သတင်းနှင့် လှုပ်ရှားမှုများ

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် ခရိုင်ဦးစီးမှူးဦးဇော်လင်းအောင်၊ မြို့နယ် ဦးစီးမှူးဦးလှထွဋ်ဦးနှင့်ဝန်ထမ်းများသည် (၂၃.၁၂.၂၀၂၄) ရက်နေ့နံနက်(၁၀;၀၀)နာရီက မြောင်းမြမြို့နယ်၊ စိုက်ပျိုးရေး နှင့်မွေးမြူရေးသိပ္ပံကျောင်းရှိ ဆရာ/ဆရာမ၊ ကျောင်းသား/သူများအား စားသုံးသူကာကွယ်ရေး အသိပညာပေး       ဟောပြောပွဲဆောင်ရွက်ခဲ့ပါသည်။

            ထိုသို့ဟောပြောဆွေးနွေးရာတွင်စားသုံးသူရေးရာဦးစီးဌာန၊ ခရိုင်ဦးစီးမှူးမှ တက်ရောက်လာသော ဆရာ/     ဆရာမ၊ ကျောင်းသား/သူများအား မိတ်ဆက်စကားပြောကြားပြီး၊ စားသုံးသူရေးရာဦးစီးဌာနပေါ်ပေါက်လာပုံ၊ ဌာန၏လက်ရှိဆောင်ရွက်နေသောလုပ်ငန်းတာဝန်များ၊ ဆက်လက်ဆောင်ရွက်ရမည့်လုပ်ငန်းတာဝန်များအား ဦးစွာ ရှင်းလင်းပြောကြားခဲ့ပြီး၊  ဆက်လက်၍ စီးပွားရေး နှင့်ကူးသန်းရောင်းဝယ်ရေးဝန်ကြီးဌာနမှ   ထုတ်ပြန်ထားသော  စားသုံးသူကာကွယ်ရေးဥပဒေ၂၀၁၉ ပါ ပြဌာန်းချက်များ၊ စားသုံးသူ၏အခွင့်အရေးနှင့်တာဝန်များ၊ စီးပွားရေး လုပ်ငန်းရှင်၏   တာဝန်များ၊ တားမြစ်ချက်များ၊ ပြစ်မှုပြစ်ဒါဏ်များအကြောင်း စားသုံးသူကာကွယ်ရေးဥပဒေ အခန်း(၁၈)ပါကုန်အညွှန်း  အမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ         ကုန်အညွှန်းအမှတ်အသားဖော်ပြရာတွင် မြန်မာဘာသာဖြစ်စေ၊ အခြားဘာသာ တစ်ခု(သို့)တစ်ခု ထက်ပို၍ တွဲလျှက်   ဖြစ်စေရေးသားဖော်ပြရမည်ဖြစ်ကြောင်း ဟောပြောဆွေးနွေးခဲ့ပါသည်၊ စားသုံးသူကာကွယ်ရေးဥပဒေပါအချက်အလက်များသိရှိလိုပါက ခရိုင်စားသုံးသူရေးရာဦးစီးမှူးရုံးတွင်လည်းကောင်း၊  စားသုံးသူရေးရာဦးစီးဌာန၊ ရုံးချုပ်၏   www.doca.mm.website   တွင်လည်း ဝင်ရောက်ကြည့်ရှုလေ့လာနိုင်ပါကြောင်း၊ စားသုံးသူများ နစ်နာမှု ရှိပါက      စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီ  ဖုန်းဖြင့်ဖြစ်စေ တိုင်ကြားနိုင်ပါကြောင်း အသိပညာပေးဟောပြောခဲ့ပြီး၊ လက်ထောက်ကျောင်းအုပ် ဆရာကြီးအား       စားသုံးသူကာကွယ်ရေးဥပဒေ စာအုပ်အားပေးအပ်ပြီး၊ ဟောပြောပွဲသို့ တက်ရောက်လာသောကျောင်းသား/ သူများအား စားသုံးသူအသိပညာပေး လက်ကမ်းစာစောင်များဖြန့်ဝေပေးခဲ့ပါသည်၊ ဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူ (၁၅၅)ဦး တက်ရောက် ခဲ့ကြောင်းသိရှိရပါသည်။

DOCA(ဧရာဝတီ)

