ပြည်တွင်းကုန်သွယ်မှုသတင်း

       တောင်ငူမြို့၊ ညောင်ပင်ဈေးရှိ  ကြက်ဥ၊ ဘဲဥအရောင်းဆိုင်တွင်  ယခင်လတွင် ကြက်ဥတစ်လုံးလျှင် အသေး ၃၆၅ကျပ်နှင့် အကြီး ၃၈၅ကျပ်ရှိခဲ့ရာမှ ယခုအပတ်တွင် တစ်လုံးလျှင် အကြီး/ အသေးအလိုက် အသေးတစ်လုံးလျှင် ၃၅၀ကျပ်၊ အလတ်တစ်လုံးလျှင် ၄၀၀ကျပ်နှင့် အကြီးတစ်လုံးလျှင် ၄၈၀ကျပ်ရှိသဖြင့် ၉၅ကျပ်အထိဈေးတက်လာပါသည်။

         ဘဲဥမှာ အသေးတစ်လုံးလျှင် ၄၀၀ကျပ်၊ အလတ်တစ်လုံးလျှင် ၄၅၀ကျပ်နှင့် အကြီးတစ်လုံးလျှင် ၅၀၀ကျပ်ဖြင့် ဈေးနှုန်းတည်ငြိမ်နေပါသည်။

         ကြက်ဥ၊ ဘဲဥမှာ အခြေခံလူတန်းစားများနှင့် အလုပ်များသောရုံးဝန်ထမ်းများ အလွယ်တကူချက်ပြုတ်စားသောက်နိုင်သော စားသောက်ကုန်ဖြစ်သဖြင့် အရောင်းအဝယ်မှာ သွက်လျက်ရှိကြောင်း တောင်ငူမြို့ ညောင်ပင်ဈေးရှိ ကြက်ဥ၊ ဘဲဥ အရောင်းဆိုင်မှ ဆိုင်ရှင်တစ်ဦး၏ ပြောကြားချက်အရသိရှိရပါသည်။

DOCA(ပဲခူး)

    ရွှေဘိုခရိုင်၌ ၂၀၂၃-၂၀၂၄ခုနှစ် မိုးမြေပဲကို (၇၃၉၀၅)ဧက စိုက်ပျိုးပြီး တစ်ဧကလျှင်(၄၂)တင်းခန့်ထွက်ရှိကြောင်း၊ မိုးမြေပဲကို ဇွန်လတွင်စတင်စိုက်ပျိုးကြပြီး စက်တင်ဘာလတွင် ရိတ်သိမ်းကြကြောင်း၊ မြေပဲလုံးဆံများမှာ စက်တင်ဘာလ၊ ဒုတိယအပတ်မှ စတင်၍ ရွှေဘိုဈေးကွက်သို့ ဝင်ရောက်ခဲ့ကြောင်း၊ နိုဝင်ဘာလ၊ ဒုတိယအပတ်တွင် အရောင်းအဝယ်ဖြစ်သည့်ဈေးနှုန်းမှာ       မြေပဲလုံးဆံတစ်တင်းလျှင် (၁၂၈၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်းအရောင်းအဝယ်ဖြစ်မှုမှာ (၄၅၀၀)တင်း/ (၁၀၃)တန် ဖြစ်ကြောင်း၊   ‌ယခင်အပတ်နှင့်ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်ပတ်၌     မြေပဲလုံးဆံ တစ်တင်းလျှင် (၁၂၃၂၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင်ယခင်အပတ်ထက် မြေပဲလုံးဆံတစ်တင်းလျှင် (၄၈၀ဝိ/-)ကျပ် ဈေးပိုမိုရရှိခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်နှစ်ကာလတူ၌ မြေပဲလုံးဆံ တစ်တင်းလျှင်(၉၂၈၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက်  မြေပဲလုံးဆံတစ်တင်းလျှင် (၃၅၂၀ဝိ/-)ကျပ် ဈေးပိုမိုရရှိခဲ့ကြောင်း ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

