သတင်းနှင့် လှုပ်ရှားမှုများ

      ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ ကလောခရိုင်ဦးစီးမှူးရုံး(အောင်ပန်း) မှ ခရိုင်ဦးစီးမှူးနှင့်ဝန်ထမ်းများသည် ၂၀၂၄ခုနှစ်၊ ဒီဇင်ဘာလ ၉ရက်နေ့၊ နံနက် ၁၀ နာရီအချိန်တွင် အောင်ပန်းမြို့ရှိ နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ နယ်စပ်ဒေသတိုင်း ရင်းသားလူငယ်များစက်မှုလက်မှုပညာသင်တန်းကျောင်းရှိသင်တန်းသား (၄၅) ဦးတို့အားစားသုံးသူ ကာကွယ်ရေးအသိပညာပေးဟောပြောပွဲဆောင်ရွက်ခဲ့ကြောင်းသိရှိရပါသည်။

          အဆိုပါဟောပြောပွဲတွင် ခရိုင်ဦးစီးမှူးကတက်ရောက်လာသော သင်တန်းကျောင်းဆရာများ နှင့်သင်တန်းသားများကို စားသုံးသူကာကွယ်ရေးဟောပြောပွဲ ဆောင်ရွက်ရခြင်း၏ ရည်ရွယ်ချက်ကို လည်းကောင်း၊ စားသုံးသူ၏အဓိပ္ပာယ်၊ စီးပွားရေးလုပ်ငန်းရှင်တို့၏ အဓိပ္ပာယ်တို့အားဟောပြောခဲ့ ကြောင်း၊ စားသုံးသူအခွင့်ရေး(၈)ချက်နှင့် လိုက်နာရမည့်တာဝန်များအကြောင်း၊ စားသုံးသူများသည် ကုန်စည်နှင့်ဝန်ဆောင်မှုများကိုဝယ်ယူအသုံးပြုရာတွင် စားသုံးသူအခွင့်အရေးများနစ်နာဆုံးရှုံးမှုရှိခဲ့ လျှင်သက်ဆိုင်ရာ ပြည်နယ်၊ တိုင်းဒေသကြီးအပါအဝင် ခရိုင်ဦးစီးမှူးရုံးများရှိ CICC များသို့ လူကိုယ် တိုင်ဖြစ်စေ၊ တယ်လီဖုန်းဖြင့်ဖြစ်စေ၊ တိုင်ကြားနိုင်ကြောင်း၊ DOCA MYANMAR MOBILE APPLICATION မှတဆင့်လည်းကောင်း၊ DOCA FACEBOOK PAGE နှင့် CONSUMER CALL CENTER ၁၅၃၅ သို့လည်းဆက်သွယ်တိုင်ကြားနိုင်ကြောင်း ဟောပြောဆွေးနွေးခဲ့ကြောင်းသိရှိရပါ သည်။

DOCA(ရှမ်း)

          ၂၀၂၄ခုနှစ် ဒီဇင်ဘာလ ပထမပတ်အထိ ဈေးနှုန်းအမြင့်တွင်ရှိခဲ့သော ကုန်စိမ်းသီးနှံအများစု မှာ(၁၀.၁၂.၂၀၂၄)ရက်နေ့တွင် ဈေးနှုန်းများထက်ဝက်နီးပါးကျဆင်းလာကြောင်း ဈေးကွက်အတွင်းမှ လေ့လာသိရှိရပါသည်။ခရမ်းချဉ်၊ ဂေါ်ဖီ၊ ပန်းမုံလာ၊ ငရုတ်ပွ နှင့် မုန်ညှင်း စသောကုန်စိမ်းသီးနှံများ မှာ နှစ်စဉ်ဆောင်းကာလတွင် ဈေးလျော့ကျသည့်အစဉ်အလာရှိပြီး ယခုနှစ်တွင် ကုန်စည်ထွက်ရှိမှု လျော့ခြင်း၊ ရေကြီးနစ်မြုပ်မှုကြောင့် စိုက်ခင်းအချို့ပျက်စီးခြင်း နှင့် အခြားဒေသမှ ကုန်ထွက်ရှိမှု နောက်ကျခြင်းကြောင့် ဈေးနှုန်းများမြင့်တက်ခဲ့ရခြင်းဖြစ်ကြောင်း သိရှိရပါသည်။ယခုကာလတွင် ပဲ ခူးတိုင်း၊ မကွေးတိုင်း၊ မန္တလေးတိုင်းဒေသကြီးတို့မှ ကုန်စိမ်းများ လှိုင်လှိုင်ပေါ်လာချိန်ဖြစ်၍ ဈေး ကွက်ဝယ်လိုအားနှင့် ကုန်ထွက်ရှိမှု မျှတလာသဖြင့် ဈေးနှုန်းများကျဆင်းလာရခြင်းဖြစ်ပါသည်။ဒီ ဇင်ဘာလ ဒုတိယပတ်၏ ကုန်စိမ်းဈေးနှုန်းများမှာ ခရမ်းချဉ်သီး (၂၇၀၀-၃၅၀၀)ကျပ်၊ ဂေါ်ဖီ (၁၅၀၀-၁၈၀၀)ကျပ်၊ ပန်းမုံလာ (၁၅၀၀-၂၀၀၀)ကျပ်၊ မုန်ညှင်း (၁၅၀၀-၁၆၀၀)ကျပ်၊ ငရုတ်ပွ (၃၅၀၀-၄၅၀၀)ကျပ်၊ ဘိုစားပဲ (၁၈၀၀-၂၀၀၀)ကျပ်စသဖြင့် ဈေးပေါက်လျက်ရှိပြီး အာလူး (၂၅၀၀- ၅၅၀၀)ကျပ်သာ ဈေးကွက်ပေါက်ဈေးရှိပါကြောင်း နှင့် ကုန်စိမ်းသီးနှံများ ဈေးဆက်လက်ကျဆင်း နိုင်ကြောင်း လေ့လာသုံးသပ်ရေးသားအပ်ပါသည်။

