ပြည်ပကုန်သွယ်မှုသတင်းများ

           လာအိုဘဏ္ဍာရေးဝန်ကြီးဌာနသည် ၂၀၂၅ ခုနှစ် တတိယသုံးလပတ်အတွက် အပြုသဘောဆောင်သော စီးပွားရေးအလားအလာကို မျှော်မှန်းထားပြီး ခရီးသွားကဏ္ဍတွင် ခိုင်မာအားကောင်းသည့် အလားအလာများနှင့် ရင်းနှီးမြှုပ်နှံမှုများ အထူးသဖြင့် လျှပ်စစ်ဓာတ်အား၊ အခြေခံအဆောက်အအုံတည်ဆောက်မှုနှင့် အခြားအဓိကကဏ္ဍများတွင် ကြီးထွားလာမှုကို မီးမောင်းထိုးပြခဲ့သည်။ လာအိုနိုင်ငံ ဘဏ္ဍာရေးဝန်ကြီးဌာနလက်အောက်ရှိ လာအိုစာရင်း အင်းဗျူရိုသည် ဝန်ကြီးဌာနမှ တာဝန်ရှိသူများ၊ လာအိုဗဟိုဘဏ်မှ ကိုယ်စားလှယ်များနှင့် အခြားသက်ဆိုင်ရာ သက်ဆိုင်သူများပါဝင်သော ညှိနှိုင်းအစည်းအဝေးကို သြဂုတ်လ ၁၃ ရက် နေ့တွင် ကျင်းပခဲ့ကြောင်း ဝန်ကြီးဌာန၏ အစီရင်ခံစာအရ သိရသည်။ အဆိုပါအစည်းအဝေးတွင် စီးပွားရေးနှင့် လူမှုရေးအခြေအနေဆိုင်ရာ အစီရင်ခံစာတစ်ရပ်ရေးဆွဲရန် ရည်ရွယ်၍ ၂၀၂၅ ခုနှစ် ပထမနှစ်ဝက်အတွက် အချက်အလက်တွက်ချက်မှုနှင့် စုစည်းမှုရလဒ်များကို အဓိကထား ဆွေးနွေးခဲ့ကြောင်းသိရသည်။ စင်တာသည် နိုင်ငံ၏ စုစုပေါင်းစီးပွားရေးတန်ဖိုးကို တွက်ချက်ခြင်း၊ အကဲဖြတ်ခြင်းနှင့် ခန့်မှန်းခြင်း တို့ကို ဆောင်ရွက်ပြီး စီးပွားရေးနှင့် လူမှုရေးလမ်းကြောင်းများဆိုင်ရာ အဓိကအချက်အလက်များကို တင်ပြပေးသည်။ ဤလုပ်ငန်းသည် ပြည်တွင်းအသားတင်ထုတ်ကုန် (GDP)၊ ပင်မမက်ခရို စီးပွားရေးဒေတာနှင့် အုပ်ချုပ်ရေးစနစ်များ၊ စစ်တမ်းများနှင့် အခြားရင်းမြစ်များမှ စုဆောင်းထားသော လူမှုရေးဆိုင်ရာ ကိန်းဂဏန်းများကဲ့သို့သော ညွှန်းကိန်းများအပေါ် မူတည်သည်။ အစီရင်ခံစာအရ လာအိုနိုင်ငံ၏ GDP သည် ၂၀၂၅ ခုနှစ် ပထမခြောက်လတွင် ၄.၅ ရာခိုင်နှုန်း တိုးလာမည်ဟု ခန့်မှန်းထားပြီး ယမန်နှစ် အလားတူကာလနှင့် တူညီသည်။ လယ်ယာကဏ္ဍသည် ၂၀၂၄ ခုနှစ် ပထမနှစ်ဝက်တွင် ၂.၉ ရာခိုင်နှုန်းမှ ၃.၃ ရာခိုင်နှုန်း တိုးတက်ခဲ့သည်။ စက်မှုကဏ္ဍသည် ယခင်နှစ် ၄.၄ ရာခိုင်နှုန်း နှင့် နှိုင်းယှဉ်ပါက ၄.၆ ရာခိုင်နှုန်း တိုးတက်ခဲ့ပြီး ဝန်ဆောင်မှုကဏ္ဍသည် ၄.၇ ရာခိုင်နှုန်း တိုးတက်ခဲ့ပြီး ၂၀၂၄ ခုနှစ် ပထမနှစ်ဝက်တွင် တိုးတက်မှုနှုန်း ၅.၂ ရာခိုင်နှုန်းထက် အနည်းငယ် လျော့နည်းခဲ့သည်။ ထို့အပြင် ၂၀၂၅ ခုနှစ် တတိယသုံးလပတ်တွင် လာအို၏ စီးပွားရေး အလားအလာသည် အပြုသဘောဆောင်လျက်ရှိပြီး ခရီးသွားကဏ္ဍတွင် ခိုင်မာသော အလား အလာများနှင့် ရင်းနှီးမြှုပ်နှံမှုများ တိုးလာလျက်ရှိပါသည်။ လယ်ယာကဏ္ဍသည် ၃.၇ ရာခိုင် နှုန်း၊ စက်မှုလုပ်ငန်း ၃.၆ ရာခိုင်နှုန်းနှင့် ဝန်ဆောင်မှုလုပ်ငန်း ၄.၃ ရာခိုင်နှုန်း တိုးလာရန် မျှော်မှန်းထားပြီး ဂျီဒီပီ တိုးတက်မှုနှုန်း ၄.၀ ရာခိုင်နှုန်းကို ဗဟိုက ခန့်မှန်းထားသည်။ သို့သော်လည်း ကမ္ဘာ့ကုန်သွယ်ရေးတင်းမာမှုများ၊ နိုင်ငံရေးပဋိပက္ခများ၊ သဘာဝဘေး အန္တရာယ် များနှင့် ကပ်ရောဂါများကြောင့် ထုတ်လုပ်မှုနှင့် ဝန်ဆောင်မှုများကို ထိခိုက်စေနိုင်သည့် အလားအလာများကြောင့် စီးပွားရေးအလားအလာ မသေချာသေးကြောင်း အစီရင်ခံစာကဆိုသည်။

