သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်တွင် တာဝန်ထမ်းဆောင်လျက်ရှိသော ဒု-ဦးစီးမှူး ဒေါ်မြင့်မြင့်သန်းနှင့်ဒေါ်တင်မာရီတို့သည် ခရိုင်ဦးစီးမှူး၏ လမ်းညွှန်မှုဖြင့် ဆိပ်ဖြူမြို့နယ်အတွင်းရှိ စားသုံးသူပြည်သူများ စားအုန်းဆီများကိုသက်သာသော ဈေးနှုန်းများဖြင့် ဝယ်ယူစားသုံးနိုင်ရေးအတွက် မြို့နယ်စီမံအုပ်ချုပ်ရေးအဖွဲ့၏စီမံဆောင်ရွက်မှုဖြင့် စားအုန်းဆီများ ဖြန့်ဖြူးရောင်းချပေးရာတွင် ပူးပေါင်းဆောင်ရွက်လျက်ရှိပါသည်။ စားအုန်းဆီများ ရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စားသုံးဆီတင်သွင်းသိုလှောင် ဖြန့်ဖြူးခြင်း လုပ်ငန်းကော်မတီမှထုတ်ပြန်ပေးလျက်ရှိသော ရည်ညွှန်းဈေးအပေါ်အခြေခံ၍ အိမ်ထောင်စုတစ်စုလျှင် တစ်ပိဿာနှုန်းဖြင့် ရောင်းချပေးလျက်ရှိပါသည်။

   ဆိပ်ဖြူမြို့နယ်မှ စားအုန်းဆီပိဿာ(၂၇၅၀)အား ဒုတိယအကြိမ်ရောင်းချရာတွင် (၂၄.၉.၂၀၂၃) ရက်နေ့တွင် အနောက်ပိုင်းရပ်ကွက်နေပြည်သူများအား  ဆယ်မျက်နှာဘုန်းကြီးကျောင်းဝန်းအတွင်း၌ အိမ်ထောင်စု(၇၅၀)စုအတွက် စားအုန်းဆီပိဿာ(၇၅၀)၊ (၂၆.၉.၂၀၂၃)ရက်နေ့တွင် ရွာသစ်ရပ်ကွက်နှင့် ကိုးထောင့်ကျေးရွာအုပ်စုနေပြည်သူများအား ဆုတောင်းပြည့်ဘုန်းကြီးကျောင်းဝန်းအတွင်း၌  အိမ်ထောင်စု(၈၁၀)စုအတွက် စားအုန်းဆီပိဿာ(၈၁၀)၊ (၂၇.၉.၂၀၂၃)ရက်နေ့တွင် အလယ်ပိုင်း ရပ်ကွက်နေပြည်သူများအား ရတနာဘုံကျော်ဘုန်းကြီးကျောင်းဝန်းအတွင်း၌ အိမ်ထောင်စု(၆၄၀)စု အတွက် စားအုန်းဆီပိဿာ(၆၄၀)ပိဿာကိုရောင်းချခြင်းနှင့် (၂၈.၉.၂၀၂၃)ရက်နေ့တွင် မြို့နယ်အဆင့်ဆင့်ဌာနဆိုင်ရာဝန်ထမ်းများအား မြို့နယ်အထွေထွေအုပ်ချုပ်ရေးရုံး၊ ငွေသဲဖြူခန်းမရှေ့၌ အိမ်ထောင်စု (၁၈၀)စုအတွက် စားအုန်းဆီပိဿာ(၁၈၀)နှင့် ယောဝရပ်ကွက်နေပြည်သူများအား ပုပ္ပါးဇုံဘုန်းကြီးကျောင်းဝိုင်းအတွင်း၌  အိမ်ထောင်စု(၃၇၀)စုအတွက် စားအုန်းဆီပိဿာ(၃၇၀)ကို အိမ်ထောင်တစ်စုလျှင် စားအုန်းဆီတစ်ပိဿာလျှင် ကျပ်(၅၁၀၀)ဖြင့် သက်သာသောဈေးနှုန်းဖြင့် စားသုံးသူပြည်သူများကို အလှည့်ကျတန်းစီစနစ်ဖြင့် ရောင်းချပေးမှုအခြေအနေကို ကွင်းဆင်းစိစစ် ကြပ်မတ်ဆောင်ရွက်ခြင်းများ ပြုလုပ်ခဲ့ပါသည်။

