ပြည်တွင်းကုန်သွယ်မှုသတင်း

    ရွှေဖရုံသီး၏အရောင်သည် ရွှေရောင်ကဲ့သို့ ဝင်းဝါနေပြီး အရသာအနည်းငယ်ချိုသည်။ မချက် ပြုတ်မီ အသားမာကျောသော်လည်း အပူပေးချက်ပြုတ်ပြီးနောက် အလွန်နူးညံ့သည်။ အသီး သာမက အပင်၏ အရွက်၊ အညွန့်၊ အပွင့်နှင့်အစေ့တို့ကိုလည်း စားသုံးနိုင်သည်။ ထားဝယ်မြို့ ပတ်ဝန်းကျင် ကျေးရွာများရှိ လယ်ကွင်း၊ စိုက်ပျိုးခြံများတွင် စိုက်ပျိုး၍ထွက်ရှိလာသော အသီးများကို ကုန်စိမ်းသည်များသို့ ဖောက်သည်ပေးကာ ထိုမှတဆင့်အနီးအနားရှိဈေးများတွင် ပြန်လည်ရောင်းချကြပြီး တစ် စိတ်လျှင်(၁၀၀၀)ကျပ်၊ တစ်လုံးလျှင်(၅၀၀၀/၆၀၀၀)ကျပ် အသီးသီးရှိကြောင်း ကုန်စိမ်းသည် များထံမှ သိရှိရပါသည်။

DOCA (တနင်္သာရီ)

   လေးဆူဓာတ်ပျော် ရွှေဆံတော်စေတီတော်မြတ်ကြီးသည် မြတ်စွာဘုရားသက်တော်ထင်ရှား ရှိစဉ်ကပင် တည်ထားကိုးကွယ်ခဲ့သော စေတီတော်မြတ်ကြီးဖြစ်သည်။ ပဲခူးတိုင်းဒေသကြီး၊ ပြည်မြို့၏ အရှေ့ပိုင်း ဆင်စုရပ်မြောက်ဘက်၊ ဆံတော်ရပ်၌ “သုဒဿန”မည်သော တောင်ကုန်းငယ်တွင် တည်ရှိ သည့် ရွှေဆံတော်ဘုရားကို မြသိတင် (မြသီးတင်) ဘုရားဟုလည်း ရှေးက ခေါ်တွင်ခဲ့သည်။ ပဲခူးတိုင်း ဒေသကြီး ပြည်မြို့ကျက်သရေဆောင် သမိုင်းဝင်လေးဆူဓာတ်ပျော် ရွှေဆံတော်စေတီတော်မြတ်ကြီး (၂၆၁၄) နှစ်ပြည့် ဗုဒ္ဓပူဇနိယပွဲတော်နှင့် (၁၂၆)ကြိမ်မြောက် ဗုဒ္ဓမြတ်စွယ်တော် ဖွင့်လှစ်အပူဇော်ခံပွဲကို ၁၃၈၇ခုနှစ် တန်ဆောင်မုန်းလဆန်း (၈)ရက် ၂၀၂၅ ခုနှစ် အောက်တိုဘာ ၂၈ရက်မှစ၍ တန်ဆောင်မုန်း လပြည့်ကျော် (၂) ရက်၊ နိုဝင်ဘာ ၆ ရက်အထိ ၁၀ ရက်တိုင် အစဉ်အလာမပျက် စည်ကားသိုက်မြိုက်စွာ ကျင်းပမည်ဖြစ်ပါသည်။

