ပြည်တွင်းကုန်သွယ်မှုသတင်း

          ပြည်ခရိုင်၊ ရွှေတောင်မြို့နယ်ရှိ ကြာနီကန်ရပ်ကွက်၊ အညာစုလမ်းတွင် ရွှေတောင်စည်းလုံချည်များ ရက်လုပ်ရောင်းချလျှက်ရှိရာ ထိုအလုပ်ရုံမှ ရွှေတောင် စည်းချည်ထည်ရက်လုပ်ရာတွင် အသုံးပြုသော ကုန်ကြမ်းများကို မန္တလေးမြို့မှ ဝယ်ယူ၍ ရက်လုပ်သည်ဟု သိရပါသည်။ ရွှေတောင် စည်းလုံချည်ရက်လုပ်ရာတွင် အဓိကလိုအပ်သော (၂/၈၀)ချည်အမျိုးအစား (၁၀)ပေါင် ထုတ်တွင် အခင် (၄၀)ပါ တစ်ထုတ်လျှင် ၈၁၀၀၀ကျပ်ဖြင့် ဝယ်ယူ၍ ရက်လုပ်ရပါသည်။ ထွက်ရှိလာသော ရွှေတောင်စည်းလုံချည် ချည်ချောများကို ရန်ကုန်မြို့၊ နေပြည်တော်နှင့် အင်းမမြို့ များသို့ ဖြန့်ဖြူးရောင်းချပြီး ဈေးနှုန်းအနေဖြင့် ဝမ်းဆက်တစ်စုံစာလျှင် ၁၃၀၀၀ကျပ်၊ လုံချည်တစ်ကွင်းလျှင် ၇၀၀၀ကျပ်ဖြင့် လက်လီ/လက်ကားဖြန့်ဖြူးရောင်းချလျှက်ရှိကြောင်း သိရပါသည်။

          တဖန် ပဲခူးတိုင်းဒေသကြီး၊ ပြည်မြို့၏ နှစ်စဉ်ရာသီချိန်ဘုရားပန်းဖြစ်သော ပန်းတိမ်မနိုင်ပန်းများမှာ ပေါ်ဦးပေါ်ဖျားဖြစ်၍ ဈေးကောင်းပြီး ရောင်းအားလည်းကောင်းပါသည်။ ပန်းတိမ်မနိုင်ပန်းများကို ပြည်မြို့အနီး ပတ်ဝန်းကျင်ရှိ ကျေးရွာများဖြစ်သော မှော်ဇာ၊ ပန်းတောင်း မြို့နယ်များမှ အများဆုံးတင်သွင်းရောင်းချပြီး စိုက်ပျိုးသူများတွက်ခြေကိုက်သောပန်း ဖြစ်ပါသည်။ ပန်းတိမ် မနိုင်ပန်းဈေးများမှာ ပန်းအကြီးအသေးပေါ်မူတည်ပြီး ဈေးကောင်းလျက်ရှိပါသည်။ ပန်းတိမ်မနိုင် အသေးတစ်ခိုင်လျှင် ၂၅၀ကျပ်မှ ၃၀၀ကျပ်အထိဈေးရှိပြီး ပန်းအကြီး တစ်ခိုင်လျှင် ၅၀၀ကျပ်ထိရှိ၍ ဈေးကောင်း၍ အရောင်းအဝယ်ဖြစ်ကြောင်း သိရပါသည်။

DOCA(ပဲခူး)

