ပြည်တွင်းကုန်သွယ်မှုသတင်း

              ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် အိမ်ဆောက်ပစ္စည်းရောင်းဝယ်ရေးဆိုင် (၁၀)ဆိုင် နီးပါးခန့် ရှိပါသည်။ ဆိုင်ကြီးမှာ (၄)ဆိုင်နီးပါးခန့် ရှိ၍ ယခုတစ်ပတ်တွင်း ဘိလပ်မြေ ဈေးမှာပိုမို၍ ယခင်အပတ်ကထက်အနည်းငယ်မြင့်တက်လာခဲ့ပါသည်။ မြို့တွင်းဆိုင်ကြိးများမှာ ရန်ကုန်ကုမ္မဏီကြီးများဖြစ်သော နိုင်းနိုင်းကုမ္ပဏီနှင့် ရွှေမေတ္တာကုမ္ပဏီကြီးများဝယ်ယူရောင်းချကြပြီး ယခင်နှစ်ကုန်လများမှစတင်၍ ဘိလပ်မြေမှာ လိုအပ်သလောက် ဝယ်ယူမရရှိခဲ့ကြောင်း၊ ကျောက်ဆည်ဘိလပ်မြေ စက်ရုံမှ ဘိလပ်မြေထုတ်လုပ်ရာတွင် ကုန်ကြမ်းရှားပါးမှု ကြောင့် လည်းကောင်း၊ တစ်နိုင်ငံလုံး အတိုင်းအတာဖြင့် ဖြန့်ဖြူးရောင်းချ ရမှုတို့ကြောင့် ဈေးမြင့်တက်လာခဲ့သည်ဟု ယူဆပါကြောင်း လုပ်ငန်းရှင်တစ်ဦးမှ ပြောကြားသည်ကို သိရှိရပါသည်။ ယခင်နှစ်(၁၁)လပိုင်းမှ စတင်ကာ ကြံ့နီဘိလပ်မြေဈေးမှာ (၁၂၅၀၀)ကျပ်ဈေး၊ အယ်ဖာဘိလပ်မြေ ဈေးမှာ (၁၂၅၀၀)ကျပ် တို့ဖြင့် စတင်၍ ဈေးကြီးမြင့်တက်လာခဲ့ရာတွင် ယခုအချိန်ထိ ဈေးနှုန်းမှာ ပြန်လည်ကျဆင်းသွား ခြင်းမရှိသေး၍ ယခုဇန်နဝါရီလ နောက်ဆုံးပတ်ဘိလပ်မြေဈေးနှုန်းမှာ ပြည်မြို့တွင်း စားသုံးသူ ဝယ်လိုအား အများဆုံးဖြစ်သည့် ကြံ့နီဘိလပ်မြေဈေးမှာ (၂၇၀၀၀)ကျပ်၊ အယ်ဖာဘိလပ်မြေဈေးမှာ (၂၇၀၀၀)ကျပ်ဈေးထိ မြင့်တက်လာခဲ့ပါသည်။ ဇန်နဝါရီလ ပထမပတ်တွင် ဘိလပ်မြေဈေးမှာ ကြံ့နီ ဘိလပ်မြေဈေးမှာ (၁၉၀၀၀)ကျပ်နှင့် အယ်ဖာ ဘိလပ်မြေဈေးမှာ (၁၉၀၀၀)ကျပ်၊ ဇန်နဝါရီလဒုတိယပတ်တွင် ကြံ့နီဘိလပ်မြေဈေးမှာ (၂၁၀၀၀)ကျပ်၊ အယ်ဖာဘိလပ်မြေ‌ဈေးမှာ (၂၁၀၀၀)ကျပ်ဈေးတို့ဖြင့် အရောင်းအဝယ်ဖြစ်ခဲ့ကြောင်း သိရှိရပါသည်။

                ယခုပြည်မြို့၏ ဘိလပ်မြေဈေးကွက်တွင် ဘိလပ်မြေပြတ်လပ်မှုမရှိကြောင်းသိရ၍ ကုန်ပစ္စည်းလက်ကျန်နည်းပါးမှုသာရှိကြောင်း သိရပါသည်။ အရောင်းအဝယ်မှာလည်း ပုံမှန်ရှိ ကြောင်း သိရှိရပါသည်။

DOCA(ပဲခူး)

              သင်္ဘောပင်သည် မြန်မာနိုင်ငံအပါအဝင် အပူပိုင်းဒေသမှာ ပေါက်ရောက်တဲ့အပင်ဖြစ်ပြီး သင်္ဘောသီးသည် အာဟာရဓာတ်များစွာ ပါဝင်သည့်အတွက် စားသုံးသင့်သည့် အသီးတစ်မျိုးဖြစ် သည်။ သင်္ဘောပင်သည် အလွယ်တကူစိုက်ပျိုးနိုင်ခြင်းကြောင့် အသီးများကိုရောင်းချ၍ အပိုဝင်ငွေရရှိသည့်အတွက် စိုက်ပျိုးသင့်သည့် အသီးတစ်မျိုးဖြစ်ပါသည်။