          ၂၀၂၄ခုနှစ်၊ ဒီဇင်ဘာလ(၂၄)ရက်နေ့၊ နံနက်(၀၈:၃၀)နာရီအချိန်တွင် စားသုံးသူရေးရာ ဦးစီးဌာန၊ ကယားပြည်နယ်ဦးစီးမှူးရုံးမှ ခေတ္တပြည်နယ်ဦးစီးမှူးနှင့် ဝန်ထမ်း(၂)ဦးသည် လွိုင်ကော်မြို့ပေါ်ရှိ စားသုံးဆီအမျိုးမျိုးရောင်းချနေသော ကုန်စုံဆိုင်များသို့ မြန်မာနိုင်ငံစား သုံးသူကာကွယ်ရေးကော်မရှင်၏( ၂/၂၀၁၉ )ပါ ကုန်အညွှန်းအမှတ်အသားသတ်မှတ်ချက်များ နှင့် ကိုက်ညီမှု/မရှိ သက်ဆိုင်ရာမိတ်ဖက်ဌာနများဖြင့် ဈေးကွက်စောင့်ကြည့် စစ်ဆေးဆောင် ရွက်ခဲ့ပါသည်။

       ထိုသို့ ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ စားသုံးဆီအများစုကို တောင်ကြီးမြို့မှ အများဆုံးတင်သွင်းလျက်ရှိပြီး မြန်မာနိုင်ငံစားသုံးသူကာကွယ်ရေးကော်မရှင် ၏(၂/၂၀၁၉)ပါ ကုန်အညွှန်းအမှတ်အသားသတ်မှတ်ချက်နှင့်ကိုက်ညီမှုရှိသော စားသုံးဆီဘူးများကိုသာ တင်သွင်းရောင်းချလျက်ရှိကြောင်း စစ်ဆေးတွေ့ရှိရပြီး စီးပွားရေးလုပ်ငန်းရှင်များ အနေ ဖြင့် ဈေးကွက်အတွင်း ဖြန့်ဖြူးရောင်းချသည့် စားသုံးဆီဘူးများတွင် ပင်ရင်း ပါဝင်ပစ္စည်းများ ကိုအခြေခံသော ကုန်စည်၏ အမျိုးအမည်ကို မြန်မာဘာသာဖြင့်ဖော်ပြထားပြီး ကုန်စည်များ၏ အသားတင်ပမာဏနှင့် အရွယ်အစားတို့ကို မြန်မာအလေးချိန်ယူနစ်ဖြစ်သော ပိဿာ၊ ကျပ်သား တို့ဖြင့် တိကျစွာဖော်ပြထားသည့် စားသုံးဆီဘူးများကိုသာ တင်သွင်းရောင်းချကြရန်၊ ဘူးသွင်းဆီ များရောင်းချပါက အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်ပါရှိသော စားသုံးဆီဘူးများကိုသာ ရောင်းချကြရန် အသိပညာပေး ကွင်းဆင်းစစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ လုပ်ငန်း တာဝန်တစ်ရပ်ဖြစ်သည့် စားသုံးသူကာကွယ်ရေးလုပ်ငန်းနှင့်စပ်လျဉ်းသည့် အသိပညာပေးခြင်းနှင့် သတင်းအချက်အလက်များ ဖြန့်ဝေပေးခြင်းတို့ ဆောင်ရွက်လျက်ရှိပါသည်။

          စားသုံးသူကာကွယ်ရေးအသိပညာပေးဟောပြောခြင်းများကို သက်ဆိုင်ရာနယ်ပယ်အသီးသီး အလိုက် ဟောပြောဆောင်ရွက်လျက်ရှိရာ (၁၉-၁၂-၂၀၂၄) ရက်နေ့၊ နေ့လယ် (၁၄:၃၀)နာရီအချိန် တွင် မန္တလေးမြို့၊ ချမ်းအေးသာစံမြို့နယ်ရှိ မြန်မာနိုင်ငံရဲတပ်ဖွဲ့၊ ရဲအရာရှိအတတ်သင်ကျောင်းရှိ တပ်ဖွဲ့ဝင်များနှင့် မိသားစုဝင် (၁၀၀)ဦးတို့အား စားသုံးသူကာကွယ်ရေးနှင့်ပတ်သက်သော အသိပညာပေးဟောပြောခြင်း ဆောင်ရွက်ခဲ့ပါသည်။