DOCA(ရှမ်း)

 ရှမ်းပြည်နယ်တောင်ပိုင်း၊ စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ဝန်ထမ်း များသည် (10.၁၂.၂၀၂၄)ရက်နေ့တွင် လွိုင်လင်မြို့ပေါ်ရှိ ကုန်စုံဆိုင်များ၌ ဆပ်ပြာရည်အမျိုးမျိုး တို့အား ဈေးကွက်စောင့်ကြည့် စစ်ဆေးခဲ့ပါသည်။

          ထိုသို့စစ်ဆေးရာ၌ ကုန်စုံဆိုင်များတွင် ရောင်းချနေသော ဆပ်ပြာရည်အမျိုးမျိုးတွင် ကုန်အညွှန်း အမှတ်အသား ပြည့်စုံစွာဖော်ပြထားခြင်း ရှိ/မရှိ၊ စားသုံးသူဘေးအန္တရာယ် ဖြစ်စေနိုင်သော ကုန်စည်များရောင်းချခြင်းရှိ/မရှိတို့အား စစ်ဆေးခဲ့ပြီး သတ်မှတ်စံချိန်စံနှုန်းနှင့် ကိုက်ညီ၍ သက်ဆိုင်ရာဌာနများမှ ခွင့်ပြုထားသော ကုန်အညွှန်းအမှတ်အသားပြည့်စုံစွာ ဖော်ပြထားသည့် ကုန်စည်များကိုသာ ဈေးကွက်အတွင်း တင်သွင်းရောင်းချစေရန် အသိပညာပေးခြင်းတို့ကို ဆောင်ရွက်ခဲ့ပါသည်။

DOCA(ရှမ်း)

ထောပတ်သီးသည် လူကြိုက်များသောသစ်သီးဝလံ ဖြစ်သည့်အတွက် မြန်မာနိုင်ငံတွင်သာမက ကမ္ဘာ့နိုင်ငံ အသီးသီးသို့ပါ တင်ပို့နေရသော ဈေးကွက်ဝင် သီးနှံတစ်မျိုးဖြစ်ပါသည်။ ထောပတ်သီးသည် အရသာကောင်းမွန် သောကြောင့် စားသုံးသူများပြားသည့်အပြင် အလှအပရေးရာအတွက်လည်း အသုံးဝင်သည့် အလှကုန်များ၊ ရေချိုး ဆပ်ပြာဆီများ၊ ဆံကေသာလိမ်းဆီများကဲ့သို့သော ပစ္စည်းများထုတ်လုပ်ရာတွင်လည်း အသုံးဝင်သည့်အတွက် ဈေးကွက် ၀ယ်လိုအား များပြားသော သီးနှံများထဲတွင် ထိပ်တန်းကပါဝင်နေပါသည်။

