ပြည်တွင်းကုန်သွယ်မှုသတင်း

           ပဲခူးတိုင်းဒေသကြီး နတ်တလင်းခရိုင် နတ်တလင်းမြို့နယ်ရှိ ပဲမျိုးစုံရောင်းဝယ်ရေး ပွဲရုံများတွင် ဇန်နဝါရီလ စတုတ္ထပါတ်မှ ယခုဖေဖော်ဝါရီလ တတိယပတ်အထိ အရောင်းအဝယ် ဖြစ်နေသော မတ်ပဲဈေး နှုန်းများမှာ အတက်အကျ အနည်းငယ်သာရှိပြီး အရောင်းအဝယ် ဖြစ်နေသည်ကို တွေ့ရပါသည်။

            ယခင် ဇန်နဝါရီလ တတိယပါတ်တွင် အရောင်းအဝယ် ဖြစ်ခဲ့သော မတ်ပဲဈေးနှုန်းမှာ ပိဿာ(၂၀)တစ်တင်းလျှင် ငွေကျပ် (၈၅၀၀၀-၉၅၀၀၀) နှုန်းဖြင့် ရောင်းဝယ်ခဲ့ပြီး  စတုတ္ထပတ်တွင် ငွေကျပ် (၉၇၆၀၀-၉၇၈၀၀)နှုန်းအထိ ဈေးမြင့်တက်ခဲ့ပါသည်။

           ယခု ဖေဖော်ဝါရီလ ပထမပတ် အဖွင့်ဈေးမှာ ပိဿာ(၂၀)တစ်တင်းလျှင် (၉၅၅၀၀-၉၅၀၀၀)နှုန်း အထိ ပြန်လည်ကျဆင်းခဲ့ပါသည်။ ဖေဖော်ဝါရီလ ဒုတိယပတ်တွင်လည်း ဈေးနှုန်းများ ဆက်လက်ကျဆင်း လျက်ရှိပြီး  ငွေကျပ် (၉၅၀၀၀-၉၄၃၀၀)နှုန်းဈေးဖြင့် ရောင်းဝယ်ခဲ့ပါသည်။

            ယခု တတိယပတ်တွင်လည်း ဈေးနှုန်းများ အတက်အကျမရှိတည်ငြိမ်နေပြီး ပိဿာ(၂၀)တစ်တင်း လျှင် ငွေကျပ်(၉၄၃၀၀-၉၅၀၀၀)နှုန်း အတွင်းသာ အရောင်းအဝယ်ဖြစ်နေကြောင်း လေ့လာသိရှိရပါသည်။

DOCA(ပဲခူး)

             မြန်မာနိုင်ငံစက်သုံးဆီ တင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

            ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်တွင် စက်သုံးဆီဆိုင်(၈)ဆိုင်ရှိရာ ၂၀၂၅ခုနှစ် ယခင်ဇန်နဝါရီလ (တတိယပတ်)တွင် ဖြစ်ပေါ်ခဲ့သော စက်သုံးဆီဈေးနှုန်းများမှာ ဓာတ်ဆီ (92) တစ်လီတာလျှင်(၃၁၁၄)ကျပ်၊ ဓာတ်ဆီ(95) တစ်လီတာ လျှင်(၃၁၇၉)ကျပ် ဒီဇယ်ရိုးရိုး တစ်လီ တာလျှင်(၂၇၇၉)ကျပ်၊ ဒီဇယ်(ပရီမီယမ်)တစ်လီတာလျှင် (၃၄၀၉)ကျပ် ဖြင့်ရောင်းချလျက်ရှိ ကြောင်းသိရပါသည်။

           ယခုဖေဖေါ်ဝါရီလ (တတိယပတ်)တွင် ဖြစ်ပေါ်ခဲ့သော စက်သုံးဆီ ဈေးနှုန်းများမှာ ဓာတ်ဆီ(92) တစ်လီတာလျှင်(၃၁၉၉)ကျပ်၊ ဓာတ်ဆီ(95) တစ်လီတာ လျှင်(၃၂၅၉)ကျပ် ဒီဇယ်ရိုးရိုး တစ်လီတာ လျှင်(၂၇၆၉)ကျပ်၊ ဒီဇယ်(ပရီမီယမ်) တစ်လီတာလျှင် (၃၄၁၉)ကျပ် ဖြင့်ရောင်းချလျှက်ရှိ ကြောင်းသိရပါသည်။

