သတင်းနှင့် လှုပ်ရှားမှုများ

      (၄.၇.၂၀၂၄)ရက်နေ့ နံနက် (၁၀:၀၀) အချိန်တွင် စားသုံးသူရေးရာဦးစီးဌာန၊ ညောင်တုန်းမြို့နယ် ဦးစီးမှူးရုံးမှ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် ညောင်တုန်းမြို့နယ် Good Brother ကုမ္ပဏီလီမိတက် အစည်းအဝေးခန်းမတွင် စိုက်ပျိုးရေးဦးစီးဌာနနှင့်အတူ ညောင်တုန်းမြို့နယ် ဆန်စက်လုပ်ငန်းများနှင့် စပါးစိုက်တောင်သူများကို  ဖိတ်ကြား၍ လုပ်ငန်းရှင် အသိပညာ ပေးဆွေးနွေးမှု ပြုလုပ်ခဲ့ပါသည်။

    အဆိုပါဆွေးနွေးပွဲတွင် ညောင်တုန်းမြို့နယ် စားသုံးသူရေးရာဦးစီးဌာန မြို့နယ်ဦးစီးမှူး ဦးအောင်လွင်က အဖွင့်အမှာစကားပြောကြားပြီး စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၏ လုပ်ငန်းစဉ်များအ‌ကြောင်း ၊  ဝန်ကြီးဌာနလက်အောက်ရှိ ဦးစီးဌာနများဖြစ်သော ကုန်သွယ်ရေးဦးစီးဌာန၊ စားသုံးသူရေးရာဦးစီးဌာန၊ မူပိုင်ခွင့်ဦးစီးဌာန၊ မြန်မာ့ကုန်သွယ်မှုမြင့်တင်ရေးအဖွဲ့ ဆိုပြီး (၄)ခုခွဲ၍ လုပ်ကိုင်ဆောင်ရွက်နေကြောင်း၊ ကုန်သွယ်ရေးဦးစီးဌာနအနေဖြင့် မိမိတို့၏ တိုင်းပြည် ဒေသထွက်ကုန်များကို တန်ဖိုးမြင့်တင်ပြီး လွတ်လပ်စွာဖြင့် အကောက်အခွန် သက်သာစွာဖြင့် ပြည်ပတင်ပို့နိုင်ရေး ကုန်သွယ်မှုကဏ္ဍကို ချိတ်ဆက်ဆောင်ရွက် လုပ်ကိုင်ပေးလျက်ရှိကြောင်း၊ ပြည်ပမှတင်သွင်းကုန်များကိုလည်း တရားဝင်မှတ်ပုံတင်ဖြင့် ပို့ကုန်သွင်းကုန်များကို ကြပ်မတ်ဆောင်ရွက်ပေးလျက်ရှိကြောင်း၊ ဥပမာ- ကားအမျိုးမျိုးတင်သွင်းခွင့်  ၊ လျှပ်စစ်သုံး မော်တော်ယဉ်၊ ဆန်နှင့်သား၊ ငါးဒေသထွက်ကုန်အမျိုးမျိုး ပါဝင်ကြောင်းကိုလည်းကောင်း၊ စားသုံးသူရေးရာဦးစီးဌာန အနေဖြင့် စားသုံသူအခွင့်အရေးအပြည့်အဝရရှိစေရန် ဥပဒေများကို ၂၀၁၉ ခုနှစ်က ပြင်ဆင် ရေးဆွဲပြဌာန်းခဲ့ပြီး၊ ကုန်စည်၊ ဝန်ဆောင်မှုများကို စားသုံးသူများ ဘေးအန္တရာယ် ကင်းစွာအသုံးပြုတတ်စေရန် လုပ်ငန်းရှင်နှင့် စားသုံးသူအကြား မျှတသော လုပ်ငန်းစဉ်တစ်ခုအနေဖြင့် ဆောင်ရွက်ပေးလျက်ရှိကြောင်း၊ စားသုံးသူကာကွယ်ရေးဥပဒေပါ အခန်း(၁၈) တွင် ပါဝင်သော ကုန်အညွှန်းအမှတ်အသားအကြောင်းကို စိုက်ပျိုးရေးတောင်သူများအနေဖြင့် ကျေကျေလည်လည် နားလည်ထားရှိပါက လယ်ယာမြေ စိုက်ပျိုးရေးသုံး ပစ္စည်များဝယ်ယူသည့်အခါ ကုန်အညွှန်းအမှတ်အသားပြည်စုံစွာ ဖော်ပြပါဝင်သော ကုန်စည်ကိုမှန်ကန်စွာ ရွေးချယ်သုံးစွဲတက်လာပြီး မိမိစိုက်ပျိုးသော စပါးအထွက်တိုးနိုင်သည့်အတွက် ကုန်အညွှန်အမှတ်အသား ဖော်ပြပါဝင်သော အသင်းအချက်အလက်အတိုင်း အသုံးပြုလာတတ်သလို မိမိတန်ဖိုးနှင့်အညီ ပေးချေနိုင်သော ကုန်စည်စစ်စစ်ကို ရွေးချယ်အသုံးပြုခြင်းကြောင့် မြေဆီလွှာပျက်စီးမှုအန္တရာယ်နည်းပါပြီး အထွက်နှုန်းကို ထိန်းသိမ်းနိုင်ပြီး ပိုမိုထွက်ရှိလာနိုင်ကြောင်း၊ စားသုံးသူအခွင့်အရေး ဆုံးရှုံးမှု တစ်စုံတစ်ရာ ရှိလာပါက စားသုံးသူရေးရာဦးစီးဌာနသို့ တိုင်ကြားနိုင်သည့် နည်းလမ်းများအကြောင်း ကို အကျယ်တဝင့် ရှင်းလင်းဆွေးနွေးခဲ့သည်။ ဆက်လက်၍ မူပိုင်ခွင့်ဦးစီးဌာနအနေဖြင့် လုပ်ငန်းရှင်များက မိမိထုတ်လုပ်သောကုန်စည်၏ ကုန်အမှတ်တံဆိပ်မူပိုင်ခွင့်ကို မှတ်ပုံတင် ဆောင်ရွက်ခြင်း လုပ်ငန်းများကို လုပ်ကိုင်ဆောင်ရွက်ပေးသော ဦးစီးဌာနဖြင့်လည်းကောင်း၊ မြန်မာ ကုန်သွယ်မှုမြင့်တင်ရေးအဖွဲ့အနေဖြင့် ပြည်ပပို့ကုန်တိုးတက်၍ နိုင်ငံခြား ဝင်ငွေတိုးတက်ရရှိစေရန်၊ စက်မှုကဏ္ဍ၊ စီးပွားရေးနှင့် လူမှုရေးကဏ္ဍများ ဖွံ့ဖြိုးတိုးတက်စေရန်၊ ပြည်တွင်း/ ပြည်ပမှ ရင်းနှီး မြှုပ်နှံသူများ မြှင့်တင်ရန် ရည်ရွယ်၍ မြန်မာနိုင်ငံ၏ အထူးစီးပွားရေးဇုန် အကောင်အထည် ဖေါ်ဆောင်ရွက်လျက်ရှိကြောင်း၊ စီးပွားရေးသံမှူးများကို နိုင်ငံတကာတွင် ခန့်အပ်၍ စီးပွားရေးသတင်းအချက်အလက်များ၊ ပြည်တွင်း/ ပြည်ပ အဖွဲ့အစည်းများ၏ သတင်းအချက် အလက်များ၊ စီးပွားရေးသံမှူးများမှ ပေးပို့လာသည့် သတင်းများ အမျိုးသား ပို့ကုန်မဟာဗျူဟာ ဖွံ့ဖြိုးတိုးတက်ရေးကို ဆောင်ရွက်လျက်ရှိကြောင်းကို အဖွင့်အမှာစကား ပြောကြာခဲ့ပါသည်။

