ပြည်တွင်းကုန်သွယ်မှုသတင်း

           မြိတ်ခရိုင်ဆီကိုယ်စားလှယ်သည် မြိတ်မြို့အတွက်လိုအပ်သောဆီများကို ရန်ကုန်မြို့ ဆီကန်များမှ ခွဲတမ်းများဖြင့်ဝယ်ယူလျက်ရှိပါသည်။ ဇန်နဝါရီလနောက်ဆုံးပတ်တွင် ခွဲတမ်း ရရှိခဲ့သော Myanmar Oil Alliance ကုမ္ပဏီ၏  စားအုန်းဆီပေပါ(၃၈)ပေပါကိုယာဉ်အမှတ် 2J-5724 ဖြင့်လည်းကောင်း ၊ Global Good Pure Group ကုမ္ပဏီ၏  စားအုန်းဆီပေပါ (၅၁)ပေပါကို ယာဉ်အမှတ် 6L-9521 တွင်လည်ကောင်း၊ စုစုပေါင်း ပေပါ(၈၉)ပေပါကိုသယ် ဆောင်လာပြီး ၂၀၂၅ခုနှစ်၊ ဖေဖော်ဝါရီလ(၄)ရက်နေ့တွင် မြိတ်မြို့သို့ရောက်ရှိလာခဲ့ကြောင်း သိရှိရပါသည်။

           အဆိုပါစားအုန်းဆီများကို မြိတ်မြို့အရောင်းဆိုင်များသို့ခွဲဝေရောင်းချပေးသွားမည်ဖြစ် ကြောင်းနှင့် မြိတ်မြို့အရောင်းဆိုင်များမှ တစ်ဆင့်ပြည်သူများသို့ရောင်းချပေးသွားမည်ဖြစ် ကြောင်းသိရှိရပါသည်။

DOCA(တနင်္သာရီ)

             ပြည်ပဲဈေးကွက်အတွင်း ပြည်တွင်းဝယ်လိုအားများ၊ ပြည်ပဝယ်လိုအားရှိသော ပဲများစသည်ဖြင့် ပဲမျိုးစုံရောင်းဝယ်လျက်ရှိကြရာ ယခုနှစ်ဆန်းပိုင်းကာလတွင် ဆောင်းပဲသစ်အချို့ဝင်ရောက်လာပြီး အချို့ပဲများကတော့ ပဲထွက်ပေါ်မှု မရှိသေးသည့်အတွက် လက်ကျန်ပဲများဖြင့် အရောင်းအဝယ် ဖြစ်နေကြောင်းသိရပါသည်။ ပဲဈေးနှုန်းများအနေဖြင့် နှစ်ကုန်ပိုင်းတွင် ရရှိခဲ့သောဈေးထက် နှစ်ဆန်းပိုင်မှာ ပဲသစ်ဈေးနှုန်းအချို့ လျော့နည်းရောင်းဝယ်နေခဲ့ပြီး နှစ်အလိုက်ပဲဈေးနှန်း အခြေအနေများအရ ယခင်နှစ်တွေရဲ့ ရရှိခဲ့သောဈေးနှုန်းထက် ဈေးပိုရရှိလာကြောင်းသိရသည်။

