ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မစည်ပင်ဈေး၊ အမှတ်(၂)ဈေးနှင့် ပျံကျဈေးတို့တွင် အိမ်ရှင်မများအတွက် ဟင်းချက်စရာတစ်မျိုးဖြစ်သည့် မျှစ်ချိုများအရောင်းအဝယ်ဖြစ်နေကြောင်း၊ ယခုအချိန်တွင် မျှစ်ချိုများစတင်ပေါ်ထွက်ချိန်လည်းဖြစ်သောကြောင့် ဈေးကောင်းရလျက်ရှိကြောင်း  ဈေးသည်များထံမှသိရသည်။ အိမ်ရှင်မများသည် မျှစ်များကို ကြော်ချက်၍သော်လည်းကောင်း၊ မျှစ်ထောင်းသုပ်၍သော်လည်းကောင်း၊ မျှစ်ချဉ်သိပ်၍သော်လည်းကောင်း အမျိုးမျိုးပြုလုပ်စားသုံးလျက်ရှိကြောင်းသိရှိရပါသည်။

       ပခုက္ကူမြို့မစည်ပင်ဈေး၌ ပေါက်မြို့နယ်အတွင်းရှိ တောင်ဦးမှထွက်ရှိသောမျှစ်များ၊ ယောနယ်ဒေသမှထွက်ရှိသောမျှစ်များ၊ ရှမ်းပြည်နယ်၊ တောင်ကြီးဒေသမှ ထွက်ရှိသောမျှစ်များ နေ့စဉ် ကုန်ချိန် (၄၀၀၀-၅၀၀၀) ဝင်ရောက်အရောင်အဝယ်ဖြစ်လျက်ရှိကြောင်း၊  ဩဂုတ်လတွင်ဖြစ်ပေါ်ခဲ့သည့် မျှစ်ဈေးနှုန်းမှာ  တစ်ပိဿာလျှင် ကျပ်(၅၀၀၀-၆၀၀၀)ထိဖြစ်ပြီး ယခုစက်တင်ဘာလ (ပထမပတ်)တွင် မျှစ်အချောင်းတစ်ပိဿာလျှင် ကျပ်(၄၀၀၀)၊ မျှစ်ပေါက်တစ်ပိဿာလျှင် ကျပ်(၃၅၀၀) ဖြင့် နေ့စဉ်အရောင်းအဝယ်ဖြစ်နေကြောင်း မြို့ဈေးသည်များထံမှသိရှိရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်တွင် မန်ကျည်းသီးမှည့်အသစ်များ ဝင်ရောက်အရောင်းအဝယ်ဖြစ်လျက်ရှိပြီး အဓိကအားဖြင့် ယောနယ်ဒေသများနှင့် ကျောက်ပန်းတောင်းမြို့၊ ဆိပ်ဖြူမြို့၊ မြိုင်၊ ကမ္မနှင့် မြစ်ခြေမြို့များမှထွက်ရှိ၍ နေ့စဉ်ဝင်ရောက်အရောင်းအဝယ်ဖြစ်လျက်ရှိပါသည်။

          ၂၀၂၄ခုနှစ်၊ စက်တင်ဘာလ(ပထမပတ်)တွင် မန်ကျည်းသီးမှည့်ဈေးနှုန်းများမှာ မန်ကျည်းသီး အစေ့ပါများဝင်ရောက်မှုနည်းပါးပြီး အစေ့လွတ်မန်ကျည်းသားများကို မြို့ပေါ်ရှိ လှောင်လက်ပွဲစားများက ဒေသတွင်းနေရာအနှံ့အပြားသို့ရောင်းချလျက်ရှိသည်။ ဈေးကွက်အနေဖြင့် စက်တင်ဘာလ ပထမပတ်တွင် မန်ကျည်းသီးမှည့်ဈေးငြိမ်ပြီး အရောင်းအဝယ်ဖြစ်လျက်ရှိသည်။ မန်ကျည်းမှည့်အစေ့လွတ်တစ်ပိဿာလျှင် လက်ကားဈေး ကျပ်(၇၀၀၀)၊ လက်လီဈေး ကျပ်(၈၀၀၀) ဈေးဖြင့်အရောင်းအဝယ်ဖြစ်ပြီး ယခင်ဩဂုတ်လ(စတုတ္ထပတ်)ဈေးနှုန်းနှင့်နှိုင်းယှဉ်ပါက ဈေးနှုန်းအတက်အကျမရှိဘဲ  အရောင်းအဝယ်ဖြစ်လျက်ရှိကြောင်း၊စက်တင်ဘာလ ပထမပတ်တွင် ပုပ္ပါးဒေသထွက် ခရမ်းချဉ်သီးများ လှိုင်လှိုင်ဝင်ရောက်ပြီး ဈေးနှုန်းကျဆင်း၍အရောင်းအဝယ်ဖြစ်ခြင်းကြောင့် ဝယ်ယူစားသုံးသူအိမ်ရှင်မများအနေဖြင့် မန်ကျည်းသီးသုံးစွဲမှုနည်း၍ လက်လီဝယ်ယူမှုအေးကြောင်း ဈေးကွက်မှသိရှိရပါသည်။

