HighLight News

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ်တာဝန်ခံရုံးအနေဖြင့်  ၂၀၂၄ခုနှစ်၊ ဇွန်လ(၁၂)ရက်နေ့၊ နံနက် (၀၉း၃၀)နာရီအချိန်တွင် ကျွန်းလှမြို့ပေါ်ရပ်ကွက်များအတွင်းရှိ ဆန်ဆိုင်များအား  မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံတို့ပါဝင်သောအဖွဲ့စုံဖြင့် ဆန်ဆိုင်များအား ကွင်းဆင်းစစ်ဆေးခြင်းဆောင်ရွက်ခဲ့ကြောင်းသိရှိရပါသည်။

     ထိုသို့ကွင်းဆင်းစစ်ဆေးခြင်းဆောင်ရွက်ရာတွင် လက်လီရောင်းချသည့်ဆန်ဆိုင်များနှင့် ဈေးကွက်အတွင်းရှိ ဆန်အမျိုးအစားများ၊ ဆန်ဈေးနှုန်းများ၊ ဆန်လက်ကျန်အခြေအနေများနှင့် အဆိုပါဆန်များကို မည်သည့်ဒေသများမှ ဝယ်ယူရောင်းချကြောင်းနှင့် ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း (သို့မဟုတ်) ဈေးကစားရန်ရည်ရွယ်ချက်ဖြင့် သိုလှောင်ထားခြင်းရှိ/မရှိကွင်းဆင်းစစ်ဆေးခဲ့ရာ ဆန်အမျိုးအစားများနှင့် ဆန်ဈေးနှုန်းများမှာ ရွှေဘိုပေါ်ဆန်းတစ်တင်းခွဲ(၁)ပိုင်းလျှင် (၁၆၀၀၀၀)ကျပ်၊ ဧရာမင်း (အဟောင်း) တစ်တင်းခွဲ(၁)ပိုင်းလျှင် (၁၄၅၀၀၀)ကျပ်၊ မနောစင်စင်တစ်တင်းခွဲ(၁)ပိုင်းလျှင် (၁၀၀၀၀၀)ကျပ်၊ မနောသုခတစ်တင်းခွဲ(၁)ပိုင်းလျှင် (၉၃၀၀၀)ကျပ်နှင့် ဆင်းသုခတစ်တင်းခွဲ(၁)ပိုင်းလျှင် (၉၀၀၀၀)ကျပ် စသည့်ဈေးနှုန်းအသီးသီးဖြင့်ရောင်းချပြီး ယခင်မေလဈေးနှုန်းများနှင့်နှိုင်းယှဉ်ပါက ယခင်လအတိုင်း အပြောင်းအလဲမရှိဘဲ တည်ငြိမ်လျက်ရှိကြောင်း၊ ဒေသတွင်းဆန်စက်များမှ ဝယ်ယူရောင်းချပြီး၊ “ရွှေဘိုပေါ်ဆန်း” ဆန်တစ်မျိုးတည်းကိုသာ ရွှေဘိုမြို့မှဝယ်ယူရောင်းချကြောင်း၊ လက်ကျန်အခြေအနေအနည်းငယ်ရှိကြောင်း၊ ၎င်းနောက် ဆန်အရောင်းဆိုင်လုပ်ငန်းရှင်အား ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်းမပြုလုပ်ကြရန်  ဆွေးနွေးခဲ့ကြောင်းနှင့် စားသုံးသူကာကွယ်ရေးအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)၊ ပုဒ်မ၄၁ပါ ကုန်အညွှန်းအမှတ်အသားများနှင့်ပြည့်စုံမှုမရှိသော ကုန်စည်များထုတ်လုပ်ဖြန့်ဖြူးခြင်း၊  ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ ဒု-ခရိုင်ဦးစီးမှူး၊  ချောင်းဦးမြို့နယ်တာဝန်ခံနှင့် ဝန်ထမ်း(၁)ဦး၊ မြို့နယ်စည်ပင်သာယာရေးအဖွဲ့မှ ဝန်ထမ်း(၁)ဦးတို့သည် (၁၁-၆-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မုံရွာမြို့၊ ကျောက္ကာလမ်းပေါ်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