              မတ်ပဲသီးနှံမှာ ယခုလိုနှစ်ဆန်းပိုင်းတွင် ပဲသစ်အချို့ အနည်းငယ်စတင် ဝင်ရောက်လာပြီး ပဲဟောင်းလက်ကျန်များလည်းရှိနေခဲ့ပါသည်။ ဒါကြောင့် ပဲသစ်/ပဲဟောင်းအားလုံး ရောင်းဝယ်ယူမှု ရှိခဲ့ကာ ပဲဈေးနှုန်းလည်း ဈေးဟောင်းများ အနေဖြင့် ပိဿာ(၂၀)၊ တစ်တင်း (၉၈၀၀၀)ကျပ်ဖြင့် ရောင်းဝယ်နေကြရသလို ပဲသစ်ဈေးမှာလည်း တစ်တင်းလျှင် (၉၂၀၀၀-၉၃၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိခဲ့ပါသည်။ ပဲဈေးနှုန်းမှာ နှစ်ကုန်ပိုင်းကာလတွင် တစ်တင်းကို (၁၁၀၀၀၀)ကျော်အထိ ဈေးမြင့်တက်ခဲ့ပေမဲ့ ယခုကာလတွင် ပဲသစ်များလည်း ဝင်လာသလို ပဲဟောင်းလက်ကျန်များလည်း ရှိနေသည့်အတွက် အနည်းငယ်ပြန်လျော့သွားခဲ့ပြီး ဝင်ရောက်လာ သမျှအရောင်းအဝယ်ဖြစ်ခဲ့သည်ဟု သိရပါသည်။ နှစ်အလိုက် ဈေးနှုန်းနှိုင်းယှဉ်မှုအရ ၂၀၂၄ခုနှစ်မှ စ၍ ပိဿာ (၂၀)၊ တစ်တင်းလျှင် (၉၀၀၀၀)ကျော်ထိ ဈေးတိုးမြင့်တက်လာခဲ့ကာ ယခုနှစ်တွင်လည်း ကျပ်(၉၀၀၀၀)ကျော် ဆက်လက်မြင့်တက်လျက်ရှိနေပါသည်။

             ပဲတီစိမ်းသီးနှံသည် မတ်ပဲသီးနှံကဲ့သို့ တစ်နှစ်ပတ်လုံး အရောင်းအဝယ်ဖြစ်သည့် ပဲသီးနှံ မဟုတ်ဘဲ ဆောင်းပဲနှင့် မိုးပဲရာသီ အထွက်လှိုင်ချိန်များတွင်သာ အရောင်းအဝယ်ဖြစ်ကြပါသည်။ ယခုကာလမှာတော့ ဆောင်းပဲသီးနှံဖြင့် အရောင်းအဝယ်ဖြစ်ခဲ့သော်လည်း ပဲအဝင်ပါးလာသည့် အတွက် ဝင်ရောက်လာသမျှ ‌ရောင်းချမှုရှိကာ ရန်ကုန်၊ မန္တလေးလိုင်းသမားများ ဝယ်ယူမှုရှိနေပြီး ၂၀၂၂ခုနှစ်မှ စ၍ ဈေးမြင့်တက်လာသော်လည်း အခြားပဲများနည်းတူ အရောင်းအဝယ်ဖြစ်ခဲ့ပါသည်။ ၂၀၂၄ခုနှစ်၊ ဇန်နဝါရီလမှာ ဈေးကွက်အတွင်း ဈေးအနိမ့်ဆုံးရနေသော်လည်း ယခုနှစ်မှာ ဈေးနှုန်းမြင့် တက်လာသည့်အတွက် မတ်ပဲသီးနှံများ ဈေးကောင်းရနေသည်ကို လေ့လာသိရှိရပါသည်။

            ပဲစင်းငုံသီးနှံမှာ ယခုကာလတွင် တဖြည်းဖြည်းလှိုင်လှိုင်ပေါ်လာပြီဖြစ်သည့်အတွက် တစ်ရက် အိတ်(၃၀၀-၄၀၀)ကျော်ဝင်ရောက်လာပြီး ရန်ကုန်ဝယ်လက်သမားများ အဓိကဝယ်ယူမှု ရှိကြပါသည်။ ဈေးနှုန်းမှာ ပိဿာ ၂၀ တစ်တင်းလျှင် (၉၅၀၀၀)ကျပ်ဖြင့် ယခင်ကာလဈေးနှုန်းထက် ဈေးအနည်းငယ်လျော့နည်းသွားသည်ဟု သိရပါသည်။ နှစ်အလိုက်ဈေးနှုန်းနှိုင်းယှဉ်မှုအရ ၂၀၂၁ခုနှစ် တွင် ဈေးအနိမ့်ဖြင့် ရောင်းဝယ်ခဲ့ပြီး ၂၀၂၂ခုနှစ်မှ စ၍ အခြားသီးနှံများနည်းတူ ဈေးနှုန်းများ ပြိုင်တူ မြင့်တက်လာခဲ့ပါသည်။ ၂၀၂၄ခုနှစ် ပဲဈေးကွက်မှာ မတ်ပဲ၊ ပဲစင်းငုံသီးနှံများထက် ဈေးပိုရသည့် အတွက် ပဲတစ်တင်းလျှင် (၁၁၅၀၀၀)ကျပ်ဖြင့် ကျပ်(၁)သိန်းအထက် ရရှိနေခဲ့ပြီး ပဲဈေးကွက်မှာ ပြည်ပဝယ်လက်ပဲများထဲတွင် ‌ဈေးအမြင့်ဆုံးရရှိခဲ့သည့်ပဲဖြစ်ပါသည်။ ယခုနှစ်မှာတော့ မတ်ပဲသီးနှံနှင့် ပဲတီစိမ်းသီးနှံများကလည်း ဈေးပြိုင်မြင့်တက်ခဲ့သည့်အတွက် ပဲစင်းငုံသီးနှံဈေးမှာ အဆိုပါပဲများနှင့် ဈေးကွာခြားခြင်းသိပ်မရှိဘဲ ရောင်းဝယ်နေခဲ့ကြပါသည်။

