သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည်(၁၀.၁၂.၂၀၂၄)ရက်နေ့ ၊နံနက် (၀၉:၀၀) နာရီအချိန်တွင် မြိုနယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဦးစီးဌာနတို့နှင့်အတူ ကြံခင်းမြို့ပေါ်ရပ်ကွက်အတွင်းရှိ ဆေးမျိုးစုံအရောင်းဆိုင်များတွင် သက်တမ်းလွန်ဆေးဝါးများ ရောင်းချမှုရှိ/မရှိ ရှောင်တခင်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းခဲ့ရာတွင် ကြံခင်းမြို့ပေါ်ရပ်ကွက်တွင်ရောင်းချလျက်ရှိသော ဆေးမျိုးစုံအရောင်း ဆိုင်များတွင် အိမ်သုံးဆေးဝါးများ ဈေးနှုန်းများမြှင့်တင်ရောင်းချမှု ရှိ/မရှိ၊ Registration မရှိသော ဆေးဝါးများ၊ သက်တမ်းလွန်ဆေးဝါးများ ရောင်းချမှုရှိ/မရှိတို့ကို စစ်ဆေးခဲ့ပြီး၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်မရှိသော၊ အရည်အသွေးနှင့် စံချိန်စံညွှန်းစစ်ဆေးမှု ခံယူထားခြင်းမရှိသည့် အာမခံချက်မရှိသော တရားမဝင်ဆေးဝါးများ ရောင်းချခြင်းမပြုရန်၊ စီးပွားရေး လုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ် အရည်အသွေးပြည့်မီသော ကုန်စည်များကိုသာ ရောင်းချရန်၊ စားသုံးသူဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက် များအကြောင်းနှင့် ပြစ်မှုပြစ်ဒဏ်များအကြောင်းစသည်တို့ကို အသိပညာပေးဆွေးနွေးခဲ့ပြီး၊ဆေးမျိုးစုံအရောင်းဆိုင်(၅)ဆိုင်အား ရှောင်တခင်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

             ဧရာ၀တီတိုင်းဒေသကြီးအတွင်း လယ်ယာထွက်ကုန်ပစ္စည်းများနှင့် ရေထွက်ကုန် ပစ္စည်းများ၊ ပြည်ပပို့ကုန် (၂)ဆ တိုးမြှင့်တင်ပို့နိုင်ရေး တွေ့ဆုံဆွေးနွေးပွဲကို ဒီဇင်ဘာလ ၁၀ ရက်နေ့ နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင် ပြုလုပ်ခဲ့ရာ တွေ့ဆုံဆွေးနွေးပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများ၊ လုပ်ငန်းရှင်များတက်ရောက်ခဲ့ကြပြီး ခရိုင်စီမံအုပ်ချုပ်ရေးအဖွဲ့များက Video Conferencing ဖြင့် တက်ရောက်ခဲ့ကြသည်။