          စားသုံးသူကာကွယ်ရေးအသိပညာပေးဟောပြောခြင်းကို စားသုံးသူရေးရာဦးစီးဌာန၊ မန္တလေး တိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲရှိ ဦးစီးမှူး ဦးတင်ချစ်ကောင်းမှ စားသုံးသူ ကာကွယ်ရေးနှင့်ဥပဒေပေါ်ပေါက်လာပုံ၊ စားသုံးသူနှင့်စီးပွားရေးလုပ်ငန်းရှင်တို့၏ အဓိပ္ပါယ်ဖွင့်ဆိုချက်၊ စားသုံးသူ၏ အခွင့်အရေးနှင့်တာဝန်များ၊ စားသုံးသူတိုင်ကြားမှုအပေါ် ဦးစီးမှူးရုံးမှ ဖြေရှင်း ဆောင်ရွက်ပေးခဲ့မှုအခြေအနေများကို ဟောပြောဆွေးနွေးခဲ့ပြီး ထုတ်ကုန်လုံခြုံစိတ်ချရမှုဌာနခွဲ တာဝန်ခံ ဦးစီးအရာရှိ ဦးမျိုးထွန်းမှ ကုန်စည်များတွင် ကုန်အညွှန်းအမှတ်အသားဖော်ပြမှုနှင့် ပတ်သက်သော အကြောင်းအရာများနှင့် ဥပဒေပါတားမြစ်ချက်များကို ကျူးလွန်ဖောက်ဖျက်ပါက  ကျခံရမည့် ပြစ်မှုပြစ်ဒဏ်များအကြောင်း ရှင်းလင်းဆွေးနွေးခဲ့ပါသည်။

DOCA(မန္တလေး)  

          ယနေ့ခေတ်တွင် Social Media အခန်းကဏ္ဍသည် အလွန်အရေးပါလာခဲ့ပါသည်။ Social Media များအသုံးပြု၍ အွန်လိုင်းစနစ်ဖြင့်ရောင်းချလာကြသည်ကိုလည်း တွေ့မြင်လာရပါသည်။ ထိုသို့ ရောင်းသူနှင့်ဝယ်သူများအားလုံး အဆင်မပြေမှုပြဿနာများမှ ကင်းဝေးဏေရန်အတွက် eComreg Online Registration www.ecomreg.gov.mm စနစ်တွင် မှတ်ပုံတင်လက်မှတ်များ လျှောက်ထားရယူကြရန် လိုအပ်ပါသည်။ eComreg Online Registration (မှတ်ပုံတင်)စနစ်တွင် မှတ်ပုံတင်ခြင်းဆောင်ရွက်ရမည့် အွန်လိုင်း စနစ်ဖြင့် ရောင်းချသူများမှ (၁) ပြည်တွင်း၌ အခြေပြု သည်ဖြစ်စေ၊ပြည်ပ၌ အခြေပြုသည်ဖြစ်စေ၊ (၂) Website တည်ထောင်၍ Website ပေါ်မှ ဈေးရောင်းချသူများအားလုံး (၃) Social Media ဟု ဆိုရာ တွင် Fcacebook အပြင် အခြားသော Social Media များအသုံးပြု၍ ငွေကြေးယူ ရောင်းချသူများ အားလုံး(၄) Mobile Application တည်ထောင်၍ ထို Mobile Application ဖြင့် ဈေးရောင်းချသူများ အားလုံးတို့သည် မှတ်ပုံတင် ဆောင်ရွက်ရမှာဖြစ်ပါတယ်။

