ပြည်ပကုန်သွယ်မှုသတင်းများ

          ၂၀၂၅ ခုနှစ်၏ ပထမ ၇ လတာကာလတွင် ဗီယက်နမ်၏ ပြုပြင်ထုတ်လုပ်ခြင်းနှင့် ကုန်ထုတ်လုပ်ခြင်းကဏ္ဍသည် နိုင်ငံခြားတိုက်ရိုက်ရင်းနှီးမြှုပ်နှံမှု(FDI)များကိုဆွဲဆောင်ရာတွင် ထိပ်ဆုံးကဦးဆောင်နေကြောင်း ဗီယက်နမ်နိုင်ငံခြားရင်းနှီးမြှုပ်နှံသည့်လုပ်ငန်းများအသင်း၏ ဒုတိယဥက္ကဌ Nguyen Van Toan ၏ အဆိုအရ သိရပါသည်။ ထိုကာလအတွင်း အသစ်မှတ်ပုံတင်သည့် FDI မှာ အမေရိကန်ဒေါ်လာ ၁၀.၀၃ ဘီလီယံတန်ဖိုးရှိခဲ့ပြီး အမေရိကန်ဒေါ်လာ ၅.၆၁ ဘီလီယံမှာ ပြုပြင်ထုတ်လုပ်ခြင်းနှင့် ကုန်ထုတ်လုပ်ခြင်းသို့ ရောက်ရှိခဲ့ကြောင်း သိရပါသည်။ မတည်ငွေအသစ်မှတ်ပုံတင်ခြင်း၊ ရင်းနှီးမြှုပ်နှံမှုထပ်တိုးခြင်းနှင့် ရှယ်ယာဝယ်ယူခြင်းတို့ပါဝင် သည့် စုစုပေါင်းဆိုပါက ကဏ္ဍသည် အမေရိကန်ဒေါ်လာ ၁၃.၇၂ ဘီလီယံရရှိခဲ့ပြီး စုစုပေါင်း FDI ရရှိမှု၏ ၅၇ ရာခိုင်နှုန်းနီးပါးရှိကြောင်း သိရပါသည်။ Toan က ဗီယက်နမ်၏ ယှဉ်ပြိုင်နိုင်သော လုပ်သားကုန်ကျစရိတ်၊ သင့်လျော်သောပထဝီနိုင်ငံတည်နေရာ၊ မျိုးဆက်သစ်လွတ်လပ်သော ကုန်သွယ်ရေးသဘောတူညီချက်များတွင်ပါဝင်မှုနှင့်  စက်မှုဇုန်များဖွံ့ဖြိုးတိုးတက်လာမှုတို့ကြောင့် ထိုရလဒ်ရရှိခဲ့ခြင်းဖြစ်ကြောင်း မှတ်ချက်ပြုခဲ့ပါသည်။ ကမ္ဘာလုံးဆိုင်ရာထောက်ပံ့မှုကွင်းဆက်များ အထူးသဖြင့် အီလတ်ထရောနစ်နှင့် အစိတ်အပိုင်းသို့ နိုင်ငံနက်ရှိုင်းစွာဝင်ရောက်မှုက ရင်းနှီးမြှုပ်နှံမှုယုံကြည်ချက်ကို အားသစ်လောင်းပေးခဲ့ကြောင်း သိရပါသည်။ Toan က ပြုပြင် ထုတ်လုပ်ခြင်းနှင့် ကုန်ထုတ်လုပ်ခြင်းကဏ္ဍများသို့ FDI ဝင်ရောက်မှုအားကောင်းခြင်းသည် ထုတ်လုပ်မှုစွမ်းရည်တိုးချဲ့ရန်၊ တင်ပို့မှုအရှိန်မြှင့်တင်ရန်၊ အလုပ်အကိုင်များဖန်တီးပေးရန်နှင့် GDP ကြီးထွားမှုသိသာစွာရရှိရန် ပံ့ပိုးပေးနိုင်မည်ဟု ပြောကြားခဲ့ပါသည်။ သို့သော် Toan က ဗီယက်နမ်သည် FDI အရည်အတွက်ကိုသာမက အရည်အသွေးကိုပါအဓိကထားသင့်ကြောင်း၊ နည်းပညာမြင့်ကဏ္ဍများကိုဦးစားပေးသင့်ကြောင်း၊  သဘာဝပတ်ဝန်းကျင်နှင့်သင့်လျော်သော စီမံကိန်းများနှင့် ပြည်တွင်းလုပ်ငန်းများကို နည်းပညာလွှဲပြောင်းပေးရန်အာမခံချက်ရှိသည့် လုပ်ငန်းများကို အဓိကထားသင့်ကြောင်း ပြောကြားခဲ့ပါသည်။ ဘဏ္ဍာရေးဝန်ကြီးဌာနအောက်ရှိ နိုင်ငံခြားရင်းနှီးမြှုပ်နှံမှုအေဂျင်စီ၏ အဆိုအရ ၂၀၂၅ ခုနှစ်၏ ပထမ ၇ လတွင် ဗီယက်နမ်သည် စုစုပေါင်းနိုင်ငံခြားရင်းနှီးမြှုပ်နှံမှု အမေရိကန်ဒေါ်လာ ၂၄.၀၉ ဘီလီယံရရှိခဲ့ပြီး ၂၀၂၄ ခုနှစ်တူညီ သည့်ကာလနှင့်နှိုင်းယှဉ်ပါက ၂၇.၃ ရာခိုင်နှုန်းမြင့်တက်ခဲ့ကြောင်း သိရပါသည်။

