ပြည်တွင်းကုန်သွယ်မှုသတင်း

          ကန့်ဘလူမြို့၊  မြို့မဈေးအတွင်းတွင် ဘုရားပန်းမျိုးစုံဖြစ်သည့် သပြေပန်း၊ နှင်းပန်း၊ ဂန္ဓမာပန်း၊ ဇွန်ပန်း၊ စံပယ်ပန်း၊ စကားဝါပန်း၊ စကားဖြူပန်း၊ ရွှေပန်း၊ ငွေပန်း၊ ပန်းတိမ်ငိုပန်း၊ နှင်းဆီပန်း၊ ခိုင်ရွှေဝါပန်းနှင့် ဇော်စိမ်းပန်း(ခေါ်)ကျောက်စိမ်းပန်းများ ရောင်းချလျက်ရှိရာ လူကြိုက်များသော ခိုင်ရွှေဝါပန်း၊ နှင်းဆီပန်းများနှင့် ဇော်စိမ်းပန်း(ခေါ်)ကျောက်စိမ်းပန်းများကို ကန့်ဘလူမြို့ပေါ်နှင့် ဒေသအနီးတစ်ဝိုက်ရှိကျေးရွာများမှ တစ်နိုင်တစ်ပိုင်စိုက်ပျိုး ရောင်းချလျက်ရှိကြောင်း သိရှိရပါသည်။ ခိုင်ရွှေဝါပန်းနှင့် ဇော်စိမ်းပန်း(ခေါ်)ကျောက်စိမ်းပန်းများကို ဘုရားပန်းအဖြစ် အသုံးပြုကြကြောင်း၊ ၂၀၂၅ခုနှစ်၊ စက်တင်ဘာလ တတိယပတ်အတွင်း ခိုင်ရွှေဝါပန်း(၁)စည်းလျှင် (၅၀၀)ကျပ် နှင့် ဇော်စိမ်းပန်း(ခေါ်) ကျောက်စိမ်းပန်း(၃)ခက်ပါ(၁)စည်းလျှင် (၁၀၀၀)ကျပ်ဖြင့် ရောင်းချလျက်ရှိကြောင်း ဘုရားပန်းမျိုး စုံ ရောင်းဝယ်ရေးလုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