     ဆက်လက်၍ မြို့နယ်စိုက်ပျိုးရေဦးစီးဌာနမှ တာဝန်ရှိသူက တောင်သူများကိုစိုက်ပျိုးရေး အသိပညာတိုးပွားစေရေး စပါးနှင့်အခြားသီးနှံများ၊ ပဲမျိုးစုံ၊ ဆီထွက်သီးနှံ၊ ဥယျာဉ်ခြံသီးနှံ၊ စက်မှုကုန်ကြမ်းသီးနှံများ သွင်းအားစုနည်းပညာများတို့ကို တောင်သူအသိပညာပေး ဆောင်ရွက် လျက်ရှိကြောင်း၊ တောင်သူများအနေဖြင့် သီးနှံအထွက်တိုးကုန်ကြမ်းများကိုဝယ်ယူသုံးစွဲကြရာတွင် စိုက်ပျိုးရေးဌာန၏ ဥပဒေ၊ နည်းဥပဒေများအတိုင်း လိုက်နာအသုံးပြုတတ်စေရန်၊ စိုက်ပျိုးရေးသုံး ပစ္စည်းရောင်းချသောလုပ်ငန်းရှင်များကလည်း ဥပဒေ၊ နည်းဥပဒေများကို လေးစားလိုက်နာ ဆောင်ရွက်ရောင်းချသွားရန်ကို အသိပညာပေး ဆွေးနွေးခဲ့ပါသည်။

    Good Brother  ကုမ္ပဏီလီမိတက်မှ တာဝန်ရှိသူတစ်ဦးမှ ဆွေးနွေးပြောကြားရာ မိမိကို ကုမ္ပဏီအနေဖြင့် တောင်သူများ ဈေးနှုန်းသက်သာစေရန်ရည်ရွယ်၍ ဆန်တစ်ပြည် ၃၀၀၀နှုန်းဖြင့် လွတ်လပ်စွာဝယ်ယူနိုင်ရန် နေ့စဉ်ရောင်းချပေးလျက်ရှိပါကြောင်း၊ ကုမ္ပဏီမှ တောင်သူများ လက်မှုလယ်ယာမှ စက်မှုလယ်ယာသို့ ကူးပြောင်းနိုင်စေရန် လယ်ယာသုံးစက်ပစ္စည်းများကို ဈေးနှုန်း ချိုသာစွာဖြင့် အရစ်ကျစနစ်ဖြင့် တောင်သူများကိုရောင်းချပေးလျက်ရှိကြောင်း၊ တောင်သူများထံမှ အရည်အသွေးကောင်း စပါးများဝယ်ယူ၍ ကောင်းမွန်သောစက်ကြီးများဖြင့် ဆန်အရည်အသွေး မြင့်မားစေရန် ကြိတ်ခွဲထုတ်လုပ်ပေးလျက်ရှိပါကြောင်း၊ ဒေသတွင်ပြည်သူများအတွက် လိုအပ်ချက်အရ ဈေးနှုန်းချိုသာစွာဖြင့် ‌ရောင်းချပေးသွားမည်ဖြစ်ကြောင်း ဆွေးနွေးခဲ့ပါ သည်။

