ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့် ဒေသတွင်း စိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ဈေးကွက်အခြေအနေ တို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်တွင် နွေရာသီနှင့် လိုက်ဖက်သည့် သဘာဝကြံရည်ချိုချိုလေးများ ရောင်းချနေကြောင်း သိရသည်။

          နွေပူပူနှင့် ကြံရည်အေးအေးလေးက လိုက်ဖက်ပြီး စိတ်ကိုကြည်လင် လန်းဆန်းစေသော ကြောင့် လူကြီးလူငယ်မရွေး ကြိုက်နှစ်သက်၍ အရောင်းသွက်လျက်ရှိကြောင်း၊ ၂၀၂၅ ခုနှစ်၊ မေလ ပထမပတ်တွင် ရောင်းချနေသော ကြံရည်ဈေးနှုန်းမှာ ခွက်ကြီး(၁)ခွက်လျှင် (၈၀၀)ကျပ်၊ (၂)ခွက် လျှင် (၁၅၀၀)ကျပ်နှင့် ခွက်သေး(၁)ခွက်လျှင် (၆၀၀)ကျပ်ဖြင့် ရောင်းချကြောင်း၊ သဘာဝအရသာ အတိုင်း ပြုလုပ်ရောင်းချခြင်းဖြစ်ကြောင်း ကြံရည်အတွက် လိုအပ်သည့်ကုန်ကြမ်း ကြံချောင်းများကို ကန့်ဘလူမြို့နယ် နတ်အင်းကျေးရွာနှင့် မြို့ပေါ်ရပ်ကွက်များမှ ဝယ်ယူရကြောင်း ကြံရည်ရောင်းချ သည့် လုပ်ငန်းရှင်ထံမှ သတင်းရရှိပါသည်။   

DOCA (စစ်ကိုင်း)

စစ်ကိုင်းတိုင်းဒေသကြီး၊ ကန့်ဘလူမြို့ “မြို့မဈေး”သည် နေ့စဉ်ဈေးရောင်းသူများ၊ ဈေးဝယ် သူများနှင့်စည်ကားလျက်ရှိပြီး ရာသီပေါ်သီးနှံများ၊ ဒေသထွက်ကုန်များအပြင် အခြားဒေသမှဝင် ရောက်သည့် လူသုံးကုန်နှင့် စားသောက်ကုန်ပစ္စည်းများ ရောင်းချပေးလျက်ရှိကြောင်း ၊ သခွတ်ပွင့် ခြောက်သည် ကန့်ဘလူမြို့ပေါ်ရပ်ကွက်များ၊ ကန့်ဘလူမြို့နယ် တောက္ကရှပ်ကျေးရွာ၊ နတ်အင်း ကျေးရွာနှင့် အခြားသောကျေးရွာများမှလည်း ဝင်ရောက်ကြောင်း သိရသည်။

 ၂၀၂၅ ခုနှစ်၊ မေလ ပထမပတ်အတွင်း “မြို့မဈေး”တွင်ရောင်းချနေသည့်  သခွတ်ပွင့်ခြောက် ဈေးနှုန်းများမှာ (၁)ပုံလျှင်(၈၀၀)ကျပ်၊ (၂)ပုံလျှင်(၁၅၀၀)ကျပ်ဖြင့် ရောင်းချကြောင်း၊ သခွတ်ပွင့်အစို များကို နေပူပူတွင် အခြောက်လှမ်းရကြောင်း၊ သခွတ်ပွင့်သည် ဆေးဘက်ဝင်သည့်အတွက် ပေါ်ချိန် တွင် လူကြိုက်များကာ အရောင်းသွက်လျက်ရှိကြောင်း ဈေးသည်များထံမှ သတင်းရရှိပါသည်။

DOCA (စစ်ကိုင်း)