Source: Xinhua

DOCA (ရန်ကုန်)                                                                             

         အာဖဂန်နစ္စတန်နိုင်ငံသည် အကြီးစားအသေးစား သတ္တုတူးဖော်ရေးစီမံကိန်းများကို လုပ်ဆောင်ခဲ့ပြီး ဒေသခံပြည်သူများကို အလုပ်အကိုင် ထောင်ပေါင်းများစွာ ပေးအပ်ခဲ့ကြောင်း စီးပွားရေးဆိုင်ရာ ယာယီလက်ထောက်ဝန်ကြီးချုပ်ရုံးက သြဂုတ်လ ၁၆ ရက်နေ့တွင် ထုတ်ပြန်ခဲ့ပြီး အကြီးစား မိုင်း ၂၉ ခုနှင့် အသေးစား မိုင်း ၁၇၅ ခုအား တူးဖော်ဆောင်ရွက်နေကြောင်း သိရသည်။

       ခန့်မှန်းခြေအားဖြင့် အာဖဂန်လူမျိုး ၁၇၀,၀၀၀ သည် သတ္တုတူးဖော်ရေး ကဏ္ဍတွင်ပါဝင် နေသည်။ သတ္တုတွင်းလုပ်ငန်းသည် နိုင်ငံ၏ စီးပွားရေးလုပ်ငန်းများတွင် အရေးပါသော အခန်းကဏ္ဍမှ ပါဝင်နေပြီး အလုပ်အကိုင်နှင့် ၀င်ငွေများ ဖန်တီးပေးနေကြောင်း သိရသည်။ ၎င်း၏ ကြွယ်ဝသော သဘာဝအရင်းအမြစ်များ အသိုက်အဝန်းကြောင့် လူသိများသော အာဖဂန်နစ္စတန် နိုင်ငံသည် မကြာသေးမီနှစ်များအတွင်း ၎င်း၏ သတ္တုကြွယ်ဝမှုကို ထိန်းချုပ်ရန်နှင့် အသုံးချရန် ကြိုးပမ်းမှုများကို တိုးချဲ့ခဲ့ကြောင်း သိရှိရပါသည်။

