ပြည်တွင်းကုန်သွယ်မှုသတင်း

    စလင်းမြို့နယ်သည် ဧရာဝတီမြစ်အနောက်ဘက်ကမ်းတွင် တည်ရှိပြီး သီးနှံစုံစိုက်ပျိုး ဖြစ်ထွန်းသောမြို့ဖြစ်ပါသည်။ စလင်းမြို့တွင်ဝါကို စလင်းမြို့အနောက်ဘက်ကုန်းမြင့်ဒေသနှင့် ယာမြေတို့တွင် အများဆုံးစိုက်ပျိုးကြပြီး ၂၀၂၂ ခုနှစ်တွင် (၁၅၀၀၀)ဧကခန့် စိုက်ပျိုးထား ရှိပါသည်။ ဝါအဓိကစိုက်ပျိုးကြသော စလင်းမြို့နယ် အင်ကျင်းပင်လှကျေးရွာရှိ တောင်သူ ဦးတင်ဆန်းနှင့် တွေ့ဆုံပြီးဝါစိုက်ပျိုးထွက်ရှိမှု အခြေအနေအားကွင်းဆင်းမေးမြန်းမှုအရ အင်ကျင်းပင်လှကျေးရွာ တွင် တောင်သူ(၁၂၀)ဦးခန့်စိုက်ပျိုးထားရှိပြီး ကျေးရွာအနေဖြင့် ဝါဧက(၇၅၀)ဧကစိုက်ပျိုး ကြောင်းဝါစိုက်တောင်သူများအနေဖြင့် ငွေခြည်(၆)၊ ငွေခြည်(၈)၊ ငွေခြည်(၁၀)၊ ရွှေတောင်(၈)၊ ရွှေတောင်(၁၀)၊ RAKA(၆၆၆) ဝါအမျိုးအစားများစိုက်ပျိုး ကြပါသည်။ ဖော်ပြပါအမျိုးအစားများအနက် RAKA (၆၆၆) ဝါမှာ အထွက်နှုန်းအောင်မြင်ပြီး ဈေးနှုန်းရရှိကြောင်း ဝါစိုက်တောင်သူထံမှ သိရှိရပါသည်။

   နှစ်စဉ်ဇူလိုင်လလယ်တွင် စိုက်ပျိုးကြပြီး စိုက်ပျိုးပြီးရက်ပေါင်း (၁၀၀-၁၂၀) ခန့်တွင် အပြီးခူးဆွတ်ရပါသည်။ ယခင်နှစ်က ဝါ(၁)ဧကစိုက်ပျိုးထုတ်လုပ်မှုကုန်ကျစရိတ်မှာ ကျပ် (၂၅၀၀၀၀)ကုန်ကျပြီး အကျိုးအမြတ်အနေဖြင့် ကျပ်(၂၀၀၀၀၀)ခန့်ရရှိကြောင်း၊ မြေအနေ အထား၊ ရာသီဥတုနှင့်သွင်းအားစုပေါ်မှုတည်၍ ဝါ(၁)ဧက(၇-၁၀)ကြိမ်ထိခူးဆွတ်ရပြီး (၁)ကြိမ် လျှင် (၄၀-၅၀)ပိဿာရရှိကာ ဝါ(၁)ဧကလျှင်ပျမ်းမျှ(၃၅၀)ပိဿာထွက်ရှိ၍ ယခင်နှစ်က ဝါသီးနှံ အနိမ့်ဆုံး (၁၅၀ဝိ/-)ရခဲ့ကြောင်း ထွက်ရှိလာသော ဝါများကို မြို့ပေါ်ရှိပွဲရုံများနှင့် စလင်း၊ ပွင့်ဖြူ၊ မိတ္ထိလာ၊ မန္တလေးစသည့်မြို့များရှိ ဝယ်လက်များမှ လာရောက်ဝယ်ယူကြောင်း ယခုနှစ် ဝါစိုက်ပျိုးကာလတွင် ရာသီဥတုကောင်းမွန်ခြင်း၊ မိုးရွာသွန်းမှုအကြိမ်ရေများခြင်း၊ မှိုရောဂါနှင့် ပြရောဂါများ ကျရောက်မှုနည်းပါးခြင်းတို့ကြောင့် အထွက်နှုန်းကောင်းနိုင်ပြီး ယခင်နှစ်ကထက် အထွက်နှုန်းပို၍ရရှိနိုင်သည့်အပြင် လက်ရှိဝါ(၁)ပိဿာ (၂၀၀ဝိ/-)ကျော်ဖြစ်၍ အကျိုးအမြတ်ပိုမို ရရှိနိုင်မည်ဖြစ်ကြောင်း ဝါစိုက်တောင်သူ  ဦးတင်ဆန်းထံမှ သိရှိရပါသည်။