              ကုလားပဲသီးနှံအနေဖြင့် ယခုကာလတွင် ပဲသစ်ဝင်ရောက်မှုမရှိသေးဘဲ အဟောင်းလက်ကျန်များသာရှိသည့်အတွက် ပဲခွဲစက်သမားများ နေ့စဉ်အဝယ်ရှိမှုအပေါ် ရောင်းချမှု ပုံမှန်ရှိခဲ့ကြပါသည်။ ပဲဈေးနှုန်းမှာ နှစ်အလိုက်ကာလတူအချိန် နှိုင်းယှဉ်မှုများအရ ၂၀၂၁ခုနှစ်တွင် ကျပ်(၃၀၀၀၀)အောက် လျော့နည်းရောင်းဝယ်ပြီး ၂၀၂၂ခုနှစ်၊ နှစ်ဆန်းပိုင်းမှစ၍ အခြားပဲများနည်းတူ ဈေးပြိုင်မြင့်တက်လာပါသည်။ ၂၀၂၃ခုနှစ်တွင် ကုလားပဲသီးနှံဈေးမှာ ပဲဈေးကွက်အတွင်း အခြားပဲများထက် ဈေးပိုရခဲ့သလို ၂၀၂၄ခုနှစ်မှာလည်း ပဲစင်းငုံမှလွဲ၍ အခြားပဲများထက် ဈေးပိုရရှိခဲ့ပါသည်။ ၂၀၂၅ခုနှစ်မှာ ကုလားပဲသီးနှံဈေး‌ အေးနေသည့်အတွက် အခြားပြည်ပ ဝယ်လက်ပဲများဖြစ်သော မတ်ပဲ၊ ပဲတီစိမ်း၊ ပဲစင်းငုံစသည့် သီးနှံများအားလုံးထက် ဈေးလျော့နည်း အရောင်းအဝယ်ဖြစ်နေခဲ့ကြောင်း လေ့လာသိရှိရပါသည်။

DOCA(ပဲခူး)

             မြန်မာနိုင်ငံသည် စပါးကိုအဓိကထား၍ စိုက်ပျိုးကြသလို ဆီဖူလှုံရန်အတွက် ဆီထွက်သီးနှံများဖြစ်သော နှမ်း၊ မြေပဲနှင့် နေကြာသီးနှံတို့အပြင် ကျန်သီးနှံများဖြစ်သော ပဲ၊ ပြောင်း၊ ဝါ တို့ကိုလည်းစိုက်ပျိုးကြပါသည်။ ဆီထွက်သီးနှံများကို စိုက်ပျိုးခြင်းဖြင့် နိုင်ငံအတွက် စားသုံးဆီဖူလှုံ နိုင်မည်အပြင် ဒီထက်မကပိုလျှံပါက ပြည်ပသို့လည်းတင်ပို့လာနိုင်မည်ဖြစ်ကြောင်းသိရသည်။