         သင်္ဘောပင်သည် မြေအမျိုးမျိုးတွင် စိုက်ပျိုးနိုင်သော်လည်း သဲဆန်သော၊ စေးသော၊ ကျစ်သောမြေများတွင် မဖြစ်ထွန်းပါ။ ရေမြုပ်ခြင်းဒဏ်ကို ခံနိုင်ရေမရှိသဖြင့် ၂ရက်ခန့်ရေမြုပ်လျှင်ပင် သေစေနိုင်သည်။ ထိုကြောင့် ညီညာသောမြေထက် အနည်းငယ်ကုန်းလျောဖြစ်နေသောမြေသည် သင်္ဘောပင်အတွက် ပိုမိုကောင်းမွန်သည်။ သင်္ဘောပင်အား အစေ့မှ မျိုးပွားယူပြီး မျိုးပွားရန်အတွက် ကျန်းမာကြီးမားပြီး ကောင်းစွာရင့်မှည့်သောအသီးမှ အစေ့များကိုယူ၍ စိုက်ပျိုးနိုင်သည်။ သင်္ဘောသီးစားခြင်းသည် ဓာတ်တိုးဆန့်ကျင်ဂုဏ်သတ္တိရှိခြင်း၊ ကင်ဆာဆန့်ကျင်ဂုဏ်သတ္တိရှိခြင်း၊ နှလုံးကျန်းမာ‌ကောင်းစေခြင်း၊ အစာချေဖျက်အားကောင်းစေခြင်း၊ အရေပြားပျက်စီးစေခြင်း စသည်တို့ကိုကာကွယ်ပေးပါသည်။

          သင်္ဘောပင်သည် မြန်မာနိုင်ငံ၌ စီးပွားဖြစ်စိုက်ပျိုးနေသော ဝင်ငွေရ ဥယျာဉ်ခြံသီးနှံတစ်ခုဖြစ်၍ ဈေးကွက်သေချာလျှင် တွက်ချေကိုက်သောသီးနှံတစ်ခုဖြစ်သည့်အပြင် အိမ်ခြံမြေအများအပြားတွင် တစ်နိုင်တစ်ပိုင်စိုက်ပျိုးလေ့ရှိသောသီးနှံဖြစ်ပါသည်။ ယခုအခါ သင်္ဘောသီးမှည့်တစ်လုံးလျှင် ၃၀၀၀ကျပ်မှ ၄၀၀၀ကျပ်အတွင်းရှိကြောင်း သစ်သီးအရောင်းဆိုင်များမှသိရှိရပါသည်။

DOCA(တနင်္သာရီ)

       စစ်ကိုင်းတိုင်းဒေသကြီး၊ ကန့်ဘလူမြို့နယ်၊ ဂါးတာကျေးရွာ၊  ဆည်ကြီးကျေးရွာ၊ နတ်အင်းကျေးရွာ၊ နတ်ပေးကျေးရွာများတွင် သဘာဝအလျောက်ထွက်ရှိပြီး တောတောင်များကြားတွင် ပေါက်ရောက်သည့် ဝါးပင်မှထွက်ရှိသည့် ဝါးပင်ပေါက် (ခေါ်) မျှစ်များကို ဒေသခံရွာသားများက  မျှစ်စိမ်း၊ မျှစ်ပြုတ်နှင့်မျှစ်ခြောက်ဟူ၍ အမျိုးအစားခွဲကာ ရောင်းချကြောင်းသိရှိရပါသည်။

          မျှစ်သည် မိုးဦးကျကာလတွင် စတင်ထွက်ပေါပြီး မျှစ်များကို  မျှစ်စိမ်းနှင့် မျှစ်ပြုတ်ဟူ၍ ရောင်းချကာ မျှစ်များလှိုင်လှိုင်ပေါ်ချိန်တွင် အခြောက်လှန်း၍ မျှစ်စိုများရှားပါးလာချိန်တွင် မျှစ် ခြောက်အဖြစ် ပြန်လည်ရောင်းချကြောင်းသိရသည်။