DOCA(မကွေး)

    မင်းဘူးမြို့မဈေးအတွင်း စားဖိုဆောင်သီးနှံများဖြစ်သည့် ကြက်သွန်နီမှာ (၁၅.၉.၂၀၂၂) နေ့တွင် လက်လီ(၁)ပိဿာ(၃၈၀၀)ကျပ် အချိန်(၁၀)အိတ်ဆွဲဈေးမှ (၃၇၀၀)ကျပ် (၃.၉.၂၀၂၂) လဆန်း ပိုင်းမှာ(၃၅၀၀)ကျပ်ဖြစ်၍ (၂၀၀)ကျပ်ဈေးနှုန်းမြှင့်တက်လာကြောင်း ကြက်သွန်နီကို မင်းဘူး၊ စလင်း၊ ဆင်ဖြူကျွန်း ပတ်ဝန်းကျင်ကျေးရွာများမှ တောင်သူများ လှောင်ထားသည့် ကြက်သွန်နီများကို မင်းဘူးမြို့မဈေးအတွင်း လာရောက်ရောင်းချခြင်း ဖြစ်ကြောင်း သိရှိရပါသည်။

   စလင်း၊ ဆင်ဖြူကျွန်းမှ ထွက်သည့် ငရုတ်ခြောက်အရှည် ဈေးနှုန်းမှာ ၁ပိဿာလျှင် (၁၈၀၀၀)ကျပ်ဖြစ်ပြီး၊ မိထ္ထီလာမှထွက်သည့် ပင်နှံငရုတ်သီးခြောက် ဈေးနှုန်းမှာ(၁၆၀၀၀)ကျပ် ဖြစ်ကြောင်း ၊မန်းကျည်းသီးမှည့် ၁ပိဿာလျှင် (၃၈၀၀)ကျပ် ဖြစ်ပြီး  ရှမ်းပြည်နယ် အောင်ပန်းမြို့မှ ထွက်ရှိသည့်အာလူးမှာ ၁ပိဿာလျှင်(၂၄၀၀/၂၅၀၀)ကျပ် ဖြစ်ကြောင်း ငရုတ်ခြောက်နှင့် မန်းကျည်းသီးမှည့်တို့မှာ ဈေးနှုန်းပြောင်းလဲမှုမရှိကြောင်း သိရပါသည်။

DOCA(မကွေး)

          (၁၅.၉.၂၀၂၂)ရက်နေ့တွင် မင်းဘူးမြို့မဈေး၌ နှမ်းဆီ၁ပိဿာလျှင်(၁၁၀၀၀)ကျပ်၊ ပဲဆီ(၁) ပိဿာလျှင် (၁၃၀၀၀)ကျပ်ဖြစ်ပြီး စားအုန်းဈေးမှာ(၁)ပိဿာ(၇၈၀၀)ကျပ် ဖြစ်ကြောင်း၊ (၃.၉.၂၀၂၂) ရက်နေ့တွင် နှမ်းဆီ၁ပိဿာလျှင်(၁၀၅၀၀)ကျပ်၊ ပဲဆီ၁ပိဿာ လျှင် (၁၂၅၀၀)ကျပ် ဖြစ်ပြီးစားအုန်းဆီဈေးမှာ(၁)ပိဿာ(၁၀၀၀၀)ကျပ်ဖြစ်ကြောင်း ၊ စားအုန်းဆီကို ရန်ကုန် MEC မှ  (၇၆၀၀)ကျပ် ဖြင့်တိုက်ရိုက်ဝယ်ယူရရှိခဲ့သည့်အတွက် စားအုန်းဆီဈေးကျသွားခြင်းဖြစ်ကြောင်း စူပါမင်း ရောင်းဝယ်ရေး ဦးသန်းထိုက်ထံမှ သိရှိရပါသည်။ စားအုန်းဆီများကို ဒေသတွင်းပဲကြော်၊ အာလူးကြော် လုပ်ငန်းရှင်များသို့လည်းဖြန့်ဖြူးရောင်းချပေးရကြောင်း သိရှိရပါသည်။

