ပြည်တွင်းကုန်သွယ်မှုသတင်း

     နာနတ်သီးသည် မြေမရွေးစိုက်ပျိုးနိုင်သော သီးနှံဖြစ်သည်။ မြေမရွေးဟုဆိုသော်လည်း မည်သည့်မြေတွင် စိုက်စိုက် ‌ရေဝပ်ခြင်းကိုတော့ကြောက်သည်။ နာနတ်သီး၏ သကြားအက်စစ် အချိုးမှာစိုက်ပျိုမြေ၏ အမြင့်ပေပေါ်တွင်လည်း တည်နိုင်သည်။ နာနတ်ပင် ကြိုက်သော အပူချိန်မှာ ၂၇ ဒီဂရီ စင်တီဂရိတ်ဖြစ်ပြီး ၂၀ ဒီဂရီစင်တီဂရိတ်အောက်နှင့် ၃၆ ဒီဂရီ စင်တီဂရိတ် အထက်ဆိုလျှင် ကြီးထွားနှုန်း ‌‌နှေးကွေးသည်။ တစ်နှစ်လျှင် မိုးရေချိန် ၂၅ လက်မမှ လက်မ၁၀၀ အတွင်း ရွာသွန်းသောဒေသများတွင် စိုက်ပျိုးနိုင်သည်။

    အပင်စိုက်ပြီး (၁၁-၁၂)လအကြာတွင် ပန်းပွင့်ပြီး (၁၅-၁၈)လအကြာတွင် ရိတ်သိမ်းနိုင်သော  အဆင့်ကို ရရှိနိုင်ပါသည်။ ဆောင်းရာသီတွင် ရင့်မှည့်သော အသီးများမှာ အချဉ်ဓာတ်များပြီး စည်သွတ်ရန်အတွက်ဖြစ်လျှင် ကြီးထွားဆဲ အသီး၏အခြေတွင် အရောင်အနည်းငယ် ပြောင်းလျှင် ရိတ်သိမ်းနိုင်ပါသည်။  နာနတ်သီးသည် အမျှင်ဓာတ်‌‌‌၊ ရေဓာတ် ပါဝင်မှုများပြီး  ဘရိုမီလိန်း ပါဝင်သည့်အတွက် ဝမ်းချုပ်ခြင်း၊  ရောင်ရမ်းမှုကို သက်သာစေနိုင်ခြင်းအပြင် ကင်ဆာရောဂါကိုလည်း ကာကွယ်ပေးနိုင်ပါသည်။

          ယခုအခါ ထားဝယ်မြို့ရှိ အသီးဆိုင်များတွင် နာနတ်သီးစျေးကောင်းလျက်ရှိရာ အကြီးတစ် လုံးလျှင်(၃၅၀၀)ကျပ်၊ အသေးတစ်လုံးလျှင်(၂၅၀၀)ကျပ် စျေးနှုန်းအသီးသီး ရှိကြောင်း သိရှိရပါသည်။

     ငှက်ပျောပင်သည် မြန်မာနိုင်ငံတွင် အနှံ့အပြားပေါက်ရောက်သည်။ တစ်နှစ်ခံအပင်မျိုးဖြစ်၍ ရှည်ဖားဖားအရွက်ကြီးများရှိသည်။ငှက်ပျောပင် တစ်ပင်တွင် ငှက်ပျောတစ်ခိုင်သာထွက်၍ အခိုင်ကို ခုတ်ယူပြီးနောက် အပင်မကြီးကို ခုတ်ပစ်ရသည်။ ပင်စည်ရင်းမှ အတက်ငယ်များ ဖြာထွက်လာ၍ ထိုးသားတက်ခေါ် ငှက်ပျောခေါင်းများကိုပင်မမှ ခွဲထုတ်ပြီး စိုက်ပျိုးလေ့ရှိကြသည်။ ငှက်ပျောပင်သည် အပင် (၁၂)လမှ(၁၈)လ အထိရောက်မှသာ အသီးများစတင်ထွက်လာသည်။ ငှက်ပျောပင်မှ အသီးမသီးမီ ဖူးတံတစ်ခုစတင်ထွက်ပေါ်လာပြီး ထိုငှက်ပျောဖူးတံတွင် အသီးလေးများသည် အပွင့်အဖတ်များ ဖြစ်လာ၍ အပွင့်များသာ အောင်မြင်ပြီးလျှင် အသီးများဖြစ်လာသည်။

    ငှက်ပျောသီးတွင် ရေဓာတ် ၇၅ရာခိုင်နှုန်းပါဝင်ပြီး အသီးတွင်ပါရှိသော ကစီဓာတ်သည် အသီးမှည့်လာသောအခါ သကြားဓာတ်သို့ ပြောင်းလဲသွားသဖြင့် စားသုံးရာတွင်  အလွန်အနှစ် အရသာ နှင့် ပြည့်စုံသည်။ ငှက်ပျောသီးတွင် အမျှင်ဓာတ်များစွာ ပါဝင်သောကြောင့် ဝမ်းချုပ်ခြင်း၊ အစာအိမ်နှင့်အူလမ်းကြောင်း ကျန်းမာရေးအတွက် များစွာအထောက်အကူပြုပါသည်။