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ၂၀၂၃ ခုနှစ်၊ ဇူလိုင်လ ၂၁ ရက်နေ့တွင် ထုတ်ပြန်သော အမိန့်ကြော်ငြာစာအမှတ်(၅၀/၂၀၂၃)အရ အွန်လိုင်းစနစ်ဖြင့်ရောင်းချခြင်း လုပ်ငန်း ကို အရေးကြီးဝန်ဆောင်မှုအဖြစ် သတ်မှတ်ထားပြီး Online စနစ်ဖြင့် ရောင်းချသော ကုန်စည်နှင့် ဝန်ဆောင်မှုလုပ်ငန်းများသည် မှတ်ပုံတင်လက်မှတ် လျှောက်ထားရရှိပြီးမှသာ လုပ်ငန်း ဆောင်ရွက် ရမည်ဖြစ်ပါသည်။ အဆိုပါ အမိန့်ကြော်ငြာစာတွင် ထုတ်ပြန်ပြီး (၆)လပြည့်မြောက်သည့် နေ့မှစ၍ မှတ်ပုံတင်လက်မှတ်မရရှိဘဲ အွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက် ကြောင်း တွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေပုဒ်မ ၅ အရ အရေးယူခြင်းခံရမည် ဖြစ်ကြောင်း ဖော်ပြထားပါတယ်။ ၂၀၂၅ ခုနှစ်၊ ဇန်နဝါရီလ (၁)ရက်နေ့မှစ၍ အွန်လိုင်းစနစ်ဖြင့် ရောင်းချခြင်း (Online Sales) လုပ်ငန်းမှတ်ပုံတင်လက်မှတ် လျှောက်ထားမှုအား မြေပြင် ကွင်းဆင်း စိစစ်ပြီးမှသာလျှင် ခွင့်ပြုထုတ်ပေးသွားမည် ဖြစ်ပါတယ်။

           အွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်နေကြသူများအနေဖြင့် eComreg Online Registration www.ecomreg.gov.mm တွင် မှတ်ပုံတင်လက်မှတ်များ လျှောက်ထား ရယူ ကြရန်နှင့် စနစ်တွင် မှတ်ပုံတင်ဆောင်ရွက်ရန် (၂)မျိုးခွဲ၍ လျှောက်ထားနိုင်ရန် ဆောင်ရွက်ထား ပါသည်။ (၁) ကုမ္ပဏီ (သို့မဟုတ်) စီးပွားရေးအဖွဲ့အစည်း (၂)  လူပုဂ္ဂိုလ်တစ်ဦးချင်း တို့ဖြစ်ပါ သည်။ eComreg Online Registration စနစ်တွင် လျှောက်ထားခြင်း လုပ်ငန်းစဉ်အား အဆင့်(၇)ဆင့်ဖြင့် သတ်မှတ်၍ လျှောက်ထားရန်ဖြစ်သည်။ စနစ်တွင် လျှောက်ထားခြင်း (၇)ဆင့် တို့မှာ (၁)Member  အဖြစ်လျှောက်ထားခြင်း (၂) အချက်အလက်များဖြည့်သွင်းခြင်း (၃) Online ကြေးပေးသွင်းခြင်း (၄) ဌာနမှ စိစစ်ခွင့်ပြုခြင်း (၅) လုပ်ငန်းရှင်မှ မှတ်ပုံတင်ကြေးပေးသွင်းခြင်းနှင့် မှတ်ပုံတင်လက်မှတ် ထုတ်ပေးခြင်း  (၆)  ပြင်ဆင်လိုသည့်  အချက်များ  ပြင်ဆင်‌လျှောက်ထားခြင်း  (၇)  သက်တမ်းတိုးလျှောက်ထားခြင်းတို့ ဖြစ်ပါသည်။ ယင်းသို့ လျှောက်ထားပြီးလျှင် သက်ဆိုင်ရာဌာနမှ လျှောက်ထား ခြင်းကို ခွင့်ပြုပေးပြီးနောက် လုပ်ငန်းရှင်မှ မိမိလျှောက်ထားသည့် လုပ်ငန်း အမျိုးအစားအလိုက် အွန်လိုင်းမှတ်ပုံတင်ကြေး ကျသင့်ငွေကို မိမိနှစ်သက်ရာ Online Payment ဖြင့် ပေးသွင်းရမည် ဖြစ်သည်။ ၎င်းနောက် မိမိလျှောက်ထားသော Certificate ကို ထုတ်ယူနိုင်မည်ဖြစ်သည်။ မှတ်ပုံ တင်လက်မှတ်ရရှိသူများအနေဖြင့် သက်တမ်းမကုန်မီ ရက်ပေါင်း (၆၀) အတွင်း သက်တမ်းတိုး လျှောက်ထားနိုင်ပါသည်။ သက်တမ်းမှာ (၂)နှစ်ရရှိမည်ဖြစ်ပါတယ်။