          ဧရာပဒေသာဆန် ၁အိတ်လျှင်(၆၀၀၀၀ မှ၇၀၀၀၀)ကျပ်ရှိပြီး မနောသုခဆန်(၁)အိတ်လျှင် (၄၈၀၀၀ မှ ၅၅၀၀၀)ကျပ်ရှိကြောင်း ဧရာပဒေသာဆန်ကို ပွင့်ဖြူ၊ စလင်း၊ ဆင်ဖြူကျွန်းမြို့များမှ ဝယ်ယူရောင်းချပြီး မနောသုခဆန်ကိုဒေသတွင်းနှင့် ဧရာဝတီတိုင်း မြောင်းမြ၊ ဖျာပုံမြို့များမှ ဝယ်ယူရောင်းချကြောင်းသိရှိရပါသည်။ ဧရာပဒေသာဆန်မှာ နိုဝင်ဘာလဆန်းတွင် အသစ်ပေါ် တော့မည်ဖြစ်ရာဆန်ဈေးမှာ တစ်ဖြည်းဖြည်းကျလာမည်ဖြစ်ကြောင်း ဆန်ပွဲရုံများမှ သုံးသပ်ထားကြောင်း သိရှိရပါသည်။

DOCA(မကွေး)

          စက်တင်ဘာလ ဒုတိယအပတ်တွင် မကွေးမြို့၊ မြို့မစျေး၌ ကြက်သွန်နီစျေးနှုန်းများ မြင့်တက်လာကြောင်း စျေးဆိုင်များ ကွင်းဆင်းမေးမြန်းမှုအရ သိရပါသည်။ စက်တင်ဘာလ ပထမအပတ်တွင် ကြက်သွန်နီ (၁)ပိဿာလျှင် (၃၅၀၀)ကျပ်ဖြင့် အရောင်းအဝယ်ဖြစ်ရာမှ စက်တင်ဘာလ ဒုတိယအပတ် တွင် ကြက်သွန်နီ အမျိုးအစားနှင့် အရည်အသွေးပေါ်မူတည်ပြီး (၁)ပိဿာလျှင် (၃၆၀၀)ကျပ် တို့ဖြင့် အရောင်းအဝယ်ဖြစ်ကာ စျေးနှုန်းများ မြင့်တက်လာကြောင်း ဆိုင်ခန်းစျေးသည်များနှင့် ပွဲရုံစျေးသည်တစ်ဦးထံမှ သိရှိရပါသည်။

              အခြားစားဖိုဆောင်သီးနှံများအနေဖြင့် ငရုပ်သီးခြောက် (၁)ပိဿာလျှင် (၁၉၀၀၀)ကျပ်၊ ကြက်သွန်ဖြူ(ဗမာ)(၁)ပိဿာလျှင်(၄၈၀၀-၅၂၀၀) ကျပ်၊ ကြက်သွန်ဖြူ (ရှမ်း)(၁)ပိဿာလျှင်(၆၀၀၀)ကျပ်၊ နနွင်းတက်(၁)ပိဿာလျှင်(၄၈၀၀)ကျပ်၊ ချင်းတက်(၁)ပိဿာလျှင် (၁၅၀၀)ကျပ်၊ မန်ကျီးသီးမှည့် (၁)ပိဿာ လျှင်(၄၀၀၀)ကျပ်၊ ကုလားပဲခြမ်း(၁) ပိဿာလျှင်(၅၅၀၀)ကျပ်၊ အာလူး(၁)ပိဿာလျှင်(၂၅၀၀)ကျပ်၊ သကြား(၁)ပိဿာလျှင်(၂၇၀၀)ကျပ်၊ ဆား(အချော) (၁) ပိဿာလျှင်(၉၅၀)ကျပ်၊ ဆား(ကြမ်း)(၁)ပိဿာလျှင် (၅၀၀)ကျပ်၊ ကြက်(CP)(၁) ပိဿာလျှင် (၈၀၀၀-၉၀၀၀)ကျပ်၊ ကြက်(ဗမာ) (၁)ပိဿာလျှင်(၁၂၀၀၀)ကျပ်၊ အမဲသား (၁)ပိဿာ လျှင်(၁၄၀၀၀)ကျပ်၊ ငါးကြင်း(၁)ပိဿာလျှင်(၁၂၀၀၀)ကျပ်၊ ဝက်သား(၁)ပိဿာလျှင် (၁၄၀၀၀-၁၆၀၀၀)ကျပ်တို့ဖြင့် အရောင်းအဝယ်ဖြစ်လျှက်ရှိကြောင်း ဆိုင်ခန်းစျေးသည်များနှင့် ပွဲရုံစျေးသည် တစ်ဦးထံမှ သိရှိရပါသည်။ စားသုံးဆီများအနေဖြင့်လည်း ပဲဆီ(၁)ပိဿာလျှင်(၁၃၅၀၀-၁၄၀၀၀)ကျပ်၊ နှမ်းဆီ(၁) ပိဿာလျှင် (၁၀၅၀၀-၁၂၀၀၀)ကျပ်၊ စားအုန်းဆီ(၁)ပိဿာလျှင်(၉၀၀၀-၉၂၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း ဆီလက်ကားစျေးဆိုင်များထံမှ သိရပါသည်။