    ထားဝယ်မြို့ရှိ ဒေသခံပြည်သူများသည် နှစ်ရှည်သီးနှံများနှင့် ရာသီပေါ်သီးနှံများကို စိုက်ပျိုး၍ အသက်မွေးဝမ်းကျောင်းပြုလျက်ရှိရာ ယခုလရာသီတွင် ငှက်ပျောသီးစျေးကောင်းရရှိ၍ မိသားစု အပိုဝင်ငွေရရှိကြောင်း သိရှိရပါသည်။ ငှက်ပျောတွင်  သီးမွှေး၊ ဖီးကြမ်း၊ ရခိုင်နှင့် ရွှေဌက်ပျောတို့ သည် လူကြိုက်များသည့်အတွက် ရောင်းအားအလွန်ကောင်းသောကြောင့် ယခုလက်ရှိ သီးမွှေးတစ်ဖီးလျှင်(၁၂၀၀၀)ကျပ်ခန့်၊ ဖီးကြမ်းတစ်ဖီးလျှင်(၅၀၀၀)ကျပ်ခန့်၊ ရခိုင်တစ်ဖီးလျှင်(၃၀၀၀)ကျပ်ခန့်နှင့်  ရွှေငှက်ပျောတစ်ဖီးလျှင် (၁၅၀၀၀ )ကျပ်ခန့်တို့ဖြင့် ရောင်းချလျက်ရှိပါသည်။

DOCA(တနင်္သာရီ)

         ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်အတွင်းရှိ ပဲမျိုးစုံရောင်းဝယ်ရေးပွဲရုံများတွင် အောက်တိုဘာလ တတိယပတ်မှ နိုဝင်ဘာလ ဒုတိယပတ်အထိ အရောင်းအဝယ် ဖြစ်ခဲ့သော မတ်ပဲဈေးနှုန်းများမှာ အောက်တိုဘာလဈေးနှုန်းများထက် အကျဈေးနှုန်းများဖြင့် အရောင်းအဝယ်ဖြစ်ခဲ့သည်ဟု စုံစမ်းသိရှိှိရသည်။

           ယခင်အောက်တိုဘာလ တတိယပတ်တွင် ပိဿာ (၂၀)ဝင်တစ်တင်းလျှင် (၁၂၁၅၀၀ကျပ်မှ ၁၂၃၀၀၀ကျပ်) ဖြင့်အရောင်းအဝယ်ဖြစ်ခဲ့ပြီး အောက်တိုဘာလ စတုတ္တပတ်တွင် (၁၂၆၀၀၀ကျပ်မှ ၁၂၁၅၀၀ကျပ်)ထိ ဈေးနှုန်းပြန်လည်ကျဆင်းသွားသည် ကိုတွေ့ရပါသည်။

           ယခုနိုဝင်ဘာလ ပထမပတ် အဖွင့်ဈေးမှာလည်း ဆက်လက်ကျဆင်းလျက်ရှိပြီး ပိဿာ (၂၀)ဝင်တစ်တင်းလျှင် (၁၂၁၅၀၀ကျပ်မှ ၁၂၂၀၀၀ကျပ်) ဖြင့်အရောင်းအဝယ်ဖြစ်ခဲ့ပြီး ယခုဒုတိယပတ်တွင် (၁၂၀၅၀၀ကျပ်မှ ၁၂၁၀၀၀ကျပ်) ဖြင့်ရောင်းဝယ်မှုရှိနေပြီး အရောင်းအဝယ်အေးလျက်ရှိကြောင်း စုံစမ်းသိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်၊ ညောင်ဝန်းအုပ်စုသည် စပါး၊ ပဲမျိုးစုံနှင့် ဟင်းသီးဟင်းရွက်မျိုးစုံကို စိုက်ပျိုးထုတ်လုပ်တင်ပို့ရောင်းချလျက်ရှိသည့်အပြင် ” မြင်းခွာရွက်”  ကိုလည်း တစ်နိုင်တစ်ပိုင် စိုက်ပျိုးကြပါသည်။