          စားသုံးသူများသည် ကုန်စည်နှင့်ဝန်ဆောင်မှုများအား အွန်လိုင်းစနစ်ဖြင့် ဝယ်ယူအသုံးပြု ရာတွင်  ထိခိုက်နစ်နာမှုများ မရှိစေရေးအတွက် မိမိဝယ်ယူမည့် Online Sales Business အွန်လိုင်း စနစ်ဖြင့်ရောင်းချသူများအနေဖြင့် eComreg Online Registration (မှတ်ပုံတင်)စနစ်တွင် အွန်လိုင်း မှတ်ပုံတင်လက်မှတ် ရရှိထားမှု ရှိ/မရှိ စုံစမ်းဝယ်ယူရန်နှင့် Online စနစ်ဖြင့် ရောင်းချမည့် စီးပွားရေး လုပ်ငန်းရှင်များအနေဖြင့်လည်း မှတ်ပုံတင်ရရှိပြီးမှသာ မိမိတို့လုပ်ငန်းများကို ဆောင်ရွက်ရပါမည်။ စားသုံးသူ ရေးရာဦးစီးဌာနသည် စားသုံးသူများအတွက် ကုန်စည်နှင့်ဝန်ဆောင်မှုများနှင့် ပတ်သက် ပြီး လုံခြုံစိတ်ချရမှုရှိစေရန်နှင့် စားသုံးသူအကာအကွယ်ပေးရေးလုပ်ငန်းများကို အဓိက ဆောင်ရွက် ပေးနေသော ဌာနတစ်ခုဖြစ်ပြီး သက်ဆိုင်ရာဌာန၊ အဖွဲ့အစည်းများနှင့်လည်း ပူးပေါင်းညှိနှိုင်း ဆောင်ရွက်လျက်ရှိပါသည်။  ထို့ကြောင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ ကို သိရှိလိုပါက www.doca.gov.mm တွင် ဝင်ရောက်လေ့လာနိုင်ပါကြောင်း တင်ပြလိုက်ရပါတယ်။

                         DOCA(မန္တလေး)                                                                                

ကမ္ဘာတဝှမ်းလုံးတွင် Covid-19 ရောဂါဖြစ်ပါပြီးနောက် မြန်မာနိုင်ငံအတွင်း Internet ရှိရုံမျှဖြင့် You Tube၊ Gmail ၊ ဆိုရှယ်မီဒီယာများ အသုံးပြု၍ စီးပွားရေးလုပ်ငန်းများ ဆောင်ရွက်လာကြပြီး Online စနစ်ဖြင့် မိမိတို့၏ စားသောက်ကုန်၊ လူသုံးကုန်၊ အလှကုန်၊ အထည်အလိပ်၊ အဝတ်အထည် အစရှိသဖြင့် အရောင်းအဝယ်ပြုလုပ်ခြင်း၊ ကြော်ငြာခြင်း၊ ဝန်ဆောင်မှု ပြုလုပ်ခြင်း လုပ်ငန်းများလည်း ကျယ်ပြန့်စွာ ဆောင်ရွက်လာကြောင်း တွေ့ရှိရသည်။

          တိုးတက်ပြောင်းလဲနေသော ယနေ့ခေတ်စီးပွားရေးသည် မိမိတို့၏ နေအိမ်များမှ အသေးစား လုပ်ငန်းတစ်ခုစတင်ရန် လွယ်ကူသောခေတ်သို့ ရောက်ရှိနေပြီဖြစ်ခြင်းကြောင့် မိမိအနေဖြင့် Online မှ အဝတ်အထည်များရောင်းသည့်လုပ်ငန်းဆောင်ရွက်မည်ဆိုပါက  ရောင်းချမည့် အမျိုးသား/ အမျိုးသမီး အသက်အရွယ်အပိုင်းအခြား၊ ခန္ဓာကိုယ်အလေးချိန်၊ အရပ်အမြင့်တို့ကို ခွဲခြားသတ်မှတ်ခြင်း၊ ရာသီဥတု အပေါ် (နွေ၊မိုး၊ဆောင်း)ဝတ်ဆင်ရန် သင့်တော်မည့် အထည်အလိပ်ရွေးချယ်ခြင်း၊ မိမိရွေးချယ်ထား သည့် အသက်အရွယ်အပိုင်းအခြားအလိုက် ကြိုက်နှစ်သက်တတ်သည့် အရောင် Design ရွေးချယ်ခြင်း များကို ကြိုတင်စဉ်းစားရပေမည်။