            ပြည်မန်ကျည်းမှည့် (ပွဲရုံ)များတွင် လှောင်မန်ကျည်းမှည့် လက်ကားသမားများသာ ဒေသတွင်းအရောင်းအဝယ်ရှိနေသည်ကို တွေ့ရပါသည်။ မန်ကျည်းမှည့်ပွဲရုံများတွင် မန်ကျည်းမှည့် တစ်ပိဿာဈေးမှာ (အသား) ၃၅၀၀ကျပ်နှင့် အစေ့ပါ(ကတုံး)ကို ၁၇၀၀ကျပ်ဖြင့် ရောင်းချနေပြီး လက်လီဈေးမှာ (အသား)ဈေးတစ်ပိဿာ ၄၀၀၀-၄၂၀၀ ကျပ်ဈေးဖြင့် ရောင်းချနေပြီး ဈေးကွက်များတွင် အစေ့ပါ မန်ကျည်းမှည့်ကို ရောင်းချခြင်းမရသည်ကို တွေ့ရပါသည်။ ယခုတစ်ပတ်အတွင်း မန်ကျည်းမှည့် ပိဿာချိန် ၄၀၀ကျော် အရောင်းအဝယ် ပုံမှန်ရှိနေကြောင်း သိရှိရပါသည်။

          ယခုတစ်ပတ်၊ ပြည်ချင်းပွဲရုံများသို့ ချင်းဝင်ရောက်မှုအနည်းငယ်ပိုများလာသည်ဟု သိရှိရပါသည်။ ဈေးကွက်တွင် အရောင်းအဝယ်အနေဖြင့်  နေ့စဉ်အိတ် ၄၀/၅၀ထိ အရောင်းအဝယ် ဖြစ်နေပါ သည်။ ဒေသတွင်း ဒါးလှီးချင်း(ဖတ်)သမားတို့နှင့် လက်လီအရောင်းသမားတို့ အဝယ်ရှိနေပြီး နယ်အဝယ် နည်းနေသည်ဟု သိရှိရပါသည်။ ယခုဇွန်လ နောက်ဆုံးပတ်တွင် ချင်းအိတ်စွဲဈေး တစ်ပိဿာလျှင် ၈၀၀/၉၀၀ ကျပ်ဈေးနှင့် သန့်ပြီးချင်းတက်ဈေးမှာ ၁၀၀၀-၁၅၀၀ကျပ်ဈေးတို့ဖြင့် ရောင်းချနေကြောင်း တွေ့ရှိရပါသည်။ လက်လီဈေးအနေဖြင့် တစ်ပိဿာလျှင် ၁၇၀၀ကျပ်ဈေး ဖြစ်ပြီး ဒါးလှီးချင်းဖတ် တစ်ပိဿာဈေးမှာ ၁၇၀၀ကျပ်ဈေးဖြင့် ရောင်းချလျှက်ရှိနေပါကြောင်း သိရှိရပါသည်။

DOCA(ပဲခူး)

            ယခုတစ်ပတ်တွင် ကြက်သွန်နီသီးနှံအနေဖြင့် ပြည်ဈေးကွက်သို့ ဝင်ရောက်မှု နည်းသွားကြောင်း သိရပါသည်။ ဆိပ်ဖြူ၊ ရေနံချောင်း၊ ပခုက္ကူဘက်မှ ကြက်သွန်နီများ ယခင်ပိဿာ(၃၀)ဝင် အိတ် ၄၀၀ကျော်ခန့် အဝင်ရှိခဲ့ရာမှ ယခုတစ်ပတ်တွင် အိတ်၂၀၀ ပတ်လည်ခန့်သာ ဝင်ရောက်မှုရှိ တော့ကြောင်း သိရပါသည်။ ဈေးနှုန်းမှာမြင့်တက်နေပြီး အရောင်းအဝယ်အေးနေသည့်အတွက် ပွဲရုံလုပ်ငန်းရှင်များမှ မှာယူရောင်းချမှု နည်းသွားသဖြင့် ဝင်ရောက်ရောင်းချမှု နည်းရခြင်းလည်း ဖြစ်ပါသည်။ ဈေးနှုန်းများအနေနှင့် ပွဲရုံလက်ကားဈေး တစ်ပိဿာကို ကြီး/လတ်/သေး ကျပ် ၁၉၀၀-၁၈၀၀-၁၇၀၀/၁၆၀၀ တို့ရှိပြီး လက်လီဈေး အသေးများတွင် ကြီး/လတ်/သေး ကျပ် ၂၂၀၀/၂၁၀၀-၂၀၀၀/၁၉၀၀ နှုန်းတို့ဖြင့် အသီးသီးရောင်းဝယ်မှု ရှိနေကြပါသည်။