DOCA(မကွေး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီသည် ပြည်ပမှတင်သွင်းသည့်စားသုံးဆီများ သတ်မှတ်အရည်အသွေးစံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သောစားသုံးဆီများကိုသုံးစွဲနိုင်ရေး၊ ဈေးနှုန်းတည်ငြိမ်စွာဝယ်ယူစားသုံးနိုင်ရေးအတွက် စဉ်ဆက်မပြတ်ဆောင်ရွက်လျက်ရှိရာ စားသုံးသူ‌ရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများက (၃-၁၀-၂၀၂၃) ရက်နေ့တွင် ပုဇွန်တောင်မြို့နယ်၊ ကုန်ဈေးတန်းလမ်းရှိ ဆိုင်ရှင်ဦးအောင်ကြည်၏ဆီဆိုင်တွင် ဆီ ၁ပိဿာလျှင် ၄၆၀၀ကျပ်နှုန်းဖြင့် စားသုံးသူပြည်သူများအား တန်းစီစနစ်ဖြင့် ရောင်းချပေးနေမှုအခြေအနေကို ကွင်းဆင်းစိစစ်ကြပ်မတ်ခဲ့ကြကြောင်းသိရှိရပါသည်။

DOCA(ရန်ကုန်)

    အွန်လိုင်းစနစ်ဖြင့်ရောင်းချသူများ (Online Sales) မှတ်ပုံတင်နိုင်ရေး အသိပညာပေးခြင်းနှင့် E- ComReg System စနစ်ဖွင့်လှစ်ခြင်းအခမ်းအနားကို ၂၀၂၃ခုနှစ်၊ အောက်တိုဘာလ ၂ရက်နေ့၊ နံနက် (၁၀:၀၀) နာရီအချိန်တွင် ရန်ကုန်မြို့၊ မင်းရဲကျော်စွာလမ်းရှိ ပြည်ထောင်စုမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ပထမထပ်မင်္ဂလာခန်းမ၌ ကျင်းပပြုလုပ်ခဲ့သည်။

     အခမ်းအနားမစတင်မီ တက်ရောက်လာသူများအား Register ပြုလုပ်ခြင်းနှင့် e ComReg စနစ်တွင် ဆောင်ရွက်နိုင်သည့်လုပ်ငန်းများ၊ Register ပြုလုပ်ပုံ၊ မှတ်ပုံတင်မည့်သူများသိရှိလိုက်နာရမည့်စည်းကမ်းချက်များနှင့် အွန်လိုင်းစနစ်ဖြင့်ရောင်းချခြင်း (Online Sales) လုပ်ငန်းမှတ်ပုံတင် (အသစ်) လျှောက်ထားရမည့် လုပ်ငန်းစဉ်အဆင့်ဆင့်ပါဝင်သည့် လက်ကမ်းစာစောင်များဖြန့်ဝေပေးခဲ့သည်။