Vietnam Plus

DOCA (ရန်ကုန်)                                                                            

             ဗီယက်နမ်နိုင်ငံမြောက်ပိုင်းရှိ Hung Yen ပြည်နယ်သည် သမင်မျက်လုံးသီးနှင့် အခြားလယ်ယာထုတ်ကုန်များ စားသုံးမှုမြှင့်တင်ရန်အတွက် အလုပ်ရုံဆွေးနွေးပွဲကို ဩဂုတ်လ ၂၀ ရက် နေ့က ကျင်းပခဲ့ကြောင်း သိရပါသည်။ ထိုအခမ်းအနားကို စက်မှုနှင့် ကုန်သွယ်ရေးဝန်ကြီးဌာနမှ တာဝန်ရှိသူများ၊ ဒေသအာဏာပိုင်များ၊ စီးပွားရေးလုပ်ငန်းများ၊ ကော်ပိုရေးတစ်များတက်ရောက်ခဲ့ကြပြီး သမင်မျက်လုံးသီးနှင့် အဓိကစိုက်ပျိုးရေးထုတ်ကုန်များဖြန့်ဖြူးရန် စာချုပ် ၁၂ ခုလက်မှတ် ရေးထိုးခဲ့ကြောင်း သိရပါသည်။ ပြည်နယ်ပြည်သူ့ကော်မတီ၏ ဒုတိယဥက္ကဌ Nguyen Le Huy က ထိုအခမ်းအနားသည် ဗီယက်နမ်၏ထိပ်တန်းသစ်သီး ၅၀ မျိုးတွင်ပါဝင်သည့် Hung Yen သမင်မျက်လုံးသီးအတွက် ဈေးကွက်များတိုးချဲ့ရန် ရည်ရွယ်ကြောင်း ပြောကြားခဲ့ပါသည်။ Hung Yen ပြည်နယ်သည် ၂၀၂၅ ခုနှစ်တွင် သမင်မျက်လုံးသီး တန်ချိန် ၅၀၀၀၀ ကျော်ထွက်ရှိရန် မျှော်မှန်းရပြီး ၆၀ ရာခိုင်နှုန်းကျော်သည် Viet GAP နှင့် အော်ဂဲနစ်စံနှုန်းများနှင့် ကိုက်ညီကြောင်း သိရပါသည်။ ထိုသစ်သီးကို အမေရိကန်၊ ဥရောပသမဂ္ဂ၊ ဂျပန်နှင့် တရုတ်တို့သို့တင်ပို့ပြီး စူပါမားကတ်များနှင့် e-commerce ပလက်ဖောင်းတို့မှတစ်ဆင့် ပြည်တွင်းစားသုံးသူများထံ ရောက်ရှိကြောင်း သိရပါသည်။ ကုန်သွယ်မှုမြှင့်တင်ရေးအေဂျင်စီ၏ ဒုတိယညွှန်ကြားရေးမှူး