ပြည်တွင်းကုန်သွယ်မှုသတင်း

     ပြည်ဈေးကွက်သို့ မကွေးတိုင်းအောင်လံဘက် (နံဇူပင်)ရွာမှ ကြက်သွန်နီများ တစ်ရက်လျှင် ပိဿာချိန် (၁၂၀၀၀)ခန့် အဝင်ရှိနေပြီး နံဇူပင်ကြက်သွန်နီမှာ အရည်အသွေးကောင်းသည့်အတွက် အရောင်းအဝယ်သွက်ကြောင်းလည်းသိရပါသည်။ တောင်တွင်းနှင့်သရက်ဘက်မှ ကြက်သွန်နီမှာ တစ်ရက်လျှင် ပိဿာချိန် (၃၀၀၀)ပတ်လည်ခန့်သာအဝင်ရှိပြီး အရောင်းအဝယ်မှာ ကြက်သွန်နီ အဝင်အားလုံးရဲ့ ထက်ဝက်ကျော်ခန့်အ‌ရောင်းအဝယ်ဖြစ်ကြောင်းသိရသည်။ ဒေသတွင်း ဝယ်လက် များ၊ အိတ်ဆွဲအရောင်းသမားများ၊ နယ်ကျော်အရောင်းအဝယ်သမားများအပြင် ပေါင်းတည်၊ သာယာဝတီ၊ မင်းလှ၊ ဆင်တဲ၊ ရွှေဘုံသာ၊ ဥသျှစ်ပင်ဘက်တို့သို့ စီးဆင်းမှုအဖြစ် အရောင်းအဝယ်ရှိနေသည်။ ဈေးနှုန်းမှာ ပွဲရုံလက်ကားဈေးတစ်ပိဿာလျှင် ကြီး/လတ်/သေး ကျပ် (၂၆၀၀-၂၅၀၀)(၂၄၀၀-၂၃၀၀)(၂၂၀၀-၂၀၀၀)နှုန်းတို့ရှိပြီး မြို့ပေါ်လက်လီဈေးများတွင်ကျပ် (၃၀၀၀-၂၈၀၀-၂၇၀၀-၂၅၀၀ -၂၃၀၀-၂၂၀၀) နှုန်းတို့ဖြင့် အသီးသီးရောင်းဝယ်မှုရှိနေကြောင်းသိရသည်။

     ပြည်ဒေသအနီးတစ်ဝိုက်ထွက်ရှိသော မှော်ဇာ၊ တောင်လုံးညို၊ မထောရွာများမှ ကြက်သွန်နီများမှာ ပြည်ပွဲရုံများသို့မသွင်းဘဲ မြို့ပေါ်လက်လီဈေးများတွင် စားသုံးသူတိုက်ရိုက် ရောင်းချခြင်းများဖြင့် အရောင်းအဝယ်ပြုလုပ်လျှက်ရှိပြီး ယခုဧပြီလဆန်းတွင် လှိုင်လှိုင်ပေါ် ထွက်လျှက် ရှိကာ ဈေးနှုန်းမှာ တစ်ပိဿာလျှင် လက်လီ/လက်ကားကျပ် ၂၂၀၀/၂၀၀၀ နှုန်းတို့ဖြင့် ရောင်းချလျက် ရှိနေကြောင်းသိရသည်။

DOCA(ပဲခူး)

              ဝါးတန်းဆန်စပါးကုန်စည်ဒိုင်သို့ (၂၉.၄.၂၀၂၅) မှ (၂.၅.၂၀၂၅) နေ့ထိ ဆန် ဝင်ရောက်မှုစာရင်းများမှာ ဧရာဝတီတိုင်းဒေသကြီး ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ် မြို့နယ်များမှ ကြားပျံ (၉၅၄၀) အိတ်၊ ပေါ်ဆန်းမွှေး (၂၃၅၈၉) အိတ်၊ ပေါ်ကျွဲ (၅၆၉၈) အိတ်၊ ဧည့်မထ (၅၇၉၂၁) အိတ်၊ ဆန်ကွဲ (၁၁၁၄၁) အိတ် ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၃၉၂၀) အိတ် နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ် များမှ ဧည့်မထ (၁၅၉၉၂) အိတ်၊ ငစိန် (၉၉၀) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံမြို့နယ်များမှ ဧည့်မထ (၁၃၄၀၀) အိတ်တို့ဝင်ရောက်မှုရှိကြောင်း ဝါးတန်း ဆန်စပါးကုန်စည်ဒိုင်၏ ပြောကြားချက်အရ သိရှိရပါသည်။      

DOCA(ရန်ကုန်)

          ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီ များသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ ၏  ကြက်သွန်နီ လက်ကျန် အခြေအနေများ အား  အမှန်ကန်ဆုံး သိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှု စာရင်းများအရလည်းကောင်း၊ ကြက်သွန်နီ လက်ကျန်အခြေအနေအား နေ့စဉ်စုံစမ်း လျက်ရှိပါသည်။ မေလ (၅) ရက်နေ့တွင် ဘုရင့်နောင် ကုန်စည်ဒိုင်သို့ ကြက်သွန်နီ ဝင်ရောက်ရာ ဒေသများဖြစ်သည့် ဆိပ်ဖြူ၊ ၊ မုံရွာ၊ မြစ်သား၊ တောင်သာ ဒေသတို့မှ ကြက်သွန်နီ (၉၉၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့် ပြန်လည်စီးထွက်မှု ရှိကြောင်း သိရှိရပါသည်။ ထို့ကြောင့် ကြက်သွန်နီ လက်ကျန်မှာ (၃၉၆၀၀၀) ကျန်ရှိကြောင်း ကုန်စည်ဒိုင် သတင်းအရ သိရှိရသည်။ ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၁၁၀၀၊ အသန့်မှာ တစ်ပိဿာ ကျပ် ၁၆၀၀ ၊ အကြီးမှာ ကျပ် ၁၈၀၀၊ ရှယ်မှာ ကျပ် ၁၉၀၀၊ မုံရွာ ကြက်သွန်နီ (အသစ်) အချော တစ်ပိဿာ ကျပ် ၉၅၀၊ အသန့်မှာ တစ်ပိဿာ ကျပ် ၁၃၅၀ ၊ အကြီးမှာ ကျပ် ၁၅၀၀၊ ရှယ်မှာ ကျပ် ၁၄၅၀၊ မြစ်သား ကြက်သွန်နီ(အသစ်) အချော တစ်ပိဿာ ကျပ် ၁၄၀၀၊ အသန့်မှာ တစ်ပိဿာ ကျပ် ၂၁၀၀ ၊ အကြီးမှာ ကျပ် ၂၃၀၀၊ ရှယ်မှာ ကျပ် ၂၄၀၀၊ တောင်သာ ကြက်သွန်နီ(အသစ်) အချောတစ်ပိဿာကျပ် ၇၀၀၊ အသန့်မှာ တစ်ပိဿာ ကျပ် ၁၁၀၀၊ အကြီး မှာကျပ် ၁၂၀၀၊ ရှယ်မှာ ကျပ် ၁၂၀၀ ဈေးတို့အသီးသီး ရှိကြောင်း စုံစမ်းသိရှိရပါသည်။

          ယခင်တစ်ပတ်နှင့် ယခုတစ်ပတ် ကြက်သွန်နီဈေးနှုန်းများ နှိုင်းယှဉ်ရာတွင် ကြက်သွန်နီ ဈေးနှုန်းများမှာ ဈေးအနည်းငယ်ကျသွားကြောင်း သိရှိရပါသည်။

DOCA(ရန်ကုန်)

     ပြည်ဈေးကွက်တွင် စားသုံးဆီဖြစ်သော မြေပဲဆီဈေးနှုန်းများမှာ ယခင်ရက်များ နှင့်စာလျှင် အနည်းငယ်မြင့်တက်လာခဲ့ပါသည်။ ပြည်မြို့အနေဖြင့် နှမ်းဆီထက် မြေပဲဆီကို စားသုံးမှုများခြင်း နယ်မြို့များမှလည်းဝယ်ယူမှုရှိခြင်းတို့ကြောင့်မြေပဲဆီဈေးများမြင့်တက်လာခဲ့သည်ဟုသိရပါသည်။ ဆီစက်များ အနေဖြင့်လည်းစားသုံးသူမှုပိုများသောမြေပဲဆီကိုသာကြိတ်ခွဲမှုများပါသည်။

     မြေပဲဆီဈေးနှုန်းများအနေဖြင့် ယခင်မတ်လအတွင်းတွင် တစ်ပိဿာကို (၁၅၀၀၀-၁၆၀၀၀)ကျပ်ဖြင့် ‌ရောင်းဝယ်ခဲ့ပြီး ယခုဧပြီလဆန်းတွင် တစ်ပိဿာကို (၁၇၀၀၀) ကျပ်ဖြင့် ‌ရောင်းချသဖြင့် တစ်ပိဿာကို (၁၀၀၀)ကျပ်ခန့် ဈေးပိုလာခဲ့ပါသည်။ ယခင်နှစ် ယခုလိုအချိန်တွင် မြေပဲဆီဈေးမှာ တစ်ပိဿာကို (၁၄၀၀၀)ကျပ်ဖြင့် ရောင်းချခဲ့သဖြင့် ယခုနှစ်တွင် တစ်ပိဿာကို (၃၀၀၀)ကျပ်ခန့် ဈေးပို လာခဲ့ပါသည်။ ယခုနှစ်တွင် မြေပဲဆီဈေးများပိုမိုမြင့်တက်လာရခြင်းမှာ သင်္ကြန်ကာလနီးလာခြင်း၊ မြေပဲ လက်ကျန်နည်းလာခြင်း၊ စားသုံးမှုများလာခြင်းတို့ကြောင့် ဖြစ်သည်ဟုသိရပါသည်။

DOCA(ပဲခူး)

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့မဈေးကြီးအတွင်း ရောင်းချလျက်ရှိ သောကြက်ဥ/ဘဲဥ လက်လီ/လက်ကား အရောင်းအဝယ်ဖြစ်နေသော ဈေးနှုန်းများမှာ ကြက်ဥ (အကြီး)တစ်လုံးလျှင် ၅၀၀/ကျပ်၊ကြက်ဥ(အလတ်)တစ်လုံးလျှင် ၄၅၀/ကျပ်၊ကြက်ဥ (အသေး) တစ် လုံးလျှင် ၄၀၀/ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိပါသည်။

      ဘဲဥဈေးကွက်ရောင်းချမှုအနေဖြင့် ဘဲဥ(အကြီး)တစ်လုံးလျှင် ၆၀၀/ကျပ်၊ဘဲဥ(အလတ်) တစ် လုံးလျှင် ၅၅၀/ကျပ်၊ဘဲဥ(အသေး)တစ်လုံးလျှင် ၅၀၀/ကျပ်ငုံးဥ(တစ်လုံး)လျှင် ၁၁၀/ကျပ်ဈေးနှုန်းတို့ ဖြင့်အရောင်းအဝယ်ရှိနေကြောင်း သိရှိရပါသည်။

DOCA(ပဲခူး)