ပြည်တွင်းကုန်သွယ်မှုသတင်း

           စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်အတွင်းရှိ သက်ဆိုင်ရာမြို့နယ်များ ဈေးများတွင် ရောင်းချလျက်ရှိသော အခြေခံစားသောက်ကုန်ဈေးနှုန်းများကို ကောက်ခံလျက် တိုင်းဦးစီးမှူးရုံး သို့နေ့စဉ်တင်ပြလျက်ရှိရာ ၂၀၂၂ ခုနှစ်၊ ဇူလိုင်လ ဒုတိယပတ်အတွင်း ပုဇွန်တောင်မြို့နယ်၊ ပုဇွန်တောင် ဈေးရှိ ဆန်ကြမ်း/ချော(နိမ်/မြင့်)ဈေးနှုန်းများမှာ ငစိန် ၁အိတ်လျှင် ၃၁၀၀ဝိ/- ၃၅၅ဝဝိ/-၊ ဧည့်မထ ၁ အိတ်လျှင် ၃၅၅ဝဝိ/- ၄၀၅၀ဝိ/-၊ ဇီယာ ၁ အိတ်လျှင် ၃၃၀၀ဝိ/- ၃၈၀၀ဝိ/-၊ မနောသုခ ၁ အိတ်လျှင် ၃၅၅၀ဝဝိ/- ၄၃၀၀ဝိ/-၊ ပေါ်ကျွဲ ၁ အိတ်လျှင် ၄၀၅၀ဝိ/- ၄၅၀၀ဝိ/-၊ ပေါ်ဆန်းမွှေး ၁ အိတ်လျှင် ၅၀၀၀ဝိ/-၅၉၅၀ဝိ/-၊ ရွှေဘိုပေါ်ဆန်းမွှေး ၁ အိတ်လျှင် ၆၂၀၀ဝိ/- ၇၁၅၀ဝိ/- တို့ဖြင့် ရောင်းချလျက်ရှိပြီး ဇူလိုင်လအတွင်း ဆန်‌ဈေးနှုန်းအခြေအနေမှာ ဈေးတည်ငြိမ်လျက်ရှိကြောင်း သိရပါသည်။

DOCA(ရန်ကုန်)

             အိမ်နီးချင်းထိုင်းနိုင်ငံနှင့် နှစ်နိုင်ငံကုန်သွယ်ရေး ဆောင်ရွက်လျက်ရှိသည့် ကရင်ပြည်နယ်၊ မြဝတီမြို့သို့ ပြည်တွင်းမှ အစေ့ထုတ်ပြောင်းများ နေ့စဉ်ပုံမှန်အတိုင်း ပြန်လည်ဝင်ရောက်လျက်ရှိကြောင်း သိရပါသည်။

            ယခင် ဇူလိုင်လ ကုန်သွယ်မှုဆိုင်ရာ မူဝါဒအပြောင်းအလဲများကြောင့် ကရင်ပြည်နယ်အတွင်း ပြောင်းဆန်ဝင်ရောက်မှု လျော့နည်းခဲ့ကြောင်းနှင့် ၂၀၂၂ ဇူလိုင်လဆန်းမှစ၍ ပုံမှန်အတိုင်း ပြန်လည် ဝင်ရောက်လျက်ရှိနေကာ ၅-၇-၂၀၂၂ မှ ၁၂-၇-၂၀၂၂ နေ့အထိ ယာဉ် (၃၈၁) စီးနှင့် ပြောင်းတန်ချိန် (၁၁၄၀၀) ဝင်ရောက်ခဲ့ပြီး ယခင် (၁)ပိဿာလျှင် (၁၀၂၄/-) ကျပ်မှ ယခုအခါ (၉၉၂/-) ကျပ်ခန့်သို့ ဈေးနှုန်းအနည်းငယ် ကျဆင်းခဲ့ကြောင်း သိရပါသည်။

DOCA(ကရင်)