          အောက်တိုဘာ၂၈ရက်၊ နံနက်၅နာရီခွဲအချိန်တွင် ဗုဒ္ဓမြတ်စွာအမှူးပြုသော ဩဝါဒစရိယ ဆရာတော်ကြီး (၁၀)ပါးနှင့် သံဃာတော် (၁၀၈) ပါးတို့ကို အရုဏ်ဆွမ်းဆက်ကပ် လှူဒါန်းပြီး နောက်  စေတီတော်ရင်ပြင် အာရုံခံတန်ဆောင်း(၄)ခု၌ သံဃာတော် ၂၇ပါးစီဖြင့် ဗုဒ္ဓါဘိသေက ဘုရားအနေကဇာတင်ကာ စေတီတော်လေးထပ်ဓမ္မာရုံ၌  တရားတော်နာယူပွဲ ကျင်းပမည်ဖြစ်ပါသည်။ ဆက်လက်၍ စေတီတော် ရင်ပြင် လေးဆူဓာတ်ပျော် ရွှေဆံတော်စေတီတော်မြတ်ကြီး (၂၆၁၄)နှစ် ပြည့် ဗုဒ္ဓပူဇနိယပွဲတော်မုခ်ဦး ဆိုင်းဘုတ်ရှေ့၌ ပွဲတော်ကို တာဝန်ရှိသူများက ဖဲကြိုးဖြတ်ဖွင့်လှစ်‌ပေးပြီး ၎င်းနောက် မြတ်စွာဘုရားရှင်နှင့် သံဃာတော်(၁၀၈)ပါးတို့ကို ဆွမ်းဆန်စိမ်း လောင်းလှူပွဲ ကျင်းပမည် ဖြစ်သည်။ အောက်တိုဘာ ၂၉ရက်နေ့ နံနက်၉နာရီတွင်  ရင်ပြင်တော်မြတ်စွယ်တော်တိုက်ရှိ ဗုဒ္ဓမြတ်စွယ်တော်ကိန်းဝပ်စံပါယ်တော်မူသည့် စိန်စေတီတော်၊ ပတ္တမြားစေတီတော်၊ ရွှေကလပ်တော်၊ မူလကြေးစေတီတော်နှင့် စန္ဒကူးကြုတ်တော်တို့ကို ရောင်တော်ဖွင့်ပွဲ ကျင်းပမည်ဖြစ်သည်။ အောက်တိုဘာလ ၃၁ရက် ညနေ ၄နာရီခွဲတွင် ရင်ပြင်တော်ကျားပျံဓမ္မာရုံ၌ (၁၂၆) ကြိမ်မြောက် ဗုဒ္ဓမြတ်စွယ်တော် ဖွင့်လှစ်အပူဇော်ခံပွဲကျင်းပခြင်း၊ တန်ဆောင်မုန်းလဆန်း ၁၂ရက်၊ နိုဝင်ဘာ ၁ ရက် နံနက် (၆:၀၀) နာရီအချိန်တွင် မြတ်စွယ်တော်တိုက်အတွင်း၌ ဗုဒ္ဓမြတ်စွယ်တော်ကို ဗုဒ္ဓါဘိသေက အနေကဇာတင်လှူပွဲနှင့် နိုဝင်ဘာ ၂ရက် မွန်းလွဲ ၃နာရီတွင် ဗုဒ္ဓ မြတ်စွယ်တော်ကို ရင်ပြင်တော်ပေါ်တွင် ရွှေဆံတော်စေတီတော်မြတ်ကြီးအား လက်ျာရစ်သုံးကြိမ် လှည့်လည်အပူဇော်ခံပွဲတို့ ကျင်းပမည် ဖြစ်ပါသည်။ ဗုဒ္ဓမြတ်စွယ်တော်ကို  အများပြည်သူဖူးမြော် ကြည်ညိုနိုင်ရန် မြတ်စွယ်တော်တိုက် မှန်ကျောင်းဆောင်တော်၌ နိုဝင်ဘာ ၃ရက်မှ ၅ရက်အထိ နေ့စဉ်နံနက် ၅နာရီခွဲမှ ည၉နာရီအထိ အပူဇော်ခံမည်ဖြစ်ကာ နိုဝင်ဘာ ၆ ရက် နံနက် ၅နာရီခွဲတွင် ဗုဒ္ဓမြတ်စွယ်တော် ကို တစ်နှစ်တာ ကိန်းဝပ်စံပါယ်တော်မူမည့် မြတ်စွယ်တော်တိုက် ဂန္ဓကုဋီတိုက်အတွင်းသို့ ပြန်လည် ပင့်ဆောင်ပြီး (၂၆၁၄)နှစ်ပြည့် ဗုဒ္ဓပူဇနိယပွဲတော်နှင့် (၁၂၆)ကြိမ်မြောက် ဗုဒ္ဓမြတ်စွယ်တော် အပူဇော်ခံပွဲ အောင်ပွဲ/ပိတ်ပွဲအခမ်းအနားတို့ကို စည်ကားသိုက်မြိုက်စွာ ကျင်းပမည်ဖြစ်သည်။ အဆိုပါပွဲတော်တွင် နှစ်စဉ် လေးဆူဓာတ်ပျော်ရွှေဆံတော်စေတီတော်မြတ်ကြီး ဗုဒ္ဓပူဇနိယပွဲတော်နှင့် ဗုဒ္ဓမြတ်စွယ်တော် မြို့တွင်းလှည့်လည်အပူဇော်ခံပွဲ စည်ကားသိုက်မြိုက်စွာကျင်းပလေ့ရှိကြပါသည်။ ဗုဒ္ဓပူဇနိယပွဲတော် ၁၀ ရက်ကာလအတွင်း ဇာတ်သဘင်ပွဲနှင့် မြန်မာ့ရိုးရာခြင်းလုံးအလှခတ်ပွဲအပါအဝင် အခြားပျော်ပွဲရွှင်ပွဲ များနှင့် ပြည်ဒေသထွက် ရိုးရာအစားအစာများနှင့် အနယ်နယ်အရပ်ရပ်မှ ဒေသထွက်ကုန်ပစ္စည်းများ ရောင်းချသည့် ပွဲဈေးဆိုင်ခန်းများဖြင့် စည်ကားသိုက်မြိုက်စွာကျင်းပမည်ဖြစ်ကာ ရပ်ဝေးရပ်နီးမှ ဘုရား ဖူးလာပြည်သူများအနေဖြင့် ပြည်ရွှေဆံတော်စေတီတော်မြတ်ကြီးနှင့် ဗုဒ္ဓမြတ်စွယ်တော်အား အနီးကပ် ဖူးမြော်ကြည်ညို ကုသိုလ်သဒ္ဓါပွားများနိုင်ပြီး မည်သူမဆို ဗုဒ္ဓပူဇနိယပွဲတော်တွင် ပျော်ရွှင်စွာလာရောက် ပါဝင်ဆင်နွှဲနိုင်ကြောင်း သတင်းကောင်းပါးအပ်ပါသည်။