          မန်ကျည်းသားများကို ပခုက္ကူမြို့ပေါ်ရှိ စားသောက်ကုန်လုပ်ငန်းရှင်လှောင်လက်သမားများက ကုန်ဝင်နည်းသောကြောင့် ဝယ်ယူထားရှိပြီး ပြန်လည်ရောင်းချကြကြောင်း၊ အကြော်ဆိုင်၊ အကင်ဆိုင်များမှ မန်ကျည်းသီး အချဉ်ရည်များပြုလုပ်ရန်အတွက် ဝယ်ယူခြင်း၊ မန်ကျည်းဖျော်ရည်လုပ်ငန်းများနှင့် မန်ကျည်းတော်ဖီ လုပ်ငန်းရှင်များကလည်း အများအပြားဝယ်ယူသည့်အပြင် ရန်ကုန်မြို့နှင့် မန္တလေးမြို့များသို့လည်း တင်ပို့လျက်ရှိကြောင်းသိရှိရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူခရိုင်အတွင်းရှိ ဆိပ်ဖြူမြို့နယ်သည် နှစ်စဉ်သီးနှံမျိုးစုံစိုက်ပျိုးရာမှ ကြက်သွန်နီသီးနှံကို စိုက်ဧကအများဆုံး ဒေသစီးပွားဖြစ်စိုက်ပျိုးပြီး ဆောင်းကြက်သွန်နီ(ပင်စိုက်)ကို အဓိကစိုက်ပျိုးကြောင်း၊ ဇန်နဝါရီလဆန်းတွင် စိုက်ပျိုး၍ မတ်လကုန်တွင် တူးဖော်ပြီး ဧပြီလမှစ၍ အောက်တိုဘာလကုန်အထိ သက်တမ်း(၇)လခန့်သိုလှောင်ထားရှိကြောင်း၊ ယခုအချိန်တွင် ကြက်သွန်နီသိုလှောင်ထားရှိမှုကုန်ခါနီး၍ ဈေးကွက်သို့ ကုန်ချိန်များစွာဝင်ရောက်လျက်ရှိကြောင်းသိရှိရသည်။

       မြို့ပေါ်ပွဲရုံဈေးကွက်သို့ ဒေသတွင်းကြက်သွန်နီစိုက်ပျိုးမှုများသော ရေပုတ်၊ အနောက်ကံတွင်း၊ ဆူးပုတ်ကုန်း၊ ကဇွဲ၊ ထန်းချောင်း၊ လိပ်ခြံ၊ ကျွန်းတော၊ ရွာသာအေး(၂)၊ တောင်ရွာမ၊ မြောက်ရွာမ၊ စိုက်ခမ်း ကျေးရွာများနှင့် အခြားမြို့နယ်များဖြစ်သော ပွင့်ဖြူ၊ စလင်း၊ တညောင်၊ ချောက်မြို့နယ်၊ ဆိပ်ဖြူကျေးရွာများမှ ဝင်ရောက်အရောင်းအဝယ်ဖြစ်လျက်ရှိကြောင်း၊ ဩဂုတ်လအတွင်း စုစုပေါင်းကြက်သွန်နီပိဿာချိန်(၁၅)သိန်းခန့်ဝင်ရောက်ခဲ့ကြောင်း ဈေးကွက်မှသိရှိရသည်။ ဈေးနှုန်းအနေဖြင့် ကြက်သွန်နီ တောဈေး ဂျွန်တစ်ပိဿာလျှင် အမြင့်ဈေး ကျပ်(၂၀၀၀-၁၈၀၀)ဈေးနှုန်းဖြင့်ဈေးငြိမ်ပြီး အရောင်းအဝယ်ဖြစ်ကြောင်း၊ စိုက်တောင်သူများအနေဖြင့် ကြက်သွန်နီဈေးမြင့်တက်ခြင်းမရှိသော်လည်း ရောင်းချမှုများကြောင်းသိရသည်။