Bui Quang Hung က Hung Yen သမင်မျက်လုံးသီးသည် များစွာသောနိုင်ငံတကာဈေးကွက်များသို့ ဝင်ရောက်ခဲ့ပြီးဖြစ်ပြီး ယခုအခါ Vinmart၊ Big C၊ Aeon နှင့် Co.opmart အစရှိသည့် အဓိကစူပါ မားကတ်များတွင် ကျယ်ပြန့်စွာရောင်းချနေကြောင်း သိရပါသည်။ Hung က တရုတ်သည် အကြီးမားဆုံးဈေးကွက်အဖြစ်ဆက်လက်ရပ်တည်နေပြီး နှစ်စဉ် တန်ချိန်၇၀၀၀၀၀ ခန့် ဝယ်လိုအားရှိကြောင်း ပြောကြားခဲ့ပါသည်။ တစ်ချိန်တည်းမှာပင် ဂျပန်နှင့် တောင်ကိုရီးယားတို့သည် တင်းကျပ်သောစံနှုန်းများနှင့် ဝယ်လိုအားရှိသော်လည်း ၎င်းတို့က ဈေးနှုန်းမြင့်မားစွာဖြင့်ဝယ်ယူကြောင်း သိရပါသည်။ အမေရိကန်နှင့် ဥရောပသမဂ္ဂတို့မှာ အော်ဂဲနစ်ထုတ်ကုန်များကို ပိုမိုသဘောကျကြောင်း သိရပါသည်။ ကုန်သွယ်ရေးတာဝန်ရှိသူတစ်ဦးက Hung Yen သမင်မျက်လုံးသီးသည် ထိုဈေးကွက်များသို့ဝင်ရောက်ပြီးဖြစ်ပြီး အားကောင်းသောအလားအလာရှိကြောင်းနှင့် အာဆီယံနှင့် အရှေ့အလယ်ပိုင်းနိုင်ငံများမှာလည်း အာမခံချက်ရှိသောဒေသများ ဖြစ်ကြောင်း ပြောကြားခဲ့ပါသည်။ ကျွမ်းကျင်သူများက ပိုမိုကောင်းမွန်သောပြုပြင်ထုတ်လုပ်ခြင်းနှင့် အားကောင်း‌သောအမှတ်တံဆိပ်ပုံရိပ်မြှင့်တင်ခြင်းက Hung Yen သမင်မျက်လုံးသီးကို ပြည်တွင်းနှင့် နိုင်ငံခြားဈေးကွက်များတွင် စဉ်ဆက်မပြတ်ရောင်းချနိုင်ရန် ကူညီပေးနိုင်မည်ဟု ပြောကြားခဲ့ပါသည်။

Vietnam Plus 

DOCA (ရန်ကုန်)                                                                           