          အထည်စများရွေးချယ်ဝယ်ယူရာတွင်လည်း အလိပ်လိုက်(ထွက်သည့် Colour များ အားလုံး ဝယ်ယူရသည့်)ရောင်းသည့် ကုမ္ပဏီများရှိသကဲ့သို့ အနည်းဆုံး ကိုက်(၂၀)အထက် ရောင်းသည့် ဆိုင် များလည်းရှိသည်၊ ဈေးနှုန်းအနည်းငယ်သာ ကွာခြားမှုရှိပါသည်။ မိမိစိတ်ကြိုက် Colour ရွေးချယ် ဝယ်ယူပါက လက္ကားဈေးနှုန်းဝယ်ယူခြင်း မဟုတ်ဘဲ လက်လီဈေးနှုန်းဖြင့်သာ ဝယ်ယူရပါသည်။

          မိမိ၏ ထုတ်ကုန်အတွက် လိုအပ်သော အမှတ်တံဆိပ်၊ LOGO  များအား Packing Service အပ်နှံဆောင်ရွက်ခြင်း၊ မိမိ Target ထားသော အရွယ်၊ အရောင်၊ ဒီဇိုင်းများရှိပါက Designer များထံ သွားရောက်၍ ချုပ်ထည်များ အပ်နှံရမည်ဖြစ်ပါသည်။ Designer အား ချုပ်လိုသော ပုံစံ၊ အမျိုးအစား အလိုက် အထည် (၃၀)၊ အထည်(၅၀)မှ စတင်လက်ခံချုပ်ပေးလျက်ရှိပြီး ချုပ်ခအနေဖြင့် တစ်ထည် လျှင် ၄၀၀ဝ-၅၀၀၀-၆၀၀၀ ကျပ်ခန့်ပေးရပြီး ကြယ်သီး၊ ဇာ၊ ဇစ် စသည့် အပိုပစ္စည်းများအတွက် ကျသင့်ငွေထပ်မံပေးချေရ မည်ဖြစ်ပါသည်။ အဆိုပါ Designer ၏ လက်ရာ ချုပ်ရိုး၊ ချုပ်သား ခိုင်ခံ့မှုရှိ/မရှိ၊ သေသပ်မှု ရှိ/မရှိ အား Simple တစ်ထည်ချုပ်၍ ကြည့်ရှုနိုင်ပါသည်။ အချို့ Designer များ မှာ Simple ချုပ်ခ ၁၅၀၀ဝိ/- ခန့်ယူလေ့ရှိပြီး အချို့ဒီဇိုင်နာများမှာ အင်္ကျီချုပ်ခအတိုင်းသာ ယူကြပါသည်။        

            အထက်ပါ အချက်အလက်များပြည့်စုံပြီးဖြစ်ပါက စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၏ http://www.ecommerce.gov.mm တွင် ဝင်ရောက်ပြီး သတ်မှတ်ထားသော အချက်အလက် များဖြင့် online  စနစ်ဖြင့်ရောင်းချခြင်းတွင် မှတ်ပုံတင်လျှောက်ထားရမည်ဖြစ်ပြီး  မှတ်ပုံတင်လျှောက်ထား ရယူထားမှု မရှိခြင်း၊လျှောက်ထားတင်ပြခဲ့သည့်ကုန်ပစ္စည်းအုပ်စုအတိုင်း ကိုက်ညီမှုမရှိခြင်း၊ ဥပဒေအရ တားမြစ်ထားသော (သို့မဟုတ်)ဥပဒေတစ်ရပ်ရပ်ဖြင့် ငြိစွန်းနေခြင်း၊ ထောက်ခံချက်၊ ညွှန်ကြားချက် များနှင့်ကိုက်ညီမှုမရှိခြင်းနှင့် အခြားတွေ့ရှိချက်များအတွက် အရေးယူခံရမည်ဖြစ်ကြောင်းသိရသည်။