               ပခုက္ကူကုန်စည်ဒိုင်တွင် အညာဒေသမှ အဓိကစိုက်ပျိုးထုတ်လုပ်သော ပဲစဉ်းငုံနီ၊ ပဲတီစိမ်း၊ ကုလားပဲမျိုးစုံ၊ ပဲနီပြား၊ ထောပတ်ပဲ၊ ပဲလွန်း၊ အခြားပဲနှင့် နှမ်းမျိုးစုံများ အရောင်းအဝယ်ဖြစ်လျှက်ရှိပါ သည်။ ဇူလိုင်လပထမပတ်တွင် အရောင်းအဝယ်ဖြစ်ခဲ့သော ပဲဈေးနှုန်းများမှာ ပဲစဉ်းငုံနီ တစ်တင်းလျှင် (၄၅၇၀၀ ) ကျပ်မှ (၄၆၀၀၀) ကျပ်၊ ကုလားပဲဝါ (HL) တစ်တင်းလျှင် (၄၆၅၀၀)  ကျပ်၊ကုလားပဲဝါလုံးကြီး(  929 ) တစ် တင်းလျှင် ၄၇၃၀၀ ကျပ်၊ ပဲတီစိမ်းကြီး မှာ အရည်အသွေးကိုလိုက်၍ တစ်တင်းလျှင် ၄၂၀၀၀ မှ ၅၀၀၀၀ ကျပ်၊ ပဲတီစိမ်းသေး တစ်တင်းလျှင် ၄၈၄၀၀ မှ ၄၉၀၀၀ ကျပ်၊ နှမ်းညို တစ်တင်းလျှင် ၅၅၀၀၀ ကျပ်၊ ပြောင်းဖူးစေ့(CP) တစ်တင်းလျှင် ၁၆၀၀၀ ကျပ်ဈေးနှုန်းဖြင့် ဥပုသ့်နေ့မှလွဲ၍ အရောင်းအဝယ်ဖြစ်နေကြောင်း ကုန်စည်ဒိုင်မှ သိရှိရပါသည်။

           ဇူလိုင်လပထမပတ်တွင် အရောင်းအဝယ်ဖြစ်မှုမှာ ပဲစဉ်းငုံနီ (၆၅၀) အိတ်၊ ကုလားပဲဝါ(HL) (၁၀၀) အိတ်၊ ကုလားပဲဝါလုံးကြီး(929)(၁၀၀)အိတ်၊ ပဲတီစိမ်းကြီး(၁၉၅၀)အိတ်၊ ပဲတီစိမ်းသေး (၁၉၀၀)အိတ်၊ နှမ်းညိုသစ် (၁၅၀၀)အိတ်၊ ပဲဇီးွက်(၅၀)အိတ်၊ ပြောင်းဖူးစေ့(CP)(၁၀၀)အိတ် အရောင်းအဝယ် ဖြစ်နေ ပါသည်။

          ပဲနှမ်းတင်ပို့မှုအနေဖြင့် မြန်မာပြည်အောက်ပိုင်း ရန်ကုန်တိုင်းဒေသကြီးသို့ အဓိကတင်ပို့ပြီး ယခုတစ်ပတ်တွင် ပဲတီစိမ်းမှာ အများဆုံးဖြစ်ပြီး အခြားပဲများမှာ ပဲယင်း၊ ကုလားပဲအမျိုးမျိုးနှင့် နှမ်ညိုများတင်ပို့လျှက်ရှိကြောင်း ကုန်သည်ပွဲစားများထံမှ သိရှိရပါသည်။

DOCA(မကွေး)

