“မိုးနှောင်းချည်မျှင်ရှည်ဝါများ စတင်စိုက်ပျိုး”
မန္တလေးတိုင်းဒေသကြီး၊ ကျောက်ဆည်ခရိုင်တွင် ၂၀၂၄-၂၀၂၅ ဘဏ္ဍာနှစ်တွင်မိုးနှောင်း ချည်မျှင်ရှည်ဝါစိုက်ဧကအနေဖြင့် ကျောက်ဆည်မြို့နယ်တွင် (၃၁၂၉) ဧက၊ စဉ့်ကိုင် မြို့နယ်တွင် (၁၅၀၁) ဧက၊ မြစ်သားမြို့နယ်တွင် (၁၂၃၆) ဧက၊ စုစုပေါင်း (၅၈၆၆) ဧကကို သြဂုတ်လဆန်း ပိုင်းတွင် စိုက်ပျိုးနိုင်ခဲ့ကြောင်း၊ ခရိုင်ကြေးတိုင်းနှင့်မြေစာရင်းဦးစီးဌာနတို့၏ စာရင်းများအရ သိရှိရပါသည်။ မိုးနှောင်းဝါစိုက်ပျိုးမှုတွင် ဘောင်ကြောင်းပေးစနစ်ဖြင့် စိုက်ပျိုးကြကြောင်း၊ မျိုးအနေဖြင့် အိန္ဒိယ(ရာကာ)မျိုးများဖြစ်သော (၃၃၃)လုံး၊(၆၆၆)လုံးနှင့် (၉၉၉)လုံးမျိုးကိုသာ အများဆုံးစိုက်ပျိုးကြကြောင်း၊ မျိုးအသုံးပြုမှုအနေဖြင့် တစ်ဧကလျှင် ဝါမျိုးစေ့ (၁၂-၁၃) ပိဿာအသုံးပြုစိုက်ပျိုးရကြောင်း၊ ဝါမျိုးစေ့တစ်ပိဿာလျှင် (၂၅၀ဝိ/-)ကျပ် စျေးဝယ်ယူ စိုက်ပျိုးရကြောင်း၊ တစ်ဧကကုန်ကျ စရိတ်အနေဖြင့် မျိုး၊ လုပ်သားခ၊ သွင်းအားစု အပါအဝင် စုစုပေါင်း (၃၅၀၀၀ဝိ/-) ကျပ်ခန့် ကုန် ကျကြောင်း၊ ယခုနှစ်တွင် မိုးရွာသွန်းမှုကောင်းသောကြောင့် ဝါစိုက်ပျိုးမှုတွင် ဝါပင်များအောင်မြင်စွာ ပေါက်ရောက်ရှင်သန်နေပြီဖြစ်ကြောင်း၊ မိုးနှောင်း ချည်မျှင်ရှည်ဝါများကို ကျောက်ဆည်မြို့နယ်တွင် တောင်တော်ရွာ၊ ကင်းရွာ၊ နောင်ခမ်းရွာ၊ မြစ်သားမြို့နယ်တွင် နဘူးကြီးအုပ်စု၊ ခင်လည်အုပ်စုနှင့် တောင်တော်ကုန်းကျေးရွာနှင့် စဉ့်ကိုင်မြို့နယ်တွင် ရွာတော်ရွာ၊ ထန်းတောရွာ၊ ညောင်ပင်သာရွာ များတွင်အများဆုံး စိုက်ပျိုးကြကြောင်း၊ နိုဝင်ဘာလကုန်နှင့် ဒီဇင်ဘာလဆန်းပိုင်းတွင် ထွက်ပေါ်မည် ဖြစ်ကြောင်း၊ မိုးနှောင်းချည်မျှင်ရှည်ဝါထွက်ပေါ်ချိန်တွင် အထွက်နှုန်းခန့်မှန်းအနေဖြင့် ပိဿာ(၄၀၀-၅၀၀)အထိ ထွက်ရှိနိုင်မည်ဖြစ်ကြောင်း ၊ ယခုလက်ရှိ ဝါရောင်းချမှုစျေးနှုန်းအနေဖြင့် ဝါတစ်ပိဿာ လျှင်(၃၁၀၀-၃၂၀၀)ကျပ်၊ ဂွမ်းတစ်ပိဿာလျှင်(၆၃၀၀-၆၅၀၀)ကျပ်၊ ဝါစေ့တစ်ပိဿာလျှင်(၁၃၀ဝိ/-) ကျပ် စျေးနှုန်းများဖြင့် ရောင်းဝယ်လျက်ရှိကြောင်း မြို့ပေါ်ပွဲရုံများသို့တောင်သူများမှတိုက်ရိုက် လာရောက်ရောင်းချသူများရှိသလို ကျေးလက်ဒေသဝါထွက်ရှိရာကျေးရွာများသို့လည်း ပွဲစားများမှ လာရောက်ဝယ်ယူသူများလည်းရှိကြောင်း ၊ ဝါရောင်းဝယ်မှုအနေဖြင့် ဝါစက်ရုံ ၊ ဝါပွဲရုံများမှ မန္တလေး စက်မှုဇုံနှင့်ချည်မျှင်စက်ရုံများသို့ရောင်းချကြောင်း၊မိုးနှောင်းချည်မျှင်ရှည်ဝါထွက်ပေါ်ချိန်တွင်စျေးနှုန်း ကောင်းမွန်ပါက အကျိုးအမြတ်ဖြစ်ထွန်းမည်ဖြစ်ကြောင်း၊ ယခုလက်ရှိ ဝါပေါက်စျေးတစ်ပိဿာလျှင် (၃၂၀ဝိ/-)ကျပ်ဖြင့် တစ်ဧကအထွက် (၄၀၀-၅၀၀) ပိဿာထွက်ရှိကြောင်း အကျိုးအမြတ်အနေဖြင့် ကုန်ကျစရိတ်နှုတ်ပြီးပါက(၉၃၀၀၀ဝိ/-)ကျပ်ခန့်မြတ်ကြောင်း၊ တောင်သူများမှ ဝါထွက်ပေါ်ချိန်တွင် ဝါသီးနှံကို ရင့်မှည့်သောအချိန်မှ ကောက်ယူပြီးရောင်းချပါက အရည်အသွေးပြည့်မှီသောဝါများ ရရှိမည်ဖြစ်ကြောင်း၊တောင်သူများမှဝါများကို ပြည်တွင်စျေးကွက်သာမက ပြည်ပစျေးကွက်များရရှိပါက အကျိုးအမြတ် ပိုမိုခံစားရမည်ဖြစ်ကြောင်း ၊ ဝါအများဆုံးစိုက်ပျိုးသော တောင်သူတစ်ဦး၏ ပြောပြချက်အရ သိရှိပါသည်။
DOCA(မန္တလေး)