              ဝန်ကြီးချုပ်က တိုင်းဒေသကြီးအတွင်းထုတ်လုပ်တင်ပို့နေသည့် စိုက်ပျိုးရေး၊ မွေးမြူရေးလုပ်ငန်းထုတ်ကုန်များအား ပြည်ပသို့ပို့ကုန်နှစ်ဆတိုးမြှင့်တင်ပို့နိုင်ရေးအတွက် ပို့ကုန်များတင်ပို့နေသည့် ကုမ္ပဏီများ၊ လုပ်ငန်းရှင်များနှင့်တွေ့ဆုံခြင်းဖြစ်ပါကြောင်း၊ ပြည်ပပို့ကုန်များတိုးမြှင့်နိုင်ရေးအတွက် စိုက်ပျိုးရေး၊ မွေးမြူရေးလုပ်ငန်းများကို ပိုမိုတိုးချဲ့ဆောင်ရွက်ပြီး ထုတ်လုပ်မှုကို မဖြစ်မနေတိုးမြှင့်ဆောင်ရွက်သွားရန် လိုအပ်မည်ဖြစ်ပါကြောင်း၊  လက်ရှိတင်ပို့နေသည့်ထုတ်ကုန်များ ပိုမိုထွက်ရှိပိုမိုတင်ပို့နိုင်အောင် နည်းလမ်းများရှာဖွေ ဆောင်ရွက်ကြရမည်ဖြစ်ပါကြောင်း၊ တိုင်းဒေသကြီးအနေဖြင့် ဆန်၊ ဆန်ကွဲ၊ ပေါင်းဆန်၊ ငါး၊ ပုစွန်၊ ဂဏန်းများကို ပြည်ပသို့တင်ပို့လျက်ရှိပါကြောင်း၊ ထုတ်ကုန်ပစ္စည်းများ တိုးမြှင့်ထုတ်လုပ်နိုင်ရန်အတွက် အလုပ်အကိုင်အခွင့်အလမ်းများ ပိုမိုဖန်တီးပေးနိုင်ရန်လည်း လိုအပ်မည်ဖြစ်ပါကြောင်း၊ ပီလောပီနံလုပ်ငန်း၊ ကြိမ်၊ ဝါး၊ ဗေဒါလက်မှုလုပ်ငန်းများနှင့် MSME ထုတ်ကုန်များကိုလည်း ပိုမိုတိုးချဲ့လုပ်ကိုင်ရန်လိုအပ်ပါကြောင်းနှင့် လယ်ယာထွက်ကုန်ပစ္စည်းများနှင့် ရေထွက်ကုန်ပစ္စည်းများ ပြည်ပပို့ကုန်(၂)ဆ တိုးမြှင့်တင်ပို့နိုင်ရေးအတွက်လည်း တက်ရောက်လာသူများက ဝိုင်းဝန်း ဆွေးနွေးပေးရန် အဖွင့်အမှာစကား ပြောကြားခဲ့သည်၊၊

            ထို့နောက် တိုင်းဒေသကြီးဝန်ကြီးချုပ်အား စီးပွားရေးရာဝန်ကြီးနှင့်ကဏ္ဍစုံ ပြည်ပသို့ တင်ပို့နေသည့် ကုမ္ပဏီများ၊ စီးပွားရေးလုပ်ငန်းရှင်များက ဆန်နှင့် ဆန်ကွဲ ပေါင်းဆန် ထုတ်ကုန်များထုတ်လုပ်နိုင်မှု၊ ဈေးကွက်ရရှိမှုနှင့် ထုတ်ကုန်ပိုမိုတင်ပို့နိုင် ရေးဆောင်ရွက်ထား ရှိမှုအခြေအနေများ၊ ပေါင်းဆန်ထုတ်လုပ်မှု ကုမ္ပဏီများ၊ စီးပွားရေးလုပ်ငန်းရှင်များက ပေါင်းဆန်ထုတ်လုပ်မှု၊ ကုန်ကြမ်းစုဆောင်းထားရှိမှု၊ ဈေးကွက်ရရှိမှုအခြေအနေများ၊ ပဲမျိုးစုံတင်ပို့ရောင်းချမှုအသင်း ဥက္ကဌမှ မတ်ပဲ၊ ပဲတီစိမ်း စသည့် ပဲမျိုးစုံ စိုက်ပျိုးထုတ်လုပ်နိုင်မှု၊ ဈေးကွက်ရရှိမှုအခြေအနေများ၊  အစေ့ထုတ်ပြောင်းအသင်းဥက္ကဌက အစေ့ထုတ်ပြောင်း စိုက်ပျိုးထုတ်လုပ်နိုင်မှု၊ တင်ပို့ရောင်းချမှု အခြေအနေများ၊ ရေထွက်ကုန်ပစ္စည်း (ငါး၊ ပုစွန်၊ ဂဏန်း) တင်ပို့ရောင်းချမှု ကုမ္ပဏီများမှထုတ်လုပ်နိုင်မှု၊ တင်ပို့ရောင်းချမှုအခြေအနေများ၊ ပီလောပီနံအသင်းဥက္ကဌမှ ပီလောပီနံထုတ်လုပ် တင်ပို့ရောင်းချမှုအခြေအနေများကို ရှင်းလင်းဆွေးနွေးတင်ပြခဲ့ကြသည်။