    အခမ်းအနားတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ ဒုတိယညွှန်ကြားရေးမှူးချုပ် ဦးသိန်းထွန်းဦးက အဖွင့်အမှာစကားပြောကြားခဲ့ရာ Online Sales များမှတ်ပုံတင်ခြင်းလုပ်ငန်းကိုဆောင်ရွက်ရသည့်အကြောင်းရင်းမှာ Online Sales ဝယ်ယူမှုအရ စားသုံးသူနစ်နာမှုများလျော့နည်းစေရန်နှင့် ပိုမိုကောင်းမွန်သည့်ပတ်ဝန်းကျင်ကောင်းကိုဖော်ဆောင်နိုင်ရန်ဖြစ်ကြောင်း၊ အွန်လိုင်းစနစ်ဖြင့်ရောင်းချမှု၊ ဝန်ဆောင်မှုပေးခြင်းကို ကဏ္ဍတိုင်းတွင် စနစ်တကျပိုမိုတွင်ကျယ်စွာအသုံးပြုလာနိုင်ရန် အမိန့်ကြော်ငြာချက်များထုတ်ပြန်ပြီး အွန်လိုင်းစနစ်ဖြင့်ရောင်းချခြင်း (Online Sales) လုပ်ငန်းများဆောင်ရွက်နိုင်ရန်အလို့ငှာ Online မှ အလွယ်တကူမှတ်ပုံတင်နိုင်ရန်အတွက် eComReg System ကိုရေးဆွဲခဲ့ခြင်းဖြစ်ကြောင်း၊ ( Oline Sales ) လုပ်ငန်းမှတ်ပုံတင်ရာတွင် ကုန်ပစ္စည်းအုပ်စု၊ ဝန်ဆောင်မှုအုပ်စုများကို စနစ်တွင်ထည့်သွင်းထားပြီး လိုအပ်သည့်ထုတ်ပြန်ကြော်ညာမှုများကို ဆက်လက်ဆောင်ရွက်သွားမည်ဖြစ်ကြောင်း၊ မှတ်ပုံတင်လက်မှတ်ခွင့်ပြုထုတ်ပေးရာတွင် ၂၀၂၃ခုနှစ်၊ ဒီဇင်ဘာလ ၃၁ရက်နေ့အထိ မှတ်ပုံတင်ကြေးကင်းလွတ်ခွင့်ဖြင့် ထုတ်ပေးသွားမည်ဖြစ်ပြီး  သက်တမ်း( ၂) နှစ်ခွင့်ပြုထားကြောင်းပြောကြားခဲ့သည်။

      ဆက်လက်၍ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် တွဲဖက်အထွေထွေအတွင်းရေးမှူး ဦးအောင်ဇေယျာလွင်က ကြိုဆိုနှုတ်ခွန်းဆက်စကားပြောကြားခဲ့ပြီး မြန်မာနိုင်ငံဒီဂျစ်တယ်စီးပွားရေးဆိုင်ရာလုပ်ငန်းရှင်များအသင်းဥက္ကဋ္ဌက Online စနစ်ဖြင့်ရောင်းချသူ (Online Sales)များမှတ်ပုံတင်နိုင်ရေး ကူညီဆောင်ရွက်နိုင်မည့်အခြေအနေများကိုရှင်းလင်းပြောကြားခဲ့သည်။

     ထို့နောက် တာဝန်ရှိသူများက အမိန့်ကြော်ငြာစာအမှတ် (၅၁/၂၀၂၃) ထုတ်ပြန်ထားရှိမှုအခြေအနေနှင့် လိုက်နာဆောင်ရွက်ရမည့် စည်းကမ်းသတ်မှတ်ချက်များကိုလည်းကောင်း၊ အွန်လိုင်းစနစ်ဖြင့်ရောင်းချသူများ မှတ်ပုံတင်လက်မှတ်လျှောက်ထားရမည့် E-Commerce Registration (Online) System နှင့်စပ်လျဉ်း၍လည်းကောင်း၊ မှတ်ပုံတင်လက်မှတ်လျှောက်ထားရာတွင် လိုက်နာရမည့်ကိစ္စရပ်များကိုလည်းကောင်း ရှင်းလင်းပြောကြားခဲ့ပါသည်။

     ဆက်လက်၍ အခမ်းအနားသို့တက်ရောက်လာသည့် စီးပွားရေးလုပ်ငန်းရှင်များက သိရှိလိုသည်များကိုမေးမြန်းခဲ့ရာ တာဝန်ရှိသူများက  ပြန်လည်ဖြေကြားခဲ့သည်။ အခမ်းအနားသို့ စီးပွားရေးလုပ်ငန်းရှင် ၁၂၀၀ဦးတက်ရောက်ခဲ့ကြပါသည်။

    (Online Sales) မှတ်ပုံတင်လျှောက်ထားလိုသူများသည် ရုံးဌာနသို့ လူကိုယ်တိုင်လာရောက်ရန်မလိုဘဲ အင်တာနက်ရရှိသည့် မည်သည့်နေရာမှမဆို လျှောက်ထားရယူနိုင်သည့် eComReg System ကို ၂၀၂၃ခုနှစ်၊ အောက်တိုဘာလ ၂ရက်နေ့မှစတင်၍ အသုံးပြုနိုင်မည်ဖြစ်ကာ e ComReg System ကို https:// www. ecomreg. gov. mm website တွင် ဝင်ရောက်လျှောက်ထားနိုင်ကြောင်းရေးသားတင်းပြလိုက်ရပါသည်။