          ပြည်ခရိုင်အတွင်း ရှမ်းပြည်နယ်၊ အောင်ပန်းမှ အဝင်ရှိသော ရှမ်းအာလူးများရှိသလို မန္တလေးမှတစ်ဆင့် ဝင်ရောက်လာသော တရုတ်အာလူးများလည်း ရှိပါသည်။ ယခုရက်ပိုင်းတွင် ရှမ်းအာလူးများသာ အဝင်ရှိပြီး တစ်ခါဝင်လျှင် အိတ် ၂၀၀နီးပါး အဝင်ရှိကြောင်းနှင့် တရုတ်အာလူးများမှာ ကုန်သွယ်မှုလမ်းကြောင်းအခြေအနေအရ ပြည်ဈေးကွက်သို့ ဝင်ရောက်မှု မရှိကြောင်း သိရပါသည်။ တရုတ်အာလူးများအဝင်မရှိသည့်အတွက် ရှမ်းအာလူးများဖြင့်သာ အရောင်းအဝယ် ဖြစ်လျှက်ရှိပြီး တစ်ပတ်လျှင် အိတ် ၅၀မှ ၁၀၀ အတွင်း ဒေသတွင်းလက်လီဝယ်ယူသူများ အာလူးကြော်လုပ်ငန်းရှင်များဖြင့် ပုံမှန်အရောင်းအဝယ် ဖြစ်လျှက်ရှိပါသည်။ ယခုတစ်ပတ် အာလူး တစ်ပိဿာလျှင် ပွဲရုံဈေး ကျပ် ၁၉၀၀-၂၀၀၀-၂၁၀၀ဖြင့် လည်းကောင်း၊ လက်လီဈေး တစ်ပိဿာလျှင် ကျပ် ၂၂၀၀-၂၄၀၀ဈေးရှိကြောင်း သိရှိရပါသည်။

DOCA(ပဲခူး)

            ပြည်ဈေးကွက်တွင် ဆီထွက်သီးနှံဖြစ်သော နှမ်းသီးနှံမှာ ဇွန်လနောက်ဆုံးပတ်တွင် အရောင်း အဝယ်ရက်ခြားသာ ဖြစ်လျှက်ရှိပါသည်။ ဒေသတွင်းဆီစက်သမားများက ဆီကြိတ်ရန် အဝယ်ရှိ သဖြင့် ရက်ခြားအရောင်းအဝယ်ဖြစ်လျှင် အိတ် ၁၀၀/၂၀၀ခန့်ဖြစ်ကြောင်း ပွဲရုံပိုင်ရှင်တစ်ဦးထံမှ သိရပါသည်။ မိုးကြိုနှမ်းများလည်း နောက်လတွင် ထွက်ပေါ်နိုင်ပြီး ယခုအချိန်တွင် ဈေးကွက်သို့ နှမ်းများ  ဝင်ရောက်မှုမရှိပေမယ့် လှောင်နှမ်းများဖြင့်သာ ရက်ခြားအရောင်းအဝယ်ဖြစ်သည်ဟု  သိရပါသည်။ နှမ်းဈေးနှုန်းအနေဖြင့် နှမ်းနီ(၃)တင်းတစ်အိတ်လျှင် ၁၆၀၀၀၀ကျပ်ဖြင့် ဇွန်လတတိယ ပတ်ကအတိုင်း ဝယ်ယူမှုရှိနေပေမယ့် ဈေးငြိမ်နေခဲ့ပါသည်။ နှမ်းနက်မှာ (၃)တင်းတစ်အိတ်လျှင် ၁၈၀၀၀၀ကျပ်ဖြင့် ဇွန်လတတိယပတ်ထက်စာလျှင်  ဈေး ၁၀၀၀၀ကျပ်ခန့် မြင့်လာသော်လည်း အရောင်းအဝယ်မဖြစ်သလို စမုံနက်နှမ်းမှာလည်း (၃)တင်းတစ်အိတ်လျှင် ၂၁၀၀၀၀ ကျပ်ဖြင့် ဇွန်လတတိယပတ်ထက် ဈေး ၁၀၀၀၀ကျပ်ခန့် ကျလာခဲ့ပါသည်။ ပြည်ဈေးကွက်ရှိ နှမ်းဈေးများမှာ အရောင်းအဝယ်ဖြစ်လျှင်ဖြစ်သလို အတက်အကျရှိကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊စားသုံးသူရေးရာဦးစီးဌာန၊ ပြည်မြို့နယ်တာဝန်ခံ ဦးနိုင်လင်းထွန်း နှင့် ဝန်ထမ်းအဖွဲ့သည် (၅.၇.၂၀၂၂)ရက်နေ့ ၊ နံနက် (၁၀:၃၀) အချိန်တွင် ပြည်ခရိုင်၊ ပြည်မြို့နယ်အတွင်းရှိ တပိုင်တနိုင် မြေပဲဆုံဆီလုပ်ငန်း လုပ်ကိုင်ရောင်းချ လျှက်ရှိသော လုပ်ငန်းနေရာသို့ ကွင်းဆင်း လေ့လာခဲ့ပါသည်။