Source: Xinhua

DOCA (ရန်ကုန်)                                                                            

              ထိုင်းနိုင်ငံနှင့်တရုတ်နိုင်ငံတို့သည် သစ်သီးကုန်သွယ်ရေးအတွက် စစ်ဆေးရေးဂိတ် ၅ ခုကို စက်တင်ဘာလ ၁ ရက်နေ့မှစ၍ ဖွင့်လှစ်ရန် သဘောတူညီခဲ့ပြီး လျင်မြန်စွာသယ်ယူပို့ဆောင်ခြင်းကို တိုးမြှင့်ရန်နှင့် ဈေးကွက်ကို တိုးချဲ့မည်ဟု သိရှိရပါသည်။

            ထိုင်းနိုင်ငံနှင့်တရုတ်နိုင်ငံတို့သည် သစ်သီးတင်ပို့သည့် တတိယနိုင်ငံ၏ စည်းမျဉ်းစည်းကမ်းအောက်တွင် သွင်းကုန်-ပို့ကုန် စစ်ဆေးရေးဂိတ် ၅ ခုဖွင့်လှစ်ရန် သဘောတူစာချုပ်တွင် လက်မှတ်‌ ရေးထိုးခဲ့ကြပါသည်။ ၄င်းသည် သယ်ယူပို့ဆောင်ရေး ကုန်ကျစရိတ်ကို လျော့ချနိုင်မည်ဖြစ်သလို စစ်ဆေးရေးဂိတ်များတွင် လူစုလူဝေးဖြစ်ခြင်းနှင့် ထိုင်းသစ်သီးများကို တရုတ်နိုင်ငံသို့ဖြတ်ပြီး လျင်မြန်စွာ သယ်ယူပို့ဆောင်နိုင်ပါမည်။

            ဤသဘောတူညီချက်အရ ထိုင်းဖက်တွင် စစ်ဆေးရေးဂိတ်သစ် ၃ ခု ဖွင့်လှစ်မည့်ဖြစ်ပြီး တရုတ်ဖက်တွင် စစ်ဆေးရေးဂိတ် ၂ ခု ဖွင့်လှစ်မည်ဖြစ်ပါသည်။ ထို့ကြောင့် ထိုင်းဖက်တွင် သစ်သီးတင်ပို့ရန် စစ်ဆေးရေးဂိတ် ၉ ခုထိရှိလာမည်ဖြစ်ပြီး တရုတ်ဖက်တွင် စစ်ဆေးရေးဂိတ် ၁၂ ခုထိရှိ လာမည်ဖြစ်ပါသည်။

            ၂၀၂၄ ခုနှစ်တွင် ထိုင်းနိုင်ငံ၏ လက်ဆက်သော သစ်သီးများ တရုတ်နိုင်ငံသို့ တင်ပို့မှုသည် ဘတ်ငွေ ၁၈၀ ဘီလီယံကျော်မည်ဟု ခန့်မှန်းထားပါသည်။တရုတ်နိုင်ငံသည် ထိုင်းနိုင်ငံ၏ သစ်သီးတင်ပို့မှုနှင့် လယ်ယာထွက်ကုန် တင်ပို့သည့် အဓိကဈေးကွက်အဖြစ် ဆက်လက်တည်ရှိနေမည်ဖြစ် ပါသည်။