DOCA(ရန်ကုန်)

   ၂၀၂၃ ခုနှစ်၊ အောက်တိုဘာလ ၃ ရက်နေ့တွင် စစ်ကိုင်းတိုင်းဒေသကြီး      ၊ စားသုံးသူရေးရာဦးစီးဌာနမှ ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့်ဝန်ထမ်း(၁)ဦးသည်၊ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့်ပူးပေါင်း၍ အမှတ်(၄)(အ.မ.က)ခွဲကျောင်းတွင် စားသုံးသူအသိပညာပေးဟောပြောပွဲ ကျင်းပခဲ့ကြောင်း သိရသည်။

  ပထမဦးစွာ ကျောင်းအုပ်ဆရာကြီးမှ အဖွင့်အမှာစကားပြောကြားပြီး ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ကြည်ဆန်းက ကျောင်းသားလူငယ်များအနေဖြင့် ငယ်စဉ်ဘဝကပင် ကောင်းမွန်သောအလေ့အကျင့်များကို နည်းစနစ်မှန်ကန်စွာလုပ်ကိုင် ပြုမှုနေထိုင်တတ်ဖို့လိုကြောင်း၊ “ရှောင်လေဝေးဝေး မူးယစ်ဆေး” ဆိုသည့်အတိုင်း ကျောင်းသားလူငယ်များ အနေဖြင့် မူးယစ်ဆေးဝါးများကို အထူးရှောင်ကြဉ်ဖို့လိုကြောင်း၊ ဒါမှသာ အနာဂတ်မှာလင်းလက်တောက်ပပြီး အောင်မြင်တဲ့လူတစ်ယောက် ဖြစ်နိုင်မှာဖြစ်ကြောင်း ဟောပြောခဲ့သည်။

   ဆက်လက်၍ စားသုံးသူရေးရာဦးစီးဌာနမှ အငယ်တန်းစာရေး ဒေါ်အိမွန်ကျော်က စားသုံးသူကာကွယ်ရေးဥပဒေပါ စားသုံးသူ၏အဓိပ္ပာယ်ဖွင့်ဆိုချက်အား ဟောပြောခဲ့ကြောင်း၊ ထုတ်ကုန်လုံခြုံ စိတ်ချရမှုရှိသည့် စားသောက်ကုန်စည်များကို ရွေးချယ်ဝယ်ယူရမည့် နည်းလမ်းများကိုဟောပြောခဲ့ကြောင်း၊  နိဂုံးချုပ်အနေဖြင့် ကန့်ဘလူမြို့နယ်တာဝန်ခံ ဦးမျိုးဝင်းသန်းမှ စားသုံးသူများအနေဖြင့် မိမိတို့၏ စားသုံးသူအခွင့်အရေးများကို ရယူတောင်ဆိုဖို့လိုကြောင်း၊ သို့မှသာ မိမိတို့၏ပစ္စုပ္ပန်တွင်သာမကဘဲ အနာဂတ်မျိုးဆက်သစ်များအတွက်ပါ ကောင်းမွန်သာယာသည့် လူနေမှုပတ်ဝန်းကျင်ကောင်းများကို ဖန်တီးပေးနိုင်မှာဖြစ်ကြောင်း ဟောပြောခဲ့ပြီး တက်ရောက်လာသည့် ဆရာ/ ဆရာမ နှင့်ကျောင်းသား/သူများကို အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ် တာဝန်ခံရုံးအနေဖြင့်  စားသုံးသူပြည်သူများ ဘေးအန္တရာယ် ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့် စစ်ဆေးခြင်းများဆောင်ရွက်လျက်ရှိရာ အောက်တိုဘာလ (၄)ရက်နေ့ နံနက်(၁၁:၀၀)နာရီ အချိန်တွင် ကျွန်းလှမြို့၊ သစ်ရာမြိုင်ရပ်ကွက်အတွင်းရှိ ဦးစန္ဒ+ ဒေါ်မြင့်မြင့်စိုး ကုန်မျိုးစုံ ရောင်းဝယ်ရေးဆိုင်အား ကျွန်းလှမြို့နယ် စီမံအုပ်ချုပ်ရေးအဖွဲ့ရုံးမှ ဒုတိယ ဦးစီးမှူး ဒေါ်ယွန်းမီမီထွန်း၊ ကျွန်းလှမြို့မစခန်းမှ ဒုရဲအုပ် ယုဝေမင်း ၊ မြို့နယ်စည်ပင်သာယာရေးအဖွဲ့မှ ဒုဦးစီးမှူး ဦးမင်းကျော့မောင်နှင့် စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံ ဒေါ်ဝေဝေအောင်တို့မှ  ဈေးကွက်စောင့်ကြည့် စစ်ဆေးခြင်း ဆောင်ရွက်ခဲ့ပါသည်။