           ယခုအပတ်နှင့် နှိုင်းယှဉ်ပါက ဓာတ်ဆီ (92)တစ်လီတာလျှင် (၈၅)ကျပ်၊ ဓာတ်ဆီ (95) တစ်လီတာလျှင် (၈၀)ကျပ် ဈေးမြင့်သွာပြီး ဒီဇယ်ရိုးရိုးဈေးနှုန်းမှာ တစ်လီတာ (၁၀)ကျပ်၊ ဒီဇယ် (ပရီမီယမ်)  တစ်လီတာ လျှင်(၁၀)ကျပ် ဈေးကျသွားကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်အတွင်းရှိ ကျေးရွာများဖြစ်သည့် ဒမငယ်ရွာ၊ ကြို့ပင်သာရွာ၊ သရက်ပင်ကန်ရိုးရွာ၊ အုတ်တန်းရွာ၊ ရေကြည်ရွာ၊ ခြောက်ခမ်းရွာ၊ ရင်းတိုက်စမ်းရွာ စသည့်ကျေးရွာများတွင် ချောင်း၊ မြောင်း၊ အင်းအိုင်နှင့် ကွင်းရေများရှိသည့်အတွက် ရောင်းဝယ်ရေးဒိုင်များသို့  ငါးရှဉ့်များ တစ်နှစ်ပတ်လုံးဝင်ရောက်၍ အရောင်းအဝယ်ဖြစ်လျက်ရှိ ကြောင်း ၊ ဆောင်းတွင်းကာလနှင့် မိုးတွင်းကာများတွင် ငါးရှဉ့်  ဝင်ရောက်မှု ပိုမိုများပြားပြီး ဧပြီလနှင့် မေလများတွင်    ငါးရှဉ့်ဝင်ရောက်မှုနည်းပါး၍ အရောင်းအဝယ်ဖြစ်ကြောင်းသိရပါသည်။

            နတ်တလင်းမြို့နယ်      ငါးရှဉ့်ရောင်းဝယ်ရေးဒိုင်သို့ တစ်ရက်လျှင် အနည်းဆုံးပိဿာချိန် (၁၀၀)မှ ပိဿာ ချိန်(၁၅၀)အထိ ဝင်ရောက်၍ တစ်လလျှင် ပိဿာချိန်(၄၀၀၀)ခန့်ဝင်ရောက် အရောင်းအဝယ်ဖြစ်လျက်ရှိကြောင်း၊ ယခုနှစ်မိုးတွင်းနှင့် ဆောင်းတွင်းကာလများတွင် ငါးရှဉ့် ကိုအကောင် အကြီးအသေး ခွဲခြားခြင်းမရှိဘဲ ငွေကျပ်(၁၀၀၀၀-၁၂၀၀၀)ဈေးနှုန်းရှိပြီး ယခု ဖေဖော် ဝါရီလ တတိယပတ်တွင်  ငါးရှဉ့် တစ်ပိဿာလျှင် ငွေကျပ်(၁၇၅၀၀)ဈေးနှုန်းဖြင့် ဝယ်ယူပြီး ရန်ကုန်ဈေးကွက်သို့ တစ်ရက်ခြား တင်ပို့ရောင်းချကြောင်း သိရှိရပါသည်။

DOCA(ပဲခူး)

          ပြည်ခရိုင်၊ ပေါက်ခေါင်းမြို့ရှိ သဖန်းချိုအုပ်စု၊ လေးကြီးကျေးရွာတွင် ကြက်သွန်များ စိုက်ပျိုးထားရှိကြောင်း သိရပါသဖြင့် စိုက်ပျိုးထွက်ရှိမှုနှင့် ဈေးနှုန်းဈေးကွက် အခြေအနများ အားသိရှိနိုင်ပါရန် ပေါက်ခေါင်းမြို့နယ်တာဝန်ခံနှင့် ဝန်ထမ်းများအဖွဲ့သည် ၂၄.၂.၂၀၂၅ ရက်နေ့တွင် ကွင်းဆင်းခဲ့ပါသည်။

