သတင်းနှင့် လှုပ်ရှားမှုများ

          ဖျာပုံခရိုင်၊ကျိုက်လတ်မြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ စားသုံးသူ ရေးရာဦးစီးဌာနတို့ ပူးပေါင်း၍ ၂၀၂၅ ခုနှစ်၊ နိုဝင်ဘာလ (၁၃) ရက်၊ မွန်းလွဲ (၁၅:၀၀) နာရီ အချိန်တွင် စားသုံးသူကာကွယ်ရေး ဥပဒေအကြောင်း သိကောင်းစရာ အသိပညာပေး Talk Show အစီအစဉ်အား ပြုလုပ်ဆောင်ရွက်ခဲ့ပါသည်။

          ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်ဦးစီးအရာရှိမှ စားသုံးသူကာကွယ် ရေး ဥပဒေ အကြောင်းကို ရှင်းပြပေးရန် ပြောကြားသဖြင့် စားသုံးသူရေးရာဦးစီးဌာနမှ ဒု-ကြီးကြပ်ရေးမှူး ဦးတင်စိန်က စားသုံးသူကာကွယ်ရေးဥပဒေပါ အခန်းပေါင်း(၂၅) ခန်းရှိပြီး အခန်း(၁၈) ဖြစ်သော ကုန်အညွှန်းအမှတ်အသား ဖော်ပြခြင်းကို ပုဒ်မ(၄၁၊၄၂၊၄၃) မှာ ဖော်ပြထားရှိပြီး ကုန်အညွှန်းအမှတ်အသားနှင့် ပါဝင်ပက်သက်ကြောင်း၊ ဖော်ပြချက်(၈) ချက်ရှိကြောင်းရှင်းလင်းပြောကြားခဲ့သည်။ တံဆိပ်၊ အမှတ်အသား၊ အမျိုးအမည်၊အရွယ်အစား ၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ဓာတ်မတည့်ကြောင်း ဖော်ပြချက်၊ ဘေးထွက်ဆိုးကျိုး၊ ကြိုတင်သတိပေးချက်၊ထုတ်လုပ်/သက်တမ်း ကုန်ဆုံး ရက်စွဲ တို့ မှာ ကုန်အညွှန်းအမှတ်အသား ဖော်ပြခြင်းဆိုင်ရာ အချက်များဖြစ်ကြောင်း ၊ မည်သည့် စီးပွားရေးလုပ်ငန်းရှင်မဆို ပုဒ်မ (၄၁) ၊ ပုဒ်မခွဲ (ခ) နှင့် (ဆ) တို့ပါ ကုန်အညွှန်းအမှတ် အသားဖော်ပြရာတွင် မြန်မာဘာသာနှင့် အခြားဘာသာ တစ်ခုထက်ပို၍ တွဲလျက် ဖော်ပြရမည် ဖြစ်ကြောင်း ရှင်းလင်းဆွေးနွေး ပြောကြားခဲ့မှုအပေါ် သတင်းရရှိပါသည်။

(Doca ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ် တာဝန်ခံနှင့် ဝန်ထမ်းတို့သည် (၁၆.၁၁.၂၀၂၅) နေ့၊ နံနက် (၁၁:၃၀) အချိန်တွင် ကျိုက်လတ်မြို့၊ သမက်ပြေကျေးရွာရှိ ဦစန်းအောင် ပိုင်ဆိုင်သော “ဆန်းသစ်မြန်မာ” ဆန်စက်သို့ သွားရောက်၍ MSMEs လုပ်ငန်းများ ဖွံ့ဖြိုးတိုးတက်ရေး ကွင်းဆင်း စိစစ် ဆောင်ရွက်ခဲ့ပါသည်။