       မြင်းခြံမြို့သည် ဧရာဝတီမြစ်၏ အရှေ့ဘက်ကမ်းတွင်တည်ရှိ၍  ဥယျဥ်ခြံမြေလုပ်ငန်းများ လုပ်ကိုင်လျက်ရှိပြီး ဓါးကျွန်းကျေးရွာ၊ တလုပ်ကျေးရွာနှင့် ဆင်ချောင်းကျေးရွာတို့တွင် မိသားစု တစ်နိုင်တစ်ပိုင် စားဝတ်နေရေးအတွက် ဟင်းခက်အမွှေးအကြိုင်အဖြစ်အသုံးပြုသော တရုတ် နံနံများ စိုက် ပျိုးထားကြောင်းသိရှိရသည်။  စိုက်ခင်းများမှထွက်ရှိသော တရုတ်နံနံများကို အေးမြ သီတာဈေးသို့ တောင်သူများကိုယ်တိုင် လာရောက်ရောင်းချကြောင်း၊ ၂၀၂၅ခုနှစ်၊ စက်တင် ဘာလ ဒုတိယပတ် တွင်ရောင်းချနေသော တရုတ်နံနံလက်လီတစ်စည်းလျှင် (၃၀၀)ကျပ်၊ ၁၀ ကျပ်သား လျှင် (၇၀၀)ကျပ်၊ လက်ကားတစ်ပိဿာလျှင် (၆၅၀၀) ကျပ်ပေါက်ဈေးများဖြင့် အရောင်းအဝယ် ဖြစ်လျက်ရှိကြောင်း၊  ယခင်ဩဂုတ်လဒုတိယပတ်တွင်  ရောင်းချနေသော တရုတ်နံနံလက်လီ တစ်စည်းလျှင် (၅၀၀) ကျပ်၊ ၁၀ ကျပ်သားလျှင် (၈၀၀)ကျပ်၊ လက်ကားတစ်ပိဿာလျှင် (၇၅၀၀)ကျပ် ခန့်ပေါက်ဈေးများဖြင့်ရောင်းချလျက်ရှိကြောင်း၊ ကာလတူနှိုင်းယှဉ်ပါက ယခင်လ ထက် ယခုလတွင် တရုတ်နံနံလက်လီတစ်စည်းလျှင် (၂၀၀) ကျပ်၊ ၁၀ ကျပ်သားလျှင် (၁၀၀)ကျပ်၊ လက်ကားတစ်ပိဿာလျှင် (၁၀၀၀)ကျပ်ခန့်ဈေးနှုန်းများကျဆင်းခဲ့ကြောင်း၊ မိုးရာသီကာလ ဖြစ်သောကြောင့် တရုတ်နံနံရွက် များပေါများစွာထွက်ပေါ်ချိန်ဖြစ်သောကြောင်း ဈေးနှုန်းကျဆင်း ခြင်းဖြစ်ကြောင်း၊ ဟင်းခက်အမွှေး အကြိုင်ဖြစ်သောကြောင့်စားသုံးမှုများပြီး စားသောက်ဆိုင်များမှ ဝယ်ယူမှုများပြား ကြောင်း  တောင်သူ၏ပြောပြချက်အရသိရှိရသည်။ ကျန်းမာရေးအကျိုးအကျေးဇူး အနေဖြင့် တရုတ်နံနံကို စားသုံးခြင်းဖြင့် သွေးတိုးကျခြင်း၊ ခေါင်းကိုက်သက်သာခြင်း၊ စိတ်လှုပ်ရှားမှု ကိုလျော့ချပေးခြင်း၊ အစာအိမ်နှင့် အူလမ်းကြောင်း ကျန်းမာရေးကို အထောက်အကူပြုကြောင်း သိရှိရသည်။

DOCA(မန္တလေး)

   မြိတ်ခရိုင်တွင် ဒေသတွင်းစားသုံးရန်ဆန်စိုက်ပျိုးမှုရှိသော်လည်း ဒေသတွင်းစားသုံးရန် မလုံလောက်သဖြင့် ဧရာဝတီတိုင်း မှအဓိကမှာယူ၍ တင်းသွင်းရောင်းချလျက်ရှိပါသည်။ ထိုအပြင် စက်တင်ဘာလ၌ ဆန်ရည်ညွှန်းစျေးနှုန်းများကျဆင်းသွားကြောင်းသိရှိရပါသည်။ ဆန်ရည်ညွှန်း စျေးကျဆင်းခြင်းကြောင့် မြိတ်ခရိုင်ရှိ ဆန်စျေးနှုန်းများ ကျဆင်းလာကြောင်း ထိုအပြင် ဒေသထွက် ဆန်များပါစျေးကျဆင်းလာကြောင်းသိရှိရပါသည်။

    စက်တင်ဘာလ(၁၈)ရက်နေ့တွင် ဆန်ဆိုင်တစ်ဆိုင်အား ဆန်စျေးနှုန်းစုံစမ်းချက်အရ ပေါ်ဆန်းဆန်တစ်အိတ်လျှင် ၁၄၀၀၀၀ ကျပ် ခန့်ရှိပြီး ယခင်က ပေါ်ဆန်းဆန်စျေးနှုန်းမှာ ၁၅၅၀၀၀ကျပ် ခန့်စျေးရှိသဖြင့် ကျပ်၁၅၀၀၀ခန့်စျေးကျဆင်းသွား‌ကြောင်း စူပါဧည့်မထစျေးနှုန်းမှာ ၇၄၄၀၀ ကျပ် ဖြစ်ပြီး ယခင်က ၈၀၀၀၀ကျပ်ခန့်စျေးရှိသဖြင့် ကျပ် ၅၆၀၀ခန့်စျေးကျဆင်းသွားကြောင်း သိရှိရပါ သည်။