    အဆိုပါ ကုန်မျိုးစုံရောင်းဝယ်ရေးဆိုင်တွင် ရောင်းချသည့် ကုန်ပစ္စည်းများအား ထုတ်ကုန် လုံခြုံစိတ်ချရမှု ရှိ/ မရှိ ၊ ကုန်အညွှန်း အမှတ်အသားများ ပြည့်စုံစွာ ဖော်ပြထားခြင်း ရှိ/ မရှိ နှင့် သက်တမ်းလွန် ကုန်စည်များ ရောင်းချနေခြင်း ရှိ / မရှိ နှင့် ရောနှောစားဆီများရောင်းချနေခြင်း ရှိ/ မရှိ တို့အား ဈေးကွက်စောင့်ကြည့် စစ်ဆေးခဲ့ရာ  ထုတ်ကုန် လုံခြုံစိတ်ချရမှု ရှိသည့် ကုန်စည်များကိုသာတွေ့ရှိရကာ ကုန်အညွှန်းအမှတ်အသား ဖေါ်ပြခြင်းနှင့် ကိုက်ညီမှုရှိပြီး သက်တမ်းလွန်စားသောက်ကုန်များ ရောင်းချမှု မရှိသော်လည်း ရောင်းချသည့် စီးပွားရေး လုပ်ငန်းရှင်များ အနေဖြင့် မိမိရောင်းချသည့် ကုန်စည်အပေါ် တာဝန်ရှိမှုကို နားလည်သိရှိစေရန် စားသုံးသူကာကွယ်ရေး ဥပဒေပါ စားသုံးသူနှင့် စီးပွားရေးလုပ်ငန်းရှင်တို့၏ အဓိပ္ပါယ်ဖွင့်ဆိုချက်များ  အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် အမှတ် (၂/၂၀၁၉)နှင့်အညီ ပြည့်စုံစွာ ထည့်သွင်ဖော်ပြ၍ ထုတ်လုပ်ဖြန့်ဖြူးသည့် ကုန်ပစ္စည်းများကိုသာ ရောင်းချကြရန် နှင့် မိမိတို့ထံ လက်ဝယ်လာရောက် ပို့ဆောင်သော ကုန်ပစ္စည်းများတွင် ကုန်အညွှန်း အမှတ်အသား မပြည့်စုံပါက လာရောက် ပို့ဆောင်သူအား ကုန်အညွှန်းအမှတ်အသား ပြည့်စုံစွာထည့်သွင်းပေးရန်နှင့် မပြည့်စုံပါက မိမိတို့မှ ဝယ်ယူ ရောင်းချမည်မဟုတ်ကြောင်း လက်ဆင့်ကမ်းပြောကြားပေးရန်နှင့် ရောနှောဆီများ မရောင်းချရန်နှင့်   စားအုံးဆီများရောင်းချမှုရှိလျှင်လည်း သတ်မှတ်ဈေးနှုန်းထက်  အမြတ်ကြီးစား မြှင့်တင်ရောင်းချခြင်းမပြုရန် စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားနှင့် ပတ်သက်၍ စားသုံးသူရေးရာဦးစီးဌာန၏ အတည်ပြုချက် ရယူနိုင်ရေး ဆောင်ရွက်ကြရန်နှင့် မိမိတို့ စားသုံးသူရေးရာဦးစီးဌာနမှ ကုန်အညွှန်းအမှတ်အသား လျှောက်ထားရာတွင် အခမဲ့ကူညီဆောင်ရွက်ပေးပါကြောင်း ၊ ဥပဒေပါ စီးပွားရေးလုပ်ငန်းရှင်၏ တာဝန်များနှင့် လိုက်နာရမည့် အချက်များအကြောင်း အသိပညာပေး ဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)