             စစ်ကိုင်းတိုင်းဒေသကြီး၊ ကန့်ဘလူခရိုင်၌ ကန့်ဘလူမြို့ပေါ်နှင့် နတ်ပေးကျေးရွာတွင် သင်္ဘောပင်များကို မိမိတို့၏နေအိမ်ခြံဝင်းများနှင့် ယာတောများတွင် တစ်ပိုင်တစ်နိုင်စိုက်ပျိုးကြ သည်။ ၂၀၂၅ ခုနှစ်၊ ဖေဖော်ဝါရီလ ပထမပတ်အတွင်း ကန့်ဘလူမြို့မဈေးတွင် သင်္ဘောသီးအစိမ်း အသေးတစ်လုံးလျှင် (၃၀၀)ကျပ်၊ အကြီးတစ်လုံးလျှင် (၅၀၀)ကျပ်၊ သင်္ဘောသီးမှည့်အသေးတစ်လုံး လျှင် (၁၅၀၀)ကျပ်နှင့် အကြီးတစ်လုံးလျှင် (၂၅၀၀)ကျပ်ဖြင့် ရောင်းချလျက်ရှိကြောင်း သိရသည်။

          အစာလည်းဆေး ဆေးလည်းအစာဆိုသည့်အတိုင်း သင်္ဘောသီးမှည့်ကို စားသုံးခြင်းဖြင့် ဓာတ်တိုးဆန့်ကျင်ပစ္စည်းများ ကြွယ်ဝသောကြောင့် ရောင်ရမ်းမှုကိုကျဆင်းစေခြင်း၊ အရွယ်တင်နုပျိုစေခြင်းနှင့် ရောဂါများကို နှိမ်နင်းနိုင်ခြင်းစသည့် အကျိုးကျေးဇူးများကို ရရှိစေနိုင်ကြောင်း၊ သင်္ဘောသီးများကို အိမ်ရှင်မများဟင်းချက်ရာ၌လည်းကောင်း၊ အသုပ်ဆိုင်များနှင့်  အထောင်းစုံရောင်းသည့် ဆိုင်များမှဝယ်ယူကြသဖြင့် သင်္ဘောသီးများ အရောင်းအဝယ်သွက်လျက်ရှိကြောင်း မြို့မဈေးရှိ ကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့နယ် ဘိုကုန်းအုပ်စု၊ ဘိုကုန်းကျေးရွာ တွင်  ဖူးစားပြောင်းကို နှစ်စဉ် စိုက်ပျိုးပြီးယခုထွက်ရှိနေသော ပြောင်းဖူးများကို နိုဝင်ဘာလတွင် စိုက် ပျိုးပြီး ဇန်နဝါရီတွင် ထွက်ရှိကြောင်း တစ်ဧကလျှင် မျိုးစေ့ထုတ်(၅)ထုတ်ခန့် စိုက်ပျိုးရပြီး ရေတင် စနစ်ဖြင့် တစ်ပင်နှင့်တစ်ပင် အကွာအဝေး (၁၀)လက်မ မကွာအဝေးထား၍ စိုက်ပျိုးရပါကြောင်း     စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ ထွန်ယက်ခ  အပါအဝင်တစ်ဧကငွေ ကျပ် (၁၅၀၀၀၀၀)  သိန်းကျော်ခန့်ကုန်ကျကြောင်း ၊ အထွက်နှုန်းအနေဖြင့် ရာသီဥတုအပေါ်မှုတည် ၍ တစ်ဧက အဖူးရေ(၈၅၀၀)ခန့် ထွက်ရှိပါကြောင်း သိရသည်။

ဈေးနှုန်းအနေဖြင့် ဇန်နဝါရီလ နောက်ဆုံးအပတ်တွင် ပြောင်းဖူးအရွယ်အစားပေါ်မှုတည်၍  ခြံ ပေါက်ဈေး ပြောင်းဖူးတစ်ဖူး ငွေကျပ်(၃၅၀)မှ(၄၀၀) ရောင်းချရ၍  စိုက်ပျိုးထွက်ရှိသော ပြောင်းဖူး များကို ကုန်စိမ်းဒိုင်များမှတဆင့် ရန်ကုန်မြို့သို့ တင်ပိုရောင်းချကြောင်း တစ်ဧကအကျိုးအမြတ် အားဖြင့် ငွေကျပ် (၁၇၀၀၀၀၀)ခန့် ရရှိ၍ ပြောင်းဖူး စိုက်ပျိုးခြင်းဖြင့် တောင်သူများ တွက်ခြေကိုက်၍ အကျိုးများလျက်ရှိကြောင်း ပြောင်းဖူး စိုက် တောင်သူများ ထံမှသိရပါသည်။

DOCA(ပဲခူး)