           ဗီယက်နမ်နိုင်ငံအလယ်ပိုင်း Gia Lai ပြည်နယ်သည် ၎င်း၏အဓိကစိုက်ပျိုးရေးထုတ်ကုန်များကို တရုတ်သို့တင်ပို့မှုမြှင့်တင်ရန်ကြိုးပမ်းမှုအနေဖြင့် ကုန်သွယ်မှုမြှင့်တင်ရေးအလုပ်ရုံ ဆွေးနွေးပွဲကို Pleiku မြို့တွင် ကျင်းပပြုလုပ်ခဲ့ကြောင်း သိရပါသည်။ ၎င်းသည် Gia Lai ပြည်နယ်က ၎င်းတို့၏ ကြီးမားသောစားသုံးသူဈေးကွက်သို့ စိုက်ပျိုးရေးထုတ်ကုန်များတရားဝင်တည်ငြိမ်စွာ တင်ပို့နိုင်ရန် သိသာထင်ရှားသောအ‌ရွေ့တစ်ခုဖြစ်ကြောင်း သိရပါသည်။ ပြည်နယ်စိုက်ပျိုးမွေးမြူရေးနှင့် သဘာဝပတ်ဝန်းကျင်ဝန်ကြီးဌာန၏အဆိုအရ ပြည်နယ်သည် စိုက်ပျိုးနိုင်သောမြေနေရာ ၉၇၇၀၀၀ ဟတ်တာရှိပြီး ဟတ်တာ ၇၅၃၀၀၀ သည်စက်မှုလုပ်ငန်းသုံးသီးနှံများ၊ သစ်သီးများနှင့် ဆေးဘက်ဆိုင်ရာအပင်များစိုက်ပျိုးရန် သင့်တော်သောမြေဩဇာကို ပိုင်ဆိုင်ထားကြောင်း သိရပါသည်။ ပြည်နယ်၏ အဓိကထုတ်ကုန်များတွင် ကော်ဖီ၊ ငှက်ပျောသီး၊ ပင်မှည့်သီးနှင့် ဒူးရင်း သီးတို့ပါဝင်ပြီး အများစုမှာ  နိုင်ငံတကာအသိအမှတ်ပြုစံနှုန်းများကို ပိုင်ဆိုင်ထားကြောင်း သိရပါ သည်။ Gia Lai သည်လည်း ဖရဲသီး၊ နဂါးမောက်သီး၊ ထောပတ်သီးနှင့် red reishi၊ reishi mushroom၊ ဂျင်းနှင့် စပါးလင်ကဲ့သို့သော တန်ဖိုးမြင့်ဆေးဘက်ဆိုင်ရာသီးနှံများကို စိုက်ပျိုးမှု တိုးချဲ့နေကြောင်း သိရပါသည်။ အရည်အသွေးနှင့် စံနှုန်းလိုအပ်ချက်များပြည့်မီရန် ပြည်နယ်သည် စိုက်ခင်းဧရိယာကုဒ် ၂၄၈ ခုကိုခွင့်ပြုခဲ့ပြီး နေ့စဉ် တန်ချိန် ၁၈၀၀ ထုတ်ပိုးနိုင်စွမ်းရှိသော ထုတ်ပိုး သည့်စက်ရုံ ၄၀ ကိုတည်ထောင်ခဲ့ကာ တရုတ်နိုင်ငံသို့ တရားဝင်တင်ပို့မှုများအတွက် ခိုင်မာသော အခြေခံအုတ်မြစ်ကို ဖန်တီးခဲ့ကြောင်း သိရပါသည်။ ပြည်နယ်ပြည်သူ့ကော်မတီဒုတိယဥက္ကဌ Nguyen Tuan Khanh က တရုတ်သည် ဗီယက်နမ်၏အကြီးမားဆုံးကုန်သွယ်ရေးမိတ်ဖက်ဖြစ်ပြီး ၂၀၂၄ ခုနှစ်တွင် အပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၁၇၁ ဘီလီယံရှိကြောင်း ပြောကြားခဲ့ပါသည်။ Gia Lai