    နိဂုံးချုပ်အနေဖြင့် စားသုံးသူရေးရာဦးစီးဌာနမှ မည်သည့်စီးပွားရေးလုပ်ငန်းရှင်မဆို သက်ဆိုင်ရာဌာနများ၏ လမ်းညွှန်ချက်၊ အမိန့်၊ ထုတ်ပြန်ချက်၊ ဥပဒေ၊ နည်းဥပဒေများကို လေးစားလိုက်နာကြရန်၊ ဆန်ရောင်းချသူလုပ်ငန်ရှင်များအနေဖြင့် မြန်မာနိုင်ငံဆန်စပါးအသင်းချုပ်မှ သတ်မှတ်ပေးသော ရည်ညွှန်းဈေးဖြင့်သာ ပြည်သူများကို ဈေးနှုန်းသက်သာစွာ ရောင်းချပေးရန်၊ ဓါတ်မြေဩဇာအိတ်ရောင်းချသူ လုပ်ငန်းရှင်များသည်လည်း သတ်မှတ်ရည်ညွှန်းဈေးအတိုင်း ရောင်းချရန်၊ ကုန်အညွှန်းအမှတ်အသားပြည်စုံစွာ ပါဝင်သောကုန်စည်ကိုရောင်းချရန်၊ သက်ဆိုင်ရာ ဌာနတို့၏ ခွင့်ပြုချက်၊ ထောက်ခံချက်ပါသောကုန်စည်များကိုသာရောင်းချရန်၊ တောင်သူများအနေဖြင့်လည်း သတင်းအချက်အလက်ပြည့်စုံမှန်ကုန်သော ကုန်စည်ကို ရွေးချယ်ဝယ်ယူသုံးစွဲပြီး မိမိအခွင့်အရေးကို သိရှိထားပြီး ကုန်စည်တွင်ပါဝင်သော သတင်းအချက်အလက် နည်းလမ်းများအတိုင်းသာ လယ်ယာမြေသုံးမြေဩဇာကို လိုက်နာသုံးစွဲမှသာ အထွက်နှုန်းကောင်းမည်ဖြစ်ကြောင်း၊ မြို့နယ်တိုင်းတွင် ကုန်ဈေးနှုန်းတည်ငြိမ်ကျဆင်းရေးအဖွဲ့ကို ဖွဲ့စည်းထားပြီး ထိုအဖွဲ့မှလိုက်လံစစ်ဆေးသည့်အခါ ဈေးနှုန်းကြီးမြင့်စွာ ရောင်းချနေခြင်းများ စစ်ဆေးတွေ့ရှိပါက ထိရောက်စွာအရေးယူခံရမည်ဖြစ်ကြောင်းကို အကျယ်တဝင့် ဆွေးနွေးခဲ့သည်။ တက်ရောက်လာသူတောင်သူများမှ သိလိုသည်များကို မေးမြန်းကြပြီး ပြန်လည်ရှင်းလင်းဆွေးနွေးကာ Good Brother  ကုမ္ပဏီမှ တောင်သူများကို ဓါတ်မြေဩဇာ ၅ အိတ် ကံစမ်းမဲဖောက်ပေးပြီး တောင်သူ ၅ ဦး မှ ဓါတ်မြေဩဇာ ၅အိတ်ကို လက်ခံရယူပြီး အစားအသောက်များဖြင့် ဧည့်ခံကာ ဆွေးနွေးပွဲကို နေ့လယ် (၁၃:၀၀)နာရီတွင် ရုတ်သိမ်းခဲ့ကြောင်း သတင်းရရှိပါသည်။

DOCA(ဧရာဝတီ)

      ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးမောင်မောင်ခိုင်သည် ဗန်းမော်ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ၈-၇-၂၀၂၄ရက်နေ့တွင် ဗန်းမော်မြို့၊ ညောင်ပင်ရပ်ရပ်ကွက်ရှိ အမှတ်(၃) အခြေခံပညာအထက်တန်းကျောင်း၊ မြဝတီခန်းမ၌ စားသုံးသူကာကွယ်ရေးအသိပညာ‌ပေးဟောပြောပွဲပြုလုပ်ကျင်းပခဲ့ပါသည်။

        အဆိုပါဟောပြောပွဲတွင် ကျောင်းအုပ်ဆရာမကြီးက အဖွင့်အမှာစကားပြောကြားခြင်း၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူးက စာကြည့်တိုက်များဖွံ့ဖြိုးတိုးတက်ရေးနှင့် စာအုပ်စာပေဖတ်ရှုခြင်းသိကောင်းစရာများအကြောင်းတို့ကိုပြောကြားခဲ့ပြီး၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးမောင်မောင်ခိုင်က မိမိဌာန၏ ယခုလက်ရှိဆောင်ရွက်နေသောလုပ်ငန်းများ၊ ဌာန၏ရည်မှန်းချက်၊ မျှော်မှန်းချက်များ၊ စားသုံးသူကာကွယ်ရေးဥပဒေပါ စားသုံးသူ၏အဓိပ္ပါယ်ဖွင့်ဆိုချက်၊ စားသုံးသူ၏အခွင့်အရေးနှင့်တာဝန်များ၊ စားသုံးသူများသည် ကုန်စည်နှင့်ဝန်ဆောင်မှုများကို ဝယ်ယူအသုံးပြုရာတွင် ထိခိုက်နစ်နာမှုများရှိပါက တိုင်ကြားနိုင်ကြောင်းနှင့် တိုင်ကြားနိုင်သည့်နည်းလမ်းများကိုရှင်းလင်းပြောကြားခဲ့ပြီး ကျောင်းသား/သူများအား ကုန်စည်များဝယ်ယူသုံးစွဲရာတွင် ကုန်အညွှန်းအမှတ်အသားပြည့်စုံမှန်ကန်မှုရှိသော ကုန်စည်များကိုရွေးချယ်ဝယ်ယူကြရန် အသိပညာပေးဟောပြောခဲ့ပါသည်။

