သတင်းနှင့် လှုပ်ရှားမှုများ

      ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဂယက်လမီးကျေးရွာ အခြေခံပညာမူလတန်းကျောင်းတွင် စားသုံးသူကာကွယ်ရေးအသိပညာပေးဟောပြောပွဲကို စက်တင်ဘာလ(၂၀)ရက်နေ့၊ နေ့လယ်(၁၃:၃၀)နာရီအချိန်တွင် ကျင်းပခဲ့ကြောင်းသိရသည်။

   အဆိုပါစားသုံးသူကာကွယ်ရေးအသိပညာပေးဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ အကြီးတန်းစာရေး ဦးအာကာမင်းက အ.မ.က ဂယက်လမီးကျောင်းရှိ ကျောင်းသား/ ကျောင်းသူများအား စားသုံးသူကာကွယ်ရေးဥပဒေပါ စားသုံးသူအခွင့်အရေးများဖြစ်သည့် စားသုံးသူ၏အခြေခံလိုအပ်ချက်များပြည့်စုံနိုင်စေမှု၊ လုံခြုံစိတ်ချစွာ ဘေးအန္တရာယ်ကင်းရှင်းနိုင်စေမှု၊ သတင်းအချက်အလက်ပြည့်စုံစွာရရှိနိုင်စေမှု၊ လွတ်လပ်စွာရွေးချယ်နိုင်စေမှု၊ နစ်နာဆုံးရှုံးမှုများအတွက် ပြောဆိုတင်ပြကြားနာနိုင်စေမှု စသည့်စားသုံးသူအခွင့်အရေးပါအချက်များနှင့် လိုက်နာဆောင်ရွက်သင့်သည့် စားသုံးသူ၏တာဝန်များ၊ စားသုံးသူပြည်သူများအနေဖြင့် ကုန်ပစ္စည်းနှင့်ဝန်ဆောင်မှုများဝယ်ယူသုံးစွဲခြင်းမပြုမီ သတိပြုဆောင်ရွက်ရမည့်အချက်များ၊ ကုန်ပစ္စည်းတစ်ခုခြင်းစီ၌ ဖော်ပြပါရှိသည့်ကုန်အညွှန်းအမှတ်အသားများအား သေချာဖတ်ရှုဝယ်ယူသုံးစွဲပါရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာန(FDA)၏ ထောက်ခံချက်ရရှိထားသော ကုန်ပစ္စည်းများအား ရွေးချယ်ဝယ်ယူသုံးစွဲသင့်ကြောင်း စသည်တို့ကို ကျောင်းသား/သူများအား စားသုံးသူကာကွယ်ရေးအသိပညာပေးဆွေးနွေးပြောကြားခဲ့ကြောင်းသိရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ စက်သုံးဆီအရောင်းဆိုင်များတွင် စက်သုံးဆီခွဲတမ်းရရှိမှုနှင့် ဖြန့်ဖြူးရောင်းချမှုအခြေအနေအား စက်တင်ဘာလ (၂၂)ရက်နေ့၊ နေ့လယ်(၁၃း၀၀)နာရီအချိန်တွင် စက်သုံးဆီဆိုင်များသို့ အဖွဲ့စုံဖြင့် သွားရောက်ကွင်းဆင်းစစ်ဆေးခဲ့ကြောင်းသိရသည်။

      ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင် ကော့မှူးမြို့နယ်စီမံအုပ်ချုပ်ရေးအဖွဲ့ဝင်(၁)၊ မြို့နယ်အထွေထွေအုပ်ချုပ်ရေးဦးစီးဌာနမှ ခေတ္တမြို့နယ်အုပ်ချုပ်ရေးမှူးနှင့် ဝန်ထမ်းများ၊ မြို့နယ်ရဲတပ်ဖွဲ့မှူးနှင့်တပ်ဖွဲ့ဝင်များ၊ မီးသတ်ဦးစီးဌာနမှမြို့နယ်ဦးစီးမှူး၊ လျှပ်စစ်ဦးစီးဌာနမှ မြို့နယ်ဦးစီးမှူး၊ စည်ပင်သာယာရေးအဖွဲ့မှ အမှုဆောင်အရာရှိနှင့်ဝန်ထမ်းများ၊ မြို့နယ်သတင်းတပ်ဖွဲ့မှ တာဝန်ရှိသူများနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ကော့မှူးမြို့နယ်၊ ဗိုလ်ချုပ်လမ်းမကြီး၊ မကျီးကန်ကျေးရွာရှိ Apex စက်သုံးဆီဆိုင်၊ ဗိုလ်ချုပ်လမ်းမကြီး၊ ဇလုပ်ကြီးကျေးရွာရှိ Max ဆီဆိုင်များတွင် ယာဉ်တန်းစီ စောင့်ဆိုင်းဝယ်ယူနေရခြင်းရှိ/မရှိ၊ စက်သုံးဆီအမျိုးအစားအလိုက် ခွဲတမ်းအချိုးကျစနစ်ဖြင့် ရောင်းချနေခြင်းရှိ/မရှိ၊ စက်သုံးဆီအရောင်းဆိုင်၏ PO ခွင့်ပြုချက်ရရှိပြီးသော စက်သုံးဆီအမျိုးအစားအလိုက် ဂါလံ၊ မည်သည့် Terminal (ဆီကန်)မှထုတ်ယူခဲ့ပြီး ဆိုင်သို့ရောက်ရှိသည့်အချိန်တို့အား စနစ်တကျထားရှိခြင်းရှိ/မရှိနှင့် စက်သုံးဆီအမျိုးအစားအလိုက် လက်ကျန်အခြေအနေတို့အား ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လမ်းညွှန်မှုအရ အလုံခရိုင်၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့  ဦးဇော်မင်းလတ်၊ ခရိုင်ဦးစီးမှူးဦးဆောင် သော ပူးပေါင်းအဖွဲ့သည်  ၁၇-၉-၂၀၂၄ ရက်နေ့မှ ၂၃.၉.၂၀၂၄ ရက်နေ့အထိ ကမ်းရိုးတန်းသွားရေယာဉ်များဆိုက်ကပ်သည့် ဆိပ်ကမ်းများဖြစ်သော သိန်းဦးဆိပ်ကမ်း၊ ဝါးတန်းဆိပ်ကမ်း၊ ချောင်းဝဆိပ်ကမ်း၊ ဘုရင့်နောင်ဆိပ်ကမ်း၊ ဗားကရာဆိပ်ကမ်း၊ ထူးဆိပ်ကမ်းများအား အကောက်ခွန်ဦးစီးဌာန၊ စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ စွမ်းအင်ဝန်ကြီးဌာန၊  မြန်မာ့ဆိပ်ကမ်းအာဏာပိုင်၊ အမှတ်(၃) ရေကြောင်းရဲတပ်ဖွဲ့ စသည့် ပူးပေါင်းအဖွဲ့များနှင့်ပူးပေါင်း၍ ရေယာဉ်များတွင် တင်ဆောင်ထားသော တင်ဆောင်ကုန်များအား ရှောင်တခင်ဝင်ရောက်စစ်ဆေးခဲ့ပြီး လက်နက်ခဲယမ်းများတင်ဆောင်မှုမရှိစေရေးအတွက် ရဲတပ်ဖွဲ့နှင့်ပူးပေါင်း၍ စစ်ဆေးမှုများပြုလုပ်ခဲ့ကြောင်း သတင်းရရှိပါသည်။

DOCA(ရန်ကုန်)

       ဧရာဝတီတိုင်းဒေသကြီး စားသုံးသူရေးရာဦးစီးဌာန တိုင်ဦးစီးမှူးရုံးတွင် (၁၈.၉.၂၀၂၄)ရက်နေ့တွင် စားသုံးသူရေးရာဌာနခွဲမှ သင်တန်းအမှတ်စဉ် (၂/၂၀၂၄) ဖွင့်လှစ်ဆောင်ရွက်၍ စားသုံးသူကာကွယ်ရေးဆိုင်ရာ အသိပညာဗဟုသုတများ ၊ လက်ရှိအရေးယူဆောင်ရွက်မှုများ ၊ထုတ်ကုန်လုံခြုံစိတ်ချရမှုအခြေအနေများအား သင်တန်းပို့ချဆောင်ရွက်ခဲ့ပြီး မှတ်တမ်းဓာတ်ပုံများ ရိုက်ကူးခဲ့ပါသည်။

     (၁၈.၉.၂၀၂၄)ရက်နေ့တွင်သင်တန်းအမှတ်စဉ် (၂/၂၀၂၄) ဖွင့်လှစ်ဆောင်ရွက်၍ စားသုံးသူရေးရာဌာနခွဲမှ စားသုံးသူကာကွယ်ရေးနှင့် အသိပညာပေးခြင်း၊ online မှတ်ပုံတင်ခြင်း ဆိုင်ရာလုပ်ငန်း စွမ်းဆောင်ရည်မြှင့်တင်ရေးသင်တန်းသို့ ဧရာဝတီတိုင်း ဒေသကြီး ၊ တိုင်းဦးစီး မှူးရုံးမှ ဝန်ထမ်း (၃၇) ဦးတက်ရောက်ခဲ့ပါသည်။