ပြည်နယ်အတွက် တင်းကျပ်သောအရည်အသွေးထိန်းချုပ်မှုနှင့် မူရင်းမှန်ကန်ကြောင်း အသိအမှတ်ပြုချက်လိုအပ်သည့် တရုတ်သည် စိုက်ပျိုးရေးနှင့် သစ်တော ထုတ်ကုန်များတင်ပို့မှုအတွက် အရေးပါသောဈေးကွက်တစ်ခုဖြစ်ကြောင်း သိရပါသည်။ တရုတ် ဈေးကွက်လိုအပ်ချက်သည် ကွဲပြားပြီး Gia Lai ပြည်နယ်သည် ကော်ဖီ၊ ဒူးရင်း၊ ပင်မှည့်သီး၊ ငရုတ် ကောင်းအနက်နှင့် အုန်းသီးတို့ပါဝင်သည့် ထုတ်ကုန်များတွင် ယှဉ်ပြိုင်နိုင်စွမ်းရှိကြောင်း သိရပါ သည်။ တရုတ်နိုင်ငံ Guangxi Zhuang ဒေသ၏ Big Data Development Bureau မှ တာဝန်ရှိသူ တစ်ဦးဖြစ်သည့် Zhu Houyan က ထုတ်လုပ်သည့်ပမာဏအပေါ်ပွင့်လင်းမြင်သာသည့်အချက် အလက်၊ ကောက်ရိတ်သိမ်းချိန်အချိန်ဇယား၊ ထုတ်ပိုးမှု၊ ကုန်အညွှန်းအမှတ်အသားနှင့် အကောက်ခွန်ကိစ္စအချိန်တိုတောင်းခြင်း၊ ထောက်ပံ့ပို့ဆောင်ရေးကုန်ကျစရိတ်ဖြတ်တောက်ခြင်း နှင့် တည်ငြိမ်သောရောင်းချနိုင်စွမ်းတို့၏ အရေးပါမှုကို အသားပေးပြောကြားခဲ့ကြောင်း သိရပါ သည်။ ထို့ပြင် Houyan က AI စွမ်းအင်သုံးစိုက်ပျိုးရေး၊ သုတေသန၊ ဖွံဖြိုးတိုးတက်ရေးမှ ကုန်သွယ်ရေးတိုးချဲ့ရန်လေ့ကျင်ခြင်းတို့တွင် ပူးပေါင်းဆောင်ရွက်ရန်အခွင့်အလမ်းများကို ပြောကြားခဲ့ကြောင်းလည်း သိရပါသည်။ ဗီယက်နမ်နိုင်ငံ စက်မှုနှင့် ကုန်သွယ်ရေးဝန်ကြီးဌာန အောက်ရှိ ဆန်းသစ်တီထွင်မှု၊ အစိမ်းရောင်အသွင်ကူးပြောင်းမှုနှင့် စက်မှုမြှင့်တင်ရေးအေဂျင်စီမှ ဒုတိယညွှန်ကြားရေးမှူး Do Thi Minh Tram က တရုတ်သည် စိုက်ပျိုးမွေးမြူရေး-ရေလုပ်ငန်း-သစ်ထုတ်ကုန်များအတွက် တည်ငြိမ်သောဝယ်လိုအားရှိသည့်ဈေးကွက်တစ်ခုဖြစ်ကြောင်း၊ ဝန်ကြီးဌာနသည် ထုတ်ကုန်အရည်အသွေးတိုးတက်ရန်နှင့် ဒေသခံများအား တရုတ်ဈေးကွက်ကို ထိရောက်စွာနှင့် အပြည့်အဝအသုံးချနိုင်ရန်ကူညီပေးမည့် စီမံချက်များဆောင်ရွက်လျက်ရှိကြောင်း ပြောကြားခဲ့ပါသည်။ ကွန့်ဖရန့်မူဘောင်တွင် နှစ်ဖက်စလုံးမှလုပ်ငန်းများသည် MoU များ ရေးထိုးခဲ့ကြပြီး လာမည့်အချိန်တွင် စဉ်ဆက်မပြတ်ပူးပေါင်းဆောင်ရွက်ရန် အလားအလာများကို တံခါးဖွင့်လှစ်ခဲ့ကြောင်း သိရပါသည်။