         ဟောပြောပွဲသို့ ဆရာ/မ (၇)ဦး၊ ကျောင်းသား/သူ (၂၃၅)ဦး၊ စုစုပေါင်း (၂၄၂)ဦးတက်ရောက်ခဲ့ကြပြီး ကျောင်းအုပ်ဆရာမကြီးထံသို့ စားသုံးသူကာကွယ်ရေးအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ကချင်)

      စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးတင်မောင်ထွန်း(ရုံးအုပ်)သည် ၈-၇-၂၀၂၄ ရက်နေ့တွင် မြစ်ကြီးနားမြို့၊ အင်ဂျန်ဒုံရပ်ကွက်ရှိ ဒေါ်ရွှေတူးကုန်စုံဆိုင်သို့သွားရောက်၍ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်း မှတ်အသားဖော်ပြခြင်းနှင့်ပတ်သက်၍ ကိုက်ညီမှုရှိ / မရှိ ဈေးကွက်စောင့်ကြည့်စစ်ဆေးခဲ့ပါသည်။

        ထိုသို့ဈေးကွက်စောင့်ကြည့်စစ်ဆေးရာတွင် PLATINUM အမှတ်တံဆိပ်ပါ မြန်မာ့နို့လက်ဘက်ရည်၌ ညွှန်ကြားချက်အမှတ် (၂/၂၀၁၉)အရ ကုန်စည်ပေါ်တွင် မြန်မာဘာသာဖြင့် ဖော်ပြရမည့်အမျိုးအမည်၊ အရွယ်အစား၊ အရေအတွက်၊ အသားတင်ပမာဏနှင့်သုံးစွဲပုံနည်းတို့ ပြည့်စုံစွာဖော်ပြပါရှိကြောင်းစစ်‌ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသားပြည့်စုံမှုမရှိသည့်ကုန်စည်များ ဈေးကွက်အတွင်း မရောင်းချရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ကချင်)

    စားသုံးသူရေးရာဦးစီးဌာန၊ တာချီလိတ်မြို့နယ်တာဝန်ခံရုံးမှ စစ်ဆေးရေးမှူးနှင့်ဝန်ထမ်းများသည် ၂၀၂၄ခုနှစ်၊ ဇူလိုင်လ(၅)ရက်နေ့၊ နံနက်(၀၉း၃၀)နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ ကျန်းမာရေးဌာန၊  မြို့နယ်အစားအသောက်နှင့်ဆေးဝါးကွပ်ကဲရေးဦးစီးဌာန၊   မြို့နယ်စည်ပင်သာယာရေးဌာနတို့မှ ဝန်ထမ်းများနှင့်ပူးပေါင်း၍ တာချီလိတ်မြို့နယ်၊ ဝိန်းကျောက်ရပ်ကွက်အတွင်းရှိ ဆေးနှင့်ဆေးပစ္စည်းအရောင်းဆိုင်(၇)ဆိုင်အား တရားမဝင်တင်သွင်းထားသောဆေးဝါးများရောင်းချခြင်းရှိ/မရှိ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ပါသည်။

