HighLight News

       စားသုံးသူရေးရာဦးစီးဌာန၊ သာယာဝတီခရိုင်၊ သာယာဝတီမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ (၁၇-၆-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ Community Center ၌ စားသုံးသူအသိပညာပေး Talk Show ကျင်းပဆောင်ရွက်ခဲ့ပါသည်။

      စားသုံး/ ထုတ်လုံတာဝန်ခံ ဒေါ်ခိုင်ခိုင်ရီက တက်ရောက်လာသူများအား  စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်များကိုဝယ်ယူအသုံးပြုရာတွင် ကုန်စည်၏အမျိုးအမည်၊ သုံးစွဲပုံနည်းလမ်း၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းပုံအညွှန်း၊ ကျန်းမာရေးဆိုင်ရာဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်များပါရှိရန်နှင့် ကုန်စည်နှင့်ဝန်ဆောင်မှုများဝယ်ယူအသုံးပြုရာတွင် နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နည်းလမ်းများအားပြောကြားကာ စားသုံးသူကာကွယ်ရေးဆိုင်ရာ အသိပညာများဆွေးနွေးဟောပြောခဲ့ကြောင်းသိရှိရပါသည်။

DOCA(ပဲခူး)

       တောင်ငူခရိုင်၊ ရေတာရှည်မြို့နယ်အတွင်းရှိ စားသုံးဆီဖြန့်ဖြူးရောင်းချသူများနှင့်တွေ့ဆုံ၍ ဥပဒေပါပြဋ္ဌာန်းချက်များ၊ အမိန့်ညွှန်ကြားချက်များနှင့်အညီ လိုက်နာဆောင်ရွက်ရေး ရှင်းလင်းဆွေးနွေးပွဲကို ၂၀၂၄ခုနှစ်၊ ဇွန်လ ၁၄ရက်နေ့ မွန်းလွဲပိုင်းတွင် စားသုံးသူရေးရာဦးစီးဌာန၊ ရေတာရှည်မြို့နယ်တာဝန်ခံရုံး၌ ကျင်းပပြုလုပ်ရာ စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က ရှင်းလင်းဆွေးနွေးခဲ့ပါသည်။

         အခမ်းအနားတွင် မြို့နယ်အထွေထွေအုပ်ချုပ်ရေးဦးစီးဌာန၊ ဒုတိယမြို့နယ်အုပ်ချုပ်ရေးမှူး ဦးထွန်းထွန်းလင်းနှင့် မြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးအေးကျော်တို့က အမှာစကားများပြောကြားခဲ့ပြီး စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က အမှတ်တံဆိပ်ပါ စားသုံးဆီများထုတ်လုပ်ရောင်းချရာတွင် စားသုံးသူကာကွယ်ရေးဥပဒေပါ ပြဋ္ဌာန်းချက်များ၊ အမိန့်၊ ညွှန်ကြားချက်များနှင့်အညီ လိုက်နာဆောင်ရွက်ရန်ကိုလည်းကောင်း၊ ရည်ညွှန်းဈေးဖြင့် ဝယ်ယူရရှိသောစားအုန်းဆီများအား သတ်မှတ်စည်းမျဉ်းစည်းကမ်းများနှင့်အညီ ရောင်းချရန်ကိုလည်းကောင်း ရှင်းလင်းပြောကြားခဲ့ပါသည်။

         ဆက်လက်၍ အစားအသောက်နှင့် ဆေးဝါးကွပ်ကဲရေးဦးစီးဌာနမှ ဒုတိယကြီးကြပ်ရေးမှူး ဒေါ်သူသူဟန်က ဌာနနှင့်သက်ဆိုင်သည့်ကိစ္စရပ်များကို ရှင်းလင်းပြောကြားခဲ့ပြီး တက်ရောက်လာသည့် လုပ်ငန်းရှင်များ၏ ဆွေးနွေးမေးမြန်းချက်များကို စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က ပြန်လည်ရှင်းလင်းဖြေကြားခဲ့ကြောင်းနှင့် အဆိုပါတွေ့ဆုံဆွေးနွေးပွဲသို့ စားသုံးဆီရောင်းချဖြန့်ဖြူးသူ ၃၃ဦးတက်ရောက်ခဲ့ကြောင်းသိရှိရပါသည်။

DOCA(ပဲခူး)