Vietnam Plus 

DOCA (ရန်ကုန်)                                                                           

           Dutch-Bangla Bank သည် ဒါကာ၏ Motijheel တွင် tk ၁၀၁၆ ကု‌ဋေခန့် တန်ကြေးရှိသော အဆောက်အဦးအား ၎င်းတို့၏ ရုံးချုပ်ဖွင့်လှစ်ရန်အတွက် ဝယ်ယူရန်ဆုံးဖြတ်ချက်ချခဲ့ကြောင်း သိရပါသည်။ အဆိုပါဘဏ်၏ ဘတ်အဖွဲ့သည် သြဂုတ်လ ၂၆ ရက်နေ့တွင်ကျင်းပသော အစည်းအဝေးပွဲတွင် အဆိုပါ ဆုံးဖြတ်ချက်ကို ချမှတ်ခဲ့ကြောင်း ဒါကာစတော့လဲလှယ်ရေးအဖွဲ့ အစည်း (DAE) ၏ ထုတ်ဖော်ချက်များအရ သိရပါသည်။ အဆိုပါဘဏ်သည် Motijheel စီးပွားရေး ဧရိယာ ၄၇ ခုတွင် ကူးသန်းရောင်းဝယ်ရေးအဆောက်အဦး ၂၁.၅ ထပ်ကိုဝယ်ယူရန် ဆုံးဖြတ်ခဲ့ကြောင်းနှင့် စုစုပေါင်းဧရိယာအကျယ်အဝန်း ၂၀၇၃၄၀ စတုရန်းပေခန့် ကျယ်ဝန်းကြောင်း သိရပါသည်။ ၁၇၆၃၀၀ စတုရန်းပေသည် မြေညီထပ်ဖြစ်ပြီး ၃၁၀၄၀ စတုရန်းပေသည် မြေ‌အောက်ခန်းဖြစ်ကြောင်း သိရပါသည်။ အဆိုပါဘဏ်သည် စီမံကိန်းကို ဘင်္ဂလားဒေ့ရှ်ဘဏ်မှ လိုအပ်သော ခွင့်ပြုမိန့်များထုတ်ပြန်မှုရရှိအပြီးတွင် စတင်မည်ဖြစ်ကြောင်း သိရပါသည်။ သို့ရာတွင် Dutch-Bangla ဘဏ်၏ ရှယ်ယာများသည် ယခင်နေ့ထက် ၁ ရာခိုင်နှုန်း tk ၄၁.၅၀ ခန့် ကျဆင်းသွာကြောင်း DSE ၏ ဖော်ပြန်ချက်များအရ သိရပါသည်။ အဆိုပါဘဏ်၏ ရန်ပုံငွေသည် tk ၄၂၀၀ ကုဋေခန့်ရှိပြီး ၎င်း၏ရှင်းပြီးသော မတည်ငွေသည် tk ၉၆၆ ကုဋေ ခန့်ရှိကြောင်း DSE မှ ထုတ်ပြန်သော သတင်းအချက်အလက်များအရ သိရှိရပါသည်။

Source: The Daily Star

DOCA (ရန်ကုန်)