         ကုန်စည်စီးဆင်းမှုအနေဖြင့် ဩဂုတ်လအတွင်း ရန်ကုန်ဘုရင့်နောင်ပွဲရုံသို့ ကုန်ချိန်ပိဿာ (၈)သိန်း၊ ကားအစီးရေ (၈၀)၊ ပြည်မြို့သို့ ကြက်သွန်နီပိဿာချိန်(၁)သိန်း၊ ကားအစီးရေ(၁၂)စီး၊ မြဝတီမြို့သို့ ကြက်သွန်နီပိဿာချိန်(၅)သိန်း၊ ကားအစီးရေ(၃၈)စီး၊ မော်လမြိုင်မြို့သို့ ကြက်သွန်နီပိဿာချိန် (၁)သိန်း၊ ကားအစီးရေ(၁၀)စီး၊ စုစုပေါင်းကြက်သွန်နီပိဿာချိန်(၁၅)သိန်းခန့်၊ တန်ချိန်အားဖြင့် (၂၄၄၉) တန်ခန့် ကုန်စည်စီးဆင်းခဲ့ပြီး ရန်ကုန်ဘုရင့်နောင်ပွဲရုံသို့ ကုန်ချိန်အများဆုံးတင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်နိုင်ငံများသို့လည်းတင်ပို့လျက်ရှိကြောင်း ဈေးကွက်မှသိရှိရပါသည်။

DOCA(မကွေး)

        မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်တွင် ကွမ်းရွက်များကို ဧရာဝတီတိုင်းဒေသကြီး၊ ကနောင်၊ မြန်အောင်၊ ပဲခူးတိုင်းဒေသကြီး၊ ပေါက်ခေါင်း၊ ပေါင်းတလည်၊ စစ်ကိုင်းတိုင်းဒေသကြီး၊ မုံရွာမြို့တို့ရှိကွမ်းခြံများမှ တိုက်ရိုက်ဝယ်ယူရောင်းချကြောင်း၊ ကွမ်းသီးများကို ထားဝယ်မှတိုက်ရိုက်တင်ပို့သည့် ပြည်မြို့ရှိ ကွမ်းဒိုင်မှတစ်ဆင့် မှာယူရောင်းချကြောင်း၊ ကွမ်းစားထုံးကို မကွေးမှဝယ်ယူရောင်းချပြီး နှပ်ဆေးနှင့်ဗမာဆေးကို မုံရွာနှင့်ပခုက္ကူမှ ဝယ်ယူရောင်းချကြောင်းသိရသည်။

          မင်းလှမြို့နယ်တွင် ကွမ်းသီး၊ ကွမ်းရွက် လက်လီ/ လက်ကားရောင်းချသည့်ဆိုင် (၁၀)ဆိုင်ခန့်ရှိပြီး ကွမ်းစိမ်းနှင့်ကွမ်းရွက်ဝါ(၂)မျိုးရှိသည့်အနက် ကွမ်းရွက်ဝါကိုပိုအစားများကြကြောင်းသိရှိရပါသည်။ ကွမ်းရွက်ဈေးနှုန်းအနေဖြင့် ၂၀၂၄ခုနှစ်၊ စက်တင်ဘာလ(ပထမပတ်)တွင် ကွမ်းရွက်ဝါ (၁)ပိဿာလျှင် ကွမ်းရွက်အကြီး၊ အသေးနှင့် ဝယ်ယူတင်သွင်းရသည့် နေရာဒေသအလိုက် ကျပ်(၁၃၀၀၀-၁၅၀၀၀)၊ ကွမ်းသီးခြမ်း(၁)ပိဿာလျှင် ကျပ်(၁၂၀၀၀)၊ ကွမ်းသီးစိပ်(၁)ပိဿာလျှင် ကျပ်(၁၂၀၀၀)၊ ကွမ်းစားထုံး(၁) လီတာ(၁)ဘူးလျှင် ကျပ်(၁၁၀၀)၊ ကွမ်းစားနှပ်ဆေး (၁)ထုပ်လျှင် ကျပ်(၇၀၀)၊ ဗမာဆေး (၁)ထုပ်လျှင် ကျပ်(၆၀၀) စသည့်ဈေးနှုန်းများဖြင့် ရောင်းချလျက်ရှိကြောင်းသိရှိရပါသည်။