            ဆန်စပါးအများဆုံးစိုက်ပျိုးသောနိုင်ငံဖြစ်သည့်အတွက် စွန့်ပစ်ပစ္စည်းဖြစ်သောဖွဲနုကို တိရိစ္ဆာန်အစာအဖြစ်သာအသုံးပြုခြင်းမပြုဘဲ တန်ဖိုးမြှင့်ပြီးဖွဲနုမှ ဆီများထုတ်လုပ်လာနိုင်လျင် ပြည်တွင်းစားသုံးဆီအဖြစ် တစ်တောင့်တစ်နေရာမှ အထောက်အကူပြု မည်ဖြစ်ပါသည်။ ဖွဲနုတွင် စပါး၏ဆီပါဝင်မှုနှုန်း ၇၅% ကျော် အထိရှိပြီး၊ အားသာချက်အနေဖြင့် အရသာနှင့်အနံ့မရှိခြင်း၊ အခြားဆီကဲ့သို့ စေးပျစ်မှုမရှိခြင်းတို့ဖြစ်ပါသည်။ ဖွဲနုဆီမှာ ဟင်းများချက်ပြုတ်၊ ကြော်လှော်ခြင်းဖြင့် မူလဟင်း၏အနံ့၊ အရသာတို့ကို ဆီကြောင့်မပြောင်းလဲနိုင်ဘဲ အားသာချက်မှာ ဆီကြောင့်လည်ချောင်းထဲတွင် ဆီကပ်မနေသဖြင့် ကျန်းမာရေးနှင့်ကိုက်ညီ‌သော စားသုံးဆီဖြစ်ပါသည်။ ဖွဲနုဆီသည် လွန်ခဲ့သည့် နှစ်ပေါင်းများစွာက ပေါ်လာခဲ့သော်လည်း လူသိနည်းသဖြင့် အသုံးပြုမှုနည်းတာတွေ့ရပါသည်။ ဖွဲနုမှတစ်ဆင့်တန်ဖိုးမြှင့်ထုတ်ကုန် ဖွဲနုဆီကို ကျယ်ပြန့်စွာအသုံးပြုလာနိုင်မည်ဆိုပါက ကျန်းမာရေးအထောက်အကူပြု စားသုံးဆီအဖြစ် အသုံးပြုလာ နိုင်မည်ဖြစ်ပါသည်။ ဆီကြိတ်ပြီးထွက်ရှိလာသော ဖွဲနုကြိတ်ဖတ်အား တိရိစ္ဆာအစားအစာအဖြစ် အသုံးပြုနိုင်မည်ဆိုလျင် တိရိစ္ဆာန်အစာထုတ်လုပ်မှုဈေးကွက်တွင်လည်း ဖွဲနုကုန်ကြမ်းဈေးထက် ဈေးနှုန်းများသက်သာလာမည်ဖြစ်ပါသည်။

            ထို့ကြောင့် တန်ဖိုးမြှင့်ထုတ်ကုန်ဖွဲနုမှတစ်ဆင့် ဖွဲနုဆီကို ကျယ်ပြန့်စွာ ထုတ်လုပ်လာ နိုင်မည်ဆိုလျှင် ပြည်ပမှ မှာယူတင်သွင်းလာသော စားအုန်းဆီအစား ပြည်တွင်းဖြစ် ဖွဲနုဆီကို သုံးစွဲမည်ဆိုပါက ပြည်တွင်းစားသုံးဆီဖူလှုံရေးကို အထောက်အကူပြုနိုင်မည်ဖြစ်ကြောင်းသိရှိရပါသည်။

DOCA(ပဲခူး)