           ကချင်ပြည်နယ်တွင် မိုးစပါးစိုက်ပျိုးချိန်ကာလဖြစ်သည့်အတွက်  ဈေးကွက်အတွင်း သွင်းအားစုများဖြစ်သည့် ဓါတ်မြေဩဇာနှင့် ပိုးသတ်ဆေးများ အရောင်းသွက်လျှက်ရှိပါသည်။ ဈေးနှုန်းများအနေဖြင့် ဇူလိုင်လ(၁၄)ရက်နေ့တွင် ပုလဲ(ရွှေတောင်) ၅၀ ကီလို တစ်အိတ်လျှင် ၉၇၀၀ဝိ/- ၊ တီစူပါ (တရုတ်သံကွင်း) ၅၀ ကီလို တစ်အိတ်လျှင် ၉၃၀၀ဝိ/- ၊ ကွန်ပေါင်း (အဲဗားဂရင်း) ၅၀ ကီလို တစ်အိတ်လျှင် ၉၃၀၀ဝိ/- ၊ ကွန်ပေါင်း (စိုးမိုးနိုင်) ၅၀ ကီလို တစ်အိတ်လျှင် ၉၅၀၀ဝိ/- ၊ ဆိုင်ရာမို (အာမို) ၅၀၀ စီစီ တစ်ပုလင်းလျှင် ၉၂၀ဝိ/- ၊ ဆိုဒ်ရင်(ဩဘာ) ၅၀၀ စီစီ တစ်ပုလင်းလျှင် ၉၀၀ဝိ/- ၊ ဒိုဇာ (ဩဘာ) ၁၀ ဂရမ် တစ်ဗူးလျှင် ၂၀၀ဝိ/- ​ဈေးနှုန်းရှိပြီး စိုက်ပျိုးရေးသုံး သွင်းအားစုများအနေဖြင့် ဈေးနှုန်းတည်ငြိမ်လျှက်ရှိကြောင်း စိုက်ပျိုးရေးသုံးပစ္စည်းအရောင်းဆိုင်များမှ သိရှိရပါသည်။

DOCA(ကချင်)

           ပဲယင်းကို တရုတ်နိုင်ငံသို့ နယ်စပ်ကုန်သွယ်ရေးမှတင်ပို့ခြင်း၊ အခြားပြည်ပဈေးကွက်သို့ ပုံမှန်ကုန်သွယ်မှုအနေဖြင့်ပင်လယ်ရေကြောင်းမှတင်ပို့ခြင်းဆောင်ရွက်ရရာ ၂၀၂၂ ခုနှစ်တွင် ပဲယင်း ကုန်အဝင်ပေါချိန် ဧပြီလက အမေရိကန်ဒေါ်လာသန်း(၅.၇)ကျော်တန်ဖိုးရှိ ပဲယင်း အရေအတွက် ကီလိုထောင်ပေါင်း (၇၀၀၀)ကျော် တင်ပို့ခဲ့ရပါသည်။ မုံရွာကုန်စည်ဒိုင်ပေါက်ဈေး အရ ဧပြီလက တစ်တင်းလျှင် (၄၁၀၀၀)ကျပ်သာ ဖြစ်ပေါ်ခဲ့ရာက ယခုဇူလိုင်လဆန်းတွင် ပစ္စည်းအဝင်မရှိတော့ဘဲ ပြည်ပဝယ်လိုအားရှိနေခြင်းကြောင့် ကုန်လက်ကျန်ပဲယင်းများကို  တစ်တင်းလျှင်(၇၅၀၀၀)ကျပ်ထိ ရောင်းချရခြင်းကြောင့် ဈေးကွက်ဝယ်လိုအားရှိသည့် ပဲယင်းကို တိုးချဲ့စိုက်ပျိုးခြင်း၊ စိုက်ပျိုးနိုင်သည့်ဒေသကို လေ့လာ၍ တောင်သူများအား တိုက်တွန်းခြင်း ဆောင်ရွက်သင့်ကြောင်း ကုန်သည်တစ်ဦးက အကြံပြုလာသည်။