         အရောင်းအဝယ်အနေဖြင့် (၁)ရက်လျှင် ကွမ်းရွက်ပိဿာချိန် (၁၀)ပိဿာနှင့်အထက်ရောင်းချရပြီး ကွမ်းသီး၊ ကွမ်းစိပ်မှာ (၅)ပိဿာမှ (၆)ပိဿာထိ ပုံမှန်ရောင်းချရကြောင်း၊ ကွမ်းသီးနှင့် ကွမ်းရွက်ဈေးနှုန်းများမှာ မှာယူရသည့်နေရာဒေသအလိုက် သယ်ယူစရိတ်မြင့်မားလာခြင်းကြောင့် ယခင်ဩဂုတ်လ (စတုတ္ထပတ်)နှင့်နှိုင်းယှဉ်ပါက ကွမ်းရွက် ကျပ်(၃၀၀၀)၊ ကွမ်းသီး ကျပ်(၃၀၀၀-၄၀၀၀)ဈေးနှုန်းမြင့်တက်၍ အရောင်းအဝယ်ဖြစ်လျက်ရှိကြောင်း၊ ကျန်ကွမ်းပစ္စည်းများမှာ ဈေးငြိမ်လျက်ရှိကြောင်း အထက်မင်းလှ-သရက် ကားလမ်းဘေးရှိ ကွမ်းသီး၊ ကွမ်းရွက်ရောင်းချသည့် ကွမ်းဆိုင်ပိုင်ရှင်တစ်ဦးထံမှသိရှိရပါသည်။

DOCA(မကွေး)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ပန်းတော်ပြင်ကျေးရွာကျေးအုပ်စုရှိ ပန်းတော်ပြင်ကျေးရွာတွင် မိုးနှမ်းကို တောင်သူ(၁၅၀)ဦးက စိုက်ဧက(၈၅၀)ဧကကို ၂၀၂၄ခုနှစ်၊ မေလ၌ စတင်စိုက်ပျိုးပြီး ဩဂုတ်လ(စတုတ္ထပတ်)တွင် ရိတ်သိမ်းကြောင်းသိရသည်။

       ပန်းတော်ပြင်ကျေးရွာ၌ မိုးနှမ်းစိုက်ပျိုးရာတွင် နှမ်းနီကိုအများဆုံးစိုက်ပျိုးကြောင်း၊ တောင်သူ ဦးတင်မိုးလှိုင်က ၎င်းအနေဖြင့် နှမ်းနီ(၃)ဧကခန့်ကို ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ ယခင်နှစ်တွင် နှမ်းစိုက်ခင်းမှထွက်ရှိသည့် နှမ်းစေ့များကို မျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ (၁)ဧကလျှင် မျိုး(၂)ပြည်ခွဲခန့်ကုန်ကျကာ အထွက်နှုန်းအနေဖြင့် (၁၂)တင်းထွက်ရှိကြောင်း၊ (၁)တင်းလျှင် ကျပ်(၁၁၅၀၀၀)ဈေးရရှိကြောင်း၊ ကုန်ကျစရိတ်အနေဖြင့် လုပ်အားခနှင့် အခြားသွင်းအားစုစရိတ်အပါအဝင် နှမ်းခင်းပေါင်းရှင်းခပေါ်မူတည်၍ (၁)ဧကလျှင် စုစုပေါင်း ကျပ်(၃၅၀၀၀၀ မှ ၅၀၀၀၀၀) ထိကုန်ကျကြောင်း၊ အကျိုးအမြတ်အနေဖြင့် (၁)ဧကလျှင် ကျပ်(၈)သိန်းမှ (၁၀)သိန်းကျော်ထိရရှိကြောင်း၊ ဈေးကွက်အနေဖြင့် အထက်မင်းလှမြို့ရှိပွဲရုံများသို့ ရောင်းချကြောင်းသိရှိရပါသည်။

DOCA(မကွေး)