            ပြည်ခရိုင်တွင် သီးနှံများစိုက်ပျိုးရာတွင် အသုံးများသော ပိုးသတ်ဆေးဈေးနှုန်းများမှာ ၂၀၂၄ခုနှစ်၊ ဒီဇင်ဘာလတွင် ယူရီးယားလုံးကြီး တစ်အိတ်လျှင် (၁၀၁၀၀၀)ကျပ်၊ ယူရီးယားလုံးသေး တစ်အိတ်လျှင် (၁၁၀၀၀၀)ကျပ်၊ တီဆူပါ(သံကွင်း) တစ်အိတ်လျှင် (၁၃၀၀၀၀)ကျပ်၊ ပိုတက် (အာမို) တစ်အိတ်လျှင် (၁၂၀၀၀)ကျပ်၊ ကွန်ပေါင်း(၁၅)ပတ်လည် တစ်အိတ်လျှင် (၁၃၀၀၀၀)ကျပ်၊ ကလိုင်ကိုဇစ် (4liter)တစ်လုံးလျှင် (၇၅၀၀၀)ကျပ်၊ ရှောင်လင် (၅၀၀CC)တစ်ပုလင်းလျှင် (၂၀၀၀၀)ကျပ်ဖြင့် ဝယ်ယူသုံးစွဲရပြီး၊ ယခု ၂၀၂၅ခုနှစ်၊ ဇန်နဝါရီလမှာတော့ ယူရီးယားလုံးကြီး တစ်အိတ်လျှင် (၁၀၀၀၀၀)ကျပ်၊ ယူရီးယားလုံးသေး တစ်အိတ်လျှင် (၁၂၀၀၀၀)ကျပ်၊ တီဆူပါ (သံကွင်း)တစ်အိတ်လျှင် (၁၄၈၀၀၀)ကျပ်၊ ပိုတက်ရှ် (အာမို) တစ်အိတ်လျှင် (၁၁၈၀၀၀)ကျပ်၊ ကွန်ပေါင်း(၁၅)ပတ်လည်တစ်အိတ်လျှင် (၁၈၅၀၀၀)၊ ကလိုင်ကိုဇစ် (4liter)တစ်လုံးလျှင် (၇၇၀၀၀)ကျပ်၊ ရှောင်လင် (၅၀၀ CC)တစ်ပုလင်းလျှင် (၂၀၀၀၀)ကျပ်ဖြင့် ဈေးကွက်အတွင်းတွင် ဝယ်ယူသုံးစွဲရပါသည်။ ဆောင်းသီးနှံများ စိုက်ပျိုးမှုများလာသောကြောင့် ပိုးသတ်ဆေး၊ ဓါတ်မြေဩဇာများမှာ ဈေးမြင့်တက်နေရခြင်းဖြစ်ကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ ကျီးသဲအုပ်စုတွင် သီးနှံမျိုးစုံစိုက်ပျိုးလျက်ရှိရာ၊ ရာသီပေါ်သီးနှံတစ်မျိုးဖြစ်သော ဖရဲသီး (၆၁၁)မျိုးများကို တစ်နိုင်တစ်ပိုင်တောင်သူ (၁၈)ဦးမှ (၆)ဧကခန့်စိုက်ပျိုးထားကြောင်းသိရှိရပါသည်။

         ဖရဲသီးကို အောက်တိုဘာလဆန်းတွင်စတင်စိုက်ပျိုးထားကြပြီး ဇန်နဝါရီလဆန်းတွင် စတင်ပေါ်ပေါက်၍ (၃)လကြာမြင့်ပါသည်။ ဖရဲသီးသည်တစ်ဧကလျှင် ရောင်းတန်းဝင်ဖရဲသီးအလုံး (၁၅၀၀)ခန့်ထွက်ရှိပါသည်။ ဖရဲသီးစိုက်ပျိုးထုတ်လုပ်မှုအနေဖြင့် တစ်ဧကလျှင်(၆)သိန်းကျပ်ခန့်ကုန်ကျပြီး၊ ပြန်လည်ရောင်းချရာတွင်အခင်းပြတ်တစ်ဧကလျှင် (၂၅)သိန်းကျပ်ရရှိပါသည်။ သို့ အတွက် ဖရဲသီးတစ်ဧကလျှင် အကျိုးအမြတ် (၁၉)သိန်းခန့်ရရှိပါသည်။

          ဝယ်ယူသူများအနေဖြင့်လည်း ဖရဲသီးများကိုအကြီးအသေးပေါ်မူတည်ပြီး(၂၀၀၀)ကျပ်မှ (၃၀၀၀)ကျပ်အထိပြန်လည်ရောင်းချကြပါသည်။ ပြန်လည်ရောင်းချရာတွင်ရန်ကုန်၊ ပြည် လမ်းဘေးတွင် ဆိုင်များဖွင့်လှစ်၍၎င်းအနီးအနားမြို့များသို့ ဖောက်သည်ပေး၍လည်းကောင်းရောင်းချကြပါသည်။

           သို့ဖြစ်ပါ၍ ယခုနှစ်ဖရဲသီးများသည် တောင်သူနှင့်ပြန်လည်ရောင်းချသူနှစ်ဦးစလုံးအကျိုးရှိသော သီးနှံဖြစ်ကြောင်းသိရှိရပါသည်။

DOCA(ပဲခူး)