တိုင်းဒေသကြီးဝန်ကြီးချုပ် မြန်မာ့ခရီးသွားဘဏ်နှင့် ဧရာဝတီတိုင်းဒေသကြီးဆောက်လုပ်ရေးလုပ်ငန်းရှင်များအသင်း၏ MOUလက်မှတ်ရေးထိုးပွဲအခမ်းအနားသို့တက်ရောက်
မြန်မာ့ခရီးသွားဘဏ်နှင့် ဧရာဝတီတိုင်းဒေသကြီး ဆောက်လုပ ်ရေး လုပ်ငန်းရှင်များအသင်း၏ MOU လက်မှတ်ရေးထိုးပွဲအခမ်းအနားကို ယနေ့နံနက်ပိုင်းက ပုသိမ်မြို့၊ ပုသိမ်ဟိုတယ်တွင်ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့် ဇနီး၊ အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ ဌာနဆိုင်ရာများ၊ ဖိတ်ကြားထားသောဧည့်သည်တော်များ တက်ရောက်ခဲ့ကြသည်။
ဦးစွာ တိုင်းဒေသကြီးဝန်ကြီးချုပ်က ယနေ့သည် မြန်မာ့ခရီးသွားဘဏ်နှင့် ဧရာဝတီတိုင်းဒေသကြီးဆောက်လုပ်ရေးလုပ်ငန်းရှင်များအသင်း၏ MOUလက်မှတ်ရေးထိုး နိုင်ခြင်းဖြစ်၍ တိုင်းဒေသကြီးအတွက် မင်္ဂလာရှိသည့်နေ့ဟု ပြောရမည်ဖြစ်ပါကြောင်း၊ ယခုကဲ့သို့ MOUလက်မှတ်ရေးထိုးနိုင်ခဲ့သဖြင့် ခရီးသွားလုပ်ငန်း၊ ဆောက်လုပ်ရေးလုပ်ငန်းများသာမက ကျန်ကဏ္ဍနယ်ပယ်အသီးသီးအတွက်လည်း အထောက်အကူပြုမည်ဖြစ်ပါကြောင်း၊ ဧရာဝတီတိုင်းဒေသကြီးသည် တည်ငြိမ်အေးချမ်းမှုရှိပြီး ရန်ကုန်မြို့နှင့်အနီးဆုံးဖြစ်၍ ပြည်တွင်း၊ ပြည်ပ ခရီးသွားလုပ်ငန်းများ ဖွံ့ဖြိုးတိုးတက်သည့် တိုင်းဒေသကြီးဖြစ်ပါကြောင်း၊ တိုင်းဒေသကြီးတွင် ချောင်းသာ၊ ရွှေသောင်ယံ၊ ငွေဆောင်၊ ဂေါ်ရန်ဂျီ စသည့်ကမ်းခြေများ၊ တန်ခိုးကြီးစေတီပုထိုးများ၊ အထင်ကရနေရာများလည်း များစွာရှိပါကြောင်း၊ ဧရာဝတီတိုင်း ဒေသကြီးအစိုးရအဖွဲ့အနေနှင့် ဘက်စုံဖွံ့ဖြိုး တိုးတက်ရေးအတွက် လူမှုစီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရန်နှင့် တိုင်းဒေသကြီးအတွင်းရှိ ပုဂ္ဂလိကဆောက်လုပ်ရေးလုပ်ငန်းရှင်များ အခန်းကဏ္ဍ ဘက်စုံဖွံ့ဖြိုးတိုးတက်နိုင်ရန် ဆောင်ရွက်လျက်ရှိပါကြောင်းနှင့် မိမိတို့ တိုင်းဒေသကြီး ဘက်စုံကဏ္ဍစုံဖွံ့ဖြိုးတိုးတက်စေရေးအတွက် ဝိုင်းဝန်းကြိုးပမ်းဆောင်ရွက်ပေးကြရန် ဂုဏ်ပြုအမှာစကားပြောကြားခဲ့ပြီးနောက် တာဝန်ရှိသူများက ဧရာဝတီတိုင်း ဒေသကြီး၏ အားကစားဖွံ့ဖြိုးတိုးတက်ရေးနှင့် အမျိုးသမီးဘောလုံးအသင်း အောင်နိုင်ရေး ရန်ပုံငွေများပေးအပ်ရာ တိုင်းဒေသကြီးဝန်ကြီးချုပ်က လက်ခံရယူခဲ့သည်။ ထို့နောက် မြန်မာ့ခရီးသွား ဘဏ်ဥက္ကဋ္ဌ၊ ဧရာဝတီတိုင်းဒေသကြီးဆောက်လုပ်ရေး လုပ်ငန်းရှင်များ အသင်းဥက္ကဋ္ဌနှင့် အတွင်းရေးမှူးတို့က မိတ်ဆက်စကားများ အသီးသီးပြောကြားခဲ့ကြသည်။
ဆက်လက်၍ မြန်မာ့ခရီးသွားဘဏ်နှင့် ဧရာဝတီတိုင်းဒေသကြီး ဆောက်လုပ်ရေးလုပ်ငန်းရှင် များအသင်းမှ တာဝန်ရှိသူများက MOUလက်မှတ်ရေးထိုးကြကာ အမှတ်တရ လက်ဆောင်ပစ္စည်းများ အပြန်အလှန်ပေးအပ်ခဲ့ကြပြီး တိုင်းဒေသကြီးဝန်ကြီးချုပ်နှင့် ဧည့်သည်တော်များသည် စုပေါင်းမှတ်တမ်းတင် ဓာတ်ပုံရိုက်ကူးခဲ့ကြသည်။
DOCA(ဧရာဝတီ)