           ပဲယင်း၏မူရင်းဒေသမှာ အိန္ဒိယ၊ မြန်မာနှင့် ပါကစ္စတန်တို့ဖြစ်ကြောင်း သိရပါသည်။ မြန်မာနိုင်ငံတွင် ပဲယင်းကို သြဂုတ်၊ စက်တင်ဘာနှင့်အောက်တိုဘာလများတွင် စိုက်ပျိုးပြီး မတ်၊ ဧပြီနှင့် မေလများတွင် ရိတ်သိမ်းလေ့ရှိကြပါသည်။ ပဲယင်းကို စစ်ကိုင်းတိုင်းဒေသကြီး၊ မကွေး တိုင်းဒေသကြီး၊ ဧရာဝတီတိုင်းဒေသကြီး၊ မွန်ပြည်နယ်၊ ကယားပြည်နယ်နှင့် ရှမ်းပြည်နယ် (တောင်ပိုင်း)ဒေသတို့တွင် စိုက်ပျိုးမှုများကြောင်း သိရှိရပါသည်။ ပဲယင်းသည် ပူနွေးသည့် ရာသီဥတုကို ကြိုက်နှစ်သက်ပြီး အပူချိန် ၁၈ မှ ၃၇ ဒီဂရီ စင်တီဂရိတ်အထိ စိုက်ပျိုးဖြစ်ထွန်းနိုင်ကြောင်းသိရပါသည်။ ပဲယင်းစိုက်ပျိုးသင့်သည့် မြေအမျိုးအစားမှာ ရေစီးရေလာကောင်းသည့် နုန်းမြေ၊ မြေဩဇာကြွယ်ဝသည့် သဲနုန်းမြေများတွင် ပိုမိုသင့်တော်ပြီး ဆားပေါက်မြေ၊ သဲဆန်မြေနှင့်ရေဝပ်မြေများတွင် မစိုက်သင့်ကြောင်းသိရပါသည်။ အတန်းလိုက်စိုက်ပျိုး မည်ဆိုပါက  ၁ ဧကလျှင် (၆- ၈) ပြည်နှုန်း သုံးစွဲနိုင်ပြီး ကြဲပက်စိုက်ပျိုးမည်ဆိုပါက (၁၀-၁၂) ပြည်အထိ သုံးစွဲရမည်ဖြစ်ပါတယ်။  ပဲယင်မျိုးစေ့များကို တန်းကြား (၁၀-၁၂) လက်မ၊ ပင်ကြား (၄-၅) လက်မထား၍ အတန်းလိုက်စိုက်နိုင်ပြီး မျိုးစေ့များကို မြေကြီးအနက် တစ်လက်မ ထားစိုက်ပြီး ရေအနည်း ငယ်ဖျန်းပေးရပါမည်။ စိုက်ပြီးရက်ပေါင်း (၃၀-၅၀) အတွင်း (၂-၃) ကြိမ် ကြားပေါင်းလိုက်ပေးဖို့ လိုအပ်ပါသည်။ ပဲယင်းပင်တွင် သီးလုံးဖောက်ပိုးနှင့် ကျိုင်းနက် ကောင်များ အဓိက ကျရောက် တတ်သည်ကို တွေ့ရပါသည်။ ရောဂါအနေဖြင့် အဝါရောင်မိုစေ့ရောဂါ၊ အရွက်ပုပ်၊ အရိုးပုပ်ရောဂါများ ကျရောက်တတ်ပါသည်။ အပင်တွေ စဝါပါက နှုတ်ပစ်သင့်ပါသည်။ ပဲယင်းကို စိုက်ပျိုးပြီး (၃-၄) လ အကြာ ရက်ပေါင်း (၉၀-၁၂၀) အတွင်း ခူးဆွတ်ရိတ်သိမ်းကြပါသည်။ သီးတောင့်များ၏ ၈၀%  အညိုရောင်ပြောင်းသည့်အချိန်တွင် စတင်ခူးဆွတ်နိုင်ပြီး နံနက်ခင်းတွင် ခူးဆွတ်ခြင်းဆောင်ရွက်ပြီး သီးတောင့်များကို နေလှန်း အခြောက်ခံပြီး အစေ့ထုတ်ကာ သိုလှောင်ရောင်းချခြင်းဖြစ်ပါသည်။ ပဲစေ့၏ဝမ်းဗိုက်တွင် အညှောင့်ဗီဇနေရာ အဖြူစင်းကြောင်းရှည်တစ်ခု ပါရှိသည်။ ပဲယင်းသည် ပဲအခွံမာ၍ အရောင်တောက်ပြောင်ပြီး နီညိုရောင်၊ ကာကီဖျော့ရောင်၊ ဝါညိုရောင်တွေ့ရတတ်သည်။ ဈေးကွက်တွင် ပဲယင်းနီနှင့် ပဲယင်းဝါ ဟုအခေါ်များပြီး ပဲယင်းနီက ဈေးပိုမိုမြင့်သည်။