            ပဲခူးတိုင်းဒေသာယာဝတီခရိုင်၊အုတ်ဖိုမြို့နယ်သည် ဒေသန္တရအရ တောင်ကျ ချောင်းမကြီး ၃ခုစီးဝင်လျက်ရှိပြီးကျေးရွာအုပ်စု ၅၄အုပ်စုတွင် စိုက်ပျိုးရေးသည် အဓိက အသက် မွေးလုပ်ငန်းဖြစ် သည်။ရာသီအလိုက်သီးနှံစိုက်ပျိုးနိုင်သည့် ဧကပေါင်း ၆၆၀၀ကျော်ရှိပြီး ငရုတ်၊ ဂေါ်ဖီ၊ သခွား၊ရုံးပတီ တို့အဓိကစိုက်ပျိုးကြပြီး ဒေသတွင်းစားသုံးရန်သာမက အခြားမြို့နယ်များသို့ တင်ပို့ရောင်းချပြီး ဝင်ငွေရရှိလျက်ရှိပါသည်။

            ယခုနှစ်တွင်မိုးအနည်းငယ်များပြီး ရေကြီးရေလျှံခဲ့သဖြင့် စိုက်ပျိုးမှုနောက်ကျခဲ့သော်လည်း ယခုအခါပန်းဂေါ်ဖီများလှိုင်လှိုင်ပေါ်ပြီး ဈေးကောင်းရလျက်ဝင်ငွေကောင်းနေကြပြီးဖြစ်သည်။ ပန်း ဂေါ်ဖီကိုအုတ်ဖိုမြို့နယ်အတွင်း တယ်ပင်ကြော၊ လေးတဲ၊ရှမ်းရွာကျပ်ချောင်း၊ သင်မန်းကုန်း၊ ကွေ့ ချောင်း၊ဦးတိုကျေးရွာအုပ်စုများမှ အဓိကထွက်ရှိပြီး နနွင်းကုန်း၊ငါးရှဉ်ရိုးအုပ်စုများတွင် ဂေါ်ဖီ ထုတ်အဓိကစိုက်ပျိုးကြသည်။စိုက်ပျိုးထုတ်လုပ်မှုကုန်ကျစရိတ်မှာ တစ်ဧကလျှင် ၂၂၅၀၀၀၀သိန်း ခန့်ရင်းရပြီး စိုက်ပျိုးထွက်ရှိမှုအနေဖြင့် တစ်ဧကလျှင်ပန်းဂေါ်ဖီ ၁၁၀၀၀ခန့်ထွက်ရှိပါသည်။ဒေသ ကုန်စိမ်းဒိုင်ကောက်ဈေးအရတစ်ပွင့်လျှင် အကြီး/အသေးပျမ်းမျှ ၇၅၀ကျပ်ခန့် ရရှိပြီး တစ်ဧက အကျိုးအမြတ် ၆၀၀၀၀၀၀/ကျပ်ခန့် ရရှိကြောင်းသိရပါသည်။

DOCA(ပဲခူး)

ပဲခူးတိုင်းဒေသကြီးရွှေတောင်မြို့နယ် မီးလောင်အုပ်စု၊ အင်္ဂလှိုင်ဂန်ကျေးရွာရှိ တောင်သူ ဦးစိုးမြင့်လေး၏ ပဲစောင်းလျှားသီးစိုက်ခင်း၌ ပဲမြစ်များတူးယူနေမှုကို (၃.၂.၂၀၂၅)ရက်နေ့ နံနက်(၁၀)နာရီတွင်သွားရောက်ကွင်းဆင်းလေ့လာခဲ့ပါသည်။ ပဲစောင်းလျှားသီးကို တစ်ယောက်စိုက် စိုက်ပျိုးထားပြီး  ပဲစောင်းလျှားသီးများတုန်းသွားချိန်၌ ပဲမြစ်များကို ပြာသိုလတွင် တူးယူရောင်းချ ကြပါသည်။ ပဲမြစ်များကို နေ့စဉ်တူးယူပါက (၁၀)ရက်မျှသာကြာသော်လည်း အလုပ်သမားများ ကိုအတူးငှားရသည့်အတွက် အလုပ်သမားများအလုပ်အားချိန်ကို စောင့်၍တူးယူရ သော်ကြောင့်ရက် အနည်းငယ်ပို၍ကြာမြင့်ပါသည်။ တစ်ခါတူးယူလျှင်ပိဿာချိန် (၁၅)ပိဿာရရှိပြီး (၁)ပိဿာလျှင် (၃၀၀၀)ကျပ် ဈေးဖြင့်မြို့ထဲမှ ပွဲစားများမှ လာရောက်ကောက်ယူပြီး ပြန်လည်၍ လက်လီ/ လက်ကားရောင်းချကြပါသည်။ ပိဿာချိန် စုစုပေါင်း (၁၅၀)ကျော်ထွက်ရှိပြီး ကုန်ကျစရိတ်မှာ တူးယူစအလုပ်သမားတစ်ဦးလျှင် (၁)သောင်းပေးရပြီး (၁၀)ရက်အတွက်တူးခ အလုပ်သမားလုပ်ခ (၁)သိန်းခန့်ကုန်ကျရပါသည်။ အကျိုးအမြတ်မှာ (၃၅၀၀၀၀)ကျပ်ခန့်ကျန်ရှိကြောင်းသိရှိရပါသည်။

DOCA(ပဲခူး)