှစ်စဉ်ပုံဖော်မြဲဖြစ်သော  ရိုးရာ ဓလေ့တစ်မျိုးလိုပင် ဖြစ်နေပါသည်။

အဆိုပါရာသီ သီးနှံများကို အလှူပွဲ၊ မင်္ဂလာဆောင်၊ အိမ်တက်၊ ဘုရားပွဲများတွင်လည်း အညာဓလေ့အရ ဧည့်ခံကျွေးမွေးကြလေ့ရှိပါသည်။ အညာဒေသဖြစ်တဲ့ မြင်းခြံမြို့တွင်လည်း ပဲမြစ်နှင့်ကန်စွန်းဥများလည်း လှိုင်လှိုင်ပေါ်နေပြီဖြစ်ရာ အေးမြသီတာဈေး၊ မြို့မစည်ပင်သာ ယာဈေးနှင့် စံပြဈေးတို့တွင် ဖေဖော်ဝါရီလ ဒုတိယပတ်တွင် ပဲမြစ် တစ်ပိဿာလျှင် ( ၄၀၀၀ )ကျပ်၊ ကန်စွန်းဥ တစ်ပိဿာလျှင်(၃၅၀၀)ကျပ်များဖြင့် အရောင်းအဝယ်ဖြစ်ကြောင်းသိရပြီး ယခင်ပေါ်ဦး ပေါ်စအချိန်တွင် ပဲမြစ်တစ်ပိဿာလျှင် (၅၀၀၀)ကျပ်၊ ကန်စွန်းဥ တစ်ပိဿာလျှင် (၄၀၀၀) ကျပ် ဈေးများဖြင့် အရောင်းအဝယ်ဖြစ်ခဲ့ကြောင်း သိရသည်။ ကန်စွန်းဥနှင့် ပဲမြစ်များသည်  တံတားဦး မြို့နယ်ဘက်တွင် အများဆုံးစိုက်ပျိုးကြပြီး စား၍ကောင်းသောကြောင့် နာမည်ရရှိကာ ရောင်းဝယ်မှု မှာလည်း ဈေးပန်းပွင့်ကြောင်း မြင်းခြံမြို့ စံပြဈေးတွင် ကန်စွန်းဥနှင့် ပဲမြစ်ရောင်းချသော ဈေးသည် များထံမှ သိရှိိရသည်။

DOCA(မန္တလေး)

          မြင်းခြံမြို့နယ်အနေဖြင့် ပဲစင်းငုံကို ဧကလိုက်စိုက်ပျိုးသူရှိသလို နှမ်း ၊ မြေပဲ တို့နှင့်ရောယှက် ၍ သီးညှပ်အဖြစ်လဲ စိုက်ပျိုးကြသည်။ပဲစင်းငုံသီးနှံသည် စိုက်ပျိုးပြီး အထူးစောင့်ရှောက်ရန် မလိုဘဲ အပွင့်ဝင်ချိန် ရာသီမဖောက်က အထွက်နှုန်းကို အပိုင်ပင်တွက်၍ရသည်ဟု ပဲစင်းငုံစိုက်ပျိုးသူ တောင်သူတစ်ဦးထံမှသိရသည်။ ပဲစင်းငုံသီးနှံသည် ဒေသတွင်းစားသုံးမှု အသုံးနည်းပြီး ပြည်ပဈေး ကွက်ဝင် သီးနှံတစ်မျိုးပင်ဖြစ်တာကြောင့် ပြည်ပဈေးကွက်ကို အားကိုးအားထားပြုနေ ရခြင်းဖြစ်ပါ သည်။ အိန္ဒိယအစိုးရက ပဲစင်းငုံကို လွတ်လပ်စွာတင်သွင်းခွင့်ကို ၂၀၂၆ ခုနှစ် ၊ မတ်လကုန်အထိ သက်တမ်းတိုးခွင့်ပြုလိုက်သည့် သတင်းများထွက်ပေါ်ပြီးသည့်နောက်ပိုင်းမှာ ပဲစင်းငုံဈေးများလဲ တစ်ရက်ထက်တစ်ရက် ဈေးမြင့်ပြောင်းလဲလာကြောင်းသိရှိရပါသည်။ မြင်းခြံမြို့ပေါ်ဈေး ကွက်သို့လည်း ယခုရက်ပိုင်းအတွင်း ပဲစင်းငုံများ အိတ် ၈၀၀ နှင့် ၁၀၀၀  အကြားမှာနေ့စဉ် အဝင် ရှိကြောင်း မြင်းခြံကုန်စည်ဒိုင်နှင့်နီးစပ်သူများထံမှသိရပြီး နယ်ဈေးကွက်ကိုအခြေခံ၍ ဈေးပြိုင်ပေး ဝယ်နေကြသည်ဟုသိရသည်။ ဈေးကွက်အနေဖြင့် ၁၃.၂.၂၀၂၅ ရက်နေ့တွင် ပဲစင်းငုံတစ်ပိဿာ လျှင် ၄၅၃၀ /- ကျပ် ၊ ၁၄.၂.၂၀၂၅ ရက်နေ့တွင် ၄၅၇၀/- ကျပ် ၊ ၁၅.၂.၂၀၂၅ ရက်နေ့တွင် ၄၆၀၀/- ကျပ်နှင့် ၁၆.၂.၂၀၂၅ ရက်နေ့တွင် ၄၆၃၀/- ကျပ် ဈေးများဖြင့် အရောင်းအဝယ်ဖြစ်လျက်ရှိကြောင်းသိရသည်။ ယခုလိုပဲစင်းငုံဈေးများ အဝင်လှိုင် အဝင်ဖြိုင်ပြီး ဈေးမရိုင်ဘဲ ဈေးခိုင်လာတာနဲ့ပတ်သက်လို့ အရောင်းအဝယ်ပွဲရုံတစ်ခုမှ အရောင်းတောင်သူတစ်ဦးကို မေးမြန်းကြည့်ရာမှာတော့ လက်ရှိဈေး သည် မနှစ်ကဒီလိုအချိန် ၆၀၀၀/- ကျပ်ဈေးရှိသည့်အတွက် တောင်သူကြိုက်ဈေးတော့ မဟုတ် သေးဘဲ လိုအပ်လို့သာလာရောက်ရောင်းချရတာဖြစ်ပါကြောင်း မနှစ်ကဈေးတော့ မမီသေးသည့် အတွက် လိုအပ်တာထက် မလိုအပ်ရင်ပိုမရောင်းဘဲ ထိန်းသိမ်းထားမည်ဆိုက ပို၍ပင်ဈေးရနိုင် ကြောင်း သိရသည်။         