        မြင်းခွာရွက်သည် နွယ်ပင်မျိုးဖြစ်ပြီး နှစ်ရှည်ပင်အမျိုးအစားဖြစ်ပါသည်။ အပင်ပြုစုထိန်းသိမ်းနိုင်မှုအပေါ်မှုတည်၍ ၁၀နှစ်မှ နှစ်၂၀အထိခူးဆွတ်ရောင်းချနိုင်ပါသည်။ သဲကုန်းမြို့နယ်၊ ညောင်ဝန်းအုပ်စု၊ ဝဲကြီးကျေးရွာတွင် မြင်းခွာရွက် ၀.၂၅ ဧကအကျယ်ရှိမြေကွက်၌ စိုက်ပျိုးရန် ဦးစွာ စိုက်ပျိုးမည့်မြေအား ထွန်ယက်ပြုပြင်၍   မြင်းခွာရွက်မျိုးစေ့တစ်ပြည်ကို ငွေကျပ် (၃၅၀၀၀) ဖြင့် (၁၀) ပြည်အသုံးပြုကြောင်း၊ မျိုးစေ့ကြဲပက်ပြီး (၁၄)ရက်သားရှိပါက အစို့များစတင်ထွက်ရှိပြီး  (၅၀-၆၀) ရက်သားရှိပါက စတင်ခူးဆွတ်ရောင်းချနိုင်ကြောင်း၊ မြင်းခွာရွက်ကို စိုက်ပျိုးပြီးပါက တစ်နှစ်ပတ်လုံးခူးဆွတ်ရောင်းချနိုင်ပြီး ခြောက်သွေ့ရာသီတွင်  တစ်လ (၂)ကြိမ်ရေသွင်းပေးရပါသည်။ ကုန်ကျစရိတ်အနေဖြင့် စတင်စိုက်ပျိုးချိန်မှစ၍ နှစ်တစ်ပတ်လည်မျိုး၊ မြေပြုင်ခအပါအဝင်  ဓာတ်မြေဩဇာ၊ ပိုးသတ်ဆေး၊ အပင်အားဆေး၊ အပင်ခူးဆွတ်ခ၊ ပေါင်းမြက်ရှင်းခ၊ ရေသွင်းခ၊ စုစုပေါင်း ငွေကျပ် သိန်း (၇၀)ခန့်ရှိကြောင်း၊ မြင်းခွာရွက်ကို တစ်လ (၁)ကြိမ်ခူးဆွတ်ရပြီး စိုက်ဧက ၀.၂၅ ကို အစည်းရေ (၆၀၀၀၀) ထွက်ရှိပြီး၊ တစ်နှစ်လျှင် အစည်းရေ ပျမ်းမျှ(၇၀၀၀၀၀)ခန့်ထွက်ရှိပြီး အကျိုးအမြတ်အားဖြင့် ဈေးနှုန်းအတက်အကျပေါ်မှုတည်ကြောင်း၊  ယခုနိုဝင်ဘာလ ဒုတိယပတ်တွင် တစ်စည်းလျှင် လက်ကား ငွေကျပ် (၂၀) နှုန်းဖြင့်ရောင်းချရကြောင်း၊ ထွက်ရှိလာသောမြင်းခွာရွက်များကို ဒေသတွင်းမြို့နယ်များ၊ ကုန်စိမ်းဒိုင်များမှတစ်ဆင့် ပြည်နှင့်ရန်ကုန်မြို့များသို့တင်ပို့ရောင်းချကြောင်း မြင်းခွာရွက်စိုက်ပျိုးသူ တောင်သူထံမှသိရပါသည်။

DOCA(ပဲခူး)

   ကြက်သွန်နီသည် နေ့စဉ်စားသုံးနေသော အစားအစာတို့တွင်မပါမဖြစ် အလွန်အရေးပါသော စားဖိုဆောင်သီးနှံတစ်မျိုးဖြစ်သည်။ ထားဝယ်စားသုံးကုန်စည်စျေးကွက်တွင် ကြက်သွန်နီစျေးနှုန်း မြှင့်တက်နေသည်ကိုတွေ့ရပါသည်။ ကြက်သွန်နီ(၁)ပိဿာလျှင် ၃၂၀၀ ကျပ်သာရှိရာမှ အောက်တိုဘာလ အတွင်း(၁)ပိဿာလျှင် ၄၃၀၀ ကျပ်၊ နိုဝင်ဘာလအတွင်း (၁)ပိဿာလျှင် ၅၀၀၀ကျပ်မှ ၅၆၀၀ကျပ် အထိ ဈေးနှုန်းမြင့်တက်သွားကြောင်း သိရှိရပါသည်။ ထားဝယ်စျေးကွက်တွင် သုံးပတ်အတွင်း ကြက်သွန်နီ(၁) ပိဿာလျှင် ၂၀၀၀ ကျပ်ခန့်စျေးတက်သွားခြင်းဖြစ်ပါသည်။ ပြည်ပသို့တင်ပို့မှုများရှိပြီး  ဒေသတွင်း စားသုံးမှုများသောကြောင့် ကြက်သွန်နီဈေးပိုမိုမြင့်တက်လာပါသည်။

   ကြက်သွန်နီသည် ရေအလွန်လိုအပ်သောသီးနှံဖြစ်သည့်အပြင် မြေအစိုဓာတ်ရှိသော မြေတွင်သာ စိုက်ပျိုးနိုင်ပါသည်။  အလွန်ချဉ်သောမြေကို မနှစ်သက်သောကြောင့် အောက်မြန်မာပြည်တွင် စိုက်ပျိုးမှု နည်းပါးပြီး အပူအအေးသင့်တင့်သော ရာသီဥတုကို ကြိုက်နှစ်သက်ပါသည်။ မြေပြန့်ဒေသတွင် ကြက် သွန်နီကို အောက်တိုဘာလနှင့်နိုဝင်ဘာလအထိသာ စိုက်ပျိုးပြီး တောင်ပေါ်‌ဒေသတွင် မတ်လနှင့်ဇွန်လအထိသာ စိုက်ပျိုးကြောင်း သိရှိရပါသည်။

DOCA()