          ဘင်္ဂလား‌ဒေ့ရှ်နိုင်ငံကြားဖြတ်အစိုးရသည် စျေးနှုန်းကျဆင်းနေချိန်ကြားတွင် လယ်သမားများ၏ အကျိုးစီးပွားများကို ကာကွယ်ရန်အတွက် အာလူးတန်ချိန် ၅၀၀၀၀ တန်ခန့် ဝယ်ယူမည်ဟု ဆုံးဖြတ်လိုက်ကြောင်း သိရပါသည်။ အဆိုပါဝယ်ယူမည့် အာလူးများကို အအေးခန်းထဲတွင် သိုလှောင်ထားမည်ဖြစ်ပြီး ၂၀၂၅ ခုနှစ် အောက်တိုဘာလနှင့် နိုဝင်ဘာလများတွင် ရောင်းချသွားမည်ဖြစ်ကြောင်း စိုက်ပျိုးရေးဝန်ကြီးဌာနက သြဂုတ်လ ၂၈ ရက်နေ့ သတင်းစာရှင်းလင်းပွဲတွင် ပြောကြားခဲ့ပါသည်။ ထပ်ပေါင်းအနေဖြင့် အစိုးရသည် အာလူးတစ်ကီလိုလျှင် TK ၂၂ ဖြင့် ရောင်းချသွားမည်ဟု သတ်မှတ်ထားကြောင်း သိရပါသည်။ အာလူးစိုက်သူများကို ယခုလာမည့်ရာသီတွင် ထောက်ပံ့သွားမည်ဖြစ်ကြောင်း အစိုးရက ထုတ်ပြန်ကြေညာခဲ့ပါသည်။ အာလူးစျေးနှုန်းများသည် စိုက်ပျိုးရေးကုန်ကျစရိတ်များထက်ပိုမိုမြင့်မားနေသောကြောင့် စိုက်ပျိုးရေးဝန်ကြီးဌာနမှ အတွင်းရေးမှူးက ဦးဆောင်၍ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ အစားအသောက်နှင့် ဘဏ္ဍာရေးဝန်ကြီးဌာနတို့မှ အတွင်းရေးမှူးများ ပါဝင်သော ကော်မတီကို လယ်သမားများ၏ စိုက်ပျိုးရေးကိစ္စရပ်များနှင့် အသက်မွေးဝမ်းကျောင်း အဆင်‌ပြေစေရေးကို ကာကွယ်ရန်အတွက် ဖွဲ့စည်းတော့မည်ဖြစ်ကြောင်း သိရပါသည်။ အဆိုပါအဖွဲ့သည် ရာသီအတွင်း ထုတ်လုပ်ခဲ့သော အာလူးစျေးနှုန်းများသင့်တော်စေရေးအတွက် အာမခံပေးသော ရည်ညွှန်းစျေးများကို ထုတ်ပြန်ရန် နှင့် ရောင်းဝယ်မှု ပမာဏကို အဆုံးသတ်ရန်အတွက် တာဝန်များကို ဆောင်ရွက်ရမည်ဖြစ်ကြောင်း သိရပါသည်။ ရာသီအစပိုင်းတွင် လယ်သမားများသည် ၎င်းတို့၏ အာလူးများကို အစိုးရက သတ်မှတ်ထားသော တစ်ကီလိုလျှင် Tk ၁၄ နှုန်းထက် တစ်ကီလိုလျှင် tk ၁၁ဖြင့်သာရောင်းချရန် တွန်းအားပေးဝယ်ယူမှုကို ကုန်သည်များဆီမှ ခံခဲ့ရကြောင်း သိရပါသည်။ ထို့အပြင် အချို့သော မြောက်ပိုင်းဒေသများတွင် အာလူးတစ်ကီလိုအတွက် ကုန်ကျစရိတ်သည် tk ၂၀ ခန့် ကျကြောင်း DAE မှထုတ်ပြန်သော သတင်းအချက်အလက်များအရ သိရပါသည်။ ဘင်္ဂလားဒေ့ရှ်နိုင်ငံသည် တစ်နှစ်လျှင် အာလူးတန်ချိန် ၁.၁၅ ကုဋေခန့် ထုတ်လုပ်လျက်ရှိပြီး ယခင်ရိတ်သိမ်းရာသီထက်ပိုမိုမြင့်မားကာ သမိုင်းတစ်လျှောက်အမြင့်ဆုံးဖြစ်ခဲ့ကြောင်း ဘင်္ဂလားဒေ့ရှ်နိုင်ငံ စာရင်းအင်းဗျူရို (BBS) ၏ ခန့်မှန်းခြေများအရ သိရပါသည်။ ၂၀၂၄-၂၀၅ ဘဏ္ဍာနှစ်တွင် လယ်သမားများသည် သစ်ဥသစ်ဖုများကို ဟက်တာ ၄.၉၂ သိန်းခန့် စိုက်ပျိုးခဲ့ပြီး တစ်နှစ်ထက်တစ်နှစ် ၈ ရာခိုင်နှုန်းခန့် မြင့်တက်လျက်ရှိကြောင်း သိရှိရပါသည်။

Source: The Daily Star

DOCA(ရန်ကုန်)