         ထိုသို့ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် တာချီလိတ်မြို့နယ်အတွင်းရှိ ဆေးနှင့်ဆေးပစ္စည်းအရောင်းဆိုင်များ၌ တရားမဝင်တင်သွင်းထားသော ဆေးနှင့်ဆေးပစ္စည်းများ ရောင်းချနေခြင်းမရှိသည်ကိုစစ်ဆေးတွေ့ရှိခဲ့ရပြီး ထို့နောက် စစ်ဆေးရေးမှူးနှင့်တာဝန်ရှိသူများက ဆေးဆိုင်ပိုင်ရှင်များအား တရားမဝင်တင်သွင်းထားသော ဆေးနှင့်ဆေးပစ္စည်းများကိုရောင်းချခြင်းမပြုရန်၊ ဆေးဝါးများအား စနစ်တကျထားသိုရန်၊ ဈေးနှုန်းများမြှင့်တင်ရောင်းချခြင်းမပြုရန်နှင့် စားသုံးသူကာကွယ်ရေးဥပဒေ အခန်း(၁၈)ပါ “ကုန်အညွှန်းအမှတ်အသားဖော်ပြခြင်း”၊ အခန်း(၁၀)ပါ “စီးပွားရေးလုပ်ငန်းရှင်၏ တာဝန်များ”ကို လိုက်နာဆောင်ရွက်ရန်ဆွေးနွေးခဲ့ကြောင်းသိရှိရပါသည်။

DOCA(ရှမ်း)

    ပြည်နယ်ကုန်ဈေးနှုန်းတည်ငြိမ်ရေးလုပ်ငန်းအဖွဲ့၊ အဖွဲ့ဝင်ဌာနဆိုင်ရာများဖြစ်သော စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ ဗဟိုစာရင်းအင်းဦးစီးဌာန၊ စည်ပင်သာယာရေးဦးစီးဌာန၊ အထူးစုံစမ်းစစ်ဆေးရေးဦးစီးဌာနတို့ပါဝင်သော ပူးပေါင်းအဖွဲ့များဖြင့်  ၄-၇-၂၀၂၄ ရက်နေ့၊ နေ့လယ်(၁၃:၀၀)နာရီအချိန်တွင်တောင်ကြီးမြို့ပေါ်ရှိ ဆန်အရောင်းဆိုင်(၃)ဆိုင်နှင့် စားသုံးဆီအရောင်းဆိုင်(၁)ဆိုင်တို့အား ရှောင်တခင်ကွင်းဆင်းစစ်ဆေးဆောင်ရွက်ခဲ့ပါသည်။

    ထိုသို့ကွင်းဆင်းစစ်ဆေးဆောင်ရွက်ရာတွင် ဆန်အရောင်းဆိုင်များအနေဖြင့် မြန်မာနိုင်ငံဆန်စပါးအသင်းချုပ်က ထုတ်ပြန်ထားသော သင့်တင့်မျှတသည့်ဈေးကွက်ဈေးနှုန်း (Reasonable Market Price) အပေါ် သယ်ယူပို့ဆောင်ခနှင့် အထွေထွေကုန်ကျစရိတ်ထည့်ပေါင်း၍ ဖြစ်သင့်ဖြစ်ထိုက်သည့်ဈေးနှုန်းဖြင့် ရောင်းချမှုရှိ/မရှိနှင့် ဈေးနှုန်းအဆမတန်မြှင့်တင်ရောင်းချခြင်းမရှိစေရေး၊ စားသုံးဆီရောင်းချနေသည့် လက်လီအရောင်းဆိုင်များအနေဖြင့် သက်မှတ်ရည်ညွှန်းဈေးထက် မြှင့်တင်ရောင်းချခြင်းမရှိစေရေးတို့ကို စစ်ဆေးကြပ်မတ်ဆောင်ရွက်ခဲ့ပါသည်။

         ထို့နောက် ဆန်အရောင်းဆိုင်များအနေဖြင့် သင့်တင့်မျှတသော ဈေးနှုန်းများဖြင့်သာရောင်းချရန်နှင့် စားသုံးဆီ လက်လီအရောင်းဆိုင်များအနေဖြင့် သက်မှတ်ရည်ညွှန်းဈေးထက် အဆမတန်မြှင့်တင်ရောင်းချခြင်းမပြုရန် စသည်တို့ကို အသိပညာပေးဆောင်ရွက်ခဲ့ကြောင်း သတင်းရရှိပါသည်။

DOCA(ရှမ်း)