         သဖန်းချိုအုပ်စု၊ လေးကြီးကျေးရွာရှိ တောင်သူဦးခင်လေးမှ ကြက်သွန်နီ ၀.၂၅ဧကကို စိုက်ပျိုးထားရှိပြီး စိုက်ပျိုးပြီး (၂)ခန့် အကြာတွင် ကြက်သွန်များကို နှုတ်ယူရောင်းချကြပါသည်။ ၀.၂၅ဧကတွင် စိုက်ပျိုးထုတ်လုပ်ကုန်ကျစရိတ်အနေဖြင့် ၈ သိန်းကျပ်ခန့်ကုန်ကျပြီး ထွက်ရှိမှုမှာ ပိဿာ ၆၃၀ခန့်ထွက်ရှိကြောင်း သိရပါသည်။ ကြက်သွန်ဘောင်တစ်ဘောင်လျှင် ၁၄ပိဿာခန့် ထွက်ရှိ၍ စိုက်ပျိုးဘောင် ၄၅ဘောင်ရှိပါသည်။ ကြက်သွန်များထွက်ရှိလာသောအခါ တစ်ပိဿာလျှင် ၂၅၀၀ကျပ်ဖြင့် စိုက်ခင်းသို့လာရောက်ဝယ်ယူသလို ဈေးများနှင့် ပွဲရုံများသို့လည်း တင်ပို့ရောင်း ချကြပါသည်။  ၀.၂၅ဧကတွင် ရရှိသောဝင်ငွေမှာ ၁၅၇၅၀၀၀ကျပ်ဖြစ်၍ တောင်သူအကျိုးအမြတ်မှာ ၇၇၅၀၀၀ကျပ်ခန့်ရရှိကြောင်း သိရပါသည်။ တောင်သူအကျိုးအမြတ်မှာ အထွက်နှုန်းနှင့် ဈေးနှုန်းအပေါ်မူတည်၍ အပြောင်းအလဲရှိကြောင်း သိရပါသည်။ ထို့ကြောင့် ကြက်သွန်နီစိုက် တောင်သူများအနေဖြင့် အထွက်နှုန်းကောင်းမွန်အောင် မျိုးကောင်းများရွေးခြယ်၍ နည်းပညာများ စနစ်တကျဖြင့်စိုက်ပျိုးနိုင်မည်ဆိုလျှင် ဒီထက်မက အကျိုးအမြတ်များလည်းရရှိနိုင်မည်ဖြစ်ကြောင်း သိရှိရပါသည်။

DOCA(ပဲခူး)

           ဆောင်းရာသီကုန်ခါနီးအချိန်ဖြစ်၍ ရာသီဥတုမှာ နေ့ခင်းအချိန်များတွင် ပူပြင်းလာပြီး မနက်ခင်းအချိန်တွင် အေးလျက်ရှိနေပါသည်။ ထို့ကြောင့် ပြည်ခရိုင်၊ ပြည်မြို့ရှိ ပန်းဈေးကွက် အနေဖြင့် ယခုအချိန်တွင် ရောင်စုံပန်းများဖြစ်သော ဂန္ဓမာပန်း၊ သစ္စာပန်း၊ နှင်းဆီပန်း ၊ မေမြို့ပန်း အစရှိသဖြင့် ပန်းများဈေးကွက်တွင် ရောင်းချလျက်ရှိနေပါသည်။ ထိုပန်းများကို ပြည်မြို့အနီးတဝိုက် ရှိ မှော်ဇာ၊ ကင်းပွန်းခြုံနှင့် ရွှေတောင်မြို့နယ်ရှိ ကသစ်ကိုင်းကျေးရွာများမှ လာရောက်ရောင်းချ ကြပါသည်။ ထိုကျေးရွာများမှ ပန်းများကို စီးပွားဖြစ်စိုက်ပျိုးကြသလို တစ်နိုင်တစ်ပိုင်လည်း စိုက်ပျိုးပါသည်။ ထွက်ရှိလာသော ပန်းများကို ပန်းဒိုင်များ၊ ဈေးသည်များက အခင်းထဲအထိ လာရောက်ဝယ်ယူရောင်းချကြပါသည်။ ဈေးများတွင်ရောင်ချသော ပန်းများ၏ ဈေးနှုန်းများမှာ ဂန္ဓမာပန်း (အဖြူ၊ အဝါ) အကြီးအသေးရောရာ(၅)ခက်ပါတစ်စည်းလျှင် ၄၅၀၀ကျပ်၊ သစ္စာပန်း (၅)တံပါတစ်စည်းလျှင် ၂၀၀၀ကျပ်၊ နှင်းဆီပန်း အပွင့်အသေး (၁၀)ပွင့်ပါတစ်စည်းလျှင် ၃၅၀၀ကျပ်၊ နှင်းဆီပန်း (အကြီး) တစ်ပွင့်လျှင် ၅၀၀-၇၀၀ကျပ်၊ မေမြို့ပန်း (ကြွေဖြူ)တစ်စည်းလျှင် ၂၀၀၀ကျပ်၊ မေမြို့ပန်း (အက်စတာ)တစ်စည်းလျှင် ၅၀၀-၁၀၀၀ကျပ်ဖြင့် ရောင်းချလျှက်ရှိပါသည်။

            ပန်းဈေးများမှာ ယခင်နှစ်ထက်စာလျှင် ယခုနှစ်မှာဈေးများထက်ဝက်ခန့် မြင့်တက်လာရခြင်းမှာ မျိုးဈေးများကြီးမြင့်ခြင်း၊ အထွေထွေကုန်ကျစရိတ်များလည်း ကြီးမြင့်လာခြင်းတို့ကြောင့် ဖြစ်သည်ဟု သိရပါသည်။ ပြည်ဈေးမှတစ်ဆင့် ရန်ကုန်မြို့ရှိဈေးများနှင့် နေပြည်တော်မြို့သို့လည်း တင်ပို့ရောင်းချကြောင်း သိရှိရပါသည်။

DOCA(ပဲခူး)