DOCA(တနင်္သာရီ)

   မြိတ်ခရိုင်တွင် ကွမ်းသီး၊ ရာဘာ၊ သီဟိုဠ်စသည်များစိုက်ပျိုးလျက်ရှိပြီး ဒေသထွက်ကွမ်းသီး များကို ပြည်တွင်းသာမကပြည်ပသို့ပါတင်ပို့ရောင်းချလျက်ရှိသည်။ ကွမ်းသီးတင်ပို့ရောင်းချရာတွင် ကွမ်းသီးခြောက်၊ ခွဲခြမ်းနှင့် အနုများ တင်ပို့ရောင်းချလျက်ရှိပြီး ရန်ကုန်၊ မန္တလေးနှင့် အခြားတိုင်း/ ပြည်နယ်များသို့လည်းတင်ပို့လျက်ရှိကြောင်းသိရှိရပါသည်။ ယခုအခါ ကွမ်းသီးနုမထွက်ရှိသော ရာသီဖြစ်သောကြောင့် ကွမ်းသီးနုစျေးကွက်တွင် တင်ပို့ခြင်းမရှိကြောင်း သိရှိရပါသည်။ မြိတ်ခရိုင် တွင် စက်တင်ဘာလတတိယပတ်တွင် ကွမ်းသီး ၅၅၃၁၀၀ပိဿာတင်ပို့နိုင်ခဲ့ကြောင်းသိရှိရပါသည်။

   မြိတ်ခရိုင်တွင် ၂၀၂၅ခုနှစ်၊ စက်တင်ဘာလ(၁၈)စျေးနှုန်းအရ ကွမ်းသီးအလုံးစျေးနှုန်းမှာ ၂၂၀၀၀ကျပ် ခန့်ဖြစ်ပြီး ကွမ်းသီးခွဲခြမ်းမှာ ၁၇၀၀၀-၁၈၀၀၀ကျပ် ခန့်‌စျေးရရှိကြောင်း ကွမ်းသီးနုမှာ တင်ပို့ခြင်းမရှိကြောင်း သိရှိရပါသည်။

DOCA(တနင်္သာရီ)

   မုဒုံမြို့၊ လမ်းမကြီးစျေးတွင် အသား၊ ငါး၊ ဥမျိုးစုံနှင့် ဟင်းသီးဟင်းရွက်များ၊ အခြား စားသောက်ကုန်ပစ္စည်းများ၊ လူသုံးကုန်ပစ္စည်းများကို ရောင်းချလျက်ရှိရာ ကြက်ဥ၊  ဘဲဥနှင့် ငုံးဥ များကို မိမိ‌ဒေသထွက် ကြက်ခြံ၊ ဘဲခြံများတို့မှ မှာယူရောင်းချလျက်ရှိသည်။

          ၂၀၂၅ခုနစ်၊ စက်တင်ဘာ တတိယပတ်၊ မုဒုံမြို့ စျေးကွက်အတွင်း၌ ရောင်းချနေသည့် ကြက်ဥ၊ ဘဲဥနှင့် ငုံးဥစျေးနှုန်းများမှ ကြက်ဥအကြီး(၁)လုံးလျှင် (၅၂၀)ကျပ်၊ ကြက်ဥအသေး (၁ ) လုံးလျှင် (၅၀၀) ကျပ်နှင့် ဘဲဥအကြီး (၁)လုံးလျှင် (၆၅၀)ကျပ်နှင့် ဘဲဥအသေး (၁)လုံးလျှင် (၆၀၀)ကျပ်နှင့် ငုံးဥ (၁)လုံးလျှင် (၁၁၀)ကျပ်၊ ငုံးဥ (၁၀)လုံးလျှင် (၁၁၀၀)ကျပ် စျေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA (မွန်)