သတင်းနှင့် လှုပ်ရှားမှုများ

မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် ပဲမျိုးစုံအရောင်းအဝယ်ဖြစ်လျက်ရှိရာ ၂၀၂၅ခုနှစ်၊ ဇူလိုင်လ(ပထမပတ်)အစောပိုင်းတွင် ပြည်တွင်းသုံးကုလားပဲဈေးငြိမ်၍ အရောင်းအဝယ် ဖြစ်လျက်ရှိပြီး ဈေးကွက်သို့ ကုလားပဲသီးနှံ စိုက်ပျိုးရာဒေသများဖြစ်သော ပခုက္ကူမြို့နယ်အတွင်းရှိ ကျေးရွာများ၊ မြစ်ခြေ၊ ကမ္မ၊ မြိုင်၊ ပေါက်၊ ရေစကြို မြို့နယ်တွင်းရှိ ကျေးရွာများအပြင် မန္တလေးတိုင်းဒေသကြီး၊ ညောင်ဦးမြို့နယ်အတွင်းရှိ ကျေးရွာများနှင့် စစ်ကိုင်းတိုင်းဒေသကြီး အတွင်းရှိကျေးရွာများမှ အများဆုံးဝင်ရောက် အရောင်းအဝယ်ဖြစ်ကြောင်း၊ ယခုအချိန်တွင် တောင်သူ များတွင် သီးနှံလက်ကျန်နည်းချိန်ရောက်ရှိပြီး ကုန်သည်ကြီးများမှ ဝယ်ယူသိုလှောင်ထားရှိသော ကုလားပဲများကို ရောင်းချဖြန့်ဖြူးလျက်ရှိကြောင်း သိရှိရသည်။ ၂၀၂၅ခုနှစ်၊ ဇူလိုင်လ(ပထမပတ်)တွင် ကုလားပဲမျိုးစုံ အရောင်းအဝယ်ဖြစ်လျက်ရှိရာ ဈေးနှုန်းအနေဖြင့် (V2)တစ်တင်းလျှင် ကျပ်(၈၉၀၀၀-၈၈၅၀၀)၊ ကုလားပဲ(V6) တစ်တင်းလျှင် ကျပ် (၉၀၀၀၀-၈၈၀၀၀)၊ ကုလားပဲ(HL) တစ်တင်းလျှင် ကျပ်(၈၇၀၀၀)၊ ကုလားပဲ(929) တစ်တင်းလျှင် ကျပ်(၈၈၀၀၀) အရောင်းအဝယ်ဖြစ်ခဲ့ပြီး ယခင်ဇွန်လ(စတုတ္ထပတ်)နှင့် ဈေးနှုန်းနှိုင်းယှဉ်ပါက ဈေးငြိမ်၍ အရောင်းအဝယ်ဖြစ်လျက်ရှိကြောင်း၊ ပွဲရုံဈေးကွက်တွင် နေ့စဉ် ပိဿာ(၂၀)ဝင်အိတ် (၁၅၀၀ မှ ၂၀၀၀)ခန့်ထိ အရောင်းအဝယ်ဖြစ်ကြောင်း၊ ပခုက္ကူပွဲရုံ ဈေးကွက်သို့ ဝင်ရောက်သည့် ကုလားပဲများကို တန်ဖိုးမြှင့်ထုတ်ကုန် အမျိုးမျိုး ထုတ်လုပ်လျက်ရှိသော မြို့ပေါ်ရှိ ပဲခွဲစက်လုပ်ငန်း ရှင်များ၊ ပဲကြော်/ပဲမုန့် (အစိမ်း/အကျက်)ထုတ်လုပ်သော လုပ်ငန်းရှင်များမှ ဝယ်ယူမှုများကြောင်း၊ ကုလားပဲဈေးမြင့်တက်၍ ကုလားပဲခြမ်းများလည်း တစ်ပြည်လျှင် ကျပ်(၈၀၀၀)ဈေးဖြင့် အရောင်း အဝယ်ဖြစ်ကြောင်း၊ ဒေသတွင်း ဝယ်ယူသုံးစွဲမှုအပြင် ရန်ကုန်၊ မန္တလေး ဈေးကွက်သို့ အများဆုံး တင်ပို့ကြောင်း၊ ကုလားပဲသီးနှံသည် ကျန်းမာရေးနှင့်ညီညွတ်ပြီး ပြည်တွင်းစားသုံးမှုများ၍ ယခု အချိန်တွင် ရောင်းလိုအားဝယ်လိုအားကောင်းပြီး အရောင်းအဝယ်သွက်လျက်ရှိကြောင်း မြို့ပေါ်ရှိ ပဲရောင်းဝယ်ရေး လုပ်ငန်းရှင်တစ်ဦးထံမှ သိရှိရပါသည်။ DOCA(မကွေး)

ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်နှင့် ဝန်ထမ်းတို့သည် စည်ပင်သာယာရေးအဖွဲ့နှင့် ပူးပေါင်း၍ ၂၀၂၅ ခုနှစ်၊ ဇူလိုင်လ(၂) ရက်နေ့၊ နံနက် (၁၀:၀၀) နာရီအချိန်တွင် ဒေးဒရဲမြို့မဈေးအတွင်းရှိ မုန့်မျိုးစုံ အရောင်းဆိုင်များတွင် ရောင်းချနေသော မုန့်များအား ကုန်အညွှန်းအမှတ်အသား ပြည့်စုံမှုရှိ/မရှိ ကွင်းဆင်း စစ်ဆေးခဲ့ကြပါသည်။ အဆိုပါကွင်းဆင်းစစ်ဆေးရာတွင် မြို့မဈေးအတွင်း ရောင်းချနေသော အသင့်စားမုန့် အမျိုးမျိုး တွင် စားသုံးသူများ ဘေးအန္တရာယ်ကင်းရှင်းစေရေးအတွက် FDA ထောက်ခံချက်အမှတ်၊ ထုတ်လုပ်သည့် ရက်စွဲ၊ သက်တမ်း ကုန်ဆုံးသည့်ရက်စွဲ၊ ပါဝင်ပစ္စည်း ဖော်ပြထားရှိမှု၊ မြန်မာဘာသာ ဖြင့် ဖော်ပြထားရှိမှု အခြေအနေတို့အား စည်ပင်သာယာရေးအဖွဲ့နှင့် ပူးပေါင်း၍ ကုန်အညွှန်းအမှတ်အသား ပြည့်စုံမှုရှိ/ မရှိ ကွင်းဆင်းစစ်ဆေးခဲ့ကြောင်း သတင်းရရှိပါသည်။ DOCA(ဧရာဝတီ)

ရေကြည်မြို့နယ်၊ ရေကြည်မြို့အတွင်းရှိ ဆေးနှင့်ဆေးပစ္စည်းအရောင်းဆိုင်များအား (၂.၇.၂၀၂၅) ရက်နေ့၊ နံနက် (၀၉း၃၀) နာရီအချိန်တွင် မြို့နယ်စည်ပင်သာယာရေးအတွင်းရှိ ရောင်းချလျက်ရှိသောဆေးနှင့် ဆေးပစ္စည်းအရောင်းဆိုင်များအား ပူးပေါင်းအဖွဲ့များနှင့် ပူးပေါင်း၍ ဆေးမျိုးစုံအရောင်းဆိုင်များတွင် ပြည်သူများအတွက်ရောင်းချပေးသော ဆေးနှင့် ဆေးပစ္စည်းများ၌ သက်တမ်းလွန်ဆေးဝါးများရှိ/ မရှိ၊ ဆေးဝါးမှတ်ပုံတင်ထားရှိသော ဆေးများရှိ/ မရှိ၊ စံမမှီဆေးဝါးများရောင်းချခြင်းရှိ/ မရှိ၊ ဒေသတွင်း ဖြစ်သင့်ဖြစ်ထိုက်သည့်ဈေးနှုန်းများဖြင့် ရောင်းချခြင်းရှိ/ မရှိကို ပူးပေါင်းအဖွဲ့များဖြင့် ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။ DOCA(ဧရာဝတီ)