          ထိုသို့ ကွင်းဆင်းဆောင်ရွက်ရာတွင် ဆန်စက်၏ ကြိတ်ခွဲထုတ်လုပ်မှု၊ ဆန်စပါးအရည် အသွေး ပြည့်မီရေး၊အချိန်အတွယ်များ ပြည့်မီမှန်ကန်မှုရှိ/မရှိ၊ ဆန်စပါးဈေးနှုန်းဈေးကွက် အခြေအနေများ တည်ငြိမ်မှု ရှိ/မရှိ၊ ပုဂ္ဂလိက ကဏ္ဍ ဖွံ့ဖြိုးတိုးတက်ရေး၊ ခေတ်မှီစက်ကိရိယာ နည်းစနစ်သစ်များ ဖွံ့ဖြိုးတိုးတက်ရေး၊ Myro တွင် မှတ်ပုံတင်ထားရှိမှု အခြေအနေ၊ ဆန်/စပါး လက်ကျန် အခြေအနေ ၊ထုတ်ကုန်လုံခြုံစိတ်ချရမှုနှင့် MSMEs လုပ်ငန်းများ ဖွံ့ဖြိုးတိုးတက်ရေး တို့အတွက် ကွင်းဆင်းစိစစ်ခဲ့ကြောင်း သတင်းရရှိခဲ့ပါသည်။

(Doca ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင်၊ကျိုက်လတ်မြို့နယ်စားသုံးသူရေးရာဦးစီးဌာနမှ စစ်ဆေးရေးအရာရှိ ဦးမိုးမင်းသန်းနှင့် ဝန်ထမ်းတို့သည် စည်ပင်သာယာရေးအဖွဲ့နှင့် ပူးပေါင်း၍ (၁၈.၁၁.၂၀၂၅) ရက်၊ နံနက် (၁၁:၀၀) နာရီ အချိန်တွင် မြို့မဈေးကြီးအတွင်းရှိ “ရူပါနွေး”၊ “မိုးကောင်းကင်”၊ “ထူးကြီး” စတိုးဆိုင်များတွင် ရောင်းချနေသော ကလေးတကိုယ်ရည်သုံးပစ္စည်းများတွင် မြန်မာဘာသာဖြင့် ကုန်အညွှန်းအမှတ်အသား ပါဝင်မှုရှိ/မရှိ စစ်ဆေးခဲ့ရာ ပါဝင်မှုရှိကြောင်း စစ်ဆေးတွေ့ရှိခဲ့ရသည်ဟု သတင်းရရှိပါသည်။

(Doca ဧရာဝတီ)

    ဖျာပုံခရိုင်၊ဒေးဒရဲမြို့နယ်စားသုံးသူရေးရာဦးစီးဌာနမှမြို့နယ်တာ၀န်ခံနှင့်၀န်ထမ်းတို့သည် (၁၇-၁၁-၂၀၂၅)ရက်နေ့တွင် အထူးစုံစမ်းစစ်ဆေးရေးဦးစီးဌာနနှင့်ပူးပေါင်း၍ ဒေးဒရဲမြို့ ရှိ စက်သုံးဆီရောင်းချလျက်ရှိသည့်"ရတနာကောင်းကင်"စက်သုံးဆီအရောင်းဆိုင် နှင့်  “BOC"စက်သုံးဆီဆိုင်များသို့သွားရောက်၍ကွင်းဆင်းစစ်ဆေးခြင်းလုပ်ငန်းအားဆောင်ရွက်ခဲ့ပါသည်။
     ထိုသို့စစ်ဆေးခြင်း ဆောင်ရွက်ရာတွင် စစ်ဆေးရေးအဖွဲ့ဝင်များသည် "ရတနာကောင်းကင်" စက်သုံးဆီဆိုင်နှင့် “BOC"စက်သုံးဆီအရောင်းဆိုင်၏ စက်သုံးဆီရောင်းချမှုအခြေအနေများ၊ စက်သုံးဆီဈေးနှုန်း၊ စက်သုံးဆီ အရည်အသွေး၊ အချင် အတွယ်မှန်ကန်မှု ရှိ/မရှိ၊ ဆီကားရောက်ရှိမှုအခြေအနေများနှင့် ဆီလက်ကျန် အခြေအနေများအား စစ်ဆေးမေးမြန်းခြင်း ဆောင်ရွက်ခဲ့ပြီး စက်သုံးဆီရောင်းချသည့် လုပ်ငန်းရှင် နှင့် တွေ့ဆုံကာ မြို့နယ် အတွင်း စက်သုံးဆီပြတ်လပ်မှုမရှိစေရေး၊ စက်သုံးဆီဈေးနှုန်း အဆမတန် မြှင့်တင် ရောင်းချမှုများ မရှိစေရေးနှင့် ဖြစ်သင့်ဖြစ်ထိုက်သောဈေးနှုန်းဖြင့် ရောင်းချရေး ဆွေးနွေး မှာကြားခြင်း များ ဆောင်ရွက်ခဲ့ကြောင်း သိရှိရပါသည်။