          ပြည်မြို့နယ်၊ မူယာပင်ရပ်၊ ရတနာမာန်အောင်လမ်းမပေါ်ရှိ အိမ်တွင်းစီးပွားဖြစ် ရောင်းချနေသော ရွှေဝါသင်း ဆုံဆီလုပ်ငန်းလုပ်ကိုင်လျှက်ရှိသော ဆီဆိုင်သို့ သွားရောက်တွေ့ဆုံမေးမြန်းခဲ့ရာ မြေပဲဆုံဆီကြိတ်ခွဲရာတွင် မြေပဲလုံးဆန်တစ်မျိုးတည်းကိုသာ ဝယ်ယူကြိတ်ခွဲသည်ဟု သိရပါသည်။ ဆီကြိတ်ရန်အတွက် မြေပဲဆန်ကို မကွေးမြို့နှင့် ပခုက္ကူမြို့များသို့ ကိုယ်တိုင်သွားရောက်၍ ဝယ်ယူ လျှက်ရှိကြောင်း သိရပါသည်။ မြေပဲဆုံဆီကြိတ်ခွဲရာတွင် မြေပဲဆန်လုံးဆန် (၄)ပြည်ကို ဆီကြိတ်လျှင် မြေပဲဆီတစ်ပိဿာခန့်ထွက်ရှိပြီး မြေပဲဖတ် (၃)ပိဿာထွက်ရှိကြောင်း သိရှိရပါသည်။ မြေပဲဆီ ကို တစ်ပိဿာလျှင် ၁၁၀၀၀ကျပ်ဖြင့်ရောင်းချပြီး မြေပဲဖတ်တစ်ပိဿာလျှင် ၂၁၀၀ကျပ်ဖြင့် ရောင်းချပါသည်။ တပိုင်တနိုင် မြေပဲဆီကြိတ်ခွဲရာတွင် တစ်နေ့လျှင် ဆီ (၂၁)ပိဿာခန့်ထွက်ရှိပြီး ထွက်ရှိလာသောဆီများကို ပြည်မြို့နယ် ဒေသတွင်းနှင့် အခြားမြို့နယ်များသို့ လက်လီ/လက်ကား ရောင်းချ ကြောင်း သိရပါသည်။ အသားတင် အကျိုးအမြတ်အနေဖြင့် ပဲဆီတစ်ပိဿာရောင်းရလျှင် အနည်းဆုံး ၅၀၀၀-၆၀၀၀ကျပ် ခန့် ရရှိသည်ဟု လေ့လာသိရှိရပါသည်။

DOCA(ပဲခူး)