            စစ်ဆေးရေးဂိတ်အသစ် ၅ ခုသည် ၂၀၂၅ ခုနှစ် စက်တင်ဘာလ ၁ ရက်နေ့တွင် စတင်မည်ဖြစ်ပြီး ထိုင်းနိုင်ငံ၏ လယ်ယာထွက်ကုန် ကုန်သွယ်မှုတန်ဖိုးကို တိုးမြင့်စေသလို အနာဂတ်တွင် ဈေးကွက်များ ပိုမိုကျယ်ပြန့်စေမည်ဖြစ်ကြောင်း သိရှိရပါသည်။

Source : The Nation Thailand

DOCA(ရန်ကုန်)                                                                

           ကမ္ဘောဒီးယားနိုင်ငံ၏ အရှေ့မြောက်ပိုင်း Kratie ပြည်နယ်တွင် ရင်းနှီးမြှုပ်နှံသူများကို ဆွဲဆောင်ရန် အစိုးရ၏ တွန်းအားပေးမှုတစ်စိတ်တစ်ပိုင်းအနေဖြင့် ရင်းနှီးမြှုပ်နှံမှုမြှင့်တင်ရန်နှင့် လယ်ယာထွက်ကုန်များ သယ်ယူပို့ဆောင်ရေးလွယ်ကူစေရန်အတွက် ရည်ရွယ်ပြီး ကန်ဒေါ်လာ ၃၅ သန်း တန်ဖိုးရှိဘက်စုံသုံး ဆိပ်ကမ်းတစ်ခုကို တည်ဆောက်ရန် စီစဉ်ထားသည်။ အရှေ့မြောက်ပိုင်းဒေသ ရင်းနှီးမြှုပ်နှံမှု မြှင့်တင်ရေးလုပ်ငန်းအဖွဲ့ (NEIPWG) ၏ ဥက္ကဋ္ဌ Hean Sahib သည် စီးပွားရေးနှင့် ဘဏ္ဍာရေး ဝန်ကြီးဌာနတွင် ရင်းနှီးမြှုပ်နှံသူ ကိုယ်စားလှယ် အဖွဲ့နှင့် တွေ့ဆုံ၍ ၎င်းတို့၏ ရင်းနှီးမြှုပ်နှံမှုခွင့်ပြုချက်လျှောက်ထားမှုအား ဆွေးနွေးခဲ့ကြောင်းသိရသည်။ အဆိုပါစီမံကိန်းကို နိုင်ငံပေါင်း ၁၄၀ တွင် အခြေစိုက်သည့် China Energy Engineering Group Co., Ltd. (CEEC) ၏ လုပ်ငန်းခွဲဖြစ်သော KP Cement Industries Co., Ltd. မှ အဆိုပြုထား သည်။ ကမ္ဘောဒီးယားနိုင်ငံ အရှေ့မြောက်ဒေသ၏ စီးပွားရေးဖွံ့ဖြိုးတိုးတက်မှုကို အထောက်အကူဖြစ်စေမည့် ရင်းနှီးမြှုပ်နှံမှုလုပ်ငန်းများနှင့် လယ်ယာထွက်ကုန်များ သယ်ယူ ပို့ဆောင်ရေးတို့အတွက် မရှိမဖြစ်လိုအပ်သော အခြေခံအဆောက်အအုံများ တည်ဆောက်ရန် စီစဉ်ထားကြောင်း Sahib က ပြောကြားခဲ့သည်။ ဘက်စုံသုံးဆိပ်ကမ်း တည်ဆောက်ခြင်းနှင့် လည်ပတ်ခြင်းအတွက် ဥပဒေမူဘောင်နှင့် စည်းမျဉ်းစည်းကမ်း သတ်မှတ်ချက်များကို နားလည်သဘောပေါက်ရန် အဓိကထား ဆွေးနွေးခဲ့ပြီး အရှေ့မြောက်ပြည်နယ်တွင် ရင်းနှီးမြှုပ်နှံမှုလုပ်ငန်းများနှင့် လယ်ယာထွက်ကုန် သယ်ယူပို့ဆောင်ရေးနှစ်ခုလုံးကို ပံ့ပိုးပေးရန် ရည်ရွယ်ထားကြောင်း Sahib က ဆက်လက်ပြောကြားခဲ့သည်။ အထူးသဖြင့် လမ်းကွန်ရက်နှင့် ဆက်သွယ်ရေးကဏ္ဍများတွင် မကြာသေးမီနှစ်များအတွင်း ဒေသတွင်း အခြေခံအဆောက်အအုံများ သိသိသာသာ တိုးတက်ကောင်းမွန်လာကြောင်းနှင့် လာအိုနှင့်ဗီယက်နမ်နိုင်ငံတို့နှင့် နီးကပ်သောပြည်နယ်များသည် စိုက်ပျိုးရေးစက်မှုလုပ်ငန်းဖွံ့ဖြိုးတိုးတက်ရေးအတွက် အထူးသဖြင့် သီးနှံစိုက်ပျိုးရေးနှင့် ပို့ကုန်အတွက် အစားအစာ ပြုပြင်ရေးတို့တွင် ၎င်းတို့၏ တောင်းဆိုမှုကို အားကောင်းစေသည်ဟု Sahib က ဆက်လက်ပြောသည်။