DOCA(မန္တလေး)

မြင်းခြံမြို့နယ်တွင် အစေ့ထုတ်ပြောင်းစိုက်ဧက(၉၄၀၀)ဧက စိုက်ပျိုးထားကြောင်း သက်ဆိုင် ရာ မြေစာရင်းဦးစီးဌာနမှ သိရသည်။ ခရိုင်ချုပ်စိုက်ပျိုးမှုအနေဖြင့် (၁၀၇၀၄) ဧကရှိပြီး ၊ နွားထိုးကြီး (၅၈၁)ဧကနှင့် တောင်သာ(၇၀၀)ဧက စိုက်ပျိုးထားကြောင်းလည်းသိရသည်။ ယခုနှစ်ရာသီ အစေ့ ထုတ်ပြောင်းစိုက်ပျိုးထုတ်လုပ်မှုလျော့နည်းမှုရှိကြောင်း မနှစ်ကဖြစ်ပေါ်ခဲ့သော အစေ့ထုတ်ပြောင်း ဈေးနှုန်းသည် ရာသီကုန်ပိတ်ဈေး တစ်ပိဿာ ၁၃၀၀/-ကျပ် နှင့် ၁၄၀၀/-ကျပ် ရှိခဲ့သည့်အတွက် အချို့တောင်သူများ ဆေးရွက်ကြီးများပြောင်းလဲစိုက်ပျိုးကြကြောင်းသိရသည့် အစိုက်လျော့၊ အထွက်လည်းလျော့သည်ဟုသိရသည်။ လက်တစ်လောအနေအထားအရ မြို့ပေါ်ဈေးကွက်သို့  အစောစိုက်အစေ့ထုတ်ပြောင်းများ ဝင်ရောက်လာကြောင်း တစ်ပိဿာဈေးနှုန်း ၁၆၀၀/- ကျပ်နှင့် ၁၇၀၀/-ကျပ်ဈေးနှုန်းရှိပြီး မြို့ပေါ်လက်လီပြန်ရောင်းချသူများနှင့်သာ အရောင်းအဝယ်ဖြစ်လျက်ရှိ ကြောင်းသိရသည်။ ဈေးကွက်အတွင်းသို့ အစေ့ထုတ်ပြောင်းများ လှိုင်လှိုင်ဝင်ရောက်လာပါက ဈေးနှုန်းအနည်းအငယ်အပြောင်းအလဲရှိနိုင်သည်ဟု လုပ်ငန်းရှင်တစ်ဦးထံမှသိရသည်။

DOCA(မန္တလေး)