ထောပတ်သီး စတင်စိုက်ပျိုးရာ မူရင်း‌ဒေသမှာ အမေရိကတိုက်အလယ်ပိုင်း၊ မက်ဆီကို(တောင်ပိုင်း) မှ မူလအရင်းတည်ပြီးပီရူး အလယ်ပိုင်း သို့ရောက်ရှိလာကာ ဥရောပ၌ ဖြစ်ထွန်းခဲ့ကြောင်း၊ ထိုမှတစ်ဆင့် အပူပိုင်းနှင့် နွေးသမဇုန်များသို့ ပျံ့နှံ့သွားကြောင်းလေ့လာသိရှိရပါသည်။ မြန်မာနိုင်ငံတွင် ထောပတ်သီးကို မန္တလေးတိုင်း ပြင်ဦးလွင်မြို့တွင် စတင်စိုက်ပျိုးခဲ့ကြပြီး ယခုအခါ ရှမ်းပြည်နယ် (တောင်ပိုင်း) ၊ ရှမ်းပြည်နယ် (‌မြောက်ပိုင်း) ၊ ကယား ပြည်နယ် နှင့် ချင်းပြည်နယ်များတွင်ပါ စိုက်ပျိုးလာကြကြောင်း သိရှိရပါသည်။  ရှမ်းပြည်နယ်မှ ထောပတ်သီး ထွက်ရှိမှု အများဆုံးဖြစ်ပြီးစိုက်ပျိုးတောင်သူများအားဝင်ငွေတိုးအမြတ်ပိုစေသည့်သီးနှံဖြစ်ကြောင်းလည်းသိရှိရပါသည်။ထောပတ် သီးများသည် အောက်တိုဘာလတွင်စတင်ထွက်ရှိပြီး ဇန်နဝါရီလကုန်ပိုင်းတွင် အသီးကုန်ပါသည်။

 ယခုဒီဇင်ဘာလသည် ထောပတ်သီးဝေဆာစွာ ထွက်ရှိသောကာလဖြစ်ပြီး ရှမ်းပြည်နယ်မှ ထွက်ရှိသော ထောပတ်သီးများသည် ဈေးကွက်ဝင်လူကြိုက် များလှပေသည်။  ထောပတ်သီး ဒေသမျိုးရင်းများကို အဝိုင်းမျိုး ၊ မီးသီးမျိုး၊ ဘူးသီးမျိုးသဖြင့် ပုံသဏ္ဍာန်အနေအထားကိုလိုက်၍ အမည်ပေးခေါ်ဆိုမှုများ ရှိသကဲ့သို့ မိမိတို့စိုက်ပျိုးသော ထောပတ်ခြံအမည်ကို ပေးခြင်းဖြင့် လည်းကောင်း ခေါ်ဆိုကြပါသည်။   Hass ထောပတ်မျိုးများသည် ဈေးကွက်အတွင်း ပိုမိုတွင်ကျယ်လျက်ရှိနေသည်ကို လေ့လာတွေ့ရှိရပါသည်။ ဒေသမျိုးရင်းထောပတ်သီးများအပြင် HASS ထောပတ်သီး သည်လည်း မြန်မာနိုင်ငံအတွင်း လွန်စွာစားသုံးမှုများပြားလာသော ထောပတ်အမျိုးအစားတစ်ခုဖြစ်ပါသည်။ HASS ထောပတ်သီး၏ အရသာမှာ ဆိမ့်၍ စီးပိုင်သောအရသာရှိ၍ စားသုံးသူများ နှစ်သက်ကြပြီး HASS ထောပတ်သီး ဈေးနှုန်းသည်‌ဒေသသီးဈေးနှုန်းထက်ပိုမြင့်ပါသည်။ ဒေသသီးတစ်လုံးလျှင် ၁၅၀-၂၀၀ကျပ်ခန့်မှစ၍ ၆၀၀- ၈၀၀ကျပ်အထိ လည်းကောင်း၊  လက်လီဈေး ၂၅၀-၅၀၀ ကျပ်ခန့်မှ ၁၀၀၀- ၁၂၀၀ကျပ်ခန့်အထိ လည်းကောင်း၊  အရွယ်အစားနှင့် ထောပတ် အမျိုးအစားပေါ်မူတည်၍ ဈေးနှုန်းအမျိုးမျိုးကွဲပြားပါသည်။ HASS ထောပတ်သီး ကိုမူ ကီလိုဂရမ်ဈေးဖြင့် ရောင်းချလေ့ရှိကြပြီး လက္ကားဈေး တစ်ကီလိုလျှင် ၃၀၀၀- ၄၀၀၀ ကျပ်အတွင်းပေါက်ဈေးရှိပြီး လက်လီဈေး တစ်ကီလို လျှင် ကျပ် ၃၅၀၀ - ၅၀၀၀ ကျပ်အတွင်းပေါက်ဈေးရှိပြီး အရွယ်အစားနှင့် လတ်ဆတ်မှုပေါ်မူတည်၍ ၆၅၀၀-၇၀၀၀ ကျပ် ခန့်အထိ ဈေးကောင်းရရှိနေကြောင်းသိရှိရပါသည်။ ထောပတ်သီးများကို ဒေသဈေးနေ့များတွင်ဝယ်ယူစားသုံးမှု များပြား ကြပြီး ဒေသတွင်းသစ်သီးရောင်းချသောဆိုင်များ၊ ပွဲရုံများနှင့်အင်တာနက်လိုင်းပေါ်မှတစ်ဆင့်လည်း ဝယ်ယူစားသုံးမှု များပြားကြကြောင်း သတင်းရရှိပါသည်။