Source: Khmer Times

DOCA(ရန်ကုန်)

          စီးပွားရေးဝန်ကြီးဌာနသည် အမေရိကန်ပြည်ထောင်စုမှ သတ်မှတ်ထားသော အခွန်စည်းမျဉ်းအသစ်များကြောင့် ထိုင်းပို့ကုန်လုပ်ငန်းရှင်များ လျှင်မြန်စွာ လိုက်လျောညီထွေဖြစ်စေရန်နှင့် သူတို့၏ ယှဉ်ပြိုင်နိုင်စွမ်းကို ထိန်းသိမ်းထားနိုင်ရန်အတွက် One-stop service center ဖွင့်လှစ် လိုက်ပြီဖြစ်ကြောင်း သိရပါသည်။

          အဆိုပါစင်တာသည် ထိုင်းနိုင်ငံမှ တင်ပို့သော ကုန်ပစ္စည်းများအပေါ် အမေရိကန်၏ ၁၉ ရာခိုင်နှုန်း အခွန်ပေးဆောင်ရမည် ဖြစ်သည့်အတွက် အသေးစားနှင့် အလတ်စား စီးပွားရေးလုပ်ငန်းများ (SMES) အပြင် ကုမ္ပဏီကြီးများကိုပါ ကူညီပေးရန် ရည်ရွယ်ထားကြောင်း အစိုးရ၏ ဒုတိယမြောက် ပြောရေးဆိုခွင့်ရှိသူ Anukool Pruksamusak က ပြောကြားခဲ့ပါသည်။

          အဆိုပါစင်တာသည် အခွန်အကောက်ညှိနှိုင်းမှုနှင့် လျော့ချခြင်းကိစ္စရပ်များ၊ စျေးကွက်သတင်းအချက်အလက်များ၊ ကုန်ကျစရိတ်လျှော့ချ‌ရေးဆိုင်ရာ အကြံညဏ်များနှင့် စီးပွားရေးအခွင့် အလမ်းများတိုးတက်စေရန် အစီအစဉ်များ၊ ကျယ်ပြန့်သော ဝန်ဆောင်မှုများနှင့် အကူအညီများ ပေးမည်ဖြစ်ကြောင်း Mr Anukool က ပြောကြားခဲ့ပါသည်။

          ပါဝင်သည့် ကိုယ်စားလှယ်လုပ်ငန်း ၁၂ ခုအနက် ၈ ခုမှာ စီးပွားရေးနှင့်ကူးသန်းရောင်းဝယ်ရေးဝန်ကြီး လက်အောက်တွင်ပါရှိကြောင်း သိရှိရပါသည်။

Source: Bangkok Post

DOCA (ရန်ကုန်)