DOCA(မကွေး)

    ပခုက္ကူမြို့မဈေး၊ ဈေးကွက်သို့ရှမ်းပြည်(အောင်ပန်း)နှင့် တရုတ်နိုင်ငံ(ပြည်ပ)မှ တင်သွင်းသောအာလူးများ မန္တလေးမြို့မှတစ်ဆင့် ပခုက္ကူမြို့သို့ နေ့စဉ်ဝင်ရောက်လျက်ရှိပါသည်။ ယခု (၁)ပတ်အတွင်း ဖြစ်ပေါ်လျက်ရှိသော အာလူးဈေးနှုန်းများမှာ  (၁)ပိဿာလျှင် လက်လီဈေး (၂၃၀၀/ ၂၂၀၀)ကျပ် ဈေးနှုန်းရှိပြီး ယခင်(၁)ပတ်ဈေးနှုန်းမှာ အာလူး(၁)ပိဿာလျှင် လက်လီဈေး (၂၅၀၀/ ၂၃၀၀/၂၂၀၀)ကျပ် ဈေးနှုန်းဖြင့် အရောင်းအဝယ်ဖြစ်ခဲ့၍ ယခင်(၁)ပတ်ထက် ဈေးနှုန်း (၂၀၀) ကျပ်ခန့်ကျဆင်းသွားကြောင်း၊ နေ့စဉ်ရှမ်းပြည်(အောင်ပန်း)မှ အာလူးများ(၁)ရက်လျှင် ပိဿာ(၃၀) ဝင်အိတ်(၇၀)၊ ကုန်ချိန်ပိဿာ(၂၀၀၀) ကျော်ခန့် ဈေးကွက်သို့ ဝင်ရောက်ပြီး တရုတ်နိုင်ငံထွက် အာလူးများမှာ(၁)ရက်လျှင် ပိဿာ(၃၀)ဝင် အိတ်(၁၀)၊ ကုန်ချိန်ပိဿာ(၃၀၀)ခန့် ဝင်ရောက် ကြောင်း၊ ဒေသထွက်အာလူးများနှင့်တရုတ်အာလူးများမှာ ဈေးနှုန်းတူရောင်းချရပြီး တရုတ်အာလူး မှာသဲ၊ နုန်းများမပါဘဲ အရည်အသွေးသန့်စင်၍ အရောင်းအဝယ် ပိုမိုသွက်ကြောင်း ဈေးသည်မှ တစ်ဆင့် သိရှိရသည်။ အာလူးများကို မြို့ပေါ်ရှိ အာလူးကြော် လုပ်ငန်းရှင်များနှင့် လက်လီ၊ လက်ကား ရောင်းဝယ်သူများမှ အများဆုံးဝယ်ယူကြောင်း သိရှိရသည်။

    ထို့အပြင် စားသုံးသူများ နေ့စဉ်ဝယ်ယူသုံးစွဲလျက်ရှိသော အခြေခံစားကုန် ယောနယ်ဒေသထွက် ဗမာကြက်သွန်ဖြူနှင့် ရှမ်းပြည်နယ်ထွက် ကြက်သွန်ဖြူ(ကြူကုတ်)များ လည်းဝင်ရောက် အရောင်းအဝယ်ဖြစ်လျက်ရှိပါသည်။ ယခု(၁)ပတ်အတွင် ယောဒေသထွက် ဗမာကြက်သွန်ဖြူ ဈေးနှုန်းမှာ အရည်အသွေး၊ အရွယ်အစားလိုက်၍ (၁)ပိဿာလျှင် လက်လီဈေး (၅၅၀၀/၅၀၀၀/ ၄၅၀၀/၃၀၀၀)ကျပ် ဈေးနှုန်းအမျိုးမျိုးဖြင့် အရောင်းအဝယ်ဖြစ်လျက်ရှိပြီး ရှမ်းပြည်နယ်ထွက် ကြက်သွန်ဖြူ (ကြူကုတ်)မျိုးများမှာ (၁)ပိဿာလျှင်(၅၀၀၀)ကျပ် ဈေးနှုန်းဖြင့် အရောင်းအဝယ်ဖြစ် လျက်ရှိကြောင်း၊ ယခင်(၁)ပတ်နှင့်ယခု(၁)ပတ် ကြက်သွန်ဖြူဈေးနှုန်းများ နှိုင်းယှဉ်လျှင် အတက်/ အကျ မရှိ ဈေးနှုန်းတည်ငြိမ်လျက်ရှိကြောင်း အခြေခံစားသုံးကုန်ပစ္စည်းရောင်းဝယ်ရေး လုပ်ငန်းရှင် တစ်ဦးထံမှ သိရှိရပါသည်။

DOCA(မကွေး)