     ပဲခူးတိုင်းဒေသကြီး၊သာယာဝတီခရိုင်၊သာယာဝတီမြို့နယ်၊ဈေးကွက်ဈေးလမ်းတွင်ကိုယ်တိုင် စိုက်ပျိုးထုတ်လုပ်သူများ၏ ပိတ်ရက်မရှိ နေ့စဉ်ရောင်းချလျက်ရှိသော ဈေးတွင် ၈.၅.၂၀၂၅ ရက်နေ့ စာရင်းကောက်ယူခဲ့ရာ ဆန်တစ်ပြည်လျှင် ၃၀၀၀/ကျပ်နှုန်းဖြင့် ဆန်(၂)အိတ်၊ဆီတစ်ပိဿာလျှင် ၇၃၀၀/ကျပ်နှုန်းဖြင့် ဆီပိဿာ (၄၂) ကြက်ဥတစ်လုံးလျှင် ၃၅၀/ကျပ်ဈေးနှုန်းဖြင့် ကြက်ဥ ၂၀၀/လုံး ဝက်သားတစ်ပိဿာလျှင် ၂၀၀၀၀ ကျပ်နှုန်းဖြင့် (၂၅)ပိဿာ၊ကြက်သားမွေးမြူရေး တစ်ပိဿာလျှင် ၁၀၀၀၀ ကျပ်နှုန်းဖြင့် (၃၀) ပိဿာ၊ဆိတ်သားတစ်ပိဿာလျှင် ၂၅၀၀၀ ကျပ်နှုန်းဖြင့် (၃)ပိဿာ၊ ငါးကြင်းတစ်ပိဿာလျှင် ၄၀၀၀ ကျပ်နှုန်းဖြင့် (၂၅)ပိဿာ၊ငါးဒံတစ်ပိဿာလျှင် ၄၅၀၀ ကျပ်နှုန်းဖြင့် (၂၅)ပိဿာ၊ ဗူးညွှန့်၊ ဖရုံညွှန့်၊ သခွားသီး၊ပဲသီး၊ ရုံးပတီသီး၊ ငရုတ်သီးစိမ်း၊ ခရမ်းချဉ်သီး၊ သံပုရာသီး၊ ကန်ဇွန်းရွက်၊ချဉ်ပေါင်ရွက်၊မျှစ်၊ကန်ဇွန်းဥ၊မေမြို့ပန်း၊ငှက်ပျောသီး စသောဟင်းသီးဟင်းရွက် ပန်းမံ တို့ကိုလည်းဈေးနှုန်းချိုသာစွာ ရောင်းချပေးလျက်ရှိပါကြောင်း ရေးသားတင်ပြအပ်ပါသည်။

DOCA(ပဲခူး)

     ပြည်ခရိုင်၊ ပေါက်ခေါင်းမြို့ရှိ သဖန်းချိုအုပ်စု၊ လေးကြီးကျေးရွာတွင် ကြက်သွန်များ စိုက်ပျိုး ထားရှိကြောင်း သိရပါသဖြင့် စိုက်ပျိုးထွက်ရှိမှုနှင့် ဈေးနှုန်း၊ ဈေးကွက် အခြေအနေများအား သိရှိနိုင်ပါရန် ပေါက်ခေါင်းမြို့နယ်တာဝန်ခံနှင့် ဝန်ထမ်းများအဖွဲ့သည် (၈.၅.၂၀၂၅)ရက် နံနက်ပိုင်း တွင် ကွင်းဆင်းခဲ့ပါသည်။

     သဖန်းချိုအုပ်စု၊ လေးကြီးကျေးရွာရှိ တောင်သူဦးခင်လေးမှ ကြက်သွန်နီ ၀.၂၅ဧကကို စိုက်ပျိုးထားရှိပြီး စိုက်ပျိုးပြီး (၂)ခန့် အကြာတွင် ကြက်သွန်များကို နှုတ်ယူရောင်းချကြပါသည်။ ၀.၂၅ဧကတွင် စိုက်ပျိုးထုတ်လုပ်ကုန်ကျစရိတ်အနေဖြင့် ၈ သိန်းကျပ်ခန့်ကုန်ကျပြီး ထွက်ရှိမှုမှာ ပိဿာ ၆၃၀ခန့်ထွက်ရှိကြောင်း သိရပါသည်။ ကြက်သွန်ဘောင်တစ်ဘောင်လျှင် ၁၄ပိဿာခန့် ထွက်ရှိ၍ စိုက်ပျိုးဘောင် ၄၅ဘောင်ရှိပါသည်။ ကြက်သွန်များထွက်ရှိလာသောအခါ တစ်ပိဿာလျှင် ၂၅၀၀ကျပ်ဖြင့် စိုက်ခင်းသို့လာရောက်ဝယ်ယူသလို ဈေးများနှင့် ပွဲရုံများသို့လည်း တင်ပို့ရောင်း ချကြပါသည်။  ၀.၂၅ဧကတွင် ရရှိသောဝင်ငွေမှာ ၁၅၇၅၀၀၀ကျပ်ဖြစ်၍ တောင်သူအကျိုးအမြတ်မှာ ၇၇၅၀၀၀ကျပ်ခန့်ရရှိကြောင်း သိရပါသည်။ တောင်သူအကျိုးအမြတ်မှာ အထွက်နှုန်းနှင့် ဈေးနှုန်းအပေါ်မူတည်၍ အပြောင်းအလဲရှိကြောင်း သိရပါသည်။ ထို့ကြောင့် ကြက်သွန်နီ စိုက် တောင်သူများအနေဖြင့် အထွက်နှုန်းကောင်းမွန်အောင် မျိုးကောင်းများရွေးခြယ်၍ နည်းပညာများ စနစ်တကျဖြင့်စိုက်ပျိုးနိုင်မည်ဆိုလျှင် ဒီထက်မက အကျိုးအမြတ်များလည်းရရှိနိုင်မည်ဖြစ်ပါသည်။