(Doca ဧရာဝတီ)

    ဧရာဝတီတိုင်းဒေသကြီး၊ ဖျာပုံခရိုင် ၊ကျိုက်လတ်မြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဦးမိုးမင်းသန်းနှင့်ဝန်ထမ်းတို့သည် ၂၀၂၅ ခုနှစ်၊ နိုဝင်ဘာလ (၁၇) ရက်တွင် (စ.စ.စ) ဦးစီးဌာန၊ မီးသတ်ဦးစီးဌာန၊ ဆန်စပါးကုန်သည်လုပ်ငန်းရှင်အသင်းနှင့် ပူးပေါင်း၍ ကျိုက်လတ်မြို့ အောင်မြင့်မိုရ်ဈေးရှိ ဆန်ဆိုင်များအား ကွင်းဆင်းစိစစ်ခဲ့ကြပါသည်။

          အဆိုပါကွင်းဆင်းစိစစ်ရာတွင် မြို့နယ်တာဝန်ခံက အများပြည်သူများ ဝယ်ယူသုံးစွဲနိူင်ရေး အတွက်ဆန်ဆိုင်များအနေဖြင့် သတ်မှတ်ထားသော ရည်ညွှန်းဈေးနှုန်းအလိုက် ဆိုင်းဘုတ်တင် ချိတ်ဆွဲ ရောင်းချနေမှုအခြေအနေ၊ ဆန်အိတ် လက်ကျန် အခြေအနေနှင့် သိုလှောင်ထားရှိမှု အခြေအနေတို့အား ပူးပေါင်းအဖွဲ့ဖြင့် ကွင်းဆင်းစိစစ်ခဲ့ပါသည်။

          အဆိုပါ ကွင်းဆင်းစိစစ်ခြင်းများသည် ပြည်ပတင်ပို့သည့် ဆန်ကြမ်းအုပ်စုများ၊ ပြည်ပတင်ပို့ခြင်းနှင့် ပြည်တွင်းစားသုံးမှုရှိသည့် ဆန်အုပ်စုများ၊ပြည်တွင်းစားသုံးသူများအတွက် အရည်အသွေးကောင်းမွန်သည့် ပေါ်ဆန်းအုပ်စုများ၊ ဈေးကွက်အတွင်း သင့်တင့်မျှတသည့် ဈေးနှုန်းနှင့် ရောင်းချမှုရှိစေရေး၊ မြန်မာနိုင်ငံ ဆန်စပါး အသင်းချုပ်(MRF) မှ ထုတ်ပြန်ထားသည့် လစဉ်ဆန်စပါးဈေးနှုန်းများနှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ညွှန်ကြားဆောင်ရွက်မှုများ၊ ဆန်အမျိုး အစားအလိုက် ရောင်းချရမည့် ရည်ညွှန်းဈေးများနှင့် ဈေးကွက်အတွင်း အမြင့်ဆုံး ရောင်းချနိုင်မည့် ဈေးနှုန်းများ ကိုက်ညီမှုရှိ/မရှိ ကွင်းဆင်းစစ်ဆေးခဲ့ကြောင်း သတင်းရရှိပါသည်။

(Doca ဧရာဝတီ)