DOCA(ပဲခူး)

     တနင်္သာရီတိုင်းဒေသကြီး၊ ထားဝယ်မြို့ရှိ ကိုယ်ပိုင်ခြံငယ်များ၊ မြို့အနီးကျေးရွာများရှိ ဥယျာဥ်ခြံ ငယ်များတွင် တစ်ပိုင်တစ်ပိုင်နှင့် စီးပွားဖြစ်စိုက်ပျိုးလျက်ရှိပြီး စားသုံးသူပြည်သူများ စားသုံးမှုများပြားသည့် ဒေသထွက် ဟင်းသီးဟင်းရွက်များဖြစ်သော ကန်စွန်းရွက်စျေးနှုန်းမှာ တစ်စည်းလျှင် ၃၀၀/၄၀၀ ကျပ်၊ ပဲ‌တောင့်ရှည် တစ်စည်းလျှင် ၆၀၀ ကျပ်၊ ချဥ်ပေါင်ရွက် တစ်စည်းလျှင် ၅၀၀ ကျပ်၊ ငရုတ်သီး နို့ဆီပုံး(အတို)တစ်ပုံးလျှင် ၁၀၀၀ ကျပ်၊ သံပရာသီး တစ်လုံးလျှင် အလုံးကြီး ၄၀၀/၅၀၀ ကျပ်၊ အလုံးသေး တစ်လုံးလျှင် ၂၅၀/၃၀၀ ကျပ်ဖြင့် အောက်တိုဘာလ ဒုတိယအပတ်အတွင်း ရောင်းချလျက်ရှိ‌‌‌‌ကြောင်း ထားဝယ်မြို့ပေါ်ရှိ ဟင်းသီးဟင်းရွက်အရောင်းဆိုင်များမှ သိရှိရပါသည်။