            စစ်ကိုင်းတိုင်းဒေသကြီးတွင် ပဲယင်းကို နှစ်စဉ် ဧက(၃၅၀၀၀)ကျော်စိုက်ပျိုးထွက်ရှိသည်။ အဓိက အများဆုံးစိုက်ပျိုးရာဒေသမှာ ကလေးမြို့နယ်ဖြစ်ပြီး ဧက(၂၈၀၀၀)ခန့် စိုက်ပျိုး ခြင်းဖြစ်သည်။ ကျန်စိုက်ပျိုးသည့်ဒေသများမှာ မင်းကင်းမြို့နယ်တွင် ဧက(၅၈၀)ခန့်၊ ထီးချိုင့် မြို့နယ်တွင် (၅၆၀၀)၊ ကသာမြို့နယ်တွင် ဧက(၁၀၀)၊ မြောင်မြို့နယ်တွင် (၅၀၀)၊ ချောင်းဦး မြို့နယ်တွင် (၃၀၀)၊ ပုလဲမြို့နယ်တွင် ဧက(၂၀၀)ခန့်စိုက်ပျိုးကြခြင်းဖြစ်ကြောင်း တွေ့ရသည်။ တစ်ဧက အထွက်နှုန်းမှာ ပျှမ်းမျှ (၁၃)တင်းခန့်ဖြစ်ရာ တစ်နှစ်လျှင်တင်းရေ (၄)သိန်းကျော် ထုတ်လုပ်မှု ရှိသည်။ တစ်ဧကကုန်ကျစရိတ်မှာ (၂၅၀၀၀၀)ခန့်ကုန်ကျပြီး ပေါ်ချိန်ပေါက်ဈေး (၄၀၀၀၀) ကျပ်ဖြင့်ရောင်းချရပါက တစ်ဧကအကျိုးအမြတ်(၂၇၀၀၀၀)ကျပ်ရရှိမည်ဖြစ်သည်။ ပဲယင်းကို တိုးချဲ့စိုက်ပျိုးရန်စဉ်းစားရာတွင် ပဲယင်းစိုက်ပျိုးမည့်မြေနေရာ၌ မြေပဲစိုက်ပျိုးမည့် အမြတ် အစွန်းနှင့် နှိုင်းယှဉ်စဉ်းစားစိုက်ပျိုးကြခြင်းဖြစ်‌ကြောင်းသိရသည်။ ပဲယင်းကို ပဲအတိုင်းသော်လည်းကောင်း ကောက်ညှင်းဆန်နှင့်တွဲဖက်၍သော်လည်းကောင်း စားသုံးလေ့ရှိကြသည်။ ပဲယင်းဈေးနှုန်းကိုလေ့လာကြည့်လျှင် ပဲရောင်းဝယ်ချိန် မေလအတွက် ၂၀၂၀ နှင့် ၂၀၂၁ ခုနှစ်က တစ်တင်းလျှင် ကျပ်၂၀၀၀၀ ခန့်သာရှိခဲ့သော ပဲယင်းသည် ၂၀၂၂ ခုနှစ်တွင် ၄၀၀၀၀ ကျပ် ဖြစ်လာသဖြင့် ယခင်နှစ်ထက် ပဲစိုက်ပျိုးထုတ်လုပ်မှု ကုန်ကျစရိတ်၂ဆခန့်မြင့်မားလာသကဲ့သို့ ရရှိသည့် ဈေးနှုန်းမှာလည်း ၂ဆခန့် ရရှိခြင်းကြောင့် လူမှုစီးပွားတိုးတက်ရေးအတွက် စိုက်ပျိုးစွမ်းအားကို မလျော့စေရေး ကြိုးပမ်းရမည်ဖြစ်ပါသည်။

DOCA(စစ်ကိုင်း)