       ဧရာဝတီတိုင်းဒေသကြီး၊ မအူပင်ခရိုင်၊ အလုပ်သမားညွှန်ကြားမှုဦးစီးဌာန၊ စားသုံးသူရေးရာဦးစီးဌာနနှင့် စက်မှုကြီးကြပ်ရေးနှင့်စစ်ဆေးရေးဦးစီးဌာနတို့ပူးပေါင်း၍  မအူပင်မြို့၊ တိုးရွှေဝါခန်းမတွင် ၂၀၂၄ခုနှစ်၊ ဇွန်လ ၁၂ရက်နေ့၌ မအူပင်ခရိုင်အတွင်းရှိ ဆန်စက်လုပ်ငန်းရှင်များနှင့်တွေ့ဆုံရှင်းလင်းဆွေးနွေးပွဲပြုလုပ်ခဲ့ကြပါသည်။

        ဆွေးနွေးပွဲတွင် အလုပ်ရှင်/ အလုပ်ရှင်ကိုယ်စားလှယ်များ၊ အလုပ်သမားအလုပ်သမားဝန်ကြီးဌာနအောက်ရှိ ဦးစီးဌာနများ၏ စည်းကြပ်သည့်ဥပဒေနှင့် လုပ်ငန်းတာဝန်များကိုရှင်းလင်းခြင်း၊ အတတ်နိုင်ဆုံး အလုပ်သမားအခက်အခဲများအပေါ်ကိုဖြေရှင်းရန်လိုအပ်ကြောင်း ဆွေးနွေးပြောကြားခြင်း၊  မိမိတို့ဧရာဝတီတိုင်းသည် စိုက်ပျိုးရေးကိုအခြေခံ၍ ဆောင်ရွက်နေသောကြောင့် ဆန်စက်လုပ်သားကြီးများ အနေဖြင့် တိုင်း/ပြည်နယ်များအတွက်ပါ ဆန်စပါးရရှိရေး ဆောင်ရွက်ပေးနေရသည့်အတွက် ကျေးဇူးတင်ရှိကြောင်း အားပေးစကားပြောကြားခဲ့သည်။  

      ၎င်းနောက် စားသုံးသူရေးရာဦးစီးဌာနအနေဖြင့် အလုပ်သမားများ၏ရပိုင်ခွင့်နှင့် လုပ်ငန်းခွင်အလုပ်သမားများ ဘေးအန္တရာယ်ကင်းရှင်းရေး၊ အလုပ်သမားများသက်သာချောင်ချိရေးတို့အတွက် အလုပ် သမား၊ အလုပ်ရှင်များမှာ ကျွန်းကိုင်းမီ ကိုင်းကျွန်းမီ ဆောင်ရွက်စေလိုကြောင်း၊ လုပ်ငန်းရှင်အသိပညာပေးဟောပြောပွဲများတွင်လည်း ထည့်သွင်းဆွေးနွေးကြောင်း၊  အလုပ်ရှင်၊ အလုပ်သမားများအနေဖြင့် မိမိတို့၏ အခွင့်အရေးတာဝန်များကို သိရှိလိုက်နာဆောင်ရွက်ကြရန်နှင့် ဆန်စက်လုပ်ငန်းဖွံ့ဖြိုးတိုးတက်ရေးအတွက်လည်း အလေးပေးဆွေးနွေးခဲ့ပြီးနောက် ဆန်စက်လုပ်ငန်းရှင်များ၊ သိုလှောင်ရုံပိုင်ရှင်များအနေဖြင့် ဆန်စပါးသိုလှောင်ရုံများအတွက် မှတ်ပုံတင်ခြင်းလုပ်ငန်းကို စားသုံးသူရေးရာဦးစီးဌာန၏ သိုလှောင်ရုံမှတ်ပုံတင်ရာ Online နှင့်ချိတ်ထားသော Myanmar Rice Online (မြန်မာ့ဆန်စပါးအွန်လိုင်း) MyRo တွင် သတ်မှတ်ချက်များအတိုင်းဖြည့်စွက်၍ ထောက်ခံချက်များဖြင့် တင်ပြလျောက်ထားခြင်းလုပ်ငန်းဆောင်ရွက်လျက်ရှိပြီး၊ သိုလှောင်ရုံဆန်စက်ပိုင်ရှင်များအနေဖြင့် မှတ်ပုံတင်ခြင်းကိုလုပ်ဆောင်နိုင်ပြီးဖြစ်ကြောင်း၊ တချို့လုပ်ငန်းရှင်များအနေဖြင့် မှတ်ပုံတင်ပြီးဖြစ်သော်လည်း ကျန်ရှိသောလုပ်ငန်းရှင်များဆောင်ရွက်နိုင်ရန်အတွက် အကျယ်တဝင့်ရှင်းလင်းပြောကြားခဲ့ပြီး ဆွေးနွေးပွဲသို့ မအူပင်ခရိုင်၊ မြို့နယ်အသီးသီးမှ ဆန်စက်လုပ်ငန်းရှင် (၁၅၀) ဦးတက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ သထုံမြို့နယ်တာဝန်ခံသည် (၁၃.၆.၂၀၂၄)ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင် သာယာရေး အဖွဲ့တို့နှင့် ပူးပေါင်း၍ သထုံမြို့နယ်အတွင်း ဆန်များဈေးနှုန်းမြှင့်တင်ရောင်းချမှုမရှိရေးနှင့် ဈေးနှုန်းတည်ငြိမ်းရေးအတွက် သထုံမြို့နယ်အတွင်းရှိ ဆန်ဂိုဒေါင်များ၊ ဆန်အရောင်းဆိုင်များအား လိုက်လံကွင်းဆင်းစစ်ဆေးခဲ့ကြောင်း သိရှိရပါသည်။