      ထိုသို့ဆောင်ရွက်ရာတွင် မုံရွာမြို့၊ ကျောက္ကာလမ်းပေါ်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များ၌  ကုန်အညွှန်းအမှတ်အသားပြည့်စုံမှုမရှိသော ကုန်စည်များရောင်းချနေခြင်းရှိ/မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များအား တင်သွင်းရောင်းချခြင်းမပြုကြရန်ပြောကြားခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)

      စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး၏ ညွှန်ကြားချက်အရ စစ်ကိုင်းခရိုင်ဦးစီးမှူးဦးဆောင်၍ ဒု-ခရိုင်ဦးစီးမှူးနှင့် ဝန်ထမ်း(၂)ဦးသည် ခရိုင်ပြည်သူ့ကျန်းမာရေးဦးစီးဌာန၊ ခရိုင်အထူးစုံစမ်းစစ်ဆေးရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့်အတူ ၂၀၂၄ခုနှစ်၊ ဇွန်လ ၁၀ရက်နေ့တွင် စစ်ကိုင်းမြို့ပေါ်ရှိ နန္ဒဝန်၊ ထွန်းသောင်၊ အောင်ဇမ္ဗူဆေးဆိုင်များအား ဈေးကွက် စောင့်ကြည့်စစ်ဆေးခဲ့ပါသည်။

        ထိုသို့ကွင်းဆင်းခဲ့သည့်ဆေးဆိုင်(၃)ဆိုင်တွင် Online Platform Viber မှတစ်ဆင့် တရားမဝင်တင်သွင်းရောင်းချသည့် ဆီးချိုရောဂါနှင့်သက်ဆိုင်သည့် Mixtard Insulin ဆေးများရောင်းချခြင်းရှိ/မရှိ ဈေးကွက်စောင့်ကြည့်စစ်ဆေးခဲ့ရာ ရောင်းချခြင်းမရှိကြောင်းစိစစ်တွေ့ရှိရပါသည်။ ဆေးများကို Online မှတစ်ဆင့်ဝယ်ယူခြင်းမပြုဘဲ မန္တလေးမြို့ရှိဆေးဆိုင်များနှင့် ကုမ္ပဏီများမှတစ်ဆင့်ဝယ်ယူပြီး ပြန်လည်ရောင်းချကြောင်း ဆိုင်ပိုင်ရှင်များ၏ ပြောကြားချက်အရသိရှိရပါသည်။ စစ်ဆေးရေးအဖွဲ့က Cold-chan Product များအား ဆေးအာနိသင်မပျက်စီးစေရန်နှင့် လူနာများအတွက် အန္တရာယ်မဖြစ်စေရန် သတ်မှတ်ထားသည့် ထားသိုသိမ်းဆည်းပုံအညွှန်းများအတိုင်း မှန်ကန်စွာထားသိုရန်၊ တရားဝင်ဆေးဝါးမှတ်ပုံတင်ခွင့်ပြုအမှတ်ပါရှိသော ဆေးများကိုဝယ်ယူရောင်းချရန်ဆွေးနွေးပြောကြားခဲ့ပြီး Cold-chan Product များသိမ်းဆည်းထားရှိမှုအားစစ်ဆေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒုဦးစီးမှူးပါ ဝန်ထမ်း(၃)ဦး၊ ပြည်သူ့ကျန်းမာရေးဦးစီးဌာနမှ ဒေါက်တာဇင်မာအေး၊ အထွေထွေအုပ်ချုပ်ရေးဦးစီးဌာနမှ ဒေါ်စိုးစန္ဒာကျော် (ဒု-ဦးစီးမှူး)၊ မြို့နယ်စည်ပင်သာယာအုပ်ချုပ်ရေးဌာနမှ ဦးကျော်သူရထွေး (လက်ထောက်အုပ်ချုပ်ရေးမှူး)ပါဝင်လျက် ရွှေပြည်သာမြို့နယ်၊ ပတ္တမြားဈေးတွင် ၁၄-၆-၂၀၂၄ ရက်နေ့၊ နေ့လယ်(၁၂:၁၀)နာရီအချိန်တွင် ဈေးတာဝန်ခံရုံး၌ အသိပညာပေးဟောပြောပွဲကျင်းပပြုလုပ်ခဲ့ပါသည်။