DOCA(ပဲခူး)

     ပြည်ခရိုင် ၊ ပြည်မြို့ရှိ ပန်းဈေးကွက် အနေဖြင့် ယခုအချိန် တွင် ရောင်စုံပန်းများဖြစ်သော ဂန္ဓမာပန်း၊ သစ္စာပန်း၊ နှင်းဆီပန်း ၊ မေမြို့ပန်း အစရှိသဖြင့် ပန်းများဈေးကွက်တွင် ရောင်းချလျှက်ရှိနေပါသည်။ ထိုပန်းများကို ပြည်မြို့ အနီးတဝိုက်ရှိ မှော်ဇာ၊ ကင်းပွန်းခြုံနှင့် ရွှေတောင်မြို့နယ်ရှိ ကသစ်ကိုင်းကျေးရွာများမှ လာရောက် ရောင်းချကြပါသည်။ ထိုကျေးရွာများမှ ပန်းများကို စီးပွားဖြစ်စိုက်ပျိုး ကြသလို တစ်နိုင် တစ်ပိုင် လည်း စိုက်ပျိုးပါသည်။ ထွက်ရှိလာသော ပန်းများကို ပန်းဒိုင်များ၊ ဈေးသည်များက အခင်းထဲ အထိလာရောက်ဝယ်ယူရောင်းချကြပါသည်။ ဈေးများတွင်ရောင်ချသော ပန်းများ၏ ဈေးနှုန်းများမှာ ဂန္ဓမာပန်း (အဖြူ၊ အဝါ) အကြီးအသေးရောရာ(၅)ခက်ပါတစ်စည်းလျှင် ၄၅၀၀ကျပ်၊ သစ္စာပန်း (၅)တံပါတစ်စည်းလျှင် ၂၀၀၀ကျပ်၊ နှင်းဆီပန်း အပွင့်အသေး (၁၀)ပွင့်ပါတစ်စည်းလျှင် ၃၅၀၀ကျပ်၊ နှင်းဆီပန်း (အကြီး) တစ်ပွင့်လျှင် ၅၀၀-၇၀၀ကျပ်၊ မေမြို့ပန်း (ကြွေဖြူ)တစ်စည်းလျှင် ၂၀၀၀ကျပ်၊ မေမြို့ပန်း (အက်စတာ)တစ်စည်းလျှင် ၅၀၀-၁၀၀၀ကျပ်ဖြင့် ရောင်းချလျှက်ရှိပါသည်။

    ပန်းဈေးများမှာ ယခင်နှစ်ထက်စာလျှင် ယခုနှစ်မှာဈေးများထက်ဝက်ခန့် မြင့်တက်လာ ရခြင်းမှာ မျိုးဈေးများကြီးမြင့်ခြင်း၊ အထွေထွေကုန်ကျစရိတ်များလည်း ကြီးမြင့်လာခြင်းတို့ကြောင့် ဖြစ်သည်ဟု သိရပါသည်။ ပြည်ဈေးမှတစ်ဆင့် ရန်ကုန်မြို့ရှိဈေးများနှင့် နေပြည်တော်မြို့သို့လည်း တင်ပို့ရောင်းချကြောင်း သိရပါသည်။

DOCA(ပဲခူး)