DOCA(ရှမ်း)

  ယာဂွန်ဥကိုရှမ်းပြည်နယ်(တောင်ပိုင်း) ပင်းလောင်းမြို့နယ်၊ နောင်တရားဒေသ၊ ပေါင်းလောင်း ဒေသတို့တွင်စီးပွားဖြစ်စိုက်ပျိုးကြပြီး ကလောနှင့်တောင်ကြီးဘက်တွင်လည်း အများအပြားစိုက်ပျိုး ကြောင်းသိရှိရပါသည်။ယာဂွန်ဥကိုနှစ်စဉ် အောက်တိုဘာနှင့် နိုဝင်ဘာလများတွင်တူးဖော်ကြပြီးဈေး ကွက်အတွင်းသို့ (၁)ပိဿာလျှင် ၃၀၀၀၊ ၃၅၀၀ကျပ်ဖြင့်ရောင်းချကြပါသည်။ ယာဂွန်ဥစိုက်ပျိုးခြင်း သည်တောင်သူများအတွက်စီးပွားဖြစ်တွက်ခြေကိုက်သောသီးနှံဖြစ်ပါသည်။

          ယာဂွန်ဥသည်ကန်စွန်းဥနှင့်ဆင်တူပြီး အရသာနှင့်အာဟာရတန်ဖိုးမှာ မတူဘဲကွဲပြားသည်ကို လေ့လာသိရှိရပါသည်။ အရသာမှာပန်းသီး၊ဖရဲသီးနှင့်တရုတ်နံနံကို ပေါင်းစားရသလိုမျိုးဖြစ်ပြီး မြေ အောက်ပန်းသီးလို့ပင်တင်စားခေါ်ဝေါ်ကြပါသည်။အစိမ်းစားလျှင် ချိုပြီးကြွပ်ရွကာ အရည်ရွှမ်းသော အသီးတစ်မျိုးဖြစ်ပါသည်။

          ယာဂွန်ဥတွင်ရေဓာတ်ပါဝင်မှု ၇၅ %၊ ကာဗွန်ဟိုက်ဒရိတ် ၂၀ %၊ အသားဓာတ် ၂ %၊ အဆီ၁%၊ သကြား၊ ဖိုက်ဘာ၊ ဗိုက်တာမင်စီ၊ ကယ်ဆီယမ်၊ ပိုတက်ဆီယမ်နှင့် ပြာဓာတ်တို့ပါဝင်နေပါသည်။ ယာ ဂွန်ဥတွင်ပါဝင်သော အချိုဓာတ်သည် ဆီးချိုသမားများပင် စားသုံးနိုင်ပါသည်။ အရိုးပွရောဂါကိုကာ ကွယ်နိုင်ပြီးသွေးတိုးရောဂါရှိသူများပုံမှန်စားသုံးပေးခြင်းဖြင့်သွေးပေါင်ထိန်းညှိခြင်းနှင့်ဖိုက်ဘာအမျှင် ဓာတ်ပါဝင်သောကြောင့်အူလမ်းကြောင်းကျန်းမာရေးကိုအထူးကောင်းမွန်စေပါသည်။ယခုအခါတွင် ယာဂွန်ဥကိုတစ်ကမ္ဘာလုံးစိုက်ပျိုးထုတ်လုပ်စားသုံးနေကြပြီဖြစ်ကြောင်းလေ့လာသိရှိရပါသည်။

DOCA(ရှမ်း)