          မျှစ်စိမ်းဆိုသည်မှာ   ပြုပြင်ထားခြင်းမရှိသော မျှစ်ကိုခေါ်ဆိုကြောင်း၊ မျှစ်ပြုတ်ဆိုသည်မှာ မျှစ်ကို တစ်ရေပြုတ်ကာ ဈေးကွက်အတွင်းသို့ ရောင်းချသည့်မျှစ်ဖြစ်ကြောင်းနှင့် မျှစ်ခြောက်မှာ မျှစ်များကိုပြုတ်၍ ရေစစ်ကာ အလွှာလေးများပါးပါးလှီး၍ ဖျာများပေါ်တွင်ခင်းကာ အခြောက်လှန်း၍ရသော မျှစ်ကိုဆိုကြောင်းသိရှိရပါသည်။ မျှစ်များလှိုင်လှိုင်ပေါ်ချိန်တွင် ပြုတ်ထားသော မျှစ်ပြုတ် (၁၀)ပိဿာကို အခြောက်လှန်းလျှင် မျှစ်ခြောက် (၁)ပိဿာရရှိကြောင်း၊ ယခုအခါ မျှစ်စိမ်း (၁)ပိဿာလျှင် (၄၀၀၀)ကျပ်၊ မျှစ်ပြုတ်(၁)ပိဿာလျှင် (၆၀၀၀)ကျပ်နှင့် မျှစ်ခြောက်အကြမ်း (၁) ပိဿာလျှင် (၁၄၀၀၀)ကျပ်ဖြစ်ပြီး မျှစ်ခြောက်အနု (၁)ပိဿာလျှင်  (၂၃၀၀၀ မှ ၂၅၀၀၀)ကျပ်ဖြင့်ရောင်းချရကြောင်းသိရှိရပါသည်။

          မျှစ်ခြောက်များမှာ စက်တင်ဘာလ ဒုတိယပတ်မှစ၍  ဈေးကွက်အတွင်းသို့ဝင်ရောက်ပြီး ယခုအချိန်တွင် မျှစ်ခြောက်များလှိုင်လှိုင်ပေါပြီး ဈေးကွက်အနေဖြင့် မန္တလေး၊ မုံရွာနှင့် ရွှေဘိုများသို့ တင်ပို့ရောင်းချကြောင်းသိရှိရပါသည်။

DOCA(စစ်ကိုင်း)

    ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့နယ်တွင် ၂၀၂၄-၂၀၂၅ ခုနှစ်၊ မိုးမြေပဲ စိုက်ဧက (၃၆၅၀) ဧကစိုက်ပျိုးပြီး၊(၁၅-၁၁-၂၀၂၄) ရက်နေ့အထိ (၃၅၂၃)ဧက ရိတ်သိမ်းပြီးကြောင်း သိရှိရပါသည်။ အထွက်နှုန်းအနေဖြင့်  ၁ ဧကပျမ်းမျှ ၆၂.၀၃ တင်းထွက်ရှိပြီး မြေပဲဆံဈေးနှုန်းမှာလည်း ၁ ပိဿာလျှင် (၇၅၀၀ကျပ်မှ ၈၅၀၀ကျပ်)ဈေးဖြင့် မြေပဲအမျိုးအစားပေါ်မူတည်၍ အရောင်းအဝယ်ဖြစ်လျက်ရှိကြောင်း၊ ထွက်ရှိသောမြေပဲများကို ဒေသခံ ဆီကြိတ်ဆုံများကဝယ်ယူ၍ ဆီကြိတ်ခြင်းနှင့် ဒေသတွင်းကုန်သည်များကဝယ်ယူ၍ ပြည်မြို့နှင့် ရန်ကုန်မြို့များသို့ တင်ပို့ရောင်းချကြောင်း သိရှိရသည်။

DOCA(ဧရာဝတီ)