    ထိုသို့ကွင်းဆင်းစစ်ဆေးရာတွင် သထုံမြို့နယ်ဆေးရုံလမ်းရှိ ရွှေလင်ဗန်းဆန်ဆိုင်၊ သထုံမြို့နယ် ရှမ်းစုလမ်းရှိဖူးပွင့်ခိုင်ဆန်ဆိုင်၊ သထုံမြို့နယ်ဘင်လှိုင်ရပ်ကွက်၊ မင်းလမ်းရှိ ကြယ်တံခွန်ဆန်ဆိုင်နှင့် ၀ါ၀ါ၀င်းဆန်ဆိုင်တို့ကိုသွားရောက်၍ ဆန်အမျိုးအစားအလိုက် ဈေးနှုန်းမြှင့်တင်ရောင်းချခြင်းအလို့ဌာ သိုလှောင်ထားခြင်းရှိ/ မရှိကိုလိုက်လံစစ်ဆေးရာ   ဈေးနှုန်းမြှင့်တင်ရောင်းချခြင်းအလို့ဌာ သိုလှောင်ထားခြင်းမရှိကြောင်း စစ်ဆေးတွေ့ရှိရပြီး ဆိုင်ရှင်များအားဈေးနှုန်းမြှင့်ရောင်းချမှုမပြုကြရေး အသိပေးဆောင်ရွက်ခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ ဘီးလင်းမြို့နယ် စားသုံးသူရေးရာဦးစီးဌာနမှ ဝန်ထမ်းများသည် (၁၃.၆.၂၀၂၄) ရက်နေ့တွင် ဘီးလင်းမြို့၊ ဘိုးလှကြီးရပ်ကွက် (အ.မ.က) မြို့သစ်ကျောင်း၌ စားသုံးသူကာကွယ်ရေးအသိပညာပေး ဟောပြောဆွေးနွေးပွဲပြုလုပ်ခဲ့ပါသည်။  စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံက ဌာန၏မျှော်မှန်းချက်၊ ရည်မှန်းချက်တာဝန်များ၊ လက်ရှိအချိန်တွင် ဌာနမှဆောင်ရွက်နေသော လုပ်ငန်းတာဝန်များကို ဦးစွာပထမဟောပြောရှင်းလင်း၍ စားသုံးသူတိုင်းရယူခွင့်ရှိသော စားသုံးသူအခွင့်အရေး (၈)ချက်၊ ကုန်အညွှန်းအမှတ်အသားပြည့်စုံမှသာလျှင် စိတ်ချယုံကြည်စွာရွေးချယ်ဝယ်ယူအသုံးပြု စားသုံးကြစေရန်နှင့် စားသုံးသူများနစ်နာဆုံးရှုံးမှုများဖြစ်ပေါ်လာပါက ဖြေရှင်းဆောင်ရွက်နိုင်မှုများကိုဟောပြောဆွေးနွေးခဲ့ပါသည်။ ဟောပြောပွဲသို့ ကျောင်းအုပ်ဆရာမကြီးဒေါ်စန်းစန်းနွယ်နှင့် ဆရာ/ ဆရာမ(၈)ဦး၊ ကျောင်းသား/ကျောင်းသူ (၁၂၀) ဦးတို့ တက်ရောက်ခဲ့ပြီး စားသုံးသူအသိပညာပေးလက်ကမ်းစာစောင်များကို ဖြန့်ဝေပေးအပ်ခဲ့ပါကြောင်း သတင်းရရှိပါသည်။

DOCA(မွန်)