          ထိုသို့ဆွေးနွေးဟောပြောရာတွင် စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ကုန်စည်အမျိုးအစားအလိုက် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြထားသည့် ထုတ်ကုန်ပစ္စည်းများကိုသာဝယ်ယူရောင်းချရမည်ဖြစ်ကြောင်း၊ မိမိတို့ရောင်းချသည့် ကုန်ပစ္စည်းများအပေါ် တာဝန်ယူရမည်ဖြစ်ကြောင်းနှင့် စားသုံးသူများနစ်နာမှုရှိလျှင်လည်း တိုင်ကြားနိုင်ကြောင်း အသိပညာပေးဟောပြောခဲ့ကြောင်းသိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ၁၄-၆-၂၀၂၄ ရက်နေ့တွင် ဗိုလ်တထောင်ခရိုင်အတွင်းရှိ ၃၆၀ဒီဂရီ(စက်ဆန်း)  Star Hight (စက်ဆန်း)၊  New Day (စက်ဆန်း)၊  High Way  (မင်္ဂလာတောင်ညွန့်)၊ Max  (သိမ်ဖြူ)၊  Max (သာကေတ)၊  Max (ကမာကြည်) စသည့် စက်သုံးဆီဆိုင်အရောင်းဆိုင်များသို့သွားရောက်၍ စက်သုံးဆီများကို သတ်မှတ်ရည်ညွှန်းဈေးအတိုင်း ရောင်းချခြင်းရှိ/မရှိ ရှောင်တခင်ကွင်းဆင်းစစ်ဆေးမှုများဆောင်ရွက်ခဲ့ကြကြောင်းသိရှိရပါသည်။

        ထိုသို့ကွင်းဆင်းစစ်ဆေးရာတွင် မြို့နယ်အတွက် စက်သုံးဆီပြတ်လတ်မှုမရှိစေရေး၊ စက်သုံးဆီဈေးနှုန်းများမြှင့်တင်ရောင်းချခြင်းမပြုရန် စက်သုံးဆီတင်သွင်းဖြန့်ဖြူးရောင်းချနေမှုအခြေအနေ၊ စက်သုံးဆီပြတ်လပ်မှုရှိ/မရှိ၊ (PPRD) စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏  နေ့စဉ်သတ်မှတ်ထုတ်ပြန်ထားသော စက်သုံးဆီရည်ညွှန်းဈေးနှုန်းအတိုင်းရောင်းချမှုရှိ/မရှိ၊ အချင်အတွယ်နှင့် အလေးချိန်မှန်ကန်မှုရှိ/မရှိစစ်ဆေးခဲ့ရာ သတ်မှတ်ရည်ညွှန်းဈေးနှုန်းအတိုင်းရောင်းချလျက်ရှိပြီး အချင်အတွယ်မှန်ကန်ကြောင်းစစ်ဆေးတွေ့ရှိရကြောင်း၊ စက်သုံးဆီလုပ်ငန်းရှင်အနေဖြင့် တရားမဝင်စက်သုံးဆီ၊ ချောဆီများတင်သွင်းဖြန့်ဖြုးရောင်းချနေခြင်းကိုစိစစ်တွေ့ရှိရပါက အရေးယူဆောင်ရွက်သွားမည်ဖြစ်ကြောင်းနှင့် ပြည်သူများ အဆင်ပြေချောမွေ့စွာဝယ်ယူနိုင်ရေးအတွက် စက်သုံးဆီအရောင်းဆိုင်များအား စက်သုံးဆီပြတ်လတ်မှုမရှိစေရေး၊ ပုံမှန်ဖွင့်လှစ်ရောင်းချနိုင်ရေးနှင့် သတ်မှတ်ဈေးနှုန်းထက် ပိုမိုရောင်းချခြင်းမပြုဘဲ  ဌာနကထုတ်ပြန်ထားသော စီးပွားရေးလုပ်ငန်းရှင်များလိုက်နာရမည့် ညွှန်ကြားချက် များအတိုင်း လိုက်နာဆောင်ရွက်ကြရန်လိုအပ်ကြောင်း အသိပေးပြောကြားခဲ့မှုကိုသိရှိရပါသည်။

DOCA(ရန်ကုန်)