မွန်ပြည်နယ်၊ မော်လမြိုင်ခရိုင် မုဒုံမြို့နယ်ရှိ ဆန်စက်လုပ်ငန်းရှင်များ အသင်း၏ ရွေးကောက်တင်မြှောက်ဖွဲ့စည်းခြင်း အခမ်းအနားကို ၈.၇.၂၀၂၅ ရက်နေ့ နံနက်ပိုင်း (၁၀း၀၀) နာရီအချိန်တွင် မုဒုံမြို့၊ မြို့မ (၁) ရပ်ကွက်ရှိ စားသုံးသူရေးရာဦးစီးဌာန မြို့နယ်တာဝန်ခံရုံး၌ ကျင်းပပြုလုပ်ခဲ့ပါသည်။ ရှေးဦးစွာ အခမ်းအနားတွင် မုဒုံမြို့နယ်ဆန်စက်လုပ်ငန်းရှင်များအသင်း နာယကမှ အဖွင့်အမှာစကားပြောကြားခဲ့ပြီး မွန်ပြည်နယ် ဆန်စက်လုပ်ငန်းရှင်များအသင်း ဥက္ကဌမှ ဆန်စက်လုပ်ငန်းရှင်များအသင်း ရွေးကောက်တင်မြှောက်ရခြင်း၏ စည်းမျဥ်း စည်းကမ်းများ၊ တာဝန်များကိုရှင်းလင်းပြောကြားခဲ့ပြီး၊ မုဒုံမြို့နယ် ဒုတိယမြို့နယ်အုပ်ချုပ်ရေးမှူးမှ ဆန်စက် လုပ်ငန်းရှင်များအား လိုအပ်သည်များ မှာကြားခဲ့ပြီး တက်ရောက်လာသည့် နာယက၊မွန်ပြည်နယ် ဆန်စက်လုပ်ငန်းရှင်များအသင်း ဥက္ကဌနှင့် ဌာနဆိုင်ရာများမှ ဦးဆောင်၍ ၂၀၂၅ ခုနှစ်မှ ၂၀၂၈ခုနှစ်အထိ ဆက်လက်တာဝန်ယူဆောင်ရွက်ကြမည့် မြို့နယ်အမှုဆောင်အဖွဲ့အား စိစစ်ရွေးချယ်ပေးခဲ့ကြပြီး အသင်းသားအားလုံးတို့၏ အတည်ပြုချက်ရယူကာ ဖွဲ့စည်းပေးခဲ့ ကြသည်။ အဆိုပါ အသင်းအမှုဆောင်သစ် အဖွဲ့ကို မုဒုံမြို့နယ်ဆန်စက်လုပ်ငန်းရှင်များအနက်မှ ဥက္ကဌ၊ ဒုဥက္ကဌ ၁/၂ ၊ အတွင်းရေးမှူး၊ တွဲဖက်အတွင်းရေးမှူး ၁/၂ ၊ ဘဏ္ဍာရေးမှူး ၊ တွဲဖက် ဘဏ္ဍာရေးမှူး ၊ စာရင်းစစ် ၊တွဲဖက်စာရင်းစစ် (၁၀)ဦးနှင့် အဖွဲ့ဝင် (၃)ဦး စုစုပေါင်း (၁၃) ဦးတို့ဖြင့် ရွေးချယ်ဖွဲ့စည်းခဲ့ပါကြောင်း သိရှိရသည်။ DOCA (မွန်)

ပုသိမ်ခရိုင်၊ သာပေါင်းမြို့နယ်၊ စားသုံးသူရေးရာဦးစီးဌာနမှ မြို့နယ်ဦးစီးမှူးသည် (၃.၇.၂၀၂၅) ရက်နေ့၊ မြို့နယ်ဦးစီးမှူးရုံး၌ မြို့ပေါ်(၃) ရပ်ကွက်၊ ကျေးရွာအုပ်စု (၆၇) အုပ်စု၊ ကျေးရွာပေါင်း (၃၉၄) ရွာရှိ စားသုံးဆီလက်လီအရောင်းဆိုင်များမှ လုပ်ငန်းရှင် (၂၀၅) ဦးတို့အား စားသုံးဆီဖြန့်ဝေမှု၊ ရောင်းချမှုများနှင့် ဈေးနှုန်းမြှင့်တင်ရောင်းချမှုမရှိစေရေး၊ အလေးချိန်မှန်ကန်စွာဖြင့် သတ်မှတ်ရည် ညွှန်းဈေးဖြင့်သာရောင်းချရန် ပြောကြားခဲ့ပြီး လုပ်ငန်းရှင်များမှလည်း သိလိုသည်များ မေးမြန်း ဆွေးနွေးခဲ့ကြောင်း သိရှိရပါသည်။ DOCA(ဧရာဝတီ)