            ခရိုင်စီမံအုပ်ချုပ်ရေးအဖွဲ့များက ခရိုင်အလိုက် စိုက်ပျိုးမွေးမြူရေးထုတ်ကုန်များ နှစ်ဆတိုးတက်ထုတ်လုပ်နိုင်ရေး ဆောင်ရွက်မည့်အခြေအနေများအားလည်းကောင်း၊ ARCCI ဥက္ကဌမှ စိုက်ပျိုးရေး၊ မွေးမြူရေးထုတ်ကုန်များ နှစ်ဆတိုးမြှင့်တင်ပို့နိုင်ရေး ပိုမိုစိုက်ပျိုးထုတ်လုပ်မည့် အခြေအနေများ၊ ကုန်ထုတ်သုတေသန၊ ဈေးကွက်သုတသေန ဆောင်ရွက်နေမှု အခြေအနေများအားလည်းကောင်း၊ တိုင်းဒေသကြီး စိုက်ပျိုးရေးဦးစီးဌာန၊ ကြေးတိုင်နှင့်မြေစာရင်းဦးစီးဌာန၊ မွေးမြူရေးနှင့်ကုသရေးဦးစီးဌာန၊ စားသုံးသူရေးရာဦးစီးဌာန တိုင်းဒေသကြီးဦးစီးမှူးတို့မှ စိုက်ပျိုးရေး၊ မွေးမြူရေးထုတ်ကုန်များနှစ်ဆတိုးမြှင့်တင်ပို့နိုင်ရေး ဆောင်ရွက်နိုင်မည့်အခြေအနေများ ရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်မှ လိုအပ်သည်များ ဖြည့်စွက်ဆွေးနွေးခြင်းနှင့် ပေါင်းစပ်ညှိနှိုင်းမှု ဆောင်ရွက်ပေးခဲ့ပြီး အခမ်းအနားကို နေလယ်(၁၃:၃၀) နာရီတွင် ရုတ်သိမ်းခဲ့ကြောင်း သတင်းရရှိပါသည်၊၊

DOCA(ဧရာဝတီ)

             (၉.၁၂.၂၀၂၄) ရက်နေ့ နေလယ်(၁၁:၀၀)နာရီအချိန်တွင် စားသုံးသူရေးရာဦးစီးဌာန၊ မအူပင်မြို့နယ် ဦးစီးမှူးရုံးမှ တာဝန်ရှိသူများသည် မအူပင်မြို့၊ စွန်သိုက်ကျေးရွာ ထိန်ထိန်လင်းဆန်စက်သို့ ထုတ်ကုန်လုံခြုံစိတ်ချရမှုရှိစေရေး ဆန်စက်လုပ်ငန်းဖွံ့ဖြိုးရေးအတွက် မြို့နယ်စည်ပင်သာယာရေးအဖွဲ့ နှင့် အတူ ကွင်းဆင်းစစ်ဆေးဆောင်ရွက်ခဲ့ကြောင်းသိရသည်။

             မြို့နယ်တာဝန်ခံမှ ထိန်ထိန်လင်းဆန်စက်တွင် စပါးကြိတ်ခွဲထုတ်လုပ်မှုလုပ်ငန်းကိုလေ့လာပြီး စပါးကြိတ်ခွဲရန် သိုလှောင်ထားရှိမှု ပမာဏ၊ စပါး ၁၀၀၀၀သိုလှောင်ထားရှိမှုနှင့်  ဆန်အိတ် လည်ပတ်နေသော ဆန်စက်၏ ကြိတ်ခွဲထုတ်လုပ်မှုအခြေအနေများ၊ ကြိတ်ခွဲပြီး ဆန်အိတ် ၁၀၀၀ရှိပြီး နဝလီကြိတ်ခွဲထုတ်လုပ်လျက်ရှိကြောင်း၊ ထုတ်ကုန်လုံခြုံစိတ်ချရ မှုရှိစေ ရေးအသိပညာပေးဆွေးနွေးခြင်း၊  သိုလှောင်ရုံများ စနစ်တကျထားရှိမှုအခြေအနေများနှင့် စပါး/ဆန်သိုလှောင်ထားရှိမှုအခြေအနေကိုမှတ်ပုံတင်ပြီး သိုလှောင်ရုံများ ကုန်ရ၊ ကုန်ထုတ်၊ ကုန်လက်ကျန်စာရင်းများအား လစဉ် MYRoတွင် Updateစာရင်း မပျက်မကွက် ဖြည့်သွင်းဆောင်ရွက်နိုင်ရန်ကို အသိပေးပြောကြားပြီး  ဆန်နှင့် ဆန်ကွဲများ ရန်ကုန်သို့ တင်ပို့ရောင်းချနေမှုအခြေအနေ၊ ဆန်စပါးဈေးနှုန်း ဈေးကွက်အခြေအနေများ၊ ဆန်စက်တွင် စပါးသိုလှောင်ထားရှိမှုနှင့် ဆန်တစ်နေကြိတ်ခွဲနိုင်မှု၊ ဆန်စက်ကြိတ်ခွဲရာမှ  ထွက်ရှိလာသောစွန့်ပစ်ပစ္စည်းများ စနစ်တကျ စွန့်ပစ်ထား ခြင်းရှိ/မရှိ ၊MSMEs လုပ်ငန်း များ ဖွံ့ဖြိုးတိုးတက်ရေးတို့အတွက် ဆန်စက်ပိုင်ရှင်နှင့် တွေ့ဆုံဆွေးနွေး ကွင်းဆင်းလေ့လာစိစစ်ခဲ့ကြောင်း သတင်းရရှိပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးရှိ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ပဲခူးမြို့နယ်တာဝန်ခံတို့သည် (၁၁.၁၂.၂၀၂၄)ရက်နေ့ နေ့လယ်(၁၃:၀၀)နာရီအချိန်တွင် ပဲခူးမြို့အတွင်းရှိ အခြေခံလူသုံးကုန်ပစ္စည်းနှင့် အိမ်သုံးဆေးဝါးများအား ပြတ်လပ်မှုရှိ/ မရှိ ကွင်းဆင်းစစ်ဆေးခြင်း ပြုလုပ်ဆောင်ရွက်ခဲ့ကြောင်းသိရှိရသည်။