      ပထမဦးစွာ တိုင်းဒေသကြီးဦးစီးမှူးဦးဇေယျာဆွေမှ အဖွင့်အမှာစကားပြောကြားခဲ့ပါသည်။ ထို့နောက်ဒုတိုင်းဦးစီးမှူးဦးထွန်းထွန်းမှ online မှတ်ပုံတင်ခြင်းဆိုင်ရာ ကိစ္စရပ်များကို ရှင်းလင်း ပြောကြားသင်တန်းပို့ချခဲ့ပါသည်။ ဆက်လက်၍ စားသုံးသူရေးရာဌာနခွဲမှ ဌာနခွဲတာဝန်ခံ   ဦးကျော်စိုးရီက စားသုံးသူအကြောင်း သိကောင်းစရာများ၊ CICC ကိစ္စရပ်များအား ပို့ချခဲ့ပါသည်။ ထုတ်ကုန်လုံခြုံစိတ်ချရမှုဌာနခွဲမှ ဦးစီးမှူး ဒေါ်မိုးမိုးခိုင်မှ ဈေးကွက်စောင့်ကြည့်စစ်ဆေးခြင်း၊ လုပ်ငန်းရှင်အသိပညာပေးခြင်းကုန်ညွှန်းစိစစ်ခွင့်ပြုခြင်းများကို ပို့ချခဲ့ပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲတာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် ဝန်ထမ်းများသည် (၂၅.၉.၂၀၂၄)ရက်နေ့ နံနက် (၀၉:၃၀)နာရီအချိန်တွင် မင်းလမ်းမပေါ်ရှိ အမှတ်(၃)အခြေခံပညာအထက်တန်းကျောင်းတွင် စားသုံးသူကာကွယ်ရေး အသိပညာပေးဟောပြောဆွေးနွေးပွဲ ကျင်းပပြုလုပ်ခဲ့ပါသည်။

     အဆိုပါ အသိပညာပေးဟောပြောဆွေးနွေးပွဲတွင် ပထမဦးစွာ ကျောင်းအုပ်ဆရာကြီးမှ အဖွင့်အမှာစကားပြောကြားပြီး ထုတ်ကုန်လုံခြုံစိတ်ချရမှုဌာနခွဲတာဝန်ခံ ဦးကျော်ဆန်းဝင်းမှ စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးကာကွယ်ရေးဥပဒေပြဌာန်းချက်ပါ စားသုံးသူများ၏အခွင့်အ‌ရေးနှင့် တာဝန်များကို အကျယ်တဝင့်ရှင်းလင်းပြောကြားခဲ့ပါသည်။ ဆက်လက်၍ စားသုံးသူရေးရာဌာနခွဲ တာဝန်ခံ ဦးစိုးမိုးမှ အွန်လိုင်းမှ တဆင့်ဝယ်ယူရောင်းချခြင်းနှင့်စပ်လျဉ်း၍ သိကောင်းစရာများ၊ အွန်လိုင်း မှ ဈေးဝယ်ယူခြင်း၏ အားသာချက်၊ အားနည်းချက်များ၊ အွန်လိုင်းမှ လိမ်လည်မှုများ၊ စားသုံးသူများ အနေဖြင့် အွန်လိုင်းမှဈေးဝယ်ယူရာတွင် စိစစ်သင့်သည့် အချက်အလက်များအား ရှင်းလင်းပြောကြားပြီး အွန်လိုင်းရောင်းဝယ်မှုပြုလုပ်မည်ဆိုပါက မှတ်ပုံတင်ခြင်းဆိုင်ရာနည်းလမ်းများအား အကျယ်တဝင့်ရှင်းလင်းပြောကြားခဲ့ပါသည်။

        အဆိုပါဟောပြောဆွေးနွေးပွဲသို့ အထက်တန်းကျောင်းသား/ ကျောင်းသူ(၂၅၀)ဦးနှင့် ဆရာ/ ဆရာမ (၄၅)ဦး တက်ရောက်ကာ ဟောပြောဆွေးနွေးပွဲအား (၁၁:၄၅) နာရီအချိန်တွင် ပြီးမြောက်ကြောင်း သိရှိရပါသည်။

DOCA(ပဲခူး)