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့်ဝန်ဆောင်မှု ဥပဒေ ပုဒ်မ ၄ ပုဒ်မခွဲ(ဂ)အရ အွန်လိုင်းစနစ်ဖြင့်ရောင်းချခြင်းလုပ်ငန်းကို အမိန့်ကြော်ငြာစာအမှတ်(၅၀/၂၀၂၃) ဖြင့် အရေးကြီးဝန်ဆောင်မှုအဖြစ် သတ်မှတ်ခြင်း၊ အမိန့်ကြော်ငြာစာအမှတ်(၅၁/၂၀၂၃)ဖြင့် အွန်လိုင်း စနစ်ဖြင့် ရောင်းချခြင်းလုပ်ငန်းမှတ်ပုံတင်ခြင်းနှင့် အမိန့်ကြော်ငြာစာအမှတ်(၄၉/၂၀၂၃)ဖြင့် အမိန့်ကြော်ငြာ စာ၊ အမိန့်၊ ညွှန်ကြားချက်များထုတ်ပြန်ခွင့်ကို ကုန်သွယ်ရေးဦးစီးဌာနအား အပ်နှင်းခြင်းကို ၂၀၂၃ ခုနှစ်၊ ဇူလိုင်လ ၂၁ ရက်နေ့၌ ထုတ်ပြန်ခဲ့ပြီး ၂၁.၁၂.၂၀၂၄ ရက်နေ့မှစ၍  အွန်လိုင်းစနစ်ဖြင့် ရောင်းချခြင်း လုပ်ငန်းများ မှတ်ပုံတင်ခြင်းလျှောက်ထားမှုများကို စားသုံးသူရေးရာဦးစီးဌာနမှ မြေပြင် စစ်ဆေးခြင်း လုပ်ငန်းများ ဆောင်ရွက်သွားမည်ဖြစ်ကြောင်း သိရသည်။

          မြေပြင်စစ်ဆေးရာ၌ Online Registration စတင်ဆောင်ရွက်စဉ် လျှောက်ထားခဲ့သည့်လုပ်ငန်းနှင့် လျှောက်ထားသူ၏ အချက်အလက်များစစ်ဆေးခြင်း၊ ရောင်းချသည့် ကုန်စည်၊ ဝန်ဆောင်မှုနှင့် စပ်လျဉ်း သည့်  အချက်အလက်များစစ်ဆေးခြင်း၊ မှတ်ပုံတင်လက်မှတ်ရရှိသူ၏ တာဝန်များဖောက်ဖျက်ခြင်းရှိ/မရှိ ၊ လျှောက်ထားသည့် အချက်အလက်များနှင့် မြေပြင်အချက်အလက်များမှန်ကန်မှုရှိ/မရှိ စစ်ဆေးဆောင်ရွက် သွားမည်ဖြစ်ပြီး အွန်လိုင်းစနစ်ဖြင့် ရောင်းချရန် မှတ်ပုံတင်မရှိဘဲ လုပ်ငန်းဆောင်ရွက်နေခြင်းနှင့် မှတ်ပုံတင် လက်မှတ်ရရှိသူက အွန်လိုင်းစနစ်ဖြင့်ရောင်းချခြင်းလုပ်ငန်းကို ဥပဒေနှင့်ညီညွတ်ခြင်းမရှိသော ပြုမူ ဆောင်ရွက်မှုတစ်ရပ်ရပ်ကို ဆောင်ရွက်နေကြောင်း တွေ့ရှိရပါက ပြစ်မှုကြောင်းအရ အရေးယူဆောင်ရွက် ခြင်း လုပ်ငန်းများ ဆောင်ရွက်သွားမည်ဖြစ်ကြောင်းသိရသည်။

အွန်လိုင်းစနစ်ကို အသုံးပြု၍ အရောင်းအဝယ်ပြုလုပ်ခြင်းသည် တစ်ဦးနှင့်တစ်ဦး  ယုံကြည်မှုကို အလေးထား၍ လုပ်ဆောင်နေကြရခြင်းဖြစ်ပြီး ထိုယုံကြည်မှုအပေါ် ဥပဒေဖြင့် ထိန်းကျောင်းဆောင်ရွက် ရခြင်းဖြစ်ပေသည်၊ လူတိုင်းလူတိုင်း ကိုယ်ကျင့်တရား ကောင်းမွန်ပြီး ကိုယ်ချင်းစာတရားထားရှိမှသာ လူမှုဘဝပတ်ဝန်းကျင် သာယာလှပလာမည်ဖြစ်ပါသည်။

DOCA(မန္တလေး)