            အဆိုပါကွင်းဆင်းဆောင်ရွက်ရာတွင် အခြေခံစားကုန်(၁၄)မျိုးဖြစ်သော ဆန်၊ ဆီ၊ ငရုတ်၊ ကြက်သွန်၊ အသား၊ ငါး၊ ကြက်ဥ၊ ဘဲဥ၊ ကုလားပဲ၊ အာလူး၊ အိမ်သုံးဆေးဝါးများဖြစ်သော အဖျားပျောက်ဆေး၊ နှာစေးပျောက်ဆေး၊ ပိုးသတ်ဆေး၊ အစာအိမ်ဆေး၊ ဓာတ်ဆား၊ လိမ်းဆေးအမျိုးမျိုးနှင့် လူသုံးကုန်ပစ္စည်းများဖြစ်သော သွားတိုက်ဆေး၊ ကိုယ်တိုက်ဆပ်ပြာ၊ ဆပ်ပြာအမျိုးမျိုး၊ တစ်ကိုယ်ရည်သုံးသန့်ရှင်းရေးပစ္စည်းများ ရောင်းချသောစတိုးဆိုင်များနှင့် အိမ်သုံးဆေးဝါးဆိုင်များအားကွင်းဆင်း၍ ပစ္စည်းများပြတ်လပ်မှုရှိ/ မရှိစစ်ဆေးရာ ပြတ်လပ်မှုမရှိပါကြောင်းနှင့် ပုံမှန်အတိုင်းအ‌ရောင်းအဝယ်ဖြစ်နေပါကြောင်း သိရှိရပါသည်။

DOCA(ပဲခူး)

             ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် အထွေထွေအုပ်ချုပ်ရေးဦးစီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့ စားသုံးသူရေးရာဦးစီးဌာနနှင့်အတူ (၅.၁၂.၂၀၂၄) ရက်နေ့၊ နံနက် (၀၉း၃၀) နာရီအချိန်တွင် ဓနုဖြူမြို့ပေါ်ရှိ ဆေးဆိုင် (၈)ဆိုင်တွင် ရောင်းချနေသောဆေးများအားဈေးကွက်စောင့်ကြည့် စစ်ဆေးခဲ့ကြောင်းသိရသည်။