DOCA (တနင်္သာရီ)

    တနင်္သာရီတိုင်းဒေသကြီး၊ ထားဝယ်မြို့ပေါ်ရှိ ကမ်းနား‌စျေး၊ စည်ပင်သာယာစျေးကြီး၊ ပုဂ္ဂလိက စျေးများတွင် ရောင်းချလျက်ရှိသာ ကြက်သားနှင့် ဝက်သားများမှာ အလှူပွဲ၊ မင်္ဂလာပွဲများစတင် ကျင်းပ ပြုလုပ်သည့် ပွင့်လင်းရာသီကာလသို့ ရောက်ရှိလာသဖြင့် အရောင်းအဝယ်ကောင်းလျက်ရှိ‌ကြောင်း ထားဝယ်မြို့စျေးများရှိ ကြက်သား၊ ဝက်သား ရောင်းချသည့် ‌စျေးသည်များထံမှ သိရှိရပါသည်။

      အောက်တိုဘာလပထမအပတ်မှ စတင်၍ အရောင်းအဝယ်ကောင်း လျက်ရှိသော ကြက်သား စျေးနှုန်းမှာ တစ်ပိဿာလျှင် ၁၅၀၀၀ ကျပ်၊ ဝက်သားတစ်ပိဿာလျှင် ၃၂၀၀၀ ကျပ်‌ဖြင့် ယခု အောက်တိုဘာလ ဒုတိယအပတ်အတွင်း ရောင်းချလျက်ရှိပြီး အရောင်းအဝယ်ကောင်းလျက်ရှိသော်လည်း စျေးနှုန်းများမှာတည်ငြိမ်လျက်ရှိပါသည်။

DOCA (တနင်္သာရီ)

   ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့နယ်တွင် အောက်တိုဘာလ ဒုတိယပတ်တွင် ဖြစ်ပေါ်နေသော အခြေခံစားသောက်ကုန်များဖြစ်သော ဧည့်မထဆန်တစ်ပြည်လျှင်  ၂၅၀၀ ကျပ်၊ ကြက်သွန်နီ(အကြီး)တစ်ပိဿာလျှင် ၂၂၀၀ ကျပ်၊(အလတ်) တစ်ပိဿာလျှင် ၁၈၀၀ ကျပ်၊(အသေး) တစ်ပိဿာလျှင် ၁၃၀၀ ကျပ်၊ ကြက်သွန်ဖြူ(ကြူကုတ်) တစ်ပိဿာလျှင် ၂၁၀၀၀ ကျပ်၊ မြန်မာ ကြက်သွန်ဖြူ (တစ်ပိဿာ)လျှင် ၆၀၀၀ ကျပ်၊ ဂျင်း(တစ်ပိဿာ)လျှင် ၄၅၀၀ ကျပ်၊သကြား (တစ်ပိဿာ)လျှင် ၄၉၀၀ကျပ်၊ကုလားပဲ(တစ်ပိဿာ)လျှင် ၆၄၀၀ ကျပ်၊မြေပဲဆံ(တစ်ပိဿာ)လျှင် ၈၅၀၀ ကျပ်၊ငရုတ်သီးခြောက်(တစ်ပိဿာ)လျှင်၁၁၀၀၀ ကျပ်၊အာလူး(တစ်ပိဿာ)လျှင် ၅၀၀၀ကျပ်၊ ဆား(တစ်ပိဿာ)လျှင် ၁၆၀၀ ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

DOCA(ပဲခူး)