              ထိုသို့ကွင်းဆင်းစစ်ဆေးမှုအရ စားသုံးသူရေးရာဦးစီးဌာနမှ မြို့နယ်ဦးစီးမှူး ဦးဝင်းမင်းစိုး ဦးစီးအရာရှိနှင့် မြို့နယ်ဆေးဝါးဆေးပစ္စည်းများ စစ်ဆေးရေးဌာနစုံအဖွဲ့သည် ဓနုဖြူ မြို့မဈေးအတွင်းရှိ  ဂန္ဓမာဆေးဆိုင်၊ ထွန်းဆေးဆိုင်၊ အလင်းသစ်ဆေးဆိုင်၊ တိုင်းရင်းဆေးအမျိူးမျိုးရောင်းဆေးဆိုင်နှင့်  သမာဓိဆေးဆိုင်၊ (၅)ရပ်ကွက်၊ ခိုင်ဝါဆေးဆိုင်၊ (၅)ရပ်ကွက်၊ ပရိုမက်ဆေးဆိုင်၊ (၈) ရပ်ကွက်၊ ဆေးဆိုင်များအား ဈေးကွက်စောင့်ကြည့်စစ်ဆေးပြီး လုပ်ငန်းရှင်များကို ဌာနဆိုင်ရာများမှ ကူညီဆောင်ရွက်ရန် လုပ်ငန်းအခက်အခဲများရှိပါက ဆေးဝါး၊ ဆေးပစ္စည်းနှင့် အထောက်အကူပြုပစ္စည်းများ သတ်မှတ်အရည်အသွေးနှင့် ဈေးနှုန်းမှန်ကန်စေရေးအတွက် မြေပြင်စစ်ဆေးဆောင်ရွက်ရန်၊ ဆေးဆိုင်များအားလုံးနေ့စဉ်ပုံမှန် ရောင်းချစေရေး  ကြပ်မတ်ဆောင်ရွက်ရန်၊ ဆေးဆိုင်များ၏ ဆေးဝါးနှင့် ဆေးပစ္စည်းလက်ကျန်စာရင်းများ ကောက်ယူပြုစုရန်နှင့် ဈေးကွက်လိုအပ်ချက်စာရင်းပြုစုရန်၊ ဆေးဝါးနှင့် ဆေးပစ္စည်းများ ပြည်ပမှ တင်သွင်းသည့် လုပ်ငန်းရှင်များနှင့် ထုတ်လုပ်သည့် စက်ရုံများ၏ အခက်အခဲ များရှိပါက တိုင်းဒေသကြီး အစိုးရအဖွဲ့သို့ တင်ပြပြီး ကူညီပံ့ပိုးပေးရန်၊ ဆေးဝါး၊ ဆေးပစ္စည်း တင်သွင်းဖြန့်ဖြူးသည့် ကုမ္ပဏီများမှာ မော်တော်ယာဉ်များနှင့် ဝန်ထမ်းများ သက်ဆိုင်ရာဆေးဆိုင်များနှင့် ဆေးသိုလှောင်သည့်နေရာများသို့ ဝင်ရောက်ကုန်ချနိုင်ရေး ကူညီပံ့ပိုးပေးရန်၊ ဈေးကွက်အတွင်း ဈေးနှုန်းအဆမတန်မြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့်သိုလှောင်ခြင်း၊ တရားမဝင်ကုန်ပစ္စည်းများ၊ အတုအပနှင့် အရည်သွေးနိမ့်ပစ္စည်းများ၊ ရောင်းချခြင်းများ စစ်ဆေးတွေ့ရှိပါက အရေးကြီးကုန်စည် ဥပဒေနှင့် တည်ဆဲဥပဒေများအရ ထိရောက်စွာအရေးယူရန်တို့ကို လုပ်ငန်းရှင်များ သိရှိလိုက်နာစေရန် အသိပေးစစ်ဆေး ဆောင်ရွက်ခဲ့ကြသည်။

              ဓနုဖြူမြို့နယ်အတွင်း ဆီးချိုနှင့် ပတ်သက်သောဆေးများ၊ သွေးကျဲဆေးများ၊ အနည်းငယ်ဝယ်ယူရခက်ခဲကြောင်း၊ ဆေးဈေးနှုန်းအနေဖြင့် ဈေးတက်ခြင်းမရှိကြောင်း ဆေးမျာကိုလည်း သိုလှောင်ထားရှိမှုမရှိကြောင်း၊  ဆေးဝါးများနှင့်ပတ်သက်၍ ဆေးလက်ကျန်အခြေအနေ၊ ဆေးဈေးကွက်ဈေးနှုန်းအခြေအနေများ၊